Yoshua
4 Tangua athu agasue amanesele guzawuga Muta wa Yordane, Yehowa wawambelele Yoshua egi: 2 “Tomba mala 12 mukatshi dia athu. Mu giphuta giagasue zula yala mumoshi. 3 Awambele egi: ‘Zulenu maseso 12 hakatshi na katshi dia Yordane, ha fundo nganga-nzambi jidi jiagumagana; ndenu nawo muahage ha fundo muya mubanda.’”
4 Yoshua watamegele mala 12 atombele muene mukatshi dia enya Isalele, yala mumoshi mu giphuta nu giphuta. 5 Waawambelele egi: “Balegenu gutuama dia Mushete wa Yehowa Nzambi wenu hakatshi na katshi dia Yordane. Muthu wagasue azule seso, ahage ha phanga gifua mudi guvula gua iphuta ya enya Isalele. 6 Maseso ene mbaakhala gifua gijiyishilo mukatshi dienu. Mu masugu adi muza gula an’enu* amihula egi: ‘Mukunda natshi mudi nu maseso awa?’ 7 Mbamuawambela egi: ‘Handaga meya a Muta wa Yordane amaganele gutuama dia mushete wa gikotelo wa Yehowa. Tangua mushete wene wakhalele muzawuga Yordane, meya a Muta wa Yordane amaganele. Maseso ene mbaakhala giwungulugilo gia ivo nu ivo mukunda nu enya Isalele.’”
8 Enya Isalele akalegele ndaga gifua luholo luaawambelele Yoshua. Azudile maseso 12 hakatshi na katshi dia Muta wa Yordane gifua luholo Yehowa wawambelele Yoshua, gifua muakhalele guvula gua iphuta ya Isalele. Ayile nawo a ahagele ha fundo akhalele naye gubanda.
9 Yoshua wahagele nji maseso 12 hakatshi na katshi dia muta wa Yordane ha fundo diamaganele nganga-nzambi jiakhalele mubata mushete wa gikotelo; maseso ene wawa guene uu nu mangino.
10 Nganga-nzambi jiakhalele mubata Mushete jiasalele ya gumagana hakatshi na katshi dia Yordane uu nu tangua athu akalegele ndaga jiagasue jiaawambelele Yehowa mu njila ya Yoshua. Akalegele nji ndaga gifua luholo Moize wawambelele Yoshua. Mu tangua diene, athu akhalele muzawuga muphushi. 11 Tangua athu agasue amanesele guzawuga, nganga-nzambi jiazawugile mbala imoshi nu Mushete wa Yehowa ha meso a athu. 12 Enya giphuta gia Ribene nu enya giphuta gia Gade nu gitshinyi gia giphuta gia Manase azawugile gutuama dia enya Isalele ako, akhalele ya gudilondega ha gulua ita gifua luholo Moize waawambelele. 13 Masuta ha mutango wa 40 000 akhalele nu iluilo ya ita azawugile gutuama dia Yehowa, ayile mu mavu a luselenga a Yeliko.
14 Mu lusugu luene, Yehowa wabuishile Yoshua mutuameji wakoma ha meso a enya Isalele agasue, akhalele gumunemesa* muavula masugu agasue a monyo wenji gifua luholo akhalele munemesa Moize.
15 Gungima Yehowa wawambelele Yoshua egi: 16 “Wambela nganga-nzambi jidi mubata mushete wa Gikotelo ha guzoga mu Muta wa Yordane.” 17 Hene Yoshua wawambelele nganga-nzambi egi: “Zogenu mu Muta wa Yordane.” 18 Tangua nganga-nzambi jiakhalele mubata mushete wa gikotelo wa Yehowa jiakatugile hakatshi na katshi dia muta wa Yordane, hadiatele ene ikanzo yawo mu mavu a gimigina, meya a Muta wa Yordane asendesele gubulumuga, azalele mu khulo gifua luholo akhalele thomo.
19 Athu azawugile muta wa Yordane mu lusugu lua kumi lua mbeji ya thomo, ayile muhaga phundo yawo gu Gilegale gu khanda ya mazogelo a kumbi a mudidilo wa Yeliko.
20 Mukunda nu maseso 12 anyi azanguile mu Muta wa Yordane, Yoshua waamaganesele gu Gilegale. 21 Gungima wawambelele enya Isalele egi: “Mu masugu adi muza, gula an’enu amihula egi: ‘Maseso awa adi mukotelesa itshi?’ 22 Mudi naye guakotelesela egi: ‘Enya Isalele azawugile muta wa Yordane mu mavu a gimigina 23 tangua Yehowa Nzambi wenu wamiginyishile meya a Yordane gutuama diawo uu nu tangua azawugile gifua luholo Yehowa Nzambi wenu wamiginyishile meya a Kianga Giabenga gutuama dietu uu nu tangua tuazawugile. 24 Wakalegele ngenyi hagula athu agasue a ha mavu ajiye egi koko gua Yehowa gudi nu ngolo jiavula nu hagula enue mukhale muvuila Yehowa Nzambi wenu woma tangua diagasue.’”