Mukanda wa Mbadi wa Gudilanduluila
7 Tangua Salomo wamanesele gutshita gisambu, tshuya tuakatugile mu dilu tuakondele mulambu wa guwotshia nu milambu iko, lutumbu lua Yehowa luazalele mu inzo. 2 Nganga-nzambi jiakhalelego nu luholo lua gungina mu inzo ya Yehowa handaga lutumbu lua Yehowa luazalele mu inzo ya Yehowa. 3 Tangua enya Isalele agasue amonele tshuya mubulumuga, nu luholo lutumbu lua Yehowa luakhalele holu dia inzo, ashiwugile phala hashi, afugamele, ahanele Yehowa mersi, “handaga muene udi wabonga; guzumba guenji gua giamatshidia guana khala mayilago.”
4 Hene fumu nu athu agasue ahanele milambu gutuama dia Yehowa. 5 Fumu Salomo wahanele milambu, ngombe 22 000 nu imeme 120 000. Luene luholo fumu nu athu agasue akalegele wano tangua amanesele gutunga inzo ya Nzambi wa giamatshidia. 6 Nganga-nzambi jiakhalele jia gumagana mu mafundo awo a midimo, hamoshi nu enya Levi anyi akhalele nu ima ya gushigila miziki inyi yakhalele guakuatesa ha guyimbila Yehowa ngimbo. (Fumu Davidi walondele ima yene ya gushigila miziki ha guhana Yehowa mersi,—“handaga guzumba guenji gua giamatshidia guana khala mayilago,”—mu tangua diakhalele Davidi mutumbuisa Nzambi hamoshi nawo.*) Nganga-nzambi jiakhalele mushiga phungi mu dijui diakola gutuama dia enya Levi tangua enya Isalele akhalele a gumagana.
7 Gungima, Salomo waphelegetesele* fundo dinyi diakhalele hakatshi n’a katshi dia gibanzala giakhalele gutuama dia inzo ya Yehowa, handaga wakhalele naye guhana milambu ya guwotshia, nu maji a shitu jia milambu ya guhuima; giwotshielo gia kuivre gialondele Salomo giakhalele giazonda mukunda nu milambu ya guwotshia nu milambu ya mbuto nu maji a shitu. 8 Mu tangua diene Salomo wakalegele wano masugu 7 hamoshi nu enya Isalele agasue, athu avula diago akatugile sendese gu Lebo-Hamate* uu nu mu Baba* dia Ejipitu. 9 Uvi mu lusugu* lua 8 akalegele gudibungisa gua ndando yavula, handaga akalegele wano masugu 7 ha gusendesa gukalegela giwotshielo. Gungima akalegele nji wano wa isasa masugu 7. 10 Mu lusugu lua 23 lua mbeji ya 7, Salomo wawambelele athu ha guvutuga, hene avutugile gu jinzo jiawo nu gusuanguluga. Akhalele nu gusuanguluga guavula mu mitshima yawo mukunda nu ndaga jiabonga Yehowa wakalegele Davidi nu Salomo nu athu enji enya Isalele.
11 Luene luholo Salomo wamanesele gutunga inzo ya Yehowa nu inzo ya fumu; wamanesele diago gutshita ndaga jiagasue jiakhalele mutshigina muene gutshita mukunda nu inzo ya Yehowa nu inzo yenji. 12 Gungima Yehowa wamuenegene gudi Salomo mu phipha, wamuwambelele egi: “Ngavi gisambu giaye, ngatombi nji fundo edi hagula dikhale gifua inzo ya milambu. 13 Gula ngakanga dilu hagula mvula inogigo, nu ngatuma matulu ha gudia mbuto jia mu gifutshi, nga ndo gula ngatuma misongo ya gisambugila mukatshi dia athu ami, 14 gula athu ami anyi ana bata jina diami adibulumuisa, angukombelela, angukamba,* abemba nji njila jiawo jiabola, ngenyi mbanguategelela mu dilu, mbanguatotesela gubola guawo, mbangubongesa luko gifutshi giawo. 15 meso ami mbaakanguluga, matshui ami mbaategelela isambu idi mukalegewa ha fundo edi. 16 Henyaha ngatombi inzo eyi, ngayibuisa ya gijila hagula jina diami dikhale guene tangua diagasue, meso ami nu mutshima wami mbawulandula nji gukhala guene.
17 “Gula aye wawenda gutuama diami gifua muawendele sh’aye Davidi, gula nji wakalagala ndaga jiagasue ngaguwambelele, watumagela mikhuala yami nu ba desizio ami, 18 ngenyi mbangujigamesa nguasa yaye ya ufumu gifua luholo ngakotele gikotelo nu sh’aye Davidi egi: ‘Mbagukhala nu muthu mukatshi dia ajigulu aye ha nguasa ya ufumu gu Isalele tangua diagasue.’ 19 Uvi gula muangutuna, muatuna gutumagela mikhuala yami ngahagi gutuama dienu, gula muaya nji mukombelela nzambi jiko, muajifugamela, 20 mbangukatula* enya Isalele mu gifutshi ngaahanele; inzo eyi ngabuishi ya gijila mukunda nu jina diami mbanguyibemba, nu mbangushigo guyitala luko. Athu agasue mbaakhala musegulula enya Isalele* nu mbaakhala gualela. 21 Inzo eyi mbayibua gibombo,* muthu wagasue mbawubalega hehi nu inzo yene, mbawuyitala nu mbawudihula, mbawuzuela egi: ‘Mukunda natshi Yehowa wakalagala ndaga ya luholo elu mu gifutshi egi nu gu inzo eyi?’ 22 Gungima ene mbaazuela egi idi handaga atunyile Yehowa Nzambi wa akhakh’awo munu waazolele gu Ejipitu, ayile gudi nzambi jiko, ajifugamele nu ajikombelele, gishina giene muene waabatela malamba awa agasue.’”