Mukanda wa Thomo wa Mafumu
14 Mu tangua diene, Abiya mun’a Yeloboama wasendesele gukata. 2 Yeloboama wawambelele mukaji’enji egi: “Ngabuba, nda usombegese milele yaye hagula athu ajiyigo egi udi mukaji’ami. Gungima uye gu Shilo, profete Ahiya udi guene. Muene wazuelele egi mbangubua fumu ha guhinyina athu awa. 3 Zula mapha 10 nu bagato nu bungu dia wigi, uye umumone. Muene mbawuguwambela ndaga mbayibuila mun’etu wa yala.”
4 Mukaji’a Yeloboama wakalegele ndaga yamuwambelele mulumi’enji. Wazugile, wayile gu Shilo gumbo dia Ahiya. Ahiya wakhalele wabui gale gifofo gakhalelego luko mumona handaga wakhalele muthu wa gukola.
5 Uvi Yehowa wawambelele Ahiya egi: “Mukaji’a Yeloboama yowu muza ha guguhula mukunda nu mun’enji udi mukata. Nguza guguwambela ndaga udi naye gumuwambela.* Gula mukhetu muene waheta, muene uza mutshita gifua udi muthu muko hagula athu amujiyigo.”
6 Hahetele mukhetu muene ha mufulo, Ahiya wavuile luholo luakhalele muene muwenda, wazuelele mbala imoshi egi: “Mukaji’a Yeloboama ngina. Mukunda natshi udi mutshita gifua udi muthu muko? Nzambi wanguhanyi ginemo gia guguwambela ndaga imoshi yabola. 7 Nda uwambele Yeloboama egi: ‘Yehowa Nzambi wa Isalele wazuela egi: “Ngagutombele mukatshi dia akuaku’aye hagula ukhale fumu wa athu ami enya Isalele. 8 Gungima ngatambudile ufumu mu inzo ya Davidi, ngaguhanele nawo. Uvi aye wakalegelego ndaga gifua muenya mudimo wami Davidi, munu wanemesele mikhuala yami nu wangukalegele nu mutshima wenji wagasue. Muene wakalegele phamba ndaga jiabonga gu meso ami. 9 Uvi aye watshitshi gubola guakoma gubalega mafumu akhalele gutuama diaye. Wadilondela nzambi muko nu ifuanesa ya utadi ha gunguhana khabu, wangutunyi. 10 Gishina giene ngudi mubata malamba mu fami ya Yeloboama. Mbangushiya mala agasue* a mu fami yenji, athu agasue ikhale muthu wazonda wa gu Isalele. Mbangukomba fami ya Yeloboama gifua luholo muthu wana komba shita uu nu tangua diana guhua! 11 Muthu wagasue wa mu fami ya Yeloboama mbawufua mu dimbo, jimbua mbajimudia; uvi munu mbawufua mu temu, tunjila tua gosa mbatumudia; handaga Yehowa wazuedi ndaga yene.”’
12 “Henyaha nda, vutuga gumbo diaye. Tangua mbawuheta mu dimbo, mona mbawufua. 13 Enya Isalele agasue mbaamudila nu mbaamufunda; phamba muene mu fami ya Yeloboama mbawufundjiwa mu malumba, handaga Yehowa Nzambi wa Isalele wamonyi ndaga yabonga phamba gudi muene. 14 Yehowa muene hakhenji mbawutomba fumu ha guhinyina Isalele. Fumu muene mbawumanesela* fami ya Yeloboama mu lusugu luene, ayi lusugu luene mangino. 15 Yehowa mbawushiya Isalele, ene mbaabua gifua ditetete didi muhungumuga holu dia muta. Mbawuvuza Isalele mu gifutshi giabonga giahanele muene gudi akhakh’awo, mbawaamuanga ha sambua diko dia Muta* handaga alondele makunji a gijila* ha guhana Yehowa khabu. 16 Muene mbawutuna Isalele mukunda nu gubola guakalegele Yeloboama nu gunu guatumile muene enya Isalele ha gutshita.”
17 Hene, mukaji’a Yeloboama wayile, gungima wahetele gu Tilesa. Tangua diahetele muene ha mufulo wa inzo, mun’awo wa yala wafuile. 18 Amufundjile, enya Isalele agasue amudidile gifua muazuelele Yehowa mu njila ya profete Ahiya, muenya mudimo wenji.
19 Ndaga jiko jiakalegele Yeloboama nu ita yaluile muene nu luholo luahinyine muene, idi yagusonega mu mukanda wa mene jia mafumu a gu Isalele. 20 Yeloboama wahinyile ivo 22, gungima wafuile gifua muafuile akhakh’enji. Mun’enji Nadabe wabuile fumu ha fundo dienji.
21 Mu tangua diene, Roboama mun’a Salomo wakhalele fumu gu Yuda. Wakhalele nu ivo 41 habuile muene fumu, wahinyile ivo 17 gu Yelusalema, dimbo diatombele Yehowa mukatshi dia iphuta yagasue ya Isalele ha guhaga jina jienji. Jina dia gin’a Roboama diakhalele Naama, wakhalele muenya Amona. 22 Enya Yuda atshitshile ndaga jiabola gu meso a Yehowa; amuhanele khabu jiavula mukunda nu gubola guawo, gubalega jinyi jiamuhanele akhakh’awo. 23 Alanduile gutunga mafundo a gukombelela nu makunji a gijila* nu mitshi ya gijila gu tumilundu tuagasue nu ha mushin’a mutshi wagasue wakoma wakhalele nu mayiji avula. 24 Guakhalele nji nu mala anyi akhalele thambi jia mu tempelo mu gifutshi. Enya Yuda akalegele ndaga jiagasue jiabola gifua enya ifutshi inyi Yehowa wakayele gutuama dia enya Isalele.
25 Mu givo gia 5 gia uhinyinyi wa fumu Roboama, fumu Shishake wa gu Ejipitu wajile muluisa Yelusalema. 26 Wazudile umonyi wa mu inzo ya Yehowa nu umonyi wa mu inzo ya fumu. Wazudile ima yagasue nu tshibu jiagasue jia wolo jialondele Salomo. 27 Hene, fumu Roboama walondele tshibu jia kuivre ha fundo dia tshibu jinyi jiazudiwe, wajihanele mafumu a masuta akhalele mubamba mufulo wa inzo ya fumu. 28 Tangua fumu wakhalele muza mu inzo ya Yehowa, masuta akhalele mubamba mufulo akhalele mubata tshibu jiene. Gungima akhalele gujivutula gu sugu ya masuta akhalele mubamba mufulo.
29 Ndaga jiko jiakalegele Roboama nu ima yagasue yatshitshile muene, idi yagusonega mu mukanda wa mene jia mafumu a gu Yuda. 30 Roboama nu Yeloboama akhalele gudiluisa tangua diagasue. 31 Gungima Roboama wafuile gifua muafuile akhakh’enji, amufundjile mu malumba a akhakh’enji mu Dimbo dia Davidi. Jina dia gin’enji diakhalele Naama, wakhalele muenya Amona. Gungima mun’enji Abiyama* wabuile fumu ha fundo dienji.