Estere

9 Mu lusugu lua 13 lua mbeji ya 12 yakotelesa egi mbeji ya Adale,* lusugu akhalele naye gukalagala ndaga jiazuelele fumu nu gutagenesa mukhuala wenji, mbalagaji jia enya Yuda jiatangijile egi jiza guabinga. Uvi ndaga jiasombegesele, enya Yuda abingile mbalagaji jiene. 2 Enya Yuda adibungishile mu membo awo anyi akhalele mu provense jiagasue jia Fumu Aseluse ha guluisa athu akhalele mutshigina guatshita gubola. Nga muthu mumoshi gakhalelego nu luholo lua gumagana gutuama diawo, handaga athu agasue akhalele guavuila woma. 3 Mafumu agasue a baprovense nu basatrape* nu baguvernere, nu athu akhalele mutshita mudimo wa fumu akhalele gu khanda ya enya Yuda handaga akhalele muvuila Mordekayi woma. 4 Mordekayi wabuile muthu wakoma mu inzo ya fumu,* lutumbu luenji luamuanganele mu provense jiagasue handaga wakhalele mubua nu ngolo jiavula.

5 Enya Yuda ashiyile mbalagaji jiawo jiagasue nu phogo ya khusa. A akalegele nji ndaga yagasue akhalele mutshigina. 6 Ashiyile nji mala 500 gu Suse gu inzo ya fumu.* 7 Ashiyile nji Phaleshandata nu Dalefone nu Asephata, 8 nu Pholata nu Adaliya nu Alidata, 9 nu Phalemasheta nu Alisayi nu Alidayi nu Vayezata. 10 Athu awa 10 akhalele ana a Amane a mala mun’a Amedata, munu wakhalele mbalagaji wa enya Yuda. Uvi gungima dia guashiya azanguilego nga gima giawo gimoshi.

11 Mu lusugu luene awambelele fumu mutango wa athu ashiyiwe gu Suse gu inzo ya fumu.*

12 Fumu wawambelele mukaji’enji Estere egi: “Enya Yuda ashiyi athu 500 gu Suse gu inzo ya fumu,* nu ana a Amane a mala 10. Ndaga jitshi jiakalegewa mu provense jiko jia fumu? Henyaha itshi udi mutshigina? Nguwambele, mbanguguhana nayo. Udi nu ndaga iko ya gungutoga ba? Mbangugukalegela nayo.” 13 Estere wamuvutudile egi: “Gula fumu wasuanguluga, ahane njila gudi enya Yuda adi gu Suse hagula hamene atshite ndaga gifua mudi muzuela mukhuala wa mangino. Ajitshige nji ana a Amane 10 a mala gu mutshi.” 14 Fumu wahanele njila hagula akalagale ndaga gifua muazuelele Estere. Hene ambile mukhuala gu Suse, ajitshigile nji ana Amane 10 a mala gu mutshi.

15 Enya Yuda a gu Suse adibungishile luko mu lusugu lua 14 mu mbeji ya Adale, ashiyile mala 300 gu Suse. Uvi azanguilego nga gima giawo gimoshi.

16 Enya Yuda a mu provense jiko jia fumu adibungishile nji, aluile ha guhuluisa mionyo yawo. Aluile nu mbalagaji jiawo, ashiyile mala 75 000 akhalele nawo umbalagaji. Uvi azanguilego nga gima giawo gimoshi. 17 Akalegele ndaga jiene mu lusugu lua 13 lua mbeji ya Adale, uvi mu lusugu lua 14 ahulugugile. Abuishile lusugu luene lusugu lua wano nu lua gusuanguluga.

18 Enya Yuda a gu Suse adibungishile mu lusugu lua 13 nu lua 14, ahulugugile mu lusugu lua 15; alubuishile nji lusugu lua wano nu lua gusuanguluga. 19 Gishina giene enya Yuda anyi akhalele mu membo a mu badistrike a gualeha abuishile lusugu lua 14 lua mbeji ya Adale, lusugu lua gusuanguluga nu lua wano, nu lusugu lua guditumina ima ya gudia.

20 Mordekayi wasonegele ndaga jiene mu mikanda, wayitumile gudi enya Yuda agasue a mu provense jiagasue jia Fumu Aseluse, ikhale anyi akhalele hehi nga gualeha. 21 Waawambelele egi, givo nu givo adi naye gunemesa lusugu lua 14 nu lua 15 lua mbeji ya Adale, 22 handaga enya Yuda ahulugile mu masugu ene ha mago a mbalagaji jiawo, mu mbeji yene nji gikenene giawo giasombegesele giabuile gusuanguluga, gudila guawo guasombegesele guabuile wano. Akhalele naye gukalagala wano mu masugu ene nu gusuanguluga. Akhalele naye nji guditumila ndambo ya ima ya gudia nu guhana phutu bakado.

23 Enya Yuda atshiginyile egi mbaalandula gukalagala wano asendesele nu mbaakalagala nji ndaga jiaasonegele Mordekayi. 24 Handaga Amane mun’a Amedata mujigulu wa Agaga, munu wakhalele mbalagaji wa enya Yuda agasue, wayile giphungi ha gushiya enya Yuda, watele Pule yakotelesa egi mubela ha guavuisa woma nu ha guashiya. 25 Uvi tangua Estere wajile gutuama dia fumu, fumu wawambelele athu ha gusonega egi: “Gubola guatshigina muene gukalagala enya Yuda gumuvutugile;” gungima amujitshigile nu an’enji a mala gu mutshi. 26 Hene atamegele masugu ene egi Pulime, yakotelesa egi Pule.* Uvi, mukunda nu ndaga jiagasue jiasonegewe mu mukanda wene, nu ndaga amonele jiatadila mulonga wene nu ndaga jiaabuidile, 27 enya Yuda ambile mukhuala egi, givo nu givo ene nu ajigulu awo nu athu agasue mbaadibungisa nawo, mbakalagala wano masugu ene mbadi ha gunemesa ndaga jiasonegewe mukunda nu ene mu tangua diatombewe. 28 Mu Fami yagasue nu mu provense yagasue nu mu membo agasue, enya Yuda akhalele naye guwunguluga masugu ene nu guanemesa mu indongo yawo yagasue. Akhalelego naye nji gubemba gukalagala wano wene mu masugu a Pulime, ajigulu awo nji akhalelego naye gubemba gukalagala wano wene.

29 Gungima Estere mun’a Abihayile nu Mordekayi muenya Yuda, akalegele ufumu wawo ha gusonega mukanda wa mbadi hagula enya Yuda akhale mutshita wano wa Pulime. 30 Watumile mikanda gudi enya Yuda agasue akhalele mu baprovense 127 jia mu ufumu wa Aseluse, mikanda yene yakhalele nu mbimbi jia guhuima nu jia giamatshidia, 31 hagula akalagale wano mu masugu a Pulime mu matangua atombewe, gifua muaawambelele Mordekayi muenya Yuda nu Estere mukaji’a fumu ha gutshita; gifua luholo enya Yuda nji ahagele mukhuala egi, ene nu ajigulu awo mbaanemesa wano wene, nu mbaatuna gudia ha gukombelela. 32 Mukhuala wa Estere watshiginyishile ndaga yatadila Pulime, awusonegele nji mu mukanda.