Mukanda wa Mbadi wa Gudilanduluila
24 Yoase wakhalele nu ivo 7 habuile muene fumu, wahinyine ivo 40 gu Yelusalema. Jina dia gin’enji diakhalele Sibia, wakhalele muenya gu Belesheba. 2 Yoase wakhalele mutshita ndaga jiabonga gu meso a Yehowa hakhalele nganga-nzambi Yoyada nu monyo. 3 Yoyada wazudile akhetu muyadi mukunda nu Yoase, gungima Yoase wavualele ana a mala nu ana a akhetu.
4 Gungima Yoase wambile matangi a gulonda inzo ya Yehowa. 5 Hene wabungishile nganga-nzambi nu enya Levi, waawambelele egi: “Ndenu mu membo a gu Yuda, mukungule makuta gudi enya Isalele agasue ha gula tukhale mulonda inzo ya Nzambi wetu givo nu givo, mudi naye gukalagala ndaga mu phushi.” Uvi enya Levi atshitshilego ndaga mu phushi. 6 Hene fumu Yoase watamegele Yoyada fumu wa nganga-nzambi, wamuwambelele egi: “Mukunda natshi watogelego enya Levi ha guya gu Yuda nu gu Yelusalema ha guzula gitadi gia gijila, ginyi Moize muenya mudimo wa Yehowa wawambelele athu ha guhana, gitadi gia gijila enya Isalele adi naye gufuta mukunda nu tenta idi nu Mushete wa Gikotelo? 7 Handaga ana a Ataliya, mukhetu wabola, anginyile gu ngolo mu inzo ya Nzambi wa giamatshidia, asendesele nji gukalegela ima yagasue ya gijila ya monzo ya Yehowa mukunda nu Bale.” 8 Hene alondele mushete gifua muazuelele fumu, awuhagele hanze ha mufulo wa inzo ya Yehowa. 9 Gungima awambelele athu mu mavu agasue a Yuda nu gu Yelusalema ha gubatela Yehowa gitadi gia gijila, ginyi Moize muenya mudimo wa Nzambi wa giamatshidia wawambelele enya Isalele ha guhana mu mavu a luselenga. 10 Mafumu agasue nu athu agasue asuangulugile, alanduile gubata misomo, akhalele guyimba mu mushete uu nu tangua mushete wene wazalele.*
11 Tangua enya Levi akhalele mubata mushete gudi fumu, gula amona egi makuta adi avula mukatshi, sekretere wa fumu nu mumoneshi wa fumu wa nganga-nzambi akhalele mukatula makuta ene mu mushete. Gungima akhalele guwuvutula ha fundo dienji. Akhalele mutshita ngenyi lusugu nu lusugu; akungigile mbongo jiavula. 12 Gungima fumu nu Yoyada akhalele muhana makuta ene gudi athu akhalele mutuameza midimo ya mu inzo ya Yehowa, athu ene akhalele mufuta athu akhalele musonga maseso, nu mbembo jiakhalele mulonda inzo ya Yehowa, nu athu akhalele mukalagala midimo nu utadi nu kuivre ha gulonda luko inzo ya Yehowa. 13 Athu akhalele mutuameza midimo asendesele gutshitshisa midimo yene. Mudimo wa gulondega inzo wakhalele muya muabonga mu utuameji wawo; alondele luko inzo ya Nzambi wa giamatshidia gifua luholo yakhalele ha thomo, ayikolesele luko. 14 Tangua amanesele gutshita mudimo wene, abatele makuta anyi asalele gudi fumu nu gudi Yoyada; makuta ene a akuatesele ha gulonda ikadigilo mukunda nu inzo ya Yehowa, nu ikadigilo mukunda nu mudimo, nu ikadigilo ya guhanela milambu, nu makhopho, nu ikadigilo ya wolo, nu ikadigilo ya utadi wa siliva. Akhalele muhana milambu ya guwotshia gu inzo ya Yehowa lusugu nu lusugu hakhalele Yoyada nu monyo.
15 Yoyada wajingile muabonga ivo yavula* gungima wafuile. Wafuile nu ivo 130. 16 Hene amufundjile mu Dimbo dia Davidi hamoshi nu mafumu, handaga watshitshile ndaga jiabonga gu Isalele mukunda nu Nzambi wa giamatshidia nu inzo yenji.
17 Tangua Yoyada wafuile, mafumu a gu Yuda ajile mufugama gutuama dia fumu, fumu wavuile ndaga amuwambelele. 18 Athu abembelele inzo ya Yehowa Nzambi wa akhakh’awo, asendesele gawo gukombelela mitshi ya gijila* nu isongo. Hene Nzambi wavuidile enya gu Yuda nu enya gu Yelusalema khabu mukunda nu gubola guawo. 19 Walanduile gutuma baprofete mukatshi diawo ha guakuatesa ha guvutuga gudi Yehowa. Baprofete alanduile guatemesa, uvi ene atunyile gutegelela.
20 Nyuma ya Nzambi yajile gudi Zakaliya mun’a nganga-nzambi Yoyada, wamaganele gutuama dia athu, wazuelele egi: “Nzambi wa giamatshidia udi muzuela egi: ‘Mukunda natshi mudi mushiya mikhuala ya Yehowa? Mbamushigo mubinga! Luholo muatunyi Yehowa, muene nji mbawumituna.’” 21 Uvi amuyidile giphungi, gungima fumu waatumile ha gumusonona maseso, hene amusonuene maseso mu gibanzala gia inzo ya Yehowa. 22 Ngenyi, Fumu Yoase gawungulugilego guzumba gua giamatshidia guamumonesele Yoyada sh’a Zakaliya. Muene washiyile Zakaliya; hakhalele muene mutshigina gubatula monyo, wazuelele egi: “Yehowa atale ndaga eyi, agusophese.”
23 Gu gisendeselo gia givo, masuta a enya Siliya anginyile gu Yuda nu gu Yelusalema ha guluisa Yoase. Gungima ashiyile mafumu agasue a athu, atambudile ima, ayitumidile fumu wa gu Damase. 24 Masuta a enya Siliya anyi ajile muluisa gifutshi akhalele azonda, uvi Yehowa waakuatesele ha gubinga masuta avula a enya Yuda, handaga enya Yuda atunyile Yehowa Nzambi wa akhakh’awo; ngenyi ahanele* Yoase ndola gifua muazuelele Nzambi. 25 Tangua masuta a enya Siliya avutugile (handaga amubembele ya gunamana muavula*), enya mudimo enji amuyidile giphungi handaga washiyile ana* a nganga-nzambi Yoyada. Amushiyile ha gitanda* gienji. Yoase wafuile, amufundjile mu Dimbo dia Davidi, uvi amufundjilego mu malumba a mafumu.
26 Awa majina a athu amuyidile giphungi: Zabade mun’a Shimeate muenya Amona nu Yozabada mun’a Shimelita muenya Moaba. 27 Mene jia ana Yoase nu ndaga jiavula baprofete amuwambelele ha gumutemesa, nu luholo lualondele* muene luko inzo ya Nzambi wa giamatshidia, jidi jia gusonega mu Mukanda wa Mafumu. Gungima mun’enji Amazia wabuile fumu ha fundo dienji.