Mukanda wa Thomo Gudi Enya gu Kolinto

16 Henyaha mukunda nu mukungo wa makuta agutumina athu a gijila, tshitenu ndaga gifua luholo ngawambelele mahungu a gu Galatiya. 2 Mu lusugu lua thomo lua phoso yagasue, muthu nu muthu mukatshi dienu abambe ndambo ya makuta gifua mudi guvula gua ima yenji, hagula mukalagalago mukungo tangua mbanguza. 3 Uvi tangua mbanguza gumbo dienu, mbangutuma athu mbamutomba mu mikanda yenu hagula azangule ima yenu muahanele nu mutshima wabonga, aye nayo gu Yelusalema. 4 Gula idi ndaga yabonga egi ame nji nguye guene, mbatuya nawo.

5 Uvi gutuama egi nguze gumbo dienu, mbangubalegela thomo gu Maseduane, handaga guene ngudi naye gubalegela. 6 Matangua ako mbangusala gumbo dienu masugu azonda. Ngajiya nji gubalegesa n’enu sungi ya guhuma, hagula muye mungutuale mu njila ha guya fundo diagasue mbanguya. 7 Ngushigo mutshigina gumitala phamba hangudi mubalega mu njila; handaga felela diami didi egi ngubalegese n’enu ndambu ya masugu gula Yehowa watshigina. 8 Uvi ngudi musala haha gu Efeso uu nu mu lusugu lua Wano wa Pantekote, 9 handaga Nzambi wanguhana luendu luakoma lua gukalagala mudimo muavula.* Uvi mbalagaji jidi jiavula.

10 Gula Timote waza gumbo dienu, tshitenu yagasue hagula gakhadigo nga nu gima gimoshi giajiya gumuhana woma hadi muene mukatshi dienu. Handaga muene udi mutshita mudimo wa Yehowa gifua luholo ame nji ngana kalagala. 11 Hene mumusegululago. Ndenu mumushinjigile mu njila hagula awende muabonga aze angusange, handaga tudi gumunenga nu aphangi.

12 Mukunda nu phangi’etu Apholo, ngamububila muavula hagula aze amitale hamoshi nu aphangi ako. Muene gashigo nu matangi a guza gumbo dienu luenyelu, uvi mbawuza gula luholo lua monega.

13 Khalenu nu gikolekole, khalenu nu gutshigina guakola, muvuigo woma, khalenu nu ngolo. 14 Ndaga jiagasue mudi mukalagala, jitshitenu nu guzumba guagasue.

15 Aphangi, mudi mujiya egi Stefanase nu athu a monzo yenji, adi athu a thomo abuile alandudi a Yesu gu provense ya Akaya.* Adihanele nu mutshima umoshi ha gukuatesa athu a gijila. Hene aphangi ngudi gumibubila egi, 16 enue nji landulenu gutumagela athu a luholo elu nu athu agasue ana kalagala nawo mudimo wakola hamoshi. 17 Uvi ngudi musuanguluga muavula luholo Stefanase nu Foletunatuse nu Akaikuse aza gungutala, handaga ene angukuatesa muavula ha fundo dienu. 18 Angukuatesele, amikuatesele nu enue nji. Hene aphangi, khalenu munemesa athu a luholo elu.

19 Aphangi a mu mahungu a gu Azi amitumina moyo. Akila nu Priska nu aphangi a mu hungu diana gudibungisa monzo yawo, amitumina moyo nu gusuanguluga guagasue mu jina dia Fumu. 20 Aphangi agasue amitumina lumene. Khalenu gudimenega nu beze ya gijila.

21 Ame Phaula ngasonega mukanda owu nu koko diami. Ngamitumina lumene.

22 Gula muthu gashigo muzumba Fumu, udi naye gutewa mukumbu. Fumi’etu, tuabuba iza! 23 Khenda jiavula jia Fumu Yesu jikhale nu enue. 24 Ngana gumizumba mukut’enu agasue handaga mudi alandudi a Klisto Yesu.