Mukanda wa Mbadi wa Gudilanduluila
23 Mu givo gia 7, Yoyada wakalegele ndaga nu gikhesa; wakotele gikotelo* nu mafumu a athu 100, mafumu ene akhalele: Azariya mun’a Yelohama nu Ishemayele mun’a Yohanana, nu Azariya mun’a Obede, nu Maseya mun’a Adaya nu Elishafata mun’a Zikri. 2 Gungima ayile mu mavu agasue a Yuda, abungishile enya Levi akhalele mu membo agasue a gu Yuda nu mafumu a fami jia iphuta ya Isalele. Tangua ahetele gu Yelusalema, 3 athu agasue akotele gikotelo nu fumu mu inzo ya Nzambi wa giamatshidia. Gungima Yoyada waawambelele egi:
“Talenu! Mun’a fumu mbawuhinyina gifua mualayele Yehowa mukunda nu ana a Davidi. 4 Ndaga mudi naye gutshita yenyeyi: Mudi naye gukhapha nganga-nzambi nu enya Levi anyi mbaaza ha gutshita mudimo mu Lusugu lua Guhuluguga mu mahunji thathu. Hunji dia thomo mbadibamba mifulo, 5 hunji dia mbadi mbadikhala gu inzo ya fumu, hunji dia thathu mbadikhala ha Mufulo wa Fondasio; uvi athu ako agasue mbaakhala mu ibanzala ya inzo ya Yehowa. 6 Mushigo naye gubemba nga muthu mumoshi ha gungina mu inzo ya Yehowa, phamba nganga-nzambi nu enya Levi anyi adi mutshita mudimo. Ene ajiya gungina handaga atombewe ha gutshita mudimo wa gijila, uvi athu agasue adi naye gutumagela ndaga jiazuedi Yehowa. 7 Enya Levi adi naye gujieta fumu, muthu wagasue udi naye gukhala nu iluilo yenji ha mago. Muthu wagasue mbawungina mu inzo udi naye gushiyiwa. Mbamukhala nu fumu fundo diagasue mbadiya muene.”*
8 Enya Levi nu enya Yuda agasue akalegele diago ndaga gifua muawambelele nganga-nzambi Yoyada. Fumu wagasue wazudile athu enji akhalele gu mudimo mu Lusugu lua Guhuluguga nu anyi akhalelego gu mudimo mu lusugu luene, handaga nganga-nzambi Yoyada gabembelego nga hunji dimoshi dia athu akhalele mutshita mudimo ha guhuluguga. 9 Nganga-nzambi Yoyada wazudile milumbu nu tshibu jiazonda-zonda* nu tshibu jiakoma jia Fumu Davidi jialondewe gifua minengu, wajihanele mafumu a athu 100. Iluilo yene yakhalele mu inzo ya Nzambi wa giamatshidia. 10 Gungima wahagele athu agasue mu mafundo awo, muthu nu muthu wakhalele nu giluilo* gienji ha mago. Amaganele sendese gu koko dia madia uu nu gu koko dia mahidi dia tempelo hehi nu giwotshielo, amaganele nji hehi nu tempelo, ajietele fumu. 11 Gungima azolele mun’a fumu hanze, amuhagele gifulu gia ufumu gu muto, amuhanele nji rulo yakhalele nu mikhuala ya Nzambi; Yoyada nu an’enji a mala amumbile maji ha gumubuisa fumu. Azuelele egi: “Fumu akhale nu monyo!”
12 Tangua Ataliya wavuile matululu a athu akhalele muya phushi nu akhalele mutumbuisa fumu, wayile mbala imoshi gudi athu akhalele gu inzo ya Yehowa. 13 Gungima Ataliya wamonele fumu ya gumagana hehi nu kunji* ha mufulo. Mafumu nu athu anyi akhalele mushiga phungi akhalele nu fumu Yoase. Athu agasue a mu gifutshi akhalele musuanguluga, akhalele nji mushiga phungi. Ngimba jinyi jiakhalele nu ima ya gushigila miziki jiakhalele mutuameza athu anyi akhalele muyimba ngimbo jia gusuanguluga. Hene Ataliya watawile milele yenji, wazuelele mu dijui diakola egi: “Anguyila giphungi! Anguyila giphungi!” 14 Uvi nganga-nzambi Yoyada wazolele mafumu a athu 100 anyi atombewe ha gutuameza masuta, waawambelele egi: “Mukatulenu mukatshi dia masuta! Gula muthu mumoshi wamulandula, mushiyenu nu phogo ya khusa!” Nganga-nzambi Yoyada wazuelele ngenyi handaga wakhalele waawambela gale egi: “Mumushiyilago mu inzo ya Yehowa.” 15 Hene, amukuatele, ayile n’enji. Tangua ahetele ha Mufulo wa Tubalu wa inzo ya fumu, amushiyile mbala imoshi hene.
16 Gungima Yoyada wakotele gikotelo egi, muene nu athu agasue nu fumu mbaalandula gukhala athu a Yehowa. 17 Gungima athu agasue ayile gu inzo* ya Bale, ayimuangele, amuangele nji iwotshielo yenji nu ifuanesa yenji, ashiyile nji Matana nganga-nzambi wa Bale gutuama dia iwotshielo. 18 Gungima Yoyada wahanele ginemo gia gutala inzo ya Yehowa gudi nganga-nzambi nu enya Levi anyi Davidi wahagele mu mahunji ha gukhala mutala inzo ya Yehowa nu ha guhana milambu ya guwotshia gudi Yehowa gifua luholo yasonegewe mu Mukhuala wa Moize; akhalele naye gutshita mudimo wene nu gusuanguluga nu ngimbo gifua muazuelele Davidi. 19 Wahagele nji abambi a mifulo gu mifulo ya inzo ya Yehowa hagula muthu wagasue udi usala nga mukunda nu ndaga itshi ganginyigo. 20 Wazudile nji mafumu a athu 100 nu manene nu atuameji a athu nu athu agasue akhalele mu gifutshi, azudile fumu mu inzo ya Yehowa, ayile. Gungima anginyile gu mufulo wa gu thunda wa inzo ya fumu, ahagele fumu ha nguasa ya ufumu. 21 Athu agasue a mu gifutshi akhalele nu gusuanguluga, dimbo diakhalele nji mu guhuima handaga ashiyile Ataliya nu phogo ya khusa.