Mukanda wa Mbadi wa Gudilanduluila
35 Yoziase watshitshile Wano wa Pake mukunda nu Yehowa gu Yelusalema. Ashiyile shitu jia mulambu wa Pake mu lusugu lua thomo lua mbeji. 2 Wahagele nganga-nzambi mu mafundo awo, waahanele gikhesa ha gutagenesa muabonga midimo yawo mu inzo ya Yehowa 3 Gungima wawambelele enya Levi, nu alongeshi a enya Isalele agasue, nu athu akhalele a gijila mukunda nu Yehowa egi: “Hagenu Mushete wa gijila mu inzo yatungile Salomo mun’a Davidi fumu wa gu Isalele. Mushigo naye guwubata ha phanga. Henyaha tshitenu mudimo mukunda nu Yehowa Nzambi wenu nu mukunda nu athu enji. 4 Dilondenu mukunda nu mudimo gifua mudi fami jia mu iphuta yenu nu mahunji enu, mu gudivua nu ndaga jiasonegele Fumu Davidi wa gu Isalele nu mun’enji Salomo. 5 Ndenu ha fundo dia gijila mumagane mu mahunji enu, hagula mutshite mudimo mukunda nu athu nu gutshita nji mudimo wahanewe fami jienu jia enya Levi. 6 Shiyenu shitu jia mulambu wa Pake, diphelegetesenu, londegenu ndaga mukunda nu aphangi’enu ha gutumagela ndaga jiazuelele Yehowa mu njila ya Moize.
7 Yoziase wazudile mitumba ya imeme ya milume nu mitumba ya khombo jia milume wayihanele mukunda nu athu, ha guhana milambu ya Pake mukunda nu athu agasue akhalele hene. Shitu jiene jiakhalele 30 000 nu ngombe 3 000. Fumu wazudile shitu jiene mukatshi dia shitu jienji. 8 Manene a fumu ahanele nji musomo gifua mulambu mu gutshigina guawo hakhawo mukunda nu athu nu nganga-nzambi nu enya Levi. Hilikiya nu Zakaliya nu Yehiele athu akhalele mutuameza inzo ya Nzambi wa giamatshidia, ahanele nganga-nzambi imeme nu khombo 2 600 nu gombe 300 mukunda nu milambu ya Pake. 9 Konaniya nu phangi’enji Shemaya nu Netanele nu Hashabiya nu Yeyele nu Yozabada, mafumu a enya Levi, ahanele musomo mukunda nu enya Levi; imeme nu khombo 5 000 nu ngombe 500 mukunda nu mulambu wa Pake.
10 Tangua amanesele gulonda ndaga jiagasue, nganga-nzambi jiamaganele mu mafundo awo, enya Levi nji amaganele nu mahunji awo gifua luholo luazuelele fumu. 11 Ashiyile shitu jia milambu ya Pake, nganga-nzambi jiakhalele muzula mahatshi gudi enya Levi, jiakhalele guamianga gu giwotshielo. Mu tangua diene, enya Levi akhalele mutanda ilema ya shitu. 12 Alondele milambu ya guwotshia ha gukhaphela athu akhalele mu mahunji a fami, hagula ajiya guyihana gudi Yehowa gifua luholo idi ya gusonega mu mukanda wa Moize; atshitshile nji luholo lumoshi mukunda nu ngombe. 13 Awetshiele shitu jia mulambu wa Pake ha tshuya gifua muakhalele muzuela mukhuala, atelegele nji shitu jia milambu ya gijila mu nzungu jiakoma nu mu nzungu jiazonda nu mu jiphano. Gungima ajibatele muphushi gudi athu agasue. 14 Gungima alondele mulambu wa Pake mukunda nu ene nu mukunda nu nganga-nzambi, ajigulu a Alona; handaga nganga-nzambi, ajigulu a Alona akhalele muhana milambu ya guwotshia nu maji a shitu uu nu mu phipha. Luene luholo enya Levi alondele mulambu wa Pake mukunda nu ene nu mukunda nu nganga-nzambi, ajigulu a Alona.
