Mukanda wa Thomo wa Gudilanduluila
11 Gungima enya Isalele agasue adibungishile, ayile gudi Davidi gu Hebrone, amuwambelele egi: “Tala! Tudi mahatshi aye.* 2 Tangua Saula wakhalele fumu, aye wakhalele mutuameza masuta a enya Isalele gu ita. Yehowa Nzambi waye waguwambelele egi: ‘Aye mbawubamba athu ami enya Isalele, mbawubua nji fumu wa athu ami enya Isalele.’” 3 Akulu agasue a gu Isalele ayile mumona Davidi gu Hebrone, wakotele nawo gikotelo gutuama dia Yehowa. Gungima amumbile maji ha gubua fumu wa Isalele gifua muazuelele Yehowa mu njila ya Samuele.
4 Gungima Davidi nu enya Isalele agasue ayile gu Yelusalema, yakotelesa egi Yebuse, fundo enya Yebuse akhalele mujinga. 5 Enya Yebuse asendesele gulela Davidi egi: “Mbawushigo mungina mu dimbo dietu nga hazonda!” Uvi Davidi watambuile dimbo diakhalele nu ibayi yakola gu Siona. Dimbo diene diana tamegewa mangino egi Dimbo dia Davidi. 6 Davidi wazuelele egi: “Muthu wagasue wadianga guya muluisa enya Yebuse, mbawubua fumu wa masuta.” Yoabe mun’a Seluya wadiangele guya, gungima wabuile fumu* wa masuta. 7 Gungima Davidi wayile mukhala mu dimbo diakhalele nu ibayi yakola. Gishina giene aditamegele egi Dimbo dia Davidi. 8 Davidi wasendesele gutunga dimbo mu khulo yagasue, sendese gu Gamulundu* uu nu mu khulo yenji. Yoabe watungile luko gitshinyi giko gia dimbo giasalele. 9 Davidi wakhalele mubua nu ngolo jiavula, Yehowa Nzambi wa masuta wakhalele n’enji.
10 Wawa mafumu a masuta a ngolo a Davidi anyi amukuatesele mu ufumu wenji hamoshi nu enya Isalele agasue ha gumubuisa fumu, gifua luholo Yehowa wazuelele mukunda nu Isalele. 11 Wawa majina a masuta a ngolo a Davidi: Yashobama mujigulu wa Hakemoni, wakhalele fumu wa masuta thathu. Mu tangua dimoshi, washiyile athu 300 nu mulumbu wenji. 12 Gungima dienji guakhalele Eleazale mun’a Dodo mujigulu wa Ahohi. Wakhalele mukatshi dia masuta thathu a ngolo. 13 Wakhalele nu Davidi gu Phase-Damima fundo enya Filistiya adibungishile ha gulua ita nu enya Isalele. Guakhalele nu dihia dimoshi dia guzala nu orje guene, masuta alengele mukunda nu enya Filistiya. 14 Uvi Eleazale wamaganele mukatshi dia dihia diene, waluile hagula dihia diene ditambudiwago. Washiyile enya Filistiya, Yehowa waakuatesele* ha gubinga.
15 Mafumu thathu mukatshi dia mafumu 30 abulumugile gudi Davidi gu seso, gu wina dia seso dia Adulama. Mu tangua diene, masuta a enya Filistiya ahagele phundo yawo mu Baba dia Refayime. 16 Davidi wakhalele fundo diayile gudisuega muene, thundu imoshi ya masuta a enya Filistiya akhalele gu Beteleheme. 17 Gungima Davidi wavuile luhungu, wazuelele egi: “Gula nga ngudi nu meya a mu wina didi hehi nu mufulo wa Beteleheme, nga ngudi munua gami!” 18 Hene masuta thathu anginyile mu phundo ya enya Filistiya gu ngolo, athayele meya a mu wina diakhalele hehi nu mufulo wa Beteleheme a abatele gudi Davidi; uvi Davidi watunyile gunua meya ene, waabundudile gutuama dia Yehowa. 19 Wazuelele egi: “Luholo ngana nemesa Nzambi wami ngajiyilego nga hazonda gutshita ndaga eyi, ngajiyilego gunua meya awa, adi gifua mahatshi a athu ayi mumba monyo wawo mu gingonza. Handaga ahagi monyo wawo mu gingonza ha gubata meya awa.” Hene watunyile gunua meya ene. Eji ndaga jiakalegele masuta a Davidi thathu a ngolo.
20 Abishayi phangi’a Yoabe wabuile fumu wa masuta ako thathu, lusugu lumoshi washiyile athu 300 nu mulumbu wenji. Muene nji wajiyiwe muavula gifua masuta thathu a Davidi. 21 Mukatshi dia masuta thathu, muene wakhalele nu lutumbu luavula gubalega masuta mbadi, wakhalele nji fumu yawo; uvi gahetelego mu ndonga ya masuta a Davidi thathu a ngolo.
22 Benaya mun’a Yoyada wakhalele muenya gikhesa,* wakalegele ndaga jiavula jia gushimana gu Kabesele. Washiyile ana mbadi a mala a Ariele muenya gu Moaba, gungima wanginyile mu wina dia meya mu lusugu luakhalele munoga neje, washiyile khoshi. 23 Washiyile nji muenya Ejipitu mumoshi wakhalele waleha diago, wakhalele nu gitala ba kude thano.* Muenya Ejipitu muene wakhalele nu mulumbu ha koko dienji, mulumbu wene wakhalele wakoma gifua mutshi ana haga wanda ha gutunga milele; uvi Benaya wayile gumuluisa nu mutshi, watambuile mulumbu wakhalele ha mago a muenya Ejipitu muene, wamushiyile nawo. 24 Jiji ndaga jiakalegele Benaya mun’a Yoyada, wakhalele nji mujiyiwa muavula gifua masuta a Davidi thathu a ngolo. 25 Wakhalele nu lutumbu luavula gubalega masuta 30, ikhale ngenyi gahetelego mu ndonga ya masuta a Davidi thathu a ngolo. Uvi Davidi wamutombele ha gukhala fumu wa masuta akhalele gumubamba.
26 Masuta a ngolo akhalele mulua ita enyawa: Asaele phangi’a Yoabe, Elehanana mun’a Dodo wa gu Beteleheme, 27 Shamota muenya gu Halode* nu Helese muenya gu Phelone, 28 nu Ira mun’a Ikeshi muenya gu Tekoa nu Abiezele muenya gu Anatota, 29 nu Sibekayi muenya gu Husha nu Ilayi muenya gu Ahohi, 30 nu Mahalayi muenya gu Netofa nu Helede mun’a Bana muenya gu Netofa, 31 nu Itayi mun’a Ribayi muenya gu Gibea mu mavu a enya Benjame nu Benaya muenya gu Philatona, 32 nu Hulayi muenya mu mababa* a Gashi nu Abiele muenya gu Bete-Araba, 33 nu Azemavete muenya gu Bahulime nu Eliyabe muenya gu Shalebima, 34 nu ana a Hasheme muenya gu Gizonite nu Yonatana mun’a Shage muenya Halale, 35 nu Ahiama mun’a Sakale muenya Halale nu Elifale mun’a Ure, 36 nu Hefele muenya gu Makela nu Ahiya muenya gu Phelone, 37 nu Heselayi muenya gu Karmele nu Nalayi mun’a Ezebayi, 38 nu Yowele phangi’a Natana nu Mibahale mun’a Hagili, 39 nu Seleke muenya Amona nu Nahalayi muenya gu Belote, munu wakhalele mubata iluilo ya Yoabe mun’a Seluya; 40 nu Ira nu Galebe enya Iteli, 41 nu Uriya muenya Hete, nu Zabade mun’a Ahelayi, 42 nu Adina mun’a Shiza wa mu giphuta gia Ribene, fumu wa enya giphuta gia Ribene nu athu 30 akhalele n’enji; 43 nu Hanana mun’a Maka nu Yosafata muenya Miteni, 44 nu Uziya muenya gu Ashetalote, Shama nu Yeyele ana a Hotama muenya gu Aloele; 45 nu Yediaele mun’a Shimeli nu Yoha phangi’a Tisite; 46 nu Eliyele muenya gu Mahavime, Yelibayi nu Yoshaviya ana a Elenama nu Yitema muenya gu Moaba; 47 nu Eliyele, Obede nu Yasiele muenya gu Mesobaita.