Yoshua
14 Wawa mavu enya Isalele azudile gifua khapho mu gifutshi gia Kanana, anyi nganga-nzambi Eleazale nu Yoshua mun’a Nune nu mafumu a fami a iphuta ya Isalele a ahanele ha gukhala. 2 Atele mubela ha gukhaphela iphuta 9 nu gitshinyi gia giphuta gia Manase mavu,* gifua luholo Yehowa wawambelele Moize. 3 Moize wahanele iphuta mbadi nu gitshinyi gia giphuta gia Manase khapho dia mavu ha sambua diko* dia Yordane, uvi gahanelego enya Levi mavu mukatshi diawo. 4 Ajigulu a Yozefe akhalele a gukhapha mu iphuta mbadi: giphuta gia Manase nu gia Efrayime. Ahanelego enya Levi khapho dia mavu, uvi a ahanele phamba membo a gukhala nu matemu mukunda nu shitu jiawo nu ima yawo iko. 5 Enya Isalele akhaphele mavu gifua luholo Yehowa wawambelele Moize.
6 Gungima mala a mu giphuta gia Yuda ayile gudi Yoshua gu Gilegale. Kalebe mun’a Yefune muenya Kenaze wamuwambelele egi: “Udi mujiya muabonga ndaga Yehowa wawambelele Moize muthu wa Nzambi wa giamatshidia mukunda nu aye nu ame gu Kadeshe-Barnea. 7 Ngakhalele nu ivo 40 tangua Moize muenya mudimo wa Yehowa wangutumile gu Kadeshe-Barnea ha guya mutala gifutshi mu gisuegi; tangua ngavutugile ngamutele lumene nu giamatshidia.* 8 Ikhale aphangi’ami ngayile nawo alebesele athu muila,* ame ngatumagele Yehowa Nzambi wami nu mutshima wagasue. 9 Mu lusugu luene, Moize wadilogele egi: ‘Mavu adiatshi ikanzo yaye mbaabua aye nu a an’aye mayilago, handaga watumagela Yehowa Nzambi wami nu mutshima waye wagasue.’ 10 Henyaha Yehowa wangubamba nu monyo gifua luholo lualayele muene ivo 45 yabalega gale, sendese tangua diahanele Yehowa laji edi gudi Moize hakhalele enya Isalele mu mavu a luselenga. Ame gami nu monyo uu nu mangino, ngatagenesa ivo 85. 11 Mangino ame gami nu ngolo gifua mu lusugu Moize wangutumile ha guya mutala gifutshi mu gisuegi. Ame gami nu ngolo gifua mu tangua diene, ngajiya gulua ita nga gutshita midimo iko. 12 Nguhane khanda ya milundu yangulayele Yehowa mu lusugu luene. Mu lusugu luene wavuile luholo athu azuelele egi ana a Anaka ana khala guene mu membo adi nu ibayi yakola, uvi Yehowa mbawukhala* nu ame. Mbanguakaya gifua luholo lualayele Yehowa.”
13 Hene Yoshua washimbigile Kalebe mun’a Yefune, wamuhanele Hebrone gifua khapho. 14 Gishina giene Hebrone yana khala khapho dia Kalebe mun’a Yefune muenya Kenaze uu nu mangino, handaga watumagele Yehowa Nzambi wa Isalele nu mutshima wagasue. 15 Jina dia Hebrone diakhalele thomo Kiriyate-Arba (Arba wakhalele muthu wa ndando yavula mukatshi dia ana a Anaka). Gifutshi giakhalele mu guhuima, ita yakhalelego luko.