Mukanda wa Yone
5 Gungima dia ndaga eyi, enya Yuda akhalele nu wano gu Yelusalema. Hene, Yesu wakandugile guene. 2 Gu Yelusalema, hehi nu Mufulo wa Imeme, guakhalele nu gijiba* giana tamegewa mu Hebelu egi Beteseda. Gijiba giene giakhalele giagujietesa nu makunji thano. 3 Athu avula akhalele agubanda moshi’a makunji ene: akhashi, ifofo, ikata* nu enya misongo ya khonzo. 4 —— 5 Uvi guakhalele nu yala mumoshi hene, wana kata gale ivo 38 yabalega. 6 Yesu wamonele muthu muene wagubanda; wajiyile egi wakhalele mukata sendese mualeha. Wamuhudile egi: “Watshigina uve muabonga ba?” 7 Muenya misongo muene wamuvutudile egi: “Fumu, ngushigo nu muthu wajiya gungumba mu gijiba hadi meya mudinyigisa. Hangudi mukamba gubulumuga, muthu muko udi mungubalega muya gutuama diami.” 8 Yesu wamuwambelele gamba: “Zuga! Zangula gitanda giaye, nda gaye.” 9 Mu tangua diene, muthu muene wavile muabonga. Wazanguile gitanda gienji, wasendesele guwenda.
Uvi yakhalele mu Lusugu lua Guhuluguga. 10 Enya Yuda asendesele guwambela muthu munu wasagewe egi: “Mangino idi Lusugu lua Guhuluguga. Mukhuala ushigo muhana muthu njila ha gubata gitanda.” 11 Uvi muene waavutudile egi: “Muthu wangusagi muene wanguwambela egi, ‘Zangula gitanda giaye, nda gaye.’” 12 Ene amuhudile egi: “Nanyi muene waguwambela egi, ‘Zangula gitanda giaye, nda gaye’?” 13 Uvi muthu munu wasagewe gakhalelego gumujiya, handaga Yesu wanginyile mukatshi dia athu avula akhalele hene.
14 Gungima Yesu wamonele muthu muene mu tempelo, wamuwambelele egi: “Tala, henyaha wasagewa, ukalagalago luko gubola hagula ndaga yabola igubuilago.” 15 Muthu muene wayile muwambela enya Yuda egi Yesu wamusagele. 16 Gishina giene enya Yuda akhalele mumonesa Yesu lamba handaga wakhalele mukalagala ndaga jiji mu Lusugu lua Guhuluguga. 17 Uvi muene waawambelele egi: “Tata wami udi mulandula gukalagala mudimo uu nu henyaha, ame nji ngudi naye gulandula gukalagala mudimo.” 18 Hene enya Yuda asendesele gukamba luko luholo lua gumushiya, handaga muene gakhalelego munemesa mukhuala wa Lusugu lua Guhuluguga nu wakhalele mutamega Nzambi egi Sh’enji; ngenyi wakhalele mumonesa egi udi luholo lumoshi nu Nzambi.
19 Yesu waawambelele egi: “Ngudi gumiwambela giamatshidia egi Mona gajiyilego gutshita nga ndaga imoshi mu gutshigina guenji. Uvi wana tshita phamba ndaga jiana mona muene Tata mukalagala. Handaga ndaga jiagasue jiana kalagala Tata, Mona nji wana gujikalagala luholo lumoshi. 20 Handaga Tata wana zumba Mona, wana gumudijiga ima yagasue yana kalagala muene. Mbawumudijiga nji midimo iko yakoma gubalega eyi, hagula enue mudihule. 21 Handaga luholo Tata gana fuzumuna athu a gufua ha guahana monyo, Mona nji wana hana monyo gudi muthu wagasue watshigina muene. 22 Handaga Tata ganago gusophesa nga muthu mumoshi. Uvi wahanele ginemo giagasue gia gusophesa gudi Mona, 23 hagula athu agasue anemese Mona gifua luholo ana nemesa Tata. Handaga muthu wagasue gashigo munemesa Mona, muene gashigo munemesa Tata wamutumine. 24 Ngudi gumiwambela giamatshidia egi, muthu wagasue wavua mbimbi yami nu washa gutshigina gudi Tata wangutumine, muene udi nu monyo wa ivo nu ivo. Muene mbagashigo musophesewa handaga wahuluishiwa gale mu gufua, waheta monyo.
