Mukanda wa Luka
9 Gungima, Yesu watamegele apostolo enji 12, waahanele ngolo nu ufumu wa gukaya bademo agasue nu wa gusaga enya misongo. 2 Waatumile ha gulongesa Ufumu wa Nzambi nu gusaga athu. 3 Waawambelele gamba: “Muzangulago nga gima gimoshi ha guya nagio mu njila, nga muhango, nga kuba* dia gubatele ima, nga dipha nga falanga;* luko, muyigo nu milele mbadi.* 4 Uvi gula muthu wamiyamba gumbo dienji, khalenu guene uu nu tangua mbamukatuga. 5 Fundo diagasue athu mbaatuna gumiyamba, tangua mudi mukatuga mu dimbo diene, bundenu malu enu ha gukatula fuphi gifua gijiyishilo mukunda nu athu ene.” 6 Hene, alandudi akatugile, ayile mu membo mu mafundo agasue mulongesa lukuma luabonga lua Ufumu nu gusaga athu.
7 Helode,* guvelenele wa distrike dia Galilea,* wavuile ndaga jiakhalele mukalegewa. Hene wabuile tunga-tunga handaga athu ako akhalele muzuela egi Yone wafuzumuga gu gufua. 8 Uvi athu ako akhalele muzuela egi Eliya, uvi ako egi profete mumoshi wa mu tangua dikulu wafuzumuga. 9 Helode wazuelele egi: “Yone ngamubatuile muto. Henyaha muthu ngudi muvua mukalagala ndaga eji udi nanyi?” Hene, wakhalele mukamba ha gumumona.
10 Tangua diavutugile apostolo, awambelele Yesu ndaga jiagasue jinyi akalegele. Muene waazanguile, wayile nawo gu dimbo dimoshi diana tamegewa egi Betesayida; wayile mukhala nawo ene hakhawo. 11 Uvi athu avula ajiyile, amulanduile. Muene waayambele nu guzumba guagasue, wasendesele gualongesa ndaga jia Ufumu wa Nzambi, wasagele nji athu anyi akhalele nu misongo. 12 Tangua ahetele mu ngueze, apostolo 12 ayile gudi muene, amuwambelele egi: “Bemba athu hagula aye mu membo a hehi nu mu ferme ha gukamba mafundo a gubanda nu ima ya gudia, handaga fundo tudi didi gualeha nu dimbo.” 13 Uvi muene waawambelele gamba: “Enue hakhenu ahanenu ima ya gudia.” Ene amuvutudile egi: “Tushigo nga nu gima, tudi phamba nu mapha thano nu jishui mbadi, zuela egi esue hakhetu tuye tusumbe ima ya gudia mukunda nu athu awa agasue.” 14 Mala akhalele hehi nu 5 000. Uvi Yesu wawambelele alandudi enji egi: “Alezenu ha gukhala hashi mu mahunji a athu 50.” 15 Alandudi akalegele gifua luholo luawambelele muene, athu agasue akhalele hashi. 16 Yesu wazanguile mapha thano nu jishui mbadi, watalele mu dilu, wahanele Nzambi mersi. Gungima waabatuile, wasendesele guahana gudi alandudi enji hagula ene a ahane gudi athu avula. 17 Mukut’awo agasue adile nu akutshile. Gungima anonele itshinyi yasalele, yakhalele inda 12 ya guzala.
18 Gungima, hakhalele muene mukombelela hakhenji, alandudi ajile gudi muene. Waahudile gamba: “Athu avula adi muzuela egi ame ngudi nanyi?” 19 Ene amuvutudile egi: “Athu ako adi muzuela egi Yone Mubatiji, ako egi Eliya, uvi ako nji egi profete mumoshi wa mu tangua dikulu wafuzumuga.” 20 Gungima waahudile egi: “Uvi enue giwa mudi muzuela egi ngudi nanyi?” Phetelo wavutuile egi: “Aye udi Klisto wa Nzambi.” 21 Waatunyishile mangololo, waalezele egi awambelago nga muthu mumoshi ndaga eyi. 22 Wazuelele luko egi: “Mun’a muthu udi naye gumona malamba avula, mbawutunyiwa gudi malemba a athu nu mafumu a nganga-nzambi nu alongeshi a mikhuala, gungima mbawushiyiwa. Uvi mu lusugu lua thathu muene mbawufuzumuga.”
23 Gungima waawambelele mukut’awo agasue egi: “Gula muthu watshigina gungulandula, udi naye gudituna, azudi mutshi* wenji wa lamba lusugu nu lusugu, alandula gunguhata. 24 Handaga muthu wagasue watshigina guhuluisa monyo wenji, mbawuwutotesa. Uvi muthu wagasue watotesa monyo wenji mukunda nu ame, muene mbawuwuhuluisa. 25 Gubonga gutshi muthu wajiya guheta gula waheta mavu agasue uvi watotesa monyo wenji nga ndo wawubolesa? 26 Handaga muthu wagasue wanguvila musonyi nu wavua musonyi mukunda nu mbimbi jiami, Mun’a muthu nji mbawumuvuila musonyi tangua mbadiza muene mu lutumbu luenji nu lua Sh’enji nu lua anjelo a gijila. 27 Uvi ngudi gumiwambela giamatshidia egi athu ako mukatshi dia athu adi haha, mbaashigo mufua gutuama egi amone thomo Ufumu wa Nzambi.”
28 Hazuelele muene mbimbi eji, masugu nage gungima, wazanguile Phetelo nu Yone nu Yakoba, wakandugile nawo gu mulundu ha gukombelela. 29 Hakhalele muene mukombelela, phala yenji yasombegesele, milele yenji yabuile yaphelegeta diago. 30 Sagumugu, mala mbadi akhalele muta n’enji maga. Mala ene akhalele Moize nu Eliya. 31 Amuenegene mu lutumbu, asendesele guzuelela guya guenji guakhalele naye gutagenesewa gu Yelusalema. 32 Phetelo nu alandudi ako mbadi akhalele gu tulo tuakola, uvi tangua diazugile ene, amonele lutumbu luenji nu mala anyi mbadi akhalele agumagana n’enji. 33 Hakhalele mala anyi mukatuga gudi Yesu, Phetelo wawambelele Yesu egi: “Mulongeshi, idi ndaga yabonga egi tukhale haha. Tutungenu tenta thathu, iko yaye, iko ya Moize, iko ya Eliya.” Muene gakhalelego mukotelesa ndaga akhalele muzuela. 34 Uvi hakhalele muene muzuela ndaga eji, tuta diazogele, diasendesele guatshuiga. Tangua tuta diene diaatshuigile, avuile woma. 35 Gungima, dijui diakatugile mu tuta diene, diazuelele egi: “Yowu Mun’ami ngatombele, mutegelelenu.” 36 Tangua dijui diakhalele muzuela, Yesu wasalele hakhenji. Alandudi ahenele tedie. Mu masugu anyi, awambelelego nga muthu mumoshi ndaga jinyi amonele.
37 Mu lusugu lualanduile, hakhalele ene mubulumuga gu mulundu, athu avula ajile mutagana Yesu. 38 Muthu mumoshi wazuelele mukatshi dia athu egi: “Mulongeshi, ngagububila, kuatesa mun’ami wa yala, handaga muene udi phamba mona mumoshi ngudi n’enji. 39 Nyuma imoshi yabola yana gumukuata; gula yamukuata, wana kaluluga mbala imoshi, yana gumukonyesa uu nu tangua ana zoga mafulo-fulo gu kano. Yana gumunamenesa thomo, gungima imubembi giwa mu lamba. 40 Ngatogi alandudi aye ha gukaya nyuma yene, uvi abingilego.” 41 Yesu wazuelele gamba: “Gindongo gia athu abola ashigo nu gutshigina, matangua guvula gutshi ngudi naye gukhala n’enu nu gukolesela mukunda nu khadilo dienu? Iza nu mun’aye haha.” 42 Uvi nu mu tangua dinyi mona muene wakhalele musuena gudi Yesu, demo diamubuishile hashi, diamukonyesele mangololo. Uvi Yesu wabalele* nyuma yabola, wasagele mona yala muene, wamuvutudile gudi sh’enji. 43 Athu agasue adihudile mangololo mukunda nu ngolo jia gushimana jia Nzambi.
Luholo athu agasue akhalele gudihula mukunda nu ndaga jiagasue jiakhalele mukalagala Yesu, muene wawambelele alandudi enji egi: 44 “Tegelelenu muabonga nu kuatenu mbimbi eji, Mun’a muthu mbawuhanewa ha mago a athu.” 45 Uvi ene akoteleselego ndaga yakhalele muene muzuela, ndaga yene yasuegewe hagula ene ayikotelesago. Luko, akhalele muvua woma ha gumuhula muhu mukunda nu ndaga yene.
46 Gungima, asendesele gumana ha gujiya gula nanyi udi wabalega gukoma mukatshi diawo. 47 Yesu wajiyile ndaga jiakhalele ene mutangiza, hene, wazanguile mona wazonda, wamuhagele gu khanda yenji, 48 gungima, waawambelele egi: “Muthu wagasue wayamba mona yowu wazonda mukunda nu jina diami, wanguyamba nji ame; muthu wagasue wanguyamba ame, wayamba nji muthu wangutumine. Handaga muthu udi wagudibulumuisa* mukatshi dienu agasue, muene udi muthu wabalega gukoma.”
49 Gungima, Yone wamuwambelele egi: “Mulongeshi, tuamonyi muthu mumoshi mukaya bademo mu jina diaye. Tuakambi gumutunyisa handaga muene ganago gugulandula hamoshi nu esue.” 50 Uvi Yesu wamuwambelele gamba: “Mumutunyisago, handaga muthu yonu gashigo gumituna, udi gu khanda yenu.”
51 Tangua Yesu wakhalele naye guya mu dilu diasuenele hehi,* hene wazudile desizio dia guya gu Yelusalema. 52 Wadiangele gutuma alandudi enji. Ene ayile, anginyile mu dimbo dimoshi dia enya Samaliya hagula alondege guza guenji. 53 Uvi athu a mu dimbo diene amuyambelego, handaga muene wakhalele nu desizio dia guya gu Yelusalema.* 54 Tangua alandudi enji, Yakoba nu Yone amonele ndaga yene, azuelele egi: “Fumu, watshigina egi tutamege tshuya tua mu dilu tuze tuashiye ba?” 55 Uvi Yesu wabalumugile, waabalele.* 56 Ene ayile mu dimbo diko.
57 Hakhalele ene muya mu njila, muthu mumoshi wamuwambelele egi: “Mbangugulandula guagasue mbawuya.” 58 Uvi Yesu wamulezele egi: “Mikenge idi nu mawina ayo, tunjila tudi nu yanzu yato, uvi Mun’a muthu gashigo nu fundo dia gubandesa muto wenji.” 59 Gungima wawambelele muthu muko egi: “Iza ungulandule.” Uvi muthu muene wamuvutudile egi: “Fumu, ngubembe nguye thomo ngufunde gale tata.” 60 Uvi Yesu wamuwambelele egi: “Bemba mvumbi jifunde mvumbi jiawo, uvi aye nda ulongese Ufumu wa Nzambi.” 61 Muthu muko wamulezele egi: “Fumu, mbangugulandula, uvi ngubembe nguye gale thomo nguditendelele nu enya fami yami.” 62 Yesu wamuwambelele egi: “Muthu wakuatshi gale gima gia gudimina mahia, gula watala ima idi gungima, gashigo watagana mukunda nu Ufumu wa Nzambi.”