Estere

2 Gungima dia ndaga eji, tangua khabu jia Fumu Aseluse jialebele, wawungulugile ndaga yakalegele Vaseti nu desizio diazudiwe mukunda nu muene. 2 Gungima enya mudimo a fumu azuelele egi: “Adi naye gukambela fumu muvuala wa mukhetu udi wabonga nu udi khenji gabungishilego muila nu yala. 3 Fumu atombe athu mu provense jiagasue jia mu ufumu wenji, hagula abungise mavuala a akhetu adi abonga diago anyi khenji abungishilego muila nu mala ha guza nawo gu inzo ya fumu* ya gu Suse, mu inzo ya akhetu.* Ahane mavuala ene gudi Hegayi muenya mudimo wa fumu watungudiwe* munu wana bamba akhetu, a ahane nji ima ha guabongesaluko muavula.* 4 Muvuala wa mukhetu munu mbawusuanguluisa fumu muavula, muene mbawubua mukaji’a fumu ha fundo dia Vaseti.” Matangi ene asuanguluishile fumu, watshitshile ndaga amuwambelele.

5 Guakhalele nu muenya Yuda mumoshi gu Suse mu inzo ya fumu* jina dienji Mordekayi. Wakhalele mun’a Yayile mun’a Shimeyi, mun’a Kishi wa mu giphuta gia Benjame, 6 Mordekayi muene wakhalele mukatshi dia athu akatugile gu Yelusalema ha guya mu uhiga, tangua Fumu Nebukadenezale wa gu Babilona wakuatele Fumu Yekoniya* wa gu Yuda ha guya n’enji mu uhiga. 7 Mordekayi wakhalele musansa Hadasa,* yakotelesa egi Estere. Estere wakhalele mun’a Abihayile phangi’a sh’a Mordekayi, gakhalelego nu tata nga nu mama. Muvuala muene wa mukhetu wakhalele diago wabonga. Hafuile sh’enji nu gin’enji, Mordekayi wamuzudile ha gumusansa gifua mun’enji. 8 Tangua awambelele athu mbimbi jiazuelele fumu nu mukhuala wambile muene, ayile nu mavuala a akhetu avula gu Suse gu inzo ya fumu,* a ahanele ha mago a Hegayi. Ayile nji nu Estere gu inzo ya fumu* gudi Hegayi mubambi wa akhetu.

9 Hegayi wasuangulugile nu Estere nu wamumonesele guzumba gua giamatshidia, hene walondele ndaga mu phushi ha gumuhana ima yakhalele naye gumubongesa luko muavula* nu ima yabonga ya gudia. Wamuhanele mavuala a akhetu 7 akhalele mutshita mudimo mu inzo ya fumu, wamuhagele nji nu mavuala ene ha fundo diabalega gubonga dia mu inzo ya akhetu.* 10 Estere gawambelelego nga muthu mumoshi gula wakhalele muenya gui nga muenya fami itshi, handaga Mordekayi wamutunyishile ha gutela nga muthu mumoshi lumene. 11 Lusugu nu lusugu Mordekayi wakhalele muya gutuama dia gibanzala gia inzo ya akhetu* ha gujiya gula Estere udi muabonga nu ha gujiya gula ndaga itshi ya mubuila.

12 Muvuala wagasue wa mukhetu wakhalele nu tangua dienji dia guya gudi Fumu Aseluse, gula wabalegesa mbeji 12 jia gudibongesa luko muavula* gifua luholo mukhuala wakhalele mutoga. Akhalele mutshita mbeji 6 ha gubongesewa luko muavula* nu maji a mire, mbeji jiko 6 nu maji a balesame nu maji ako a luholo nu luholo. 13 Gungima dia sungi yene, muvuala wagasue wa mukhetu wakhalele hehi ha guya gudi fumu. Tangua diakhalele mukatuga muene mu inzo ya akhetu* ha guya mu inzo ya fumu, akhalele naye gumuhana gima giagasue giakhalele mutoga muene. 14 Mu ngueze wakhalele muya gudi fumu, uvi mu gimenegena wakhalele muvutuga gu inzo ya mbadi ya akhetu* gudi Shashagaza muenya mudimo wa fumu watungudiwe* munu wakhalele mubamba akhetu. Wakhale naye guvutuga luko phamba gula fumu wasuanguluga n’enji nu wamutamega mu jina dienji.

15 Estere wakhalele mun’a Abihayile. Abihayile wakhalele phangi’a sh’a Mordekayi yago wasansele Estere. Hatagenele tangua dia Estere dia guya gudi fumu, gatogelego nga gima gimoshi phamba ima yamuwambelele Hegayi muenya mudimo wa fumu watungudiwe nu wakhalele mubamba akhetu. (Mu tangua diene athu agasue akhalele mumona Estere akhalele musuanguluga n’enji.) 16 Ayile nu Estere gudi Fumu Aseluse gu inzo yenji ya ufumu mu mbeji ya 10, yakotelesa egi mu mbeji ya Tebete,* mu givo gia 7 gia uhinyinyi wenji. 17 Fumu wazumbile Estere muavula gubalega akhetu ako agasue, wasuangulugile nji n’enji nu wamutshiginyile* muavula gubalega akhetu ako anyi akhalele khenji abungishilego muila nu mala. Hene wamusudigile gipho gia ufumu,* gungima wabuile mukaji’enji ha fundo dia Vaseti. 18 Fumu wakalegele wano wakoma mukunda nu mafumu enji agasue nu enya mudimo enji, wano wene wakhalele mukunda nu Estere. Gungima wazuelele egi azole athu a mu baprovince akhalele mu bologo,* walanduile nji guhana athu bakado gifua muakhalele umonyi wa fumu.

19 Tangua ajile mu mbala ya mbadi nu akhetu akhalele khenji abungishilego muila nu mala,* Mordekayi wakhalele hashi ha mufulo wa inzo ya fumu. 20 Estere gazuelelego nga ndaga imoshi yatadila aphangi’enji nu akuaku’enji gifua muamuwambelele Mordekayi; walanduile gutshita ndaga yamuwambelele Mordekayi gifua tangua diakhalele muene gumbo dienji.

21 Mu masugu ene tangua Mordekayi wakhalele hashi ha fundo dienji ha mufulo wa inzo ya fumu, Bigetana nu Telesha, enya mudimo mbadi a fumu anyi akhalele mubamba mufulo wa inzo ya fumu avuile khabu, ayidile Fumu Aseluse giphungi ha gumushiya. 22 Uvi Mordekayi wavuile ndaga yene, wayile muwambela mbala imoshi Estere mukaji’a fumu. Estere wayile muwambela Fumu Aseluse mu jina dia Mordekayi. 23 Hene akambele gujiya mulonga wene muabonga, akotelesele egi yakhalele giamatshidia, gungima ajitshigile imbi ya mala ene mbadi gu mutshi. Asonegele nji ndaga jiene jiagasue mu mukanda wa mene jia mu tangua diene ha meso a fumu.