Mukanda wa Thomo wa Gudilanduluila
23 Habuile Davidi muthu wa gukola, gu gisugishilo gia monyo wenji, wabuishile mun’enji Salomo fumu gu Isalele. 2 Gungima wabungishile mafumu agasue a gu Isalele nu nganga-nzambi nu enya Levi. 3 Enya Levi anyi akhalele nu ivo 30 nu holu atangewe mumoshi-mumoshi; mukut’awo agasue akhalele 38 000. 4 Mukatshi diawo, athu 24 000 akhalele mutuameza midimo mu inzo ya Yehowa. Mafumu nu manzuji akhalele 6 000. 5 Athu 4 000 akhalele abambi a mifulo, ako 4 000 akhalele mutumbuisa Yehowa nu ima ya gushigila miziki inyi Davidi wazuelele egi: “Ngayilondji mukunda nu gutumbuisa Nzambi.”
6 Davidi waakhaphele* mu mahunji gifua muakhalele majigo a ana a Levi: Jigo dia Geleshona, dia Kehate nu dia Melali. 7 Ana a Geleshona akhalele: Ladana nu Shimeyi. 8 Ana a Ladana akhalele mutatu: fumu Yehiele, Zetame nu Yowele. 9 Ana a Shimeyi akhalele mutatu: Shelomota, Haziele nu Halana. Athu awa ene akhalele mafumu a fami jia Ladana. 10 Ana a Shimeyi akhalele: Yahata, Zina, Yewushe nu Beliya. Athu awa nguana akhalele ana a Shimeyi. 11 Yahata wakhalele fumu, Ziza wakhalele muthu wa mbadi. Uvi Yewushe nu Beliya avualelego ana a mala avula; hene a atangele gifua fami imoshi, a ahanele nji mudimo umoshi.
12 Ana a Kehate akhalele nguana: Amerame, Yisehale, Hebrone nu Uziele. 13 Ana a Amerame a mala akhalele: Alona nu Moize. Uvi Alona nu an’enji a mala ahagewe ha gukhala mukalagala mudimo tangua diagasue ha Fundo Diabalega Gijila, ha guhana milambu gutuama dia Yehowa, ha gumukalegela mudimo nu ha gushimbiga athu mu jina dienji tangua diagasue. 14 Uvi mukunda nu Moize muthu wa Nzambi wa giamatshidia, an’enji a mala atangewe mukatshi dia giphuta gia enya Levi. 15 Ana a Moize akhalele: Gershome nu Eliezele. 16 Shebuele wakhalele fumu wa ana a Gershome. 17 Fumu wa ajigulu* a Eliezele wakhalele Lehabia; Eliezele gavualelego ana ako a mala uvi ana a Lehabia akhalele avula diago. 18 Shelomita wakhalele fumu wa ana a Yisehale. 19 Ana a Hebrone enyawa: fumu Yeliya, Amaliya muthu wa mbadi, Yahaziele muthu wa thathu, Yekamame muthu wa nguana. 20 Ana a Uziele enyawa: fumu Mika nu Yishiya muthu wa mbadi.
21 Ana a Melali akhalele: Mali nu Mushi. Ana a Mali akhalele: Eleazale nu Kishi. 22 Eleazale wafuile, gavualelego ana a mala, wavualele phamba ana a akhetu. Hene ana a Kishi, aphangi’awo a mu fami,* azanguile ana ene a akhetu mu ulo. 23 Mushi wavualele ana a mala mutatu: Mali, Edele nu Yelemota.
24 Ene akhalele ana a Levi anyi asonegewe majina gifua muakhalele iphuta yawo nu mafumu a iphuta yawo. Enya Levi anyi akhalele nu ivo 20 nu holu atangewe, asonegele nji majina awo gu mukanda. Ene akhalele mutshita mudimo gu inzo ya Yehowa. 25 Davidi wazuelele egi: “Yehowa Nzambi wa Isalele wahanyi athu enji guhuima, muene mbawukhala gu Yelusalema mayilago. 26 Ngenyi enya Levi mbaashigo mubata luko tabernakle nga ikadigilo yayo ya mudimo.” 27 Hene, ha gutadila malongo a suga ahanele Davidi, enya Levi anyi akhalele nu ivo sendese 20 nu holu atangewe. 28 Ene akhalele mukuatesa ana a Alona gu mudimo wa mu inzo ya Yehowa, akhalele mutshita mudimo mu ibanzala nu mu sugu jia gudila nu guphelegetesa ima yagasue ya gijila, akhalele nji mutshita midimo iko ya mu inzo ya Nzambi wa giamatshidia. 29 Akhalele nji mukuatesa ha gulonda mapha* akhalele muhagewa mu thundu nu phupha iladiege-diege mukunda nu mulambu wa mbuto nu tumapha tuazonda-zonda tushigo nu levire nu bagato awetshiewe ha gikalengelo nu pate ya gufutula nu maji nu izongelo yagasue nu ima yagasue ya guthesela. 30 Akhalele naye gukhala guene gimenegena giagasue ha guhana Yehowa mersi nu ha gumutumbuisa, mu ngueze nji akhalele mutshita ngenyi. 31 Akhalele nji mukuatesa tangua diagasue hakhalele muhanewa milambu ya guwotshia gudi Yehowa mu Masugu a Guhuluguga, mu mawano a mbeji jihe-jihe nu mu sungi jia mawano. Akhalele mutshita ngenyi gutuama dia Yehowa mbala nu mbala. Guvula guawo guakhalele gifua muakhalele mutoga mukhuala. 32 Akhalele nji mutagenesa inemo yawo mukunda nu inzo ya tenta ya gudibungishila nu fundo dia gijila, akhalele nji mukuatesa aphangi’awo ana a Alona mukunda nu mudimo wa mu inzo ya Yehowa.