Mukanda wa Mbadi wa Gudilanduluila
22 Gungima enya gu Yelusalema azudile Ahaziya mun’a Yolama wa gasala-songi, amubuishile fumu ha fundo dienji, handaga hunji dia nzangi dinyi diajile nu enya Alabe gu phundo diashiyile an’enji agasue a mala a gukula. Hene Ahaziya mun’a Yolama wasendesele guhinyina gu Yuda. 2 Ahaziya wakhalele nu ivo 22 habuile muene fumu, wahinyine givo gimoshi gu Yelusalema. Jina dia gin’enji diakhalele Ataliya; Ataliya wakhalele mujigulu* wa Omeli.
3 Ahaziya walanduile nji makalegelo abola a enya fami ya Ahaba, handaga gin’enji wakhalele gumuhana malongo ha gutshita ndaga jiabola. 4 Wakhalele mutshita ndaga jiabola gu meso a Yehowa gifua enya fami ya Ahaba, handaga ene abuile ahanyi enji a malongo gungima dia gufua gua sh’enji. Atshitshile ngenyi ha gumushiyisa. 5 Walanduile malongo awo, wayile nji nu Yolama mun’a Fumu Ahaba wa gu Isalele ha guluisa Fumu Hazaele wa gu Siliya gu Ramote ya gu Gileade. Uvi masuta akhalele musonona mifula anamenesele Yolama. 6 Yolama wavutugile gu Yizelele hagula asagewe phuta amunamenesele gu Rama haluile muene ita nu fumu Hazaele wa gu Siliya.
Ahaziya* mun’a Yolama fumu wa gu Yuda wayile gu Yizelele ha gutala Yolama mun’a Ahaba handaga wakhalele mukata.* 7 Nzambi watshitshile egi Ahaziya aye atale Yolama hagula afue guene. Hahetele Ahaziya, azogele nu Yolama, ayile mutagana Yehu mujigulu* wa Nimishi munu Yehowa wambile maji* ha gushiya enya fami ya Ahaba agasue. 8 Tangua Yehu wasendesele guhana enya fami ya Ahaba ndola, wamonele mafumu a gu Yuda nu ana a aphangi a Ahaziya a mala, athu akhalele mutshitshila Ahaziya mudimo, waashiyile. 9 Yehu wakambele nji Ahaziya, gungima amukuatele gu Samaliya, fundo diayile gudisuega muene. Amubatele gudi Yehu, amushiyile, gungima amufundjile handaga azuelele egi: “Muene udi mujigulu wa Yosafata, muthu wakambele Yehowa nu mutshima wenji wagasue.” Mu fami ya Ahaziya, guakhalelego nga nu muthu wakhalele watagana ha guhinyina.
10 Tangua Ataliya gin’a Ahaziya wavuile egi mun’enji wafua, washiyile athu agasue akhalele mu fami ya ufumu* wa gu Yuda. 11 Uvi Yehoshebate mun’a fumu Yolama wa mukhetu wakatudile Yoase mun’a fumu Ahaziya mu gisuegi mukatshi dia ana a fumu akhalele naye gushiyiwa, wamuhagele nu giledi* gienji mu sugu ya mukatshi. Yehoshebate mun’a fumu Yolama (wakhalele mukaji’a nganga-nzambi Yoyada, wakhalele nji phangi’a Ahaziya) wasuegele mona muene hagula Ataliya gamumonyigo. Hene Ataliya gamushiyilego. 12 Yoase wasalele nawo. Amusuegele mu inzo ya Nzambi wa giamatshidia ivo 6. Mu tangua diene, Ataliya wakhalele muhinyina mu gifutshi.