Mukanda wa Mbadi wa Mafumu

17 Mu givo gia 12 gia uhinyinyi wa Fumu Ahaza wa gu Yuda, Hoshea mun’a Ela wabuile fumu gu Isalele. Wahinyine ivo 9 gu Samaliya. 2 Wakhalele mutshita ndaga jiabola gu meso a Yehowa, uvi gatshitshilego gubola guavula gifua gunu guatshitshile mafumu a gu Isalele anyi ahinyine gutuama dienji. 3 Fumu Shalamanesele wa gu Asiliya wajile gumuluisa. Hoshea wabuile muenya mudimo wenji, wasendesele gumufuta gitadi. 4 Uvi lusugu lumoshi, fumu wa gu Asiliya wavuile egi Hoshea wamuyila giphungi handaga watumile athu gudi Fumu So wa gu Ejipitu nu gamutumidilego gitadi gifua muakhalele mutshita muene mu ivo yabalega. Hene, fumu wa gu Asiliya wamukuatele, wamujitshigile, wamumbile mu bologo.

5 Fumu wa gu Asiliya wajile muluisa gifutshi giagasue, wajietele* dimbo dia Samaliya ivo thathu. 6 Mu givo gia 9 gia uhinyinyi wa Hoshea, fumu wa gu Asiliya watambudile dimbo dia Samaliya. Gungima wabatele enya Isalele mu uhiga gu Asiliya. Waahagele gu Hala nu gu Habole hehi nu muta wa Gozana nu mu membo a gu Mede.

7 Ndaga yene yabuidile enya Isalele handaga akalegele gubola gu meso a Yehowa Nzambi wawo, munu waazolele mu gifutshi gia Ejipitu nu waahuluishile ha mago a Farao fumu wa gu Ejipitu. Akombelele nzambi jiko,* 8 alanduile kutime jia enya ifutshi inyi Yehowa wakayele gutuama diawo, alanduile nji kutime jiahagele mafumu a gu Isalele.

9 Enya Isalele alanduile gukalagala ndaga jiabola gu meso a Yehowa Nzambi wawo. Akhalele mutunga mafundo a gukombelela mu membo awo agasue, sendese gu jinzo jialeha uu nu mu membo akhalele nu ibayi yakola.* 10 Ajigile makunji a gijila nu mitshi ya gijila* mu tumilundu tuagasue nu ha mushin’a mutshi wagasue wakoma wakhalele nu mayiji avula. 11 Akhalele muhana milambu* mu mafundo agasue a gukombelela gifua muakhalele mukalagala enya ifutshi inyi Yehowa wakayele gutuama diawo. Alanduile gukalagala ndaga jiabola ha guhana Yehowa khabu.

12 Alanduile gukombelela isongo ya usala* inyi Yehowa waawambelele egi: “Mushigo naye gutshita ngenyi!” 13 Yehowa walanduile gutemesa enya Isalele nu enya Yuda mu njila ya baprofete enji agasue nu athu akhalele mumona vizio egi: “Bembenu makalegelo enu abola! Tumagelenu mikhuala yami nu ndaga jiagasue ngawambelele akhakh’enu nu jinyi ngamiwambelele mu njila ya enya mudimo ami baprofete.” 14 Uvi ategelelego, akhalele mito yakola gifua* akhakh’awo anyi akhalelego nu gutshigina gudi Yehowa Nzambi wawo. 15 Atunyile mikhuala yenji, anemeselego gikotelo giakotele muene nu akhakh’awo, alanduilego malongo a ahanele muene ha guatemesa. Akhalele mukombelela isongo ya githuhu, abuile nji athu a githuhu. Alanduile makalegelo a enya ifutshi yagasue yakhalele hehi nawo anyi Yehowa waatunyishile ha gulandula.

16 Atunyile gutumagela mikhuala yagasue ya Yehowa Nzambi wawo, alondele isongo ya ana a ngombe mbadi ya utadi nu mutshi wa gijila,* akhalele mufugamela themua jiagasue jia mu dilu, akombelele nji Bale. 17 Awetshiele nji an’awo a mala nu a akhetu ha tshuya, akhalele muphonga, akhalele mukamba gujiya ndaga mbajibua mu masugu adi muza, adihanele* ha gutshita ndaga jiabola gu meso a Yehowa ha gumuhana khabu.

18 Yehowa wavuidile enya Isalele khabu jiakola, hene waakatudile gu meso enji. Wabembele phamba giphuta gia Yuda.

19 Nu ene enya gu Yuda, atumagelego mikhuala ya Yehowa Nzambi wawo; alanduile nji makalegelo anyi enya Isalele alanduile. 20 Yehowa watunyile ajigulu agasue a Isalele, waahanele musonyi, waahanele nji ha mago a nzangi, gusuga waakatudile gutuama dienji. 21 Wakatudile Isalele mu fami ya Davidi, enya Isalele abuishile Yeloboama mun’a Nebate fumu. Uvi Yeloboama watumile enya Isalele ha gubemba gukombelela Yehowa, waatumile nji ha gukalagala gubola guakoma. 22 Enya Isalele alanduile gukalagala ndaga jiagasue jiabola jinyi jiakalegele Yeloboama. Abembelego gujikalagala 23 uu nu tangua Yehowa waakatudile gu meso enji gifua luholo luazuelele muene mu njila ya baprofete* enji agasue. Gishina giene abatele enya Isalele mu uhiga gu Asiliya. Guene ana khala uu nu mangino.

24 Fumu wa gu Asiliya wazudile enya mu membo awa: Babilona, Kuta, Ava, Hamate nu Sefalevayima, waahagele mu membo a gu Samaliya ha fundo dia enya Isalele. Athu ene azudile mavu a Samaliya, asendesele gukhala mu membo enji. 25 Tangua akhalele guene, gu gisendeselo akhalelego muvuila Yehowa woma.* Hene Yehowa waatumidile khoshi, jiashiyile athu ako mukatshi diawo. 26 Athu ayile muwambela fumu wa gu Asiliya egi: “Enya ifutshi wabatele mu uhiga anyi wahagele mu membo a Samaliya, ashigo mujiya gikombelelo* gia Nzambi wa mu gifutshi giene. Hene muene udi guatumila khoshi, jidi guashiya handaga nga muthu mumoshi mukatshi diawo gashigo mujiya gikombelelo gia Nzambi wa mu gifutshi giene.”

27 Hene fumu wa gu Asiliya waawambelele egi: “Zulenu nganga-nzambi mumoshi muabatele mu uhiga mumuvutule guene hagula aye a alongese gikombelelo gia Nzambi wa mu gifutshi giene.” 28 Hene nganga-nzambi mumoshi wa gu Samaliya munu wabatewe mu uhiga wavutugile, wayile mukhala gu Betele, wasendesele gualongesa luholo lua guvuila Yehowa woma.*

29 Uvi gifutshi nu gifutshi gialondele nzambi wawo,* amuhagele mu jinzo jia gukombelela jinyi jiakhalele mu mafundo a gukombelela anyi enya Samaliya alondele. Gifutshi nu gifutshi giatshitshile ngenyi mu membo akhalele mujinga. 30 Hene enya gu Babilona alondele gisongo gia Sukota-Benota, enya gu Kuta alondele gisongo gia Negala, enya gu Hamate alondele gisongo gia Ashima, 31 enya gu Ava alondele gisongo gia Nibaza nu gia Tatake. Enya gu Sefalevayima akhalele mukonda an’awo ha tshuya ha guhana milambu gudi Adalameleke nu Anameleke, nzambi jia enya Sefalevayima. 32 Ngatshima akhalele muvuila Yehowa woma, uvi atombele nganga-nzambi mukatshi dia athu agasue ha gujihaga mu mafundo a gukombelela. Nganga-nzambi jiene jiakhalele guakalegela mudimo mu jinzo jia gukombelela jinyi jiakhalele mu mafundo a gukombelela. 33 Akhalele muvuila Yehowa woma, uvi akhalele mukombelela nzambi jiawo gifua muakhalele gikombelelo* gia ifutshi inyi akatugile.

34 Uu nu mangino wawa gawo ana landula gikombelelo* giawo gikulu. Gushigo nga nu muthu mukatshi diawo wana kombelela Yehowa nu wana landula mikhuala nu badesizio enji, nga gutumagela mikhuala Yehowa wahanele ana a Yakoba, munu walugile muene egi Isalele. 35 Tangua Yehowa wakotele gikotelo nu enya Isalele, waawambelele egi: “Mushigo naye guvuila nzambi jiko woma, mushigo naye gujifugamela nga gujikombelela nga gujihana milambu. 36 Uvi Yehowa yago wamizolele mu gifutshi gia Ejipitu nu ngolo jiavula nu koko dienji dia ngolo, muene mudi naye guvuila woma. Muene mudi naye nji gufugamela nu guhana milambu. 37 Mudi naye gutumagela muabonga mikhuala nu badesizio nu ndaga jiasonegele muene mukunda nu enue, mushigo naye guvuila nzambi jiko woma. 38 Mushigo naye gujimbila gikotelo ngakotele n’enu, mushigo naye guvuila nzambi jiko woma. 39 Uvi mudi naye guvuila Yehowa Nzambi wenu woma, handaga muene mbawumihuluisa ha mago a mbalagaji jienu jiagasue.”

40 Uvi athu ene atumagelego, alanduile gikombelelo* giawo gikulu. 41 Enya ifutshi yene akhalele muvuila Yehowa woma, uvi akhalele nji mukombelela isongo yawo alondele. An’awo nu ajigulu awo ana landula gukalagala ndaga gifua akhakh’awo uu nu mangino.