Mukanda wa Mbadi wa Gudilanduluila
11 Tangua Roboama wahetele gu Yelusalema, wabungishile mbala imoshi mala 180 000 akhalele mujiya gulua ita* a mu giphuta gia Yuda nu gia Benjame ha guya muluisa enya Isalele ha guvutula ufumu gudi Roboama. 2 Gungima Yehowa wawambelele Shemaya, muthu wa Nzambi wa giamatshidia egi: 3 “Wambela Roboama mun’a fumu Salomo wa gu Yuda, nu enya Isalele agasue adi mu mavu a enya giphuta gia Yuda nu a enya giphuta gia Benjame egi: 4 ‘Yehowa wazuela egi: “Muyigo muluisa aphangi’enu. Muthu nu muthu avutuge gumbo dienji handaga ame ngatshitshi egi ndaga yene ikalegewe.”’” Athu atumagele Yehowa, avutugile gu jinzo jiawo, ayilego muluisa Yeloboama.
5 Roboama wakhalele mujinga gu Yelusalema, watungile nji membo akhalele nu ibayi yakola mu mavu a Yuda. 6 Membo ene akhalele: Beteleheme nu Etame nu Tekoa, 7 nu Bete-Sule nu Soko nu Adulama, 8 nu Gate nu Malesha, nu Zife 9 nu Adolayima, nu Lakishe nu Azeka, 10 nu Sola nu Ayalona nu Hebrone. Membo awa akhalele nu ibayi yakola mu mavu a enya giphuta gia Yuda nu a enya giphuta gia Benjame. 11 Wakolesele luko membo akhalele nu ibayi yakola, wahagele bakomanda mu membo ene, waahanele nji ima ya gudia nu maji nu matombe. 12 Wahagele tshibu jiakoma nu milumbu mu dimbo nu dimbo; wakolesele diago muavula membo ene. Muene walanduile guhinyina enya giphuta gia Yuda nu gia Benjame.
13 Nganga-nzambi nu enya Levi anyi akhalele gu Isalele yagasue, akatugile mu mavu awo, ajile ha gumuhana mago. 14 Enya Levi abembele matemu awo nu mavu awo, ajile gu Yuda nu gu Yelusalema handaga Yeloboama nu an’enji a atunyishile ha gutshita mudimo wawo wa ginganga-nzambi mukunda nu Yehowa. 15 Yeloboama watombele nganga-nzambi jienji mukunda nu mafundo a gukombelela* nu mukunda nu nzambi jia isongo jiakhalele gifua khombo* nu mukunda nu isongo ya ana a ngombe yalondele muene. 16 Athu a mu iphuta yagasue ya Isalele anyi akhalele mutshita yagasue ha gukamba Yehowa Nzambi wa Isalele mu mutshima wawo, ayile nu nganga-nzambi gu Yelusalema ha guhana milambu gudi Yehowa Nzambi wa akhakh’awo. 17 Akolesele ufumu wa gu Yuda ivo thathu, akuatesele nji Roboama mun’a Salomo; mu ivo yene thathu, akhalele mulandula gifezegeselo gia Davidi nu gia Salomo.
18 Roboama wazudile mukhetu mu ulo jina dienji Mahalata. Sh’a Mahalata wakhalele Yelimota mun’a Davidi, gin’enji wakhalele Abihayile mun’a Eliabe, mujigulu wa Yese. 19 Gungima mukhetu muene wamuvualele ana awa a mala: Yewushe, Shemaliya nu Zahama. 20 Wazudile nji mukhetu muko mu ulo, jina dienji diakhalele Maka, mujigulu wa Abasaloma. Gungima Maka wavualele Abiya nu Atayi nu Ziza nu Shelomita. 21 Roboama wakhalele muzumba Maka mujigulu wa Abasaloma muavula gubalega akhetu agasue azudile muene mu ulo nu akaji’enji ako; handaga wazudile akhetu 18 mu ulo, wakhalele nji nu akhetu ako 60. Wavualele ana a mala 28 nu ana a akhetu 60. 22 Roboama watombele Abiya mun’a Maka ha gukhala mutuameji mukatshi dia aphangi’enji a mala, handaga wakhalele mutshigina gumubuisa fumu. 23 Uvi watshitshile ndaga nu gutema, watumile* an’enji ako a mala gu khanda jiagasue jia mavu a Yuda nu a Benjame mu membo agasue akhalele nu ibayi yakola; waahanele ima ya gudia yavula, wazudile nji akhetu avula mukunda nu ene.