Yoshua
13 Yoshua wabuile diago muthu wa gukola. Hene Yehowa wamuwambelele egi: “Wabua muthu wa gukola, uvi guasala luko nu gitshinyi giakoma gia mavu mudi naye guzula.* 2 Mavu asala enyawa: khanda yagasue ya enya Filistiya nu khanda yagasue ya enya Geshule 3 (mavu adi musendesa gu gitshinyi gia Muta wa Nile* gidi gu khanda ya mazogelo a kumbi a* Ejipitu uu nu gu mudidilo wa Ekrone gu khanda ya nord, anyi athu akhalele muzuela thomo egi adi mavu a enya Kanana) nu mavu a mafumu thano a enya Filistiya (Gaza, Asedode, Asekelone, Gate, nu Ekrone), nu mavu a enya Avime 4 gu khanda ya sud; mavu agasue a enya Kanana; Meala ya enya Sidona uu nu gu Afeka mu mudidilo wa enya Amole; 5 nu mavu a enya Gebale, nu Libane yagasue gu khanda ya mazogelo a kumbi, sendese gu Bale-Gade gu mbongo ya Mulundu wa Helemona uu nu gu Lebo-Hamate;* 6 nu khanda yagasue ya milundu, sendese gu Libane uu nu gu Miselefote-Mayime; nu mavu agasue a enya Sidona. Mbangukaya athu ene agasue gutuama dia enya Isalele. Udi naye guhana mavu ene gudi Isalele gifua khapho, gifua luholo ngaguwambelele. 7 Henyaha udi naye gukhaphela iphuta 9 nu gitshinyi gia giphuta gia Manase mavu awa gifua khapho diawo.”
8 Gitshinyi giko gia giphuta gia Manase nu enya giphuta gia Ribene nu gia Gade azanguile khapho diawo diaahanele Moize gu khanda ya mazogelo a kumbi a Yordane, gifua luholo Moize muenya mudimo wa Yehowa waahanele: 9 sendese gu Aloele mu mudidilo wa baba dia Alenona,* nu dimbo didi hakatshi na katshi dia baba, nu mafundo agasue a Medeba ashigo nu milundu uu nu gu Dibona; 10 nu membo agasue a Sihona, Fumu wa enya Amole wakhalele muhinyina gu Heshebona uu nu gu mudidilo wa enya Amona; 11 nu Gileade, nu mavu a enya Geshule nu a enya Maka, nu Mulundu wagasue wa Helemona, nu Bashana yagasue uu nu gu Saleka; 12 nu mavu agasue a ufumu wa Oga gu Bashana, munu wakhalele muhinyina gu Ashetalote nu gu Edeleyi. (Wakhalele muenya Refayime wa suga wasalele nu monyo.) Moize waabingile nu waakayele. 13 Uvi enya Isalele akayelego enya Geshule nu enya Maka; gishina giene enya Geshule nu enya Maka wawa gawo ana khala mukatshi dia enya Isalele uu nu mangino.
14 Uvi Moize gahanelego enya Levi khapho. Milambu yana wetshiewa ha tshuya mukunda nu Yehowa Nzambi wa Isalele yene khapho diawo, gifua luholo luaalayele muene.
15 Gungima Moize wahanele enya giphuta gia Ribene khapho diawo fami nu fami; 16 mavu awo akhalele musendesa gu Aloele idi mu mudidilo wa baba dia Alenona, nu dimbo didi hakatshi na katshi dia baba, nu mafundo agasue ashigo nu milundu hehi nu Medeba; 17 Heshebona nu membo enji agasue adi mu mafundo ashigo nu milundu: Dibona, Bamota-Bale nu Bete-Bale-Meona, 18 nu Yahase nu Kedemota nu Mefata, 19 nu Kiriyatayime nu Sibema nu Seleta-Shahale gu mulundu udi hehi nu baba, 20 nu Bete-Pheole nu gu mbongo ya milundu ya Phisega nu Bete-Yeshimota, 21 nu membo agasue a mu mafundo ashigo nu milundu, nu mavu agasue a ufumu wa Sihona Fumu wa enya Amole, munu wakhalele muhinyina gu Heshebona. Moize wamubingile nu Evi nu Lekeme nu Sule nu Hule nu Reba, mafumu a enya Madiana anyi akhalele mu utuameji wa Sihona munu wakhalele mu gifutshi giene. 22 Balama mun’a Beole, munu wakhalele nganga-ngombo, wakhalele mukatshi dia athu anyi enya Isalele ashiyile nu phogo ya khusa. 23 Yordane yakhalele mudidilo wa mavu a enya giphuta gia Ribene; ene mavu ahanewe gifua khapho gu giphuta gia enya Ribene gifua muakhalele fami jiawo nu membo akoma nu membo azonda-zonda akhalele hehi.
24 Gungima Moize wahanele enya giphuta gia Gade khapho, gifua muakhalele fami jiawo. 25 Mavu awo akhalele: Yazele nu membo agasue a gu Gileade, nu gitshinyi gia mavu a enya Amona uu nu gu Aloele idi ha sambua dia Raba. 26 Akhalele nji musendesa gu Heshebona uu nu gu Ramate-Misepha nu gu Betonime, nu sendese gu Mahanayime uu nu gu mudidilo wa Debile; 27 mu baba azudile Bete-Halama nu Bete-Nimela nu Sukote nu Safona, mavu asalele mu ufumu wa Sihona Fumu wa gu Heshebona, mudidilo wakhalele Yordane sendese gu songi ya Kianga gia Kinelete gu khanda ya mbongo,* gu khanda ya mazogelo a kumbi a Yordane. 28 Diene diakhalele khapho dia enya giphuta gia Gade gifua muakhalele fami jiawo nu membo akoma nu membo azonda-zonda akhalele hehi.
29 Gungima Moize wahanele khapho gudi gitshinyi gia giphuta gia Manase, gifua muakhalele fami jiawo. 30 Mavu awo akhalele musendesa gu Mahanayime nu gu Bashana yagasue, nu mavu agasue a ufumu wa Oga Fumu wa gu Bashana nu membo agasue a tenta a Yayile gu Bashana. Membo akoma akhalele 60. 31 Gitshinyi gia Gileade nu Ashetalote nu Edeleyi, membo akhalele mu mavu a ufumu wa Oga gu Bashana, ahanewe gudi ana Makile mun’a Manase, yakotelesa egi gudi gitshinyi gia fami jia ana a Makile.
32 Awa akhalele makhapho Moize waahanele mu mavu a luselenga a Moaba, ha sambua dia Yordane gu khanda ya mazogelo a kumbi a Yeliko.
33 Uvi Moize gahanelego enya giphuta gia Levi khapho. Yehowa Nzambi wa Isalele muene khapho diawo, gifua luholo luaalayele muene.