Mukanda wa Thomo wa Gudilanduluila
16 Ayile nu Mushete wa Nzambi wa giamatshidia, awuhagele mu tenta yalondele Davidi mukunda nu mushete wene. Gungima ahanele milambu ya guwotshia nu milambu ya guhuima gutuama dia Nzambi wa giamatshidia. 2 Tangua Davidi wamanesele guhana milambu ya guwotshia nu milambu ya guhuima, washimbigile* athu mu jina dia Yehowa. 3 Davidi wahanele enya Isalele agasue mala nu akhetu, muthu nu muthu dipha dimoshi dialondewe gifua munengu, nu gato galondewe nu mabundu a date, nu gato galondewe nu mabundu a vinyo. 4 Gungima watombele enya Levi ako ha gutshita mudimo gutuama dia Mushete wa Yehowa, ha gunemesa* Yehowa Nzambi wa Isalele, ha gumuhana mersi nu ha gumutumbuisa. 5 Asafe wakhalele mutuameji, Zakaliya wakhalele mukuateshi wenji, Yeyele nu Shemilamota nu Yehiele nu Matitia nu Eliyabe nu Benaya nu Obede-Edome nu Yeyele akhalele mushiga miziki nu ima ya gushigila miziki yana khala nu shinga nu itare. Asafe wakhalele mushiga sembale. 6 Nganga-nzambi Benaya nu nganga-nzambi Yahaziele akhalele mushiga phungi tangua diagasue gutuama dia mushete wa gikotelo wa Nzambi wa giamatshidia.
7 Mu lusugu luene, Davidi wasonegele lungimbo mu mbala ya thomo ha guhana Yehowa mersi, wawambelele Asafe nu aphangi’enji ha guyimba lungimbo luene egi:
8 “Hanenu Yehowa mersi, tumbuisenu jina dienji,
Wambelenu athu ndaga jiakoma jiatshitshile muene.
10 Disunzulenu mukunda nu jina dienji dia gijila.
Mitshima ya athu adi mukamba Yehowa ikhale nu gusuanguluga.
11 Kambenu Yehowa, mutogenu ngolo.
Kambenu phala yenji tangua diagasue.
12 Wungulugenu ndaga jiabonga jiakalegele muene,
Ndaga jienji jia gushimana nu luholo luasophesele muene.
13 Enue ajigulu* a Isalele muenya mudimo wenji,
Enue ana a Yakoba athu atombele muene.
14 Muene udi Yehowa Nzambi wetu.
Wana sophesa mavu agasue.
15 Wungulugenu gikotelo gienji mayilago,
Wungulugenu ndaga jialayele muene* uu nu gu indongo 1 000,
16 Gikotelo giakotele muene nu Abalahama,
Nu gudiloga guadilogele muene gudi Izake,
17 Gudiloga guahagele muene gifua mukhuala mukunda nu Yakoba
Nu gifua gikotelo gia ivo nu ivo mukunda nu Isalele,
18 Hazuelele muene egi: ‘Mbanguguhana gifutshi gia Kanana
Mbagikhala khapho diaye.’
19 Wazuelele ndaga yene tangua muakhalele athu azonda,
Ayi muakhalele diago muazonda, muakhalele nji ngenji mu gifutshi.
20 Akhalele muya nu guwenda akatuga mu gifutshi giko ayi mu gifutshi giko,
Akatuga mu ufumu umoshi, ayi mu ufumu uko.
21 Nzambi gabembelego nga muthu mumoshi ha guasagesa,
Uvi wabalele mafumu mukunda nu ene.
22 Wazuelele egi: ‘Mukuatshigo athu ami ngatombele,*
Mutshitshigo baprofete ami nga ndaga imoshi yabola.’
23 Enue athu agasue a ha mavu yimbilenu Yehowa!
Wambelenu athu lusugu nu lusugu ndaga jiana kalagala muene ha guhuluisa athu!
24 Longesenu lutumbu luenji mukatshi dia ifutshi,
Midimo yenji ya gushimana mukatshi dia athu agasue.
25 Handaga Yehowa udi wakoma, udi nji watagana ha guheta lutumbu luagasue.
Athu adi naye gumuvuila woma wavula, gubalega nzambi jiko jiagasue.
26 Nzambi jiagasue jia athu jidi nzambi jia gituhu,
Uvi Yehowa muene wafugile dilu.
27 Gukoma* nu lutumbu luana gumujieta,
Ngolo nu gusuanguluga guana khala ha fundo diana khala muene.
28 Enue fami jiagasue jia ha mavu tumbuisenu Yehowa,
Tumbuisenu Yehowa mukunda nu lutumbu luenji nu ngolo jienji.
29 Hanenu Yehowa lutumbu ludi naye guheta muene mukunda nu jina dienji;
Batenu musomo, zenu gutuama dienji.
Fugamenu gutuama dia* Yehowa nu milele ya gijila.*
30 Athu agasue a ha mavu adigite gutuama dienji!
Mavu* adi a gujigamesa muabonga ajiyilego gunyigishiwa.*
31 Dilu disuanguluge, mavu akhale nji nu gusuanguluga;
Wambelenu ifutshi egi: ‘Yehowa wabua Fumu!’
32 Kianga nu ima idi ya guzala muene inume;
Matemu nu ima yagasue idi muene isuanguluge.
33 Mu tangua diene dimoshi, mitshi ya mu gishitu imbe milolo ya gusuanguluga gutuama dia Yehowa,
Handaga muene udi muza* ha gusophesa mavu.
34 Hanenu Yehowa mersi handaga muene udi wabonga;
guzumba guenji gua giamatshidia guana khala mayilago.
35 Zuelenu egi: ‘Tuhuluise, O Nzambi muhuluishi wetu,
Tubungise, tuhuluise nji ha mago a enya ifutshi,
Hagula tuhane jina diaye dia gijila mersi
Nu hagula tugutumbuise nu gusuanguluga guagasue.
36 Yehowa Nzambi wa Isalele atumbuishiwe
Sendese mangino uu nu ivo nu ivo.’”*
Athu agasue azuelele egi: “Amen!”* atumbuishile nji Yehowa.
37 Gungima Davidi wabembele Asafe nu aphangi’enji a mu fami yawo gutuama dia mushete wa gikotelo wa Yehowa, ha gulandula gukalagala mudimo gutuama dia Mushete wene, gifua muakhalele mudimo wawo wa lusugu nu lusugu. 38 Obede-Edome nu athu a mu fami yawo 68 nu Obede-Edome mun’a Yedutuna nu Hosa akhalele abambi a mufulo. 39 Davidi wahagele nganga-nzambi Zadoke nu nganga-nzambi jiko jiakhalele mutshita n’enji mudimo gutuama dia tabernakle ya Yehowa, ha fundo dia gukombelela* diakhalele gu Gibeona. 40 Hagula akhale muhana milambu ya guwotshia gudi Yehowa tangua diagasue holu dia giwotshielo gia mulambu wa guwotshia gimenegena nu ngueze, nu ha gutshita ndaga jiagasue jiasonegewe mu mukhuala wa Yehowa unu wahanele muene enya Isalele. 41 Akhalele nu Hemane nu Yedutuna nu athu ako anyi atombewe, atangewe majina ha guhana Yehowa mersi handaga guzumba guenji gua giamatshidia guana khala mayilago. 42 Hemane nu Yedutuna akhalele nu ginemo gia gushiga phungi, nu sembale, nu ima ya gushigila miziki ha gutumbuisa* Nzambi wa giamatshidia. Ana a Yedutuna akhalele nu ginemo gia gutadila mufulo. 43 Gungima athu agasue avutugile gu jinzo jiawo, Davidi wayile ha gushimbiga enya fami yenji.