15 Ayimbi a ngimbo, yakotelesa egi ana a Asafe amaganele mu mafundo awo a midimo gifua muazuelele Davidi nu Asafe nu Hemane nu Yedutuna, muthu wa fumu wakhalele mumona vizio. Abambi a mifulo amaganele mu mifulo mu mafundo akhalele mutshita midimo, akatugilego mu midimo yawo handaga aphangi’awo enya Levi akhalele mulondega milambu ya Pake mukunda nu ene. 16 Mu lusugu luene, akalegele ndaga jiagasue jiatogele Yehowa mukunda nu wano wa Pake, ahanele milambu ya guwotshia holu dia giwotshielo gia Yehowa gifua muazuelele Fumu Yoziase.
17 Enya Isalele anyi akhalele hene akalegele Wano wa Pake mu lusugu luene, akalegele nji Wano wa Mapha Ashigo nu Levire masugu 7. 18 Khenji guakalegewe gale ndo wano wa Pake gifua wuwu gu Isalele sendese mu masugu a profete Samuele; gushigo nji nga nu fumu mumoshi wa gu Isalele wakalegele Wano wa Pake wa luholo elu gifua muakalegele Yoziase, nu nganga-nzambi, nu enya Levi nu enya gu Yuda agasue nu enya Isalele anyi akhalele hene nu enya gu Yelusalema. 19 Wano wene wa Pake wakalegewe mu givo gia 18 gia uhinyinyi wa Yoziase.
20 Gungima dia ndaga eji jiagasue, tangua Yoziase wamanesele gulondega tempelo, Fumu Neko wa gu Ejipitu wajile mulua ita gu Kalekemishi hehi nu muta wa Efrata. Yoziase wayile ha gumuluisa. 21 Uvi fumu Neko watumile athu ha gumuwambela egi: “Aye fumu wa gu Yuda, ndaga eyi ishigo gugutadila aye! Mangino ngajilego ha guguluisa, uvi ngudi muya muluisa gifutshi giko handaga Nzambi wanguwambela egi ngutshite muphushi. Bemba gudikambela milonga, uluishigo Nzambi, handaga Nzambi udi nu eme, gula ndo udi gugubatela malamba.” 22 Uvi Yoziase gamuvuidilego, wasombegesele milele yenji hagula athu amujiyigo, gungima wayile gumuluisa. Watunyile ndaga jiazuelele Nzambi mu njila ya Neko. Wayile gumuluisa mu baba dia Megido.
23 Athu ana sonona mifula asonuene Fumu Yoziase mufula. Yoziase wawambelele enya mudimo enji egi: “Ngukatulenu ha fundo edi, handaga nganamana mangololo.” 24 Enya mudimo enji amuzolele mu phusu-phusu, amumbile mu phusu-phusu yenji ya mbadi ya ita, amubatele gu Yelusalema. Yoziase wafuile, amufundjile mu malumba a akhakh’enji. Athu agasue a gu Yuda nu a gu Yelusalema amudidile. 25 Yelemiya wayimbile lungimbo lua gikenene* mukunda nu Yoziase. Ngimba jiagasue jia mala nu jia akhetu jiana yimba Yoziase mu ngimbo jiawo jia gikenene uu nu mangino; azudile desizio egi ngimbo jiene jidi naye guyimbiwa gu Isalele, hene ajisonegele mu mukanda wa ngimbo jia gikenene.
26 Ndaga jiko jiakalegele Yoziase, nu guzumba gua giamatshidia guamonesele muene mu luholo luanemesele muene ndaga jidi jia gusonega mu mukanda wa mikhuala ya Yehowa, 27 nu ndaga jiakalegele muene sendese gu gisendeselo uu nu gu suga, jidi jia gusonega mu Mukanda wa Mafumu a gu Isalele nu a gu Yuda.