Mukanda wa Mbadi wa Gudilanduluila
12 Tangua ufumu wa Roboama wajigamesewe nu habuile muene nu ngolo, wabembele gulandula mikhuala ya Yehowa, enya Isalele agasue nji atshitshile gifua muene. 2 Mu givo gia thano gia uhinyinyi wa Fumu Roboama, Fumu Shishake wa gu Ejipitu wajile muluisa Yelusalema handaga enya Isalele asalelego a gujinginyina gudi Yehowa. 3 Wakhalele nu phusu-phusu jia ita 1 200 nu awendeshi a tubalu 60 000, wakhalele nji nu masuta avula diago anyi akatugile n’enji gu Ejipitu: enya gu Libia, enya Suki nu enya gu Etiopi. 4 Watambudile membo a gu Yuda akhalele nu ibayi yakola, gu gisugishilo wahetele gu Yelusalema.
5 Profete Shemaya wayile gudi Roboama nu gudi mafumu a gu Yuda anyi adibungishile gu Yelusalema mukunda nu Shishake. Waawambelele egi: “Yehowa wazuela egi: ‘Enue muangubembele, hene ame nji ngamibemba ha mago a Shishake.’” 6 Tangua mafumu a gu Isalele nu fumu Roboama avuile ndaga yene, adibulumuishile, azuelele egi: “Yehowa wakalagala ndaga mu luholo luatagana.” 7 Hamonele Yehowa egi adibulumuisa, Yehowa wawambelele Shemaya egi: “Adibulumuisa. Mbangushigo guashiya, gualeha ndo ngudi guahuluisa. Mbangushigo muvila Yelusalema khabu mu njila ya Shishake. 8 Uvi ene mbaabua enya mudimo enji, hagula ajiye gudisha gudi hakatshi dia gungukalegela ame nu gukalegela mafumu* a ifutshi iko.”
9 Fumu Shishake wa gu Ejipitu wajile muluisa Yelusalema. Wazudile umonyi wa mu inzo ya Yehowa nu umonyi wa mu inzo ya fumu. Wazudile ima yagasue nu tshibu jiagasue jia wolo jialondele Salomo. 10 Hene Fumu Roboama walondele tshibu jia kuivre ha fundo dia tshibu jinyi jiazudiwe, wajihanele mafumu a masuta* akhalele mubamba mufulo wa inzo ya fumu. 11 Tangua fumu wakhalele muza mu inzo ya Yehowa, masuta akhalele mubamba mufulo akhalele mungina, abatshi tshibu jiene, gungima akhalele gujivutula gu sugu ya masuta akhalele mubamba mufulo. 12 Fumu wadibulumuishile, gishina giene Yehowa gamuvuidilego luko khabu, gashiyilego diago dimbo diagasue. Gu Yuda guakhalele nji nu ima iko yabonga.
13 Fumu Roboama wakolesele ufumu wenji gu Yelusalema, walanduile nji guhinyina. Roboama wakhalele nu ivo 41 habuile muene fumu, wahinyine ivo 17 gu Yelusalema, dimbo diatombele Yehowa mukatshi dia iphuta yagasue ya Isalele ha guhaga jina dienji. Jina dia gin’a fumu Roboama diakhalele Naama, wakhalele muenya Amona. 14 Uvi Roboama watshitshile ndaga jiabola, handaga gazudilego desizio mu mutshima wenji ha gukamba Yehowa.
15 Lumene lua Roboama sendese gu gisendeselo uu nu gu suga ludi lua gusonega mu ndaga jiasonegele profete Shemaya nu Ido, muthu wakhalele mumona vizio. Ndaga jiene jidi mu mikanda ya senga* ya fami. Roboama nu Yeloboama akhalele gudiluisa tangua diagasue. 16 Gungima Roboama wafuile gifua muafuile akhakh’enji, amufundjile mu Dimbo dia Davidi; mun’enji Abiya wabuile fumu ha fundo dienji.