Mukanda wa Mbadi wa Mafumu
12 Mu givo gia 7 gia uhinyinyi wa Yehu, Yoase wabuile fumu. Wahinyile ivo 40 gu Yelusalema. Jina dia gin’enji diakhalele Sibia, wakhalele muenya gu Belesheba. 2 Yoase wakhalele mutshita ndaga jiabonga gu meso a Yehowa hakhalele nganga-nzambi Yoyada gumuhana malongo. 3 Uvi mafundo a gukombelela akatudiwego. Athu alanduile gawo guhana milambu nu gukanduisa mishi ya milambu yene mu mafundo a gukombelela.
4 Yoase wawambelele nganga-nzambi egi: “Zulenu makuta agasue adi mubata athu mu inzo ya Yehowa mukunda nu milambu ya gijila: makuta a gitadi anyi muthu wagasue udi naye gufuta, nu makuta adi naye guzula nganga-nzambi gudi muthu wadilogi, nu makuta agasue ana hana athu mu gutshigina guawo gifua musomo mu inzo ya Yehowa. 5 Nganga-nzambi hakhawo mbaazula makuta ene gudi athu adi guahana,* gungima adi naye gukalegela makuta ene ha gulonda inzo mu mafundo agasue adi naye gulondewa.”*
6 Uvi mu givo gia 23 gia uhinyinyi wa Fumu Yoase, nganga-nzambi jiakhalele khenji jilondega galego inzo. 7 Fumu Yoase watamegele nganga-nzambi Yoyada nu nganga-nzambi jiko, waahudile egi: “Mukunda natshi mushigo mulondega tempelo? Muzudigo luko makuta gudi athu gula mushigo guakalegela ha gulondega tempelo.” 8 Hene, nganga-nzambi jiatshiginyile ha gubemba guzula makuta gudi athu, abembele nji ginemo gia gulondega tempelo.
9 Gungima nganga-nzambi Yoyada wazudile mushete, wakobuele hulu ha gitshuigilo gia mushete wene, wawuhagele hehi nu giwotshielo gu khanda ya koko dia madia dia muthu udi mungina mu tempelo ya Yehowa. Nganga-nzambi jiakhalele mubamba mufulo jiakhalele mumba makuta agasue akhalele mubata athu mu inzo ya Yehowa mu mushete wene. 10 Gula amona egi makuta avudi gale mu mushete, sekretere wa fumu nu nganga-nzambi wakoma akhalele muza ha guzula makuta* athu abatshi gu inzo ya Yehowa, a atangi. 11 Gungima dia gutanga makuta ene, akhalele guahana gudi athu atombewe ha gutuameza midimo mu tempelo ya Yehowa. Atuameji ene akhalele muzula makuta ene ha gufuta athu akhalele mutshita mudimo wa mabaya nu athu akhalele mutunga anyi akhalele mulondega inzo ya Yehowa. 12 Akhalele nji mufuta bamaso nu athu akhalele musonga maseso. Akhalele musumba mabaya nu maseso a gusonga ha gulondega tempelo ya Yehowa, akhalele nji mukalegela makuta ene mukunda nu midimo iko yagasue ya mu tempelo.
13 Uvi akhalelego mukalegela makuta athu akhalele mubata mu inzo ya Yehowa ha gulonda malonga a utadi wa siliva nga ima ya gujimina tshuya nga malonga nga phungi nga gima giagasue gialondewe nu wolo nga nu utadi wa siliva mukunda nu inzo ya Yehowa. 14 Akhalele muhana makuta ene phamba gudi athu akhalele mutshita mudimo, akhalele guakalegela ha gulondega tempelo ya Yehowa. 15 Atuameji anyi akhalele muhanewa makuta ha gufuta athu anyi akhalele mutshita mudimo, akhalele athu a gushila mutshima. Gishina giene, akhalelego mukamba gujiya luholo akhalele mukalegela makuta ene. 16 Uvi akhalelego mubata makuta mukunda nu milambu ya gulondega ndaga nu makuta a milambu mukunda nu gubola gu inzo ya Yehowa. Akhalele a nganga-nzambi.
17 Mu tangua diene, Hazaele fumu wa gu Siliya wayile muluisa dimbo dia Gate, waditambudile. Gungima wadilondele ha guya muluisa* Yelusalema. 18 Hene Fumu Yoase wa gu Yuda wazudile milambu yagasue ya gijila inyi khakh’enji Yosafata nu Yolama nu Ahaziya, mafumu a gu Yuda, ahanele gudi Nzambi.* Wazudile nji milambu yenji ya gijila nu ima yagasue yalondewe nu wolo yakhalele gu sugu akhalele mubambela ima ya ndando mu inzo ya Yehowa nu mu inzo ya fumu, wayitumidile fumu Hazaele wa gu Siliya. Hene Hazaele wavutugile, galuishilego luko Yelusalema.
19 Ndaga jiko jiakalegele Yoase nu ima yatshitshile muene, idi yagusonega mu mukanda wa mene jia mafumu a gu Yuda. 20 Enya mudimo a Yoase amuyidile giphungi, amushiyile mu inzo ya gamulundu,* mu njila idi muya gu Sila. 21 Enya mudimo enji amushiyile akhalele: Yozakale mun’a Shimeate nu Yozabada mun’a Shomele. Amufundjile nu akhakh’enji mu Dimbo dia Davidi. Gungima mun’enji Amazia wabuile fumu ha fundo dienji.