Mukanda wa Thomo wa Mafumu
19 Gungima Ahaba wawambelele Yezabele ndaga jiagasue jiakalegele Eliya nu luholo luashiyile muene baprofete agasue nu phogo ya khusa. 2 Hene Yezabele watumile mbimbi gudi Eliya egi: “Nzambi jinguhane ndola yakola gula hamene mu tangua edi ngagukalegelego gifua luholo watshitshi baprofete ene!”* 3 Eliya wavuile woma, hene walengele ha guhuluisa monyo wenji. Wahetele gu Belesheba mu mavu a Yuda, wabembele muenya mudimo wenji guene. 4 Eliya wawendele lusugu lumoshi ha guheta mu mavu a luselenga. Hahetele muene guene, wakhalele ha mushin’a mutshi wa jene, watogele egi afue.* Wazuelele egi: “Ngahuila gami! Oo Yehowa, ngushiye, handaga ngushigo muthu wabonga gubalega akhakh’ami.”
5 Gungima wabandele ha mushin’a mutshi wa jene, tulo tuamukuatele. Uvi mbala imoshi, muanjelo wamukuatele, wamuwambelele egi: “Zuga udie.” 6 Hakangudile muene meso, wamonele dipha diakhalele gifua munengu holu dia maseso a tshuya nu bungu dia meya hehi nu muto wenji. Wadile, wanuile, wabandele luko. 7 Gungima muanjelo wa Yehowa wajile luko mbala ya mbadi, wamukuatele, wamuwambelele egi: “Zuga udie handaga njila udi muya idi diago yaleha.” 8 Eliya wazugile, wadile nu wanuile. Ima yadile muene yamuhanele ngolo jia guwenda masugu 40 phipha nu muanya uu nu hahetele muene gu Horebe, mulundu wa Nzambi wa giamatshidia.
9 Hahetele muene guene, wanginyile mu wina dia seso, wabandele muene. Mu phipha yene, Yehowa wamuhudile egi: “Eliya, itshi udi mutshita haha?” 10 Eliya wamuvutuile egi: “Ngakalegele Yehowa Nzambi wa masuta mudimo nu gikhesa giavula. Uvi enya Isalele ashiyi gikotelo giaye, abuishi giwotshielo giaye nu ashiyi baprofete aye nu phogo ya khusa, phamba ame ngasala. Henyaha adi mukamba gungushiya.” 11 Uvi Nzambi wamuwambelele egi: “Zoga umagane gu mulundu gutuama dia Yehowa.” Yehowa wabalegele gutuama dia Eliya, funji yakola diago yakhalele mutawula milundu nu gubula maseso gutuama dia Yehowa, uvi Yehowa gakhalelego mu funji yene. Gungima dia funji, mavu adigitshile, uvi Yehowa gakhalelego mu gudigita guene gua mavu. 12 Gungima dia gudigita gua mavu, tshuya tuazogele, uvi Yehowa gakhalelego mu tshuya tuene. Gungima dia tshuya, dijui dimoshi diazogele hashi-hashi, diakhalele diatuluga. 13 Tangua Eliya wavuile dijui diene, watshuigile mulele wenji gu phala, wazogele, wamagenele ha mufulo wa wina dia seso. Gungima dijui diene diamuhudile egi: “Eliya, itshi udi mutshita haha?” 14 Eliya wamuvutuile egi: “Ngakalegele Yehowa Nzambi wa masuta mudimo nu gikhesa giavula. Uvi enya Isalele ashiyi gikotelo giaye, abuishi giwotshielo giaye nu ashiyi baprofete aye nu phogo ya khusa, phamba ame ngasala. Henyaha adi mukamba gungushiya.”
15 Yehowa wamuwambelele egi: “Vutuga, nda mu mavu a luselenga a Damase. Gula waheta guene, utombe Hazaele ha gubua fumu* gu Siliya. 16 Udi naye nji gutomba Yehu mujigulu wa Nimishi ha gubua fumu* gu Isalele, utombe nji Elisha* mun’a Shafata wa gu Abele-Mehola ha gubua profete* ha fundo diaye. 17 Muthu wagasue munu mbawulenga phogo ya khusa ya Hazaele, Yehu mbawumushiya; munu mbawulenga phogo ya khusa ya Yehu, Elisha mbawumushiya. 18 Ngudi luko nu athu 7 000 gu Isalele anyi khenji afugamelego gutuama dia Bale nu khenji amuhanele galego beze.”
19 Eliya wakatugile guene wayile, wamonele Elisha mun’a Shafata mudima nu ngombe 24 jiakhalele gutuama dienji jia gujitshiga mbadi-mbadi, muene hakhenji wakhalele nu ngombe mbadi jia gu suga. Eliya wayile gudi muene, wamusonuene mulele wenji wa giprofete. 20 Hene, Elisha wabembele ngombe, wahatele Eliya phushi, wamuwambelele egi: “Ngabuba, nguhane njila nguye nguhane tata nu mama beze ha gualaya, gungima mbangugulandula.” Muene wamuvutuile egi: “Nda, ngagukangelego njila.” 21 Elisha wavutugile, wazudile ngombe mbadi jia milume, wajihanele mulambu. Wazudile muhitu nu mitshi iko akhalele mukalegela ha gudima, wayibuishile khunyi, watelegele ngombe, wayihanele athu, adile. Gungima walanduile Eliya, wasendesele gumukalegela mudimo.