Mukanda wa Mbadi wa Mafumu
11 Tangua Ataliya gin’a Ahaziya wavuile egi mun’enji wafua, washiyile athu agasue akhalele mu fami ya ufumu.* 2 Uvi Yehosheba mun’a Fumu Yolama, phangi’a Ahaziya wa mukhetu, wakatudile Yoase mun’a Ahaziya mu gisuegi mukatshi dia ana a fumu akhalele naye gushiyiwa. Wamusuegele nu giledi gienji gu sugu ya mukatshi hagula Ataliya gamumonyigo. Hene Yoase wasalele nu monyo. 3 Yoase nu giledi gienji asalele ya gudisuega mu inzo ya Yehowa ivo 6; mu tangua diene Ataliya wakhalele muhinyina mu gifutshi.
4 Mu givo gia 7, Yoyada watumine athu ha guya mutamega mafumu a athu 100 a masuta akhalele mubamba fumu,* nu mafumu a athu 100 a masuta akhalele mubamba inzo ya fumu,* ha guza gudi muene gu inzo ya Yehowa. Wakotele nawo gikotelo, waatogele ha gudiloga mu inzo ya Yehowa egi mbaanemesa gikotelo giene. Gungima waadijigile mun’a fumu. 5 Waawambelele egi: “Talenu ndaga mudi naye gutshita: Mudi naye gukhapha hunji dia masuta mbaatshita mudimo mu Lusugu lua Guhuluguga mu itshinyi thathu. Gitshinyi gia thomo mbagitala muabonga inzo ya fumu, 6 gitshinyi gia mbadi mbagikhala ha Mufulo wa Fondasio, gitshinyi gia thathu mbagikhala ha mufulo gungima dia masuta ana bamba inzo ya fumu. Masuta a mu itshinyi yene yagasue mbaabamba tempelo mu tangua diawo. 7 Mahunji enu mbadi anyi mbaashigo mutshita mudimo mu Lusugu lua Guhuluguga, mbaatadila muabonga inzo ya Yehowa ha gubamba fumu. 8 Mudi naye gujieta fumu, muthu wagasue udi naye gukhala nu iluilo yenji ha mago. Muthu wagasue mbawukamba guabalega ha guya gudi fumu udi naye gushiyiwa. Mbamukhala nu fumu fundo diagasue mbadiya muene.”
9 Mafumu a athu 100 akalegele diago ndaga gifua muaawambelele nganga-nzambi Yoyada. Fumu wagasue wazudile athu enji akhalele gu mudimo mu Lusugu lua Guhuluguga nu anyi akhalelego gu mudimo mu lusugu luene. Ayile gudi nganga-nzambi Yoyada. 10 Nganga-nzambi wahanele mafumu a athu 100 milumbu nu tshibu jia Fumu Davidi jinyi jialondewe gifua minengu, iluilo yene yakhalele mu inzo ya Yehowa. 11 Masuta akhalele mubamba inzo ya fumu amaganele mu mafundo awo, suta diagasue wakhalele nu iluilo yenji ha mago. Amaganele sendese gu koko dia madia uu nu gu koko dia mahidi dia tempelo hehi nu giwotshielo. Amaganele nji hehi nu tempelo, ajietele fumu. 12 Gungima Yoyada wazolele mun’a fumu hanze, wamuhagele gifulu gia ufumu gu muto nu rulo yakhalele nu mikhuala ya Nzambi. Amumbile maji ha gumubuisa fumu, asendesele gubunda mago, azuelele egi: “Fumu akhale nu monyo!”
13 Tangua Ataliya wavuile matululu a athu akhalele muya phushi, wayile mbala imoshi gudi athu akhalele gu inzo ya Yehowa. 14 Tangua diahetele Ataliya guene, wamonele fumu ya gumagana hehi nu kunji gifua luholo akhalele mutshita. Mafumu nu athu akhalele mushiga phungi akhalele nu fumu Yoase. Athu agasue a mu gifutshi akhalele musuanguluga, akhalele nji mushiga phungi. Hene, Ataliya watawile milele yenji, wazuelele mu dijui diakola egi: “Anguyila giphungi! Anguyila giphungi!” 15 Uvi nganga-nzambi Yoyada wawambelele mafumu a athu 100 anyi atombewe ha gutuameza masuta egi: “Mukatulenu mukatshi dia masuta. Gula muthu mumoshi wamulandula, mudi naye gumushiya nu phogo ya khusa. Nganga-nzambi Yoyada wazuelele ngenyi handaga wakhalele waawambela gale egi: “Mushigo naye gumushiya mu inzo ya Yehowa.” 16 Hene amukuatele ayile n’enji. Tangua ahetele ha fundo ana nginyishila tubalu mu inzo ya fumu, amushiyile hene.
17 Gungima Yoyada wakotele gikotelo hakatshi dia Yehowa nu fumu nu athu hagula alandule gukhala athu a Yehowa. Wakotele nji gikotelo hakatshi dia fumu nu athu. 18 Gungima athu agasue a mu gifutshi ayile mu inzo* ya Bale, amuangele iwotshielo yenji nu ifuanesa yenji, ashiyile nji Matana nganga-nzambi wa Bale, gutuama dia iwotshielo.
Gungima nganga-nzambi watombele atuameji mukunda nu inzo ya Yehowa. 19 Wazudile nji mafumu a athu 100 nu masuta akhalele mubamba fumu* nu masuta a inzo ya fumu nu athu agasue a mu gifutshi ha gubata fumu. Akatugile n’enji mu inzo ya Yehowa, ayile uu nu gu inzo ya fumu, abalegele mu njila ya mufulo wa masuta ana bamba inzo ya fumu. Gungima Yoase wakhalele ha nguasa ya ufumu. 20 Athu agasue a mu gifutshi akhalele nu gusuanguluga, dimbo diakhalele nji mu guhuima handaga ashiyile Ataliya nu phogo ya khusa hehi nu inzo ya fumu.
21 Yoase wakhalele nu ivo 7 habuile muene fumu.