Mukanda wa Thomo wa Mafumu
9 Tangua Salomo wamanesele gutunga inzo ya Yehowa nu inzo ya fumu nu ima yagasue yakhalele mutshigina gutshita muene, 2 Yehowa wamuenegele gudi Salomo mu mbala ya mbadi, gifua muamonegele gudi muene gu Gibeona. 3 Yehowa wamuwambelele egi: “Ngavui gisambu watshitshi gutuama diami nu gububa guaye. Ngabuisa inzo eyi watungi ya gijila hagula jina diami dikhale mutumbuishiwa muene tangua diagasue. Meso ami nu mutshima wami mbawukhala guene tangua diagasue. 4 Gula wawenda gutuama diami gifua muawendele sh’aye Davidi nu mutshima waye wagasue nu udi mukalagala ndaga jiabonga; gula nji wakalagala ndaga jiagasue ngaguwambelele, watumagela mikhuala yami nu badesizio ami, 5 ngenyi mbanguhaga nguasa yaye ya ufumu gu Isalele mayilago, gifua luholo ngalayele sh’aye Davidi egi: ‘Mbagukhala nu muthu mukatshi dia ajigulu aye ha nguasa ya ufumu gu Isalele tangua diagasue.’ 6 Uvi gula aye nu an’aye muangutuna, muatuna gutumagela mikhuala yami ngahaga gutuama dienu, gula muaya nji mukombelela nzambi jiko, muajifugamela, 7 mbangukatula enya Isalele mu gifutshi ngaahanele. Inzo ngabuishi ya gijila mukunda nu jina diami, mbanguyibemba nu mbangushigo guyitala luko. Athu agasue mbaakhala musegulula enya Isalele* nu mbaakhala gualela. 8 Inzo eyi mbayibua gibombo. Muthu wagasue mbawubalega hehi nu inzo yene mbawuyitala nu mbawudihula, mbawumba gisugu, mbawuzuela egi: ‘Mukunda natshi Yehowa wakalagala ndaga ya luholo elu mu gifutshi egi nu gu inzo eyi?’ 9 Gungima ene mbaazuela egi: ‘Idi handaga atunyile Yehowa Nzambi wawo wazolele akhakh’awo gu Ejipitu, ayile gudi nzambi jiko, ajifugamele nu ajikombelele. Gishina giene Yehowa waabatela malamba awa agasue.’”
10 Salomo watshitshile ivo 20 ha gutunga jinzo mbadi: inzo ya Yehowa nu inzo ya fumu. 11 Mu tangua diene, Hirame, fumu wa gu Tile wahanele Salomo mabaya a sedre nu a jenevriye nu wolo wavula unu fumu wamutogele. Fumu Salomo wahanele Hirame membo 20 mu mavu a Galilea. 12 Hene, Hirame wakatugile gu Tile, wayile ha gutala membo amuhanele Salomo. Uvi gasuangulugilego nu membo ene.* 13 Wamuhudile egi: “Mun’etu, awa membo a luholo lutshi wanguhana?” Gishina giene uu nu mangino membo ene ana tamegewa egi Mavu a Kabule.* 14 Mu tangua diene, Hirame watumidile fumu wolo batalanta 120.*
15 Elu lumene lua athu Fumu Salomo wazudile ha gutshita midimo gu ngolo nu ha gutunga inzo ya Yehowa, nu inzo yenji hakhenji* nu gamulundu,* nu ibayi ya Yelusalema, Hasole, Megido nu Gezele. 16 (Farao, fumu wa gu Ejipitu, wajile, watambudile dimbo dia Gezele, wadikondele tshuya; washiyile nji enya Kanana akhalele mujinga mu dimbo diene. Wadihanele gifua kado ga ulo gudi mun’enji wa mukhetu, mukaji’a Salomo.) 17 Salomo watungile luko* dimbo dia Gezele nu Bete-Holone ya gu Mbongo, 18 nu Balate nu Tamare idi mu mavu a luselenga, mukatshi dia gifutshi, 19 nu membo agasue a Salomo a gubambela ima, nu membo mukunda nu phusu-phusu, nu membo mukunda nu awendeshi a tubalu. Salomo watungile ima yagasue yakhalele mutshigina muene gutunga gu Yelusalema, gu Libane nu mu mavu agasue akhalele muhinyina muene. 20 Athu agasue anyi akhalelego enya Isalele yakotelesa egi enya Amole, enya Hete, enya Phelese, enya Hivi nu enya Yebuse anyi asalele, 21 ajigulu awo anyi asalele mu gifutshi, anyi enya Isalele akhalelego nu luholo lua gushiya, Salomo waazudile ha gutshita midimo gu ngolo gifua ahiga uu nu mangino. 22 Uvi Salomo gabuishilego nga muenya Isalele mumoshi muhiga, handaga akhalele masuta enji, enya mudimo enji, mafumu, bakomanda, mafumu a athu akhalele muwendesa phusu-phusu jienji nu mafumu a athu akhalele muwendesa tubalu tuenji. 23 Mafumu a athu akhalele mutuameza midimo ya Salomo akhalele 550; ene akhalele mutala athu akhalele mutshita mudimo.
24 Uvi mun’a Farao wa mukhetu wakatugile mu Dimbo dia Davidi, wayile mukhala mu inzo yenji yamutungidile Salomo. Gungima Salomo watungile Gamulundu.*
25 Mbala thathu mu givo, Salomo wakhalele muhana milambu ya guwotshia nu milambu ya guhuima ha giwotshielo giatungile muene mukunda nu Yehowa. Wakhalele nji muhana mulambu wakhalele muzola mishi holu dia giwotshielo giakhalele gutuama dia Yehowa. Salomo wamanesele gutunga inzo.
26 Fumu Salomo walondele nji masuwa avula gu Esione-Gebele hehi nu Elote, mu khulo ya Kianga Giabenga mu gifutshi gia Edome. 27 Hirame watumine enya mudimo wenji nu masuwa avula ha gutshita mudimo hamoshi nu enya mudimo a Salomo. Athu ene akhalele mujiya Kianga muabonga. 28 Ayile gu Ofile, azudile wolo batalanta 420, awubatele gudi Fumu Salomo.