Mukanda wa Thomo wa Mafumu

12 Roboama wayile gu Shekeme, handaga enya Isalele agasue ayile gu Shekeme ha gumubuisa fumu. 2 Tangua Yeloboama mun’a Nebate wavuile ndaga yene (wakhalele yowu genji gu Ejipitu handaga walengele mukunda nu Fumu Salomo, wayile mukhala gu Ejipitu). 3 Mala a gu Isalele atumile athu ha guya gumutamega. Gungima Yeloboama nu enya Isalele agasue ayile gudi Roboama, amuwambelele egi: 4 “Sh’aye wabuishile muhitu wetu wanema. Uvi gula aye walebesa mudimo wakola watuhanele sh’aye nu watukatula ginemo* giakola giatuhagele muene, mbatugukalegela mudimo.”

5 Roboama waawambelele egi: “Ndenu mbamuze gungima dia masugu thathu.” Athu ayile. 6 Fumu Roboama wayile mumona athu a gukola* akhalele mukalegela sh’enji Salomo mudimo hakhalele muene nu monyo. Waahudile egi: “Longo ditshi mudi gunguhana hagula nguye nguhane athu awa mvutu?” 7 Ene amuvutuile egi: “Gula wabua muenya mudimo wa athu awa mangino, watshigina ndaga agutogi nu waahana mvutu nu gisemo, ene mbaakhala enya mudimo waye tangua diagasue.”

8 Uvi Roboama watunyile longo diamuhuile athu a gukola,* wayile mumona mavuala a mala akudile n’enji anyi abuile enya mudimo enji. 9 Waahudile egi: “Longo ditshi mudi gunguhana hagula nguye nguhane mvutu gudi athu awa anguwambelele egi: ‘Lebesa muhitu watuhagele sh’aye’?” 10 Mavuala a mala akudile n’enji amuwambelele egi: “Mukunda nu athu aji guguwambela egi: ‘Sh’aye wabuishile muhitu wetu wanema, uvi aye lebesa ginemo gia muhitu wetu’; udi naye guawambela egi: ‘Muno wami wa thege-thege* mbawubalega kete dia tata gukoma. 11 Tata wanemesele muhitu wenu, uvi ame mbanguwunemesa luko muavula. Tata wamihanele ndola nu fimbo jia gituhu, uvi ame mbangumihana ndola nu fimbo jidi nu utadi gu songi.’”

12 Yeloboama nu athu agasue ayile gudi Roboama mu lusugu lua thathu gifua luholo luaawambelele muene egi: “Mbamuvutuge mu lusugu lua thathu.” 13 Uvi fumu wahanele athu mvutu nu khabu, watunyile longo diamuhanele athu a gukola.* 14 Watshiginyile longo diamuhanele mavuala, wawambelele athu egi: “Tata wanemesele muhitu wenu, uvi ame mbanguwunemesa luko muavula. Tata wamihanele ndola nu fimbo jia gituhu, uvi ame mbangumihana ