Mukanda wa Thomo wa Mafumu
4 Fumu Salomo wakhalele muhinyina Isalele yagasue. 2 Athu awa ene akhalele manene enji:* Azariya mun’a Zadoke wakhalele nganga-nzambi. 3 Eliholefe nu Ahiya ana a Shisha akhalele basekretere; Yosafata mun’a Ahiluda muene wakhalele musonega ndaga jiakhalele mubua mu gifutshi. 4 Benaya mun’a Yoyada wakhalele fumu wa masuta; Zadoke nu Abiatare akhalele nganga-nzambi. 5 Azariya mun’a Natana wakhalele fumu wa baguvernere; Zabude mun’a Natana wakhalele nganga-nzambi, wakhalele nji futa dia fumu. 6 Ahishale wakhalele mutuameza enya mudimo a monzo ya fumu; Adonilama mun’a Abeda wakhalele mutuameza athu akhalele mukalagala midimo gu ngolo.
7 Salomo wakhalele nu baguvernere 12 mu gifutshi giagasue gia Isalele. Baguvernere ene akhalele muhana fumu nu athu agasue a monzo yenji ima ya gudia. Guvernere wagasue wakhalele nu ginemo gia gubata ima ya gudia mbeji imoshi mu givo. 8 Majina a baguvernere ene enyawa: Mun’a Hule, wakhalele mutuameza gu khanda yagasue ya milundu ya Efrayime. 9 Mun’a Dekele, wakhalele mutuameza Makase nu Shalebima nu Bete-Shemeshe nu Elona-Bete-Hanane. 10 Mun’a Hesede wakhalele gu Alubote, wakhalele mutuameza Soko nu mavu agasue a Hefele. 11 Mun’a Abinadaba wakhalele mutuameza khanda yagasue ya milundu ya Dole. (Wazudile Tafate mun’a Salomo mu ulo). 12 Bana mun’a Ahiluda, wakhalele mutuameza Tanaka nu Megido nu mavu agasue a Bete-Shana. Mavu ene akhalele gu khanda ya Saletana, gu mbongo ya Yizelele; akhalele sendese gu Bete-Shana uu nu gu Abele-Mehola, akhalele nji muya uu nu gu khanda ya Yokemeame. 13 Mun’a Gebele wakhalele gu Ramote ya gu Gileade, wakhalele mutuameza membo a Yayile mun’a Manase akhalele gu Gileade. Wakhalele nji mutuameza khanda ya Alegobe gu Bashana; khanda yene yakhalele nu membo akoma 60 akhalele nu ibayi nu mifulo yakhalele mukangewa nu ima yalondewe nu kuivre. 14 Ahinadaba mun’a Ido, wakhalele mutuameza Mahanayime. 15 Ahimase, wakhalele mutuameza mavu a enya giphuta gia Nefetali. (Wazudile Basemate mun’a Salomo muko wa mukhetu mu ulo). 16 Bana mun’a Hushayi, wakhalele mutuameza mavu a enya giphuta gia Asele nu mavu a Bealota. 17 Yosafata mun’a Phalua, wakhalele mutuameza mavu a enya giphuta gia Isakale. 18 Shimeyi mun’a Ela, wakhalele mutuameza mavu a enya giphuta gia Benjame. 19 Gebele mun’a Uri, wakhalele mutuameza mavu a Gileade. Mavu ene akhalele thomo mutuamezewa gudi Sihona, fumu wa enya Amole nu Oga fumu wa gu Bashana. Guakhalele nji nu guvernere wakhalele mutuameza baguvernere ako agasue a mu gifutshi.
20 Enya Yuda nu enya Isalele akhalele avula gifua gishegele gu khulo ya muta. Akhalele mudia nu gunua, akhalele nji nu gusuanguluga.
21 Salomo wakhalele muhinyina ma ufumu agasue sendese gu Muta* uu nu gu gifutshi gia enya Filistiya uu nu gu mudidilo wa Ejipitu. Mafumu ene akhalele gumubatela misomo masugu agasue akhalele muene nu monyo.
22 Lusugu nu lusugu, ha gulonda ima ya gudia mukunda nu Salomo nu athu agasue a monzo yenji, akhalele mubata bakore* 30 a phupha iladiege-diege, nu bakore 60 a phupha athu agasue akhalele mukalegela, 23 ngombe 10 jia maji-maji, ngombe 20 jiakhalele mudia muangu, imeme 100, gutanga ndo tubaji* nu tuseshi nu mayembe a maji-maji. 24 Salomo wakhalele mutuameza sambua edi diagasue dia Muta,* sendese gu Tifesa uu nu gu Gaza nu mafumu agasue a sambua diene dia Muta. Athu agasue a gu khanda yene akhalele mu guhuima. 25 Mu masugu agasue a uhinyinyi wa Salomo, enya Yuda nu enya Isalele akhalele mu ubambi, sendese gu Dane uu nu gu Belesheba. Muthu wagasue wakhalele ha mushin’a mutshi wenji wa vinyo nu wa figi.
26 Salomo wakhalele nu phango 4 000* jia tubalu mukunda nu phusu-phusu jienji nu tubalu* 12 000.
27 Baguvernere ene akhalele mubata ima ya gudia mukunda nu Fumu Salomo nu athu agasue akhalele mudia gu mesa enji. Guvernere wagasue wakhalele mutagenesa ginemo giene mbeji imoshi; wakhalele mutshita yagasue hagula ima ya gudia ikhale gu inzo ya fumu tangua diagasue. 28 Akhalele nji mubata orje nu muangu mu mafundo agasue akhalele nayo funu mukunda nu tubalu nu mukunda nu tubalu tuakhalele munana phusu-phusu. Guvernere wagasue wakhalele mubata guvula gua ima akhalele gumutoga.
29 Nzambi wakuatesele Salomo ha gukhala nu ndunge jiavula nu gutema; wamukuatesele nji ha gukotelesa* ndaga jiavula diago. 30 Salomo wakhalele nu ndunge jiavula gubalega athu agasue a gu khanda ya mazogelo a kumbi nu athu agasue a gu Ejipitu. 31 Wakhalele watema gubalega athu agasue; gubalega muenya ndunge Etane muenya Ezela, nu Hemane nu Kalekola nu Daleda ana a Mahole. Salomo wajiyiwe muavula mu ifutshi yagasue yakhalele hehi. 32 Salomo wasonegele* ishima 3 000 nu ngimbo 1 005. 33 Wakhalele muzuelela mitshi, sendese gu mutshi wa sedre wa gu Libane uu nu gu gamutshi ga hisophe gana zoga holu dia gibayi. Wakhalele muzuelela nji shitu nu tunjila* nu ima yana wenda vumo mu mavu* nu jishui. 34 Athu a mu ifutshi yagasue akhalele muza ha gutegelela ndunge jia Salomo; nu ene mafumu a ha mavu agasue akhalele muza handaga avuile lumene lua ndunge jia Salomo.