Mukanda wa Thomo wa Mafumu

11 Fumu Salomo gazumbilego phamba mun’a Farao wa mukhetu, uvi wazumbile nji akhetu ako avula a ngenji. Akhalele: enya Moaba, enya Amona, enya Edome, enya Sidona nu enya Hete. 2 Akhalele enya mu ifutshi inyi Yehowa wawambelele enya Isalele egi: “Mushigo naye gudibungisa nawo* handaga mbaamituma ha gulandula nzambi jiawo.” Uvi Salomo wakuatele ufuta nawo, waazumbile. 3 Wakhalele nu akhetu 700 akhalele ana a mafumu nu akhetu ako 300. Akhetu ene amutumile mage-mage ha gutuna Nzambi. 4 Habuile Salomo muthu wa gukola, akhetu ene amutumile ha gukombelela nzambi jiko, gakhalelego diago ya gujinginyina gudi* Yehowa Nzambi wenji gifua muakhalele sh’enji Davidi. 5 Salomo wakombelele Ashitolete, nzambi-mukhetu wa enya Sidona, nu Milekome nzambi wa usala wa enya Amona. 6 Salomo wakalegele ndaga yabola gu meso a Yehowa, gakhalelego diago ya gujinginyina gudi Yehowa gifua muakhalele sh’enji Davidi.

7 Mu tangua diene, Salomo watungile fundo dia gukombelela* gu mulundu, ha sambua dia Yelusalema mukunda nu Kemoshe, nzambi wa usala wa gu Moaba, nu mukunda nu Moleke, nzambi wa usala wa enya Amona. 8 Wakalegele ngenyi mukunda nu akaji’enji agasue a mu ifutshi iko anyi akhalele muwetshia milambu ha guhana nzambi jiawo.

9 Yehowa wavuidile Salomo khabu jiakola handaga gakhalelego luko ya gujinginyina gudi Yehowa Nzambi wa Isalele, munu wamuenegele gudi muene mbala mbadi 10 nu wamutemesele egi gashigo naye gukombelela nzambi jiko. Uvi muene gatumagelego ndaga yamuwambelele Yehowa. 11 Hene Yehowa wawambelele Salomo egi: “Luholo wakalagala ndaga eyi nu watuna gunemesa gikotelo giami nu mikhuala yami ngaguhanele, mbangugutambula diago ufumu, mbanguwuhana gudi muenya mudimo waye mumoshi. 12 Uvi mukunda nu sh’aye Davidi, mbangushigo mutambula ufumu wene tangua udi nu monyo. Mbanguwutambula ha mago a mun’aye, 13 uvi mbangushigo mutambula ufumu wagasue. Mbanguhana mun’aye giphuta gimoshi mukunda nu muenya mudimo wami Davidi nu mukunda nu dimbo dia Yelusalema ngatombele.”

14 Gungima Yehowa wazolele mbalagaji mukunda nu Salomo, jina dienji Hadada muenya Edome wa mu vumo dia ufumu wa gu Edome. 15 Tangua Davidi wabingile Edome, Yoabe fumu wa masuta, wayile mufunda imbi ya athu afuile, wakambele nji gushiya mala agasue a gu Edome. 16 (Handaga Yoabe nu mala agasue a gu Isalele asalele guene mbeji 6 uu nu tangua ashiyile mala agasue a gu Edome.) 17 Uvi Hadada walengele nu enya Edome ako anyi akhalele enya mudimo a sh’enji, ayile gu Ejipitu. Mu tangua diene, Hadada wakhalele mona wazonda. 18 Akatugile gu Madiana, ayile gu Parane. Gungima azudile mala a gu Parane, ayile gu Ejipitu gudi fumu Farao wa gu Ejipitu. Farao wamuhanele inzo nu ima ya gudia nu mavu. 19 Farao wasuangulugile muavula nu Hadada, hene wamuhanele phangi’a mukaji’enji ha gudizula n’enji mu ulo. Mukaji’a Farao wakhalele fumu-mukhetu Taphanese.* 20 Gungima phangi’a Taphanese wavualele mona wa yala nu Hadada, jina dienji Genubata. Taphanese wazanguile mona muene,* wayile n’enji mu inzo ya Farao. Genubata walanduile gukhala nu ana a Farao.

21 Hakhalele Hadada gu Ejipitu, wavuile egi Davidi wafuile gale, Yoabe fumu wa masuta wafuile gale nji. Hene Hadada wawambelele Farao egi: “Nguhane njila nguye mu gifutshi gietu.” 22 Uvi Farao wamuwambelele egi: “Itshi udi mukamba inyi ushigo nayo, hene udi mutshigina guvutuga mu gifutshi gienu?” Hadada wamuvutudile egi: “Gima ndo, uvi ngabuba nguhane njila nguye.”

23 Nzambi wazolele nji mbalagaji muko mukunda nu Salomo, jina dienji Lezona mun’a Eliyada munu walengele gumbo dia fumi’enji Hadadezele, fumu wa gu Soba. 24 Tangua Davidi wabingile* enya gu Soba, Lezona wabungishile athu gu khanda yenji, wabuile fumu wa hunji dimoshi dia nzangi. Gungima ayile gu Damase, akhalele guene. Lezona wasendesele guhinyina gu Damase. 25 Wabuile mbalagaji wa Isalele masugu agasue a uhinyinyi wa Salomo. Katula gubola guakalegele Hadada, muene nji wakalegele enya Isalele gubola. Tangua diagasue diakhalele muhinyina muene gu Siliya, wakhalele nu umbalagaji nu enya Isalele.

26 Guakhalele nji nu mbalagaji muko, jina dienji Yeloboama mun’a Nebate wa mu giphuta gia Efrayime, wa mu dimbo dia Seleda. Wakhalele muenya mudimo wa Salomo, gin’enji wakhalele mukhetu wa gafunda, jina dienji Seluwa. Yeloboama wasendesele nji gulumbugila* fumu. 27 Ndaga yamutumile ha gulumbugila fumu yene eyi: Fumu Salomo watungile gamulundu,* wakangele nji fundo diakhalele dia uhululu mu gibayi gia Dimbo dia sh’enji Davidi. 28 Yeloboama wakhalele yala wa ngolo. Tangua Salomo wamonele egi muvuala owu wa yala wakhalele mutshita mudimo muavula, wamuhagele mutuameji wa athu agasue azudiwe mu inzo ya Yozefe ha gutshita mudimo gu ngolo. 29 Mu tangua diene, Yeloboama wakatugile gu Yelusalema. Hakhalele muene muya mu njila, wataganele nu prophete Ahiya wa gu Shilo; Ahiya wasudigile mulele uhe-uhe. Mala ene mbadi akhalele hakhawo mu temu. 30 Ahiya wazudile mulele uhe-uhe wasudigile muene, wawubatudile mu itshinyi 12. 31 Gungima wawambelele Yeloboama egi:

“Zula itshinyi 10, handaga Yehowa Nzambi wa Isalele wazuela egi: ‘Ngudi mutambula ufumu ha mago a Salomo, aye mbanguguhana iphuta 10. 32 Uvi mbangumubembela giphuta gimoshi mukunda nu muenya mudimo wami Davidi nu mukunda nu dimbo dia Yelusalema ngatombele mukatshi dia iphuta yagasue ya Isalele. 33 Mbangutshita ngenyi handaga athu ami angutunyile, ayile mufugamela Ashitolete, nzambi-mukhetu wa enya Sidona, nu Kemoshe nzambi wa gu Moaba, nu Milekome nzambi wa enya Amona. Ene awendelego mu njila ngaawambelele ha gulandula, atshitshilego ndaga jiabonga gu meso ami, atumagelego nji mikhuala yami nu badesizio ami, gifua muatshitshile Davidi sh’a Salomo. 34 Uvi mbangushigo mutambula Salomo ufumu wagasue, mbangubemba egi akhale fumu masugu agasue a monyo wenji mukunda nu muenya mudimo wami Davidi yago ngatombele, handaga watumagele ndaga ngamuwambelele nu mikhuala yami. 35 Uvi mbanguzula ufumu ha mago a mun’enji, mbanguguhana nawo; yakotelesa egi mbanguguhana iphuta 10. 36 Mbanguhana mun’enji giphuta gimoshi, hagula muenya mudimo wami Davidi akhale tangua diagasue nu muenda gutuama diami gu dimbo dia Yelusalema ngatombele ha guhaga jina diami. 37 Aye mbangutomba, mbawuhinyina gifutshi giagasue gifua luholo udi mutshigina,* mbawubua fumu gu Isalele. 38 Gula watumagela ndaga jiagasue ngudi guguwambela nu wawenda mu njila jiami, watshita ndaga jiabonga gu meso ami nu watumagela mikhuala yami gifua muatshitshile muenya mudimo wami Davidi, mbangukhala nji nu aye. Mbangutshita nji egi enya fami* yaye alandule guhinyina gifua luholo ngatshitshile mukunda nu Davidi, mbanguguhana Isalele. 39 Mbanguhana ajigulu a Davidi musonyi mukunda nu ndaga yene, uvi mbayishigo mukhala mayilago.’”

40 Salomo wakambele gushiya Yeloboama, uvi Yeloboama walengele, wayile gu Ejipitu gudi fumu Shishake wa gu Ejipitu. Wakhalele gu Ejipitu uu nu tangua Salomo wafuile.

41 Ndaga jiko jiakalegele Salomo nu ima yagasue yatshitshile muene nu gutema guenji, idi ya gusonega mu mukanda wa lumene lua Salomo. 42 Salomo wahinyine Isalele yagasue gu Yelusalema ivo 40. 43 Gungima Salomo wafuile,* amufundjile mu dimbo dia sh’enji Davidi. Mun’enji Roboama wabuile fumu ha fundo dienji.