Mukanda wa Thomo wa Gudilanduluila
12 Wawa athu ayile gudi Davidi gu Sikelage guayile muene gudisuega hakhalele muene mulenga Saula mun’a Kishi; athu ene akhalele mukatshi dia masuta a ngolo anyi amukuatesele gu ita. 2 Akhalele nu mata a manana, akhalele mujiya gusonona maseso nu lanse, nga mifula nu mata a manana gu koko gua madia nga gua mahidi. Akhalele aphangi’a Saula, enya giphuta gia Benjame. 3 Ahiezele wakhalele fumu wawo hamoshi nu Yoashe, muyadi’awo tshima akhalele ana a Shema muenya gu Gibea; Yeziele nu Phelete ana a Azemavete, nu Beleka, nu Yehu muenya gu Anatota, 4 nu Ishemaya muenya gu Gibeona yago wakhalele suta dia ngolo mukatshi dia athu 30, wakhalele nji holu dia athu 30; guakhalele nji nu Yelemiya, nu Yahaziele, nu Yohanana nu Yozabada muenya gu Gedela, 5 nu Eluzayi, nu Yelimota, nu Bealiya, nu Shemaliya, nu Shefatia wa gu Halife, 6 nu Elkana, nu Yishiya, nu Azalele, nu Yoezele, nu Yashobama ajigulu a Kora; 7 nu Yoela, nu Zebadia ana a Yelohama muenya gu Gedole.
8 Athu ako a mu giphuta gia Gade ayile gu khanda ya Davidi, ayile gumusanga fundo diayile gudisuega muene mu mavu a luselenga; akhalele masuta a ngolo, masuta alongugile ha gulua ita, akhalele mujiya gulua nu tshibu yakoma nu mulumbu. Phala jiawo jiakhalele gifua jia khoshi. Akhalele nji muzula phushi gifua tuseshi tua mu milundu. 9 Ezele wakhalele fumu, Obadia muthu wa mbadi, Eliyabe muthu wa thathu, 10 Mishamana muthu wa nguana, Yelemiya muthu wa thano, 11 Atayi muthu wa 6, Eliyele muthu wa 7 12 Yohanana muthu ya 8, Elezabada muthu wa 9, 13 Yelemiya muthu wa 10, Makebanayi muthu wa 11. 14 Athu ene akhalele enya giphuta gia Gade, akhalele mafumu a masuta. Suta dialeba mukatshi diawo diakhalele nu ngolo jia guluisa masuta 100, Suta diakola mukatshi diawo diakhalele nu ngolo jia guluisa masuta 1 000. 15 Athu awa, ene azawugile muta wa Yordane mu mbeji ya thomo tangua muta wakhalele wa guzala uu nu mu khulo. Akayele athu agasue akhalele mujinga mu mafundo ashigo nu milundu, gu khanda ya mazogelo a kumbi nu gu khanda ya mayilo a kumbi.
16 Athu ako a mu giphuta gia Benjame nu gia Yuda, ayile nji musanga Davidi ha fundo dia disuegele muene. 17 Gungima Davidi wayile guatagana, waawambelele egi: “Gula muaji mu guhuima ha gungukuatesa, mbamubua mafuta ami. Uvi gula muaji ha gunguhana gudi mbalagaji jiami uvi ame ngatshitshilego gubola, Nzambi wa akhakh’etu udi mumona ndaga yene, mbawusophesa mulonga wene.” 18 Gungima nyuma yajile* gudi Amasayi fumu wa athu 30, wazuelele egi:
“Oo Davidi tudi athu aye, Oo mun’a Yese tudi gu khanda yaye.
Khala mu guhuima, khala mu guhuima, muthu wagasue udi gugukuatesa akhale nji mu guhuima,
Handaga Nzambi waye udi gugukuatesa.”
Hene Davidi waayambele muabonga, waahagele mukatshi dia mafumu a masuta.
19 Athu ako a mu giphuta gia Manase alengele, ayile gu khanda ya Davidi tangua diayile muene nu enya Filistiya ha guluisa Saula. Uvi Davidi gakuateselego enya Filistiya, handaga mafumu a enya Filistiya atele maga mukatshi diawo, gungima amukayele, azuelele egi: “Mbawutulenga ha guvutuga gudi fumu wenji Saula, mbawumba monyo wetu mu gingoza.” 20 Athu a mu giphuta gia Manase anyi alengele ayile gudi Davidi tangua diayile muene gu Sikelage enyawa: Adena, Yozabada, Yediaele, Mikaele, Yozabada, Elihu nu Siletayi; akhalele mafumu a athu 1 000 a mu giphuta gia Manase. 21 Akuatesele Davidi ha guluisa hunji dia nzangi handaga mukut’awo agasue akhalele masuta a ngolo nu a gikhesa, abuile mafumu a masuta. 22 Lusugu nu lusugu athu akhalele muza gudi Davidi ha gumukuatesa, uu nu tangua phundo yenji yabuile yakoma gifua phundo ya Nzambi.
23 Gugu guvula gua mafumu a athu akhalele nu iluilo ha gulua ita, anyi ayile gudi Davidi gu Hebrone ha gumuhana ufumu wa Saula gifua muazuelele Yehowa. 24 Mala a mu giphuta gia Yuda anyi akhalele mubata tshibu jiakoma nu milumbu akhalele 6 800, akhalele a gudilonda ha gulua ita. 25 Mu giphuta gia Simeone masuta a ngolo nu a gikhesa akhalele 7 100.
26 Mu giphuta gia Levi akhalele 4 600. 27 Yoyada wakhalele fumu wa ana a Alona, wakhalele nu athu 3 700, 28 nu Zadoke muvuala wa yala wakhalele nu ngolo nu gikhesa, nu mafumu 22 a fami jia mu giphuta giawo.
29 Mu giphuta gia Benjame aphangi a Saula akhalele 3 000, avula mukatshi diawo akhalele thomo mubamba ima ya mu inzo ya Saula. 30 Mu giphuta gia Efrayime mala a ngolo nu a gikhesa akhalele 20 800, akhalele enya lutumbu mu fami jia mu giphuta giawo.
31 Mu gitshinyi gia giphuta gia Manase athu atombewe ha guza mubuisa Davidi fumu akhalele 18 000. 32 Mu giphuta gia Isakale akhalele nu mafumu 200 akhalele mukotelesa muabonga ndaga, akhalele nji mujiya ndaga enya Isalele adi naye gutshita nu tangua adi naye guyitshita. Ene akhalele mutuameza aphangi’awo agasue. 33 Mu giphuta gia Zabulona guakhalele nu athu 50 000 akhalele mujiya gulua ita, alongesewe muabonga, akhalele hehi ha gulua ita nu iluilo ya maluholo agasue. Mukut’awo agasue ayile gudi Davidi, akhalele a gujinginyina* gudi muene. 34 Mu giphuta gia Nefetali mafumu akhalele 1 000, akhalele nu athu 37 000 akhalele mubata tshibu jiakoma nu milumbu. 35 Mu giphuta gia Dane athu alongesewe muabonga ha gulua, anyi akhalele hehi ha gulua ita akhalele 28 600. 36 Mu giphuta gia Asele athu akhalele mujiya gulua ita anyi akhalele hehi ha gulua akhalele 40 000.
37 Masuta anyi akatugile ha sambua diko dia Yordane a mu giphuta gia Ribene nu gia Gade nu gitshinyi gia giphuta gia Manase akhalele 120 000, akhalele nu iluilo ya ita ya maluholo agasue. 38 Mukut’awo agasue akhalele mujiya gulua ita, akhalele a gudilondega ha guya mulua ita, ajile nu mutshima wawo wagasue gu Hebrone ha guhaga Davidi fumu ya Isalele yagasue. Enya Isalele ako agasue akhalele mutshigina* nji guhaga Davidi fumu. 39 Akhalele guene masugu thathu nu Davidi, adile, anuile ima yaalondele aphangi’awo. 40 Athu anyi akhalele hehi, nu anyi akhalele gualeha a mu giphuta gia Isakale, gia Zabulona nu gia Nefetali akhalele mubata ima ya gudia holu dia phunda nu dia shamo nu dia ngombe. Ajile nu phupha, nu bagato alondewe nu mabundu a figi a gimigina, nu a vinyo, nu matombe, nu maji, nu ngombe, nu imeme yavula diago handaga enya Isalele akhalele nu gusuanguluga.