Mukanda wa Mbadi wa Gudilanduluila
21 Yosafata wafuile gifua muafuile akhakh’enji, amufundjile nu akhakh’enji mu Dimbo dia Davidi. Mun’enji Yolama wabuile fumu ha fundo dienji. 2 Aphangi’enji ana a Yosafata akhalele: Azariya, Yehiele, Zakaliya, Azariya, Mikaele nu Shefatia; mukut’awo agasue akhalele ana a Fumu Yosafata wa gu Isalele.* 3 Sh’awo waahanele bakado avula a utadi wa siliva nu wolo nu ima ya ndando nu membo akhalele nu ibayi yakola gu Yuda. Uvi wahanele ufumu gudi Yolama handaga muene wakhalele somi.
4 Tangua Yolama wazudile ufumu wa sh’enji, washiyile aphangi’enji agasue nu mafumu ako a gu Isalele nu phogo ya khusa ha gukolesa ufumu wenji. 5 Yolama wakhalele nu ivo 32 habuile muene fumu, wahinyine ivo 8 gu Yelusalema. 6 Walanduile makalegelo abola a mafumu a gu Isalele, watshitshile nji gubola guakalegele enya fami ya Ahaba, handaga wazudile mun’a Ahaba wa mukhetu mu ulo; walanduile gutshita ndaga jiabola gu meso a Yehowa. 7 Uvi Yehowa gatambudilego ufumu mu fami ya Davidi mukunda nu gikotelo giakotele muene nu Davidi, handaga walayele egi mbawumuhana muenda nu mbawuhana nji an’enji muenda mayilago.
8 Hakhalele Yolama fumu, enya Edome alumbugile ufumu wa gu Yuda, gungima aditombele fumu wawo. 9 Hene, Yolama wayile nu bakomanda enji nu phusu-phusu jienji jiagasue. Wazugile mu phipha, waluishile enya Edome nu mafumu a masuta awo akhalele muwendesa phusu-phusu, anyi akhalele agumujieta, waabingile. 10 Uvi enya Edome wawa gawo ana lumbugila enya Yuda uu nu mangino. Mu tangua diene, enya gu Libena alumbugile nji Yolama handaga wabembele Yehowa Nzambi wa akhakh’enji. 11 Walondele nji mafundo a gukombelela* gu milundu ya mu mavu a Yuda ha gutuma enya gu Yelusalema ha gulumbugila Nzambi,* wawunganesele nji enya Yuda.
12 Gungima wahetele mukanda wamusonegele profete Eliya egi: “Yehowa Nzambi wa khakh’aye Davidi wazuela egi: ‘Aye walanduilego makalegelo a sh’aye Yosafata nga a Fumu Asa wa gu Yuda. 13 Uvi walandula makalegelo a mafumu a gu Isalele, watumi enya gu Yuda nu enya gu Yelusalema ha gulumbugila Nzambi* gifua muatshitshile fami ya Ahaba; washiya nu ene aphangi’aye, ana a sh’aye anyi akhalele abonga gugubalega aye. 14 Gishina giene Yehowa udi muhana athu aye ndola yakola nu an’aye nu akaji’aye; muene mbawubolesa nji ima yaye yagasue. 15 Mbawukata misongo yavula nu misongo ya mu mala uu nu tangua mala aye mbakhala muzoga gonze lusugu nu lusugu mukunda nu misongo.’”
16 Hene, Yehowa watumile enya Filistiya* nu enya gu Alabe anyi akhalele hehi nu enya gu Etiopi ha guluisa Yolama. 17 Ajile muluisa enya gu Yuda, anginyile mu mavu awo gu ngolo, atambudile ima yagasue yakhalele mu inzo ya fumu nu an’enji nu akaji’enji, phamba mun’enji wa gasala-songi Yoahaza* wasalele. 18 Gungima dia ndaga eji jiagasue, Yehowa wamuwasele misongo mu mala, inyi yajiyilego gusagewa. 19 Gungima tangua ivo mbadi yabalegele, mala amuzogele gonze mukunda nu misongo. Wafuile gufua gua lamba diago mukunda nu misongo yenji. Athu enji ahagelego tshuya tuakola ha gumutumbuisa gifua luholo atshitshile mukunda nu akhakh’enji. 20 Wakhalele nu ivo 32 habuile muene fumu, wahinyine ivo 8 gu Yelusalema. Gushigo nga nu muthu mumoshi wavuile gikenene mukunda nu gufua guenji. Wafundjiwe mu Dimbo dia Davidi, uvi amufundjilego mu malumba a mafumu.