25 “Ngudi gumiwambela giamatshidia egi, tangua didi muza, tangua diene dienyedi, athu a gufua mbaavua dijui dia Mun’a Nzambi. Athu anyi mbaategelela muabonga, mbaaheta monyo. 26 Handaga Tata udi nu ngolo jia guhana monyo.* Wahanele nji Mona ngolo jia guhana monyo. 27 Wamuhanele nji ufumu wa gusophesa, handaga muene udi Mun’a muthu. 28 Mudihudigo mukunda nu ndaga yene, handaga tangua didi muza, athu agasue adi mu malumba* mbaavua dijui dienji 29 nu mbaazoga. Athu anyi akalegele ndaga jiabonga, mbaafuzumuga ha guheta monyo. Uvi anyi akalegele ndaga jiabola, mbaafuzumuga ha gusophesewa. 30 Ame ngajiyilego gutshita nga ndaga imoshi mu gutshigina guami. Ngana sophesa ha gutadila ndaga ngudi muvua. Usopheshi wami udi watagana, handaga nganago gukamba gukalagala gutshigina guami, uvi ngana kamba gukalagala gutshigina gua muthu wangutumine.
31 “Gula ame hakhami ngudi muzuela ndaga jiangutadila, mbimbi jiami jishigo jia giamatshidia. 32 Gudi nu muthu muko udi muzuela ndaga jiami. Ngudi mujiya egi ndaga jidi muzuela muene mukunda nu ame jidi jia giamatshidia. 33 Enue muatumine athu gudi Yone. Muene walongesele giamatshidia. 34 Uvi ame ngushigo mutshigina ndaga jidi muzuela muthu. Uvi ngudi muzuela ndaga eji hagula enue muhuluishiwe. 35 Muthu muene wakhalele muenda udi mulema nu udi muhenya. Mu tangua diazonda, enue muatshiginyile gusuanguluga muavula nu kiajiji gienji. 36 Ngudi nu ndaga imoshi ya ndando gubalega inyi yazuelele Yone. Handaga midimo yanguhanele Tata ha gukalagala, ingudi mukalagala ame, idi mumonesa egi Tata wangutumine. 37 Tata wangutumine, muene hakhenji wazuelele ndaga mukunda nu ame. Enue khenji muavuile galego dijui dienji nu khenji muamonele galego luholo ludi muene. 38 Enue mushigo nu mbimbi yenji mukatshi dienu, handaga muanago gusha gutshigina gudi muthu watumine muene.
39 “Enue mudi mukamba Mukanda wa Nzambi handaga mudi mutangiza egi mbamuheta monyo wa mayilago mu njila ya mukanda wene. Mukanda wene nji, wene wana zuela ndaga jiangutadila ame. 40 Uvi enue mushigo mutshigina guza gudi ame hagula muhete monyo. 41 Ame nganago gutshigina lutumbu ludi mukatuga gudi athu. 42 Uvi ngudi mujiya muabonga egi, enue mushigo nu guzumba gua Nzambi mukatshi dienu. 43 Ngajile mu jina dia Tata wami, uvi enue muanguyambelego. Gula muthu muko waza mu jina dienji hakhenji, enue mbamumuyamba. 44 Luholo lutshi muajiya gutshigina, hamudi mutshigina lutumbu gudi athu, nu mushigo mukamba lutumbu ludi mukatuga gudi Nzambi mumoshi ha mumoshi? 45 Mutangizago egi ame mbangumifunda gudi Tata. Gudi nu muthu wana gumifunda, Moize, munu enue muana gudifelela. 46 Giamatshidia, gula nga muamonesele gutshigina gudi Moize, nga muamonesa nji gutshigina gudi ame, handaga muene wasonegele ndaga jiangutadila ame. 47 Gula enue muatshiginyilego ndaga jiasonegele muene, na luholo lutshi mbamutshigina giwa ndaga ngudi muzuela?”