Mukanda wa Thomo wa Gudilanduluila
22 Gungima Davidi wazuelele egi: “Fundo edi diene mbaatunga inzo ya Yehowa Nzambi wa giamatshidia, giwotshielo enya Isalele mbaakhala muhana milambu ya guwotshia mbagikhala nji haha.”
2 Davidi wabungishile ngenji jiakhalele gu Isalele, wajihanele mudimo wa gubatula nu gusonga maseso a gutungila inzo ya Nzambi wa giamatshidia. 3 Davidi wakungigile utadi wavula wa gulondela misumadi ya gukhokhela ijidigo nu tuma tuagukuatenesela nu kuivre yavula, guakhalelego nu luholo lua guthesa gunema guenji. 4 Wakungigile nji mabaya a sedre avula diago handaga enya Sidona nu enya gu Tile akhalele mubatela Davidi mabaya a sedre avula. 5 Davidi wazuelele egi: “Mun’ami Salomo udi muvuala, gashigo mujiya ndaga jiavula.* Inzo idi naye gutungiwa mukunda nu Yehowa idi naye gukhala yabonga diago, hagula gukoma nu gubonga guenji gujiyiwe mu ifutshi yagasue. Ngudi naye gumulondela ima.” Hene, Davidi walondele ima yavula diago gutuama egi afue.
6 Davidi watamegele mun’enji Salomo, wamuwambelele ha gutunga inzo mukunda nu Yehowa Nzambi wa Isalele. 7 Davidi wawambelele mun’enji Salomo egi: “Ngakhalele diago mutshigina gutunga inzo mukunda nu jina dia Yehowa Nzambi wami. 8 Uvi Yehowa wanguwambelele egi: ‘Aye wanosesele mahatshi avula, waluile nji ita yavula. Ishigo aye mbawutunga inzo mukunda nu jina diami handaga wanosesele mahatshi avula ha mavu gu meso ami. 9 Tala! Mbawuvuala mona wa yala, muene mbawukhala muthu wa guhuima,* mbangumuhana guhuima tangua mbangumuhuluisa ha mago a mbalagaji jienji jiagasue mbajikhala hehi n’enji. Jina dienji mbadikhala Salomo;* mu uhinyinyi wenji, mbangukuatesa enya Isalele ha gukhala mu guhuima, mbaakhala nji tedie. 10 Muene mbawutunga inzo mukunda nu jina diami. Mbawubua mun’ami, ame mbangukhala sh’enji. Mbangujigamesa nguasa yenji ya ufumu gu Isalele mayilago.’
11 “Henyaha mun’ami, Yehowa akhale nu aye hagula ubinge ha gutunga inzo mukunda nu Yehowa Nzambi waye, gifua muazuelele muene mukunda nu aye. 12 Tangua Yehowa mbawuguhana ufumu gu Isalele, aguhane nji nu gutema nu ndunge hagula wajiya gutumagela mikhuala ya Yehowa Nzambi waye. 13 Mbawubinga gula watumagela muabonga mikhuala nu badesizio anyi Yehowa wawambelele Moize ha guhana enya Isalele. Khala nu gikhesa nu ngolo. Uvuigo woma, ubuigo tunga-tunga. 14 Ngatshitshi ngolo ha gulonda ima mukunda nu inzo ya Yehowa. Ngakungiga wolo batalanta* 100 000 nu utadi wa siliva batalanta 1 000 000 nu kuivre yavula nu utadi unu ajiyilego guthesa gunema guenji. Ngalondji nji mabaya nu maseso uvi aye mbawulezela nji ima iko. 15 Udi nji nu enya mudimo avula: athu ana songa maseso, athu ana tunga nu maseso, athu ana tshita mudimo wa mabaya, nu athu ana jiya midimo ya maluholo agasue. 16 Wolo nu utadi wa siliva nu kuivre nu utadi udi wavula diago, ushigo nu luholo lua guthesewa. Henyaha sendesa gutshita mudimo, Yehowa akhale nu aye.”
17 Gungima Davidi wawambelele mafumu agasue a gu Isalele ha gukuatesa mun’enji Salomo. Wazuelele egi: 18 “Yehowa Nzambi wenu gashigo n’enu ba? Ishigo muene wamihanele guhuima gu khanda jiagasue? Handaga muene wangukuatesele ha gubinga athu akhalele mu gifutshi; gifutshi giene gidi nji ha mago a Yehowa nu ha mago a athu enji. 19 Henyaha tshitenu yagasue ha gukamba Yehowa Nzambi wenu nu mutshima wenu wagasue nu monyo* wenu wagasue. Sendesenu nji gutunga fundo dia gijila dia Yehowa Nzambi wa giamatshidia hagula mubate mushete wa gikotelo wa Yehowa nu ikadigilo ya gijila ya Nzambi wa giamatshidia mu inzo mbamutunga mukunda nu jina dia Yehowa.”