Mukanda wa Mbadi wa Gudilanduluila
36 Gungima athu a mu gifutshi azudile Yoahaza mun’a Yoziase, amubuishile fumu gu Yelusalema ha fundo dia sh’enji. 2 Yoahaza wakhalele nu ivo 23 habuile muene fumu, wahinyine mbeji thathu gu Yelusalema. 3 Uvi fumu wa gu Ejipitu wamukatudile ha nguasa yenji ya ufumu gu Yelusalema. Watogele enya Yuda ha gumufuta gibawu, batalanta* 100 a utadi wa siliva nu talanta imoshi ya wolo. 4 Gungima fumu Neko wa gu Ejipitu wazudile Eliyakime phangi’a Yoahaza, wamubuishile fumu gu Yuda nu gu Yelusalema, wamusombegesele jina egi Yoyakime. Uvi wazudile Yoahaza, wayile n’enji gu Ejipitu.
5 Yoyakime wakhalele nu ivo 25 habuile muene fumu, wahinyine ivo 11 gu Yelusalema. Wakhalele mutshita ndaga jiabola gu meso a Yehowa Nzambi wenji. 6 Fumu Nebukadenezale wa gu Babilona wajile gumuluisa, hagula amukuate, amujitshige malenge mbadi a kuivre ha guya n’enji gu Babilona. 7 Nebukadenezale wazudile ikadigilo iko ya mu inzo ya Yehowa wayile nayo gu Babilona, wayihagele mu inzo yenji ya ufumu. 8 Ndaga jiko jiakalegele Yoyakime, nu ndaga jia usala jiakalegele muene nu ndaga jienji jiko jiabola, jidi jia gusonega mu Mukanda wa Mafumu a gu Isalele nu a gu Yuda. Mun’enji Yoyakine wabuile fumu ha fundo dienji.
9 Yoyakine wakhalele nu ivo 18 habuile muene fumu, wahinyine mbeji thathu nu masugu 10 gu Yelusalema. Wakhalele mutshita ndaga jiabola gu meso a Yehowa. 10 Gu gisendeselo gia givo,* fumu Nebukadenezale watumile athu hagula akuate Yoyakine ha gumubata gu Babilona, nu ha guzula ima ya ndando yakhalele mu inzo ya Yehowa. Nebukadenezale wazudile Sedesiase munu wakhalele phangi’a Yoyakime, wamubuishile fumu gu Yuda nu gu Yelusalema ha fundo dia Yoyakine.
11 Sedesiase wakhalele nu ivo 21 habuile muene fumu, wahinyine ivo 11 gu Yelusalema. 12 Wakhalele mutshita ndaga jiabola gu meso a Yehowa Nzambi wenji. Gadibulumuishilego gutuama dia profete Yelemiya munu wakhalele muzuela mu jina dia Yehowa. 13 Walumbugile nji fumu Nebukadenezale yago wamutogele ha gudiloga gutuama dia Nzambi egi mbawusala ya gujinginyina gudi muene. Wakhalele muto wakola, wakolesele nji mutshima wenji, watunyile guvutuga gudi Yehowa Nzambi wa Isalele. 14 Mafumu agasue a nganga-nzambi nu athu agasue, akhalelego luko ya gujinginyina gudi Nzambi; akhalele mukalagala ndaga jia usala jia maluholo agasue jia enya ifutshi iko. Abolesele inzo ya Yehowa inyi yaphelegetesele muene gu Yelusalema.
15 Yehowa Nzambi wa akhakh’awo wakhalele mulandula guatemesa mu njila ya enya mudimo wenji. Wakhalele guatemesa mbala jiavula handaga wakhalele muvua khenda mukunda nu athu enji nu mukunda nu tempelo yenji. 16 Uvi akhalele musegulula enya mudimo a Nzambi wa giamatshidia, akhalelego munemesa mbimbi jienji; akhalele nji mulela baprofete enji. Hene Yehowa waavidile khabu jiakola, guakhalelego luko nu luholo lua guakuatesa.
17 Nzambi watumile fumu wa enya Kaldea ha gualuisa, washiyile an’awo a mala nu phogo ya khusa ha fundo dia gijila. Gavilego khenda mukunda mavuala a mala nga tundongo nga athu a gukola nga ene athu akhalele nu ukhashi mu muila. Nzambi wahanele ima yagasue ha mago enji. 18 Fumu wa enya Kaldea wazudile ikadigilo yagasue yakhalele mu inzo ya Nzambi wa giamatshidia, ikhale yakoma nga yazonda, nu umonyi wakhalele mu inzo ya Yehowa nu umonyi wa fumu nu wa manene enji; wayile nayo yagasue gu Babilona. 19 Wakondele inzo ya Nzambi wa giamatshidia, wamuangele gibayi gia Yelusalema; wakondele nji jinzo jiagasue jialeha jiakhalele nu ibayi yakola, wabolesele ima yagasue ya ndando. 20 Athu anyi ahulugile gu phogo ya khusa, fumu wa enya Kaldea waabatela mu uhiga gu Babilona. Abuile enya mudimo enji nu a an’enji a mala uu nu tangua ufumu wa gu Phelese wasendesele guhinyina, 21 ha gutagenesa ndaga yazuelele Yehowa mu njila ya Yelemiya, uu nu tangua mavu atagenesele ivo yenji ya guhululuga. Tangua mavu asalele a githuhu, ahulugugile uu nu hatagenesele ene ivo 70.
22 Mu givo gia thomo gia uhinyinyi wa Fumu Siluse wa gu Phelese, Yehowa wamutumile ha guwambela athu agasue a mu ufumu wenji ndaga imoshi ha gutagenesa ndaga yazuelele Yehowa mu njila ya Yelemiya. Fumu Siluse wasonegele nji ndaga yene, wazuelele egi: 23 “Siluse Fumu wa gu Phelese udi muzuela egi: ‘Yehowa Nzambi wa mu dilu wanguhanyi ma ufumu agasue a ha mavu, wanguhanyi nji ginemo gia gumutungila inzo gu Yelusalema mu mavu a gu Yuda. Yehowa Nzambi akhale nu muthu wagasue mukatshi dia akombeledi enji, munu udi mutshigina gukanduga gu Yelusalema.