Estere
3 Gungima dia ndaga eji, Fumu Aseluse wahanele Amane mun’a Amedata mujigulu wa Agaga ginemo giko, wamuhanele ufumu wavula gubalega mafumu ako agasue a mu ufumu wenji anyi akhalele n’enji. 2 Enya mudimo agasue akhalele ha mufulo wa inzo ya fumu akhalele naye gushiwuga nu gufugama gutuama dia Amane, handaga fumu wazuelele egi adi naye gutshita ngenyi ha gumunemesa. Uvi Mordekayi watunyile gumushiwugila nga gumufugamela. 3 Enya mudimo a fumu akhalele ha mufulo ahudile Mordekayi egi: Mukunda natshi ushigo munemesa ndaga yazuelele fumu. 4 Lusugu nu lusugu akhalele gumuhula uvi muene gakhalelego guavuila. Gungima awambelele Amane ha gutala gula ndaga yakhalele mutshita Mordekayi yakhalele yabonga nga ndo; handaga Mordekayi waawambelele egi wakhalele muenya Yuda.
5 Tangua Amane wamonele egi Mordekayi wakhalele mutuna gushigula muto gutuama dienji nga gufugama, wavuile khabu jiakola. 6 Amane wakhalele mutshigina gushiya Mordekayi. Uvi wakambele nji gushiya* athu ako, handaga amuwambelele egi Mordekayi wakhalele muenya Yuda. Hene wasendesele gukamba luholo lua gushiya enya Yuda, akuaku’a Mordekayi agasue anyi akhalele mu ufumu wa Aseluse.
7 Mu mbeji ya thomo, yakotelesa egi mbeji ya Nisana* ya givo gia 12 gia uhinyinyi wa Fumu Aseluse, atele Pule (yakotelesa egi mubela,) gutuama dia Amane ha gujiya lusugu nu mbeji adi naye gukalagala ndaga yene. Mubela wene wabuile mu mbeji ya 12 yakotelesa egi mbeji ya Adale.* 8 Gungima Amane wawambelele fumu Aseluse egi, gudi nu athu amoshi ngenyi adi a gudimuanga mukatshi dia athu a mu provense jiagasue jia mu ufumu waye. Mikhuala ya athu ene idi ya gudisha nu ya athu agasue, ashigo nji mutumagela mikhuala ya fumu. Mbawushigo muheta nga gubonga gumoshi gula waabemba. 9 Fumu gula ndaga yene yagusuanguluisa, mukhuala umoshi usonegewe egi enya Yuda adi naye gushiyiwa. Mbangufuta talanta* 10 000 jia utadi wa siliva gudi enya mudimo a fumu hagula ajimbe ha fundo ana bamba umonyi wa fumu.*
10 Mu tangua diene, fumu wakatudile luphete* luenji luagumbila kashe luakhalele gu koko dienji, waluhanele Amane mun’a Amedata mujigulu wa Agaga, munu wakhalele mbalagaji wa enya Yuda. 11 Gungima fumu wawambelele Amane egi: “Athu nu utadi wa siliva* adi ha mago aye, tshita nawo ndaga yagasue watshigina.” 12 Atamegele basekretere a fumu mu lusugu lua 13 lua mbeji ya thomo. Basekretere ene asonegele ndaga jiagasue Amane wawambelele atuameji a fumu,* nu baguvernere akhalele mu baprovense nu mafumu a athu a maluholo a gudisha. Asonegele mikanda gudi athu a mu provense nu a mu mafundo agasue mu zuelelo diawo nu mu isona* ya mazuelelo ene. Asonegele ndaga jiene mu jina dia Fumu Aseluse nu ambile kashe nu luphete lua fumu.
13 Atumile mikanda mu provense jiagasue jia fumu. Mikanda yene yakhalele muhana njila ha gushiya nu gumuanga nu gumanesela enya Yuda agasue, mavuala, mambuta, ana nu akhetu mu lusugu lumoshi. Yakhalele mu lusugu lua 13 lua mbeji ya 12 yakotelesa egi mbeji ya Adale. Mikanda yene yakhalele nji muhana njila ha gutambula ima yawo yagasue. 14 Kopi imoshi ya mukanda wene yakhalele naye gubua mukhuala mu provense jiagasue. Awambelele athu agasue ndaga jiakhalele muzuela mukhuala wene hagula adilondege mukunda nu lusugu luene. 15 Mikanda yene yatumiwe muphushi gifua luholo fumu wazuelele. Mukhuala wene wahanewe gu Suse gu inzo* ya fumu. Gungima fumu nu Amane akhalele hashi ha gunua matombe, uvi enya gu Suse akhalele nu gikenene giakola.