Mukanda wa Mbadi wa Gudilanduluila
19 Gungima Fumu Yosafata wa gu Yuda wavutugile mu guhuima gumbo dienji* gu Yelusalema. 2 Yehu mun’a Hanani, muthu wakhalele mumona vizio, wayile mutagana Fumu Yosafata, wamuwambelele egi: “Mukunda natshi udi naye gukuatesa muthu wabola? Mukunda natshi udi naye guzumba athu anago guzumba Yehowa? Gishina giene Yehowa wa guvuila khabu. 3 Uvi, Nzambi wamonyi ndaga jiabonga mu mutshima waye, handaga wakatudile mitshi ya gijila* mu gifutshi, walondele nji mutshima waye* ha gukamba Nzambi wa giamatshidia.”
4 Yosafata walanduile gujinga gu Yelusalema. Gungima wayile luko mutala athu sendese gu Belesheba uu nu gu khanda ya milundu ya Efrayime ha guakuatesa ha guvutuga gudi Yehowa Nzambi wa akhakh’awo. 5 Watombele nji manzuji mu gifutshi, mu membo agasue akhalele nu ibayi yakola gu Yuda. 6 Wawambelele nji manzuji egi: “Temienu mu ndaga mudi mutshita handaga mushigo musophesa mukunda nu muthu uvi mudi musophesa mukunda nu Yehowa, muene udi nu enue tangua mudi musophesa. 7 Henyaha vuilenu Yehowa woma, monesenu gutema mu ndaga mudi mutshita handaga Yehowa Nzambi wetu gana tshigina ndo usopheshi wa mambo, nga khadilo dia gutomba-tomba, gana tshigina nji ndo ima* ha gubingisa nga ha gufuisa muthu milonga.”
8 Yosafata watshitshile nji ngenyi gu Yelusalema, watombele enya Levi ako nu nganga-nzambi nu mafumu ako a fami jia enya Isalele ha gukhala manzuji mukunda nu Yehowa nu ha gusophesa milonga ya enya gu Yelusalema. 9 Waawambelele egi: “Tala ndaga mudi naye gutshita ha guvuila Yehowa woma, ha gukhala yagujinginyina nu ha gudihana gudi muene nu mutshima wenu wagasue: 10 Gula aphangi’enu ana khala mu membo ako aza nu mulonga watadila muthu washiyi muthu muko nga mulonga watadila luholo ndaga imoshi idi naye gukalegewa, nga mukhuala, nga badesizio azudiwe adi mumonesa luholo ndaga imoshi idi naye gukalegewa, mudi naye guatemesa hagula akhadigo nu gubola gutuama dia Yehowa, gula ndo muene mbawumivuila khabu, mbawuvuila nji aphangi’enu khabu. Yene ndaga mudi naye gutshita hagula mukhadigo nu gubola. 11 Mudi nu Amaliya, fumu wa nganga-nzambi, udi mutuameji wenu mukunda nu ndaga jiagasue jiatadila Yehowa. Zebadia mun’a Ishemayele udi mutuameji wa giphuta gia Yuda mukunda nu ndaga jiagasue jiatadila fumu; enya Levi mbaakhala gumikuatesa. Khalenu nu ngolo, tshitenu mudimo; Yehowa akhale nu muthu wagasue udi mutshita ndaga jiabonga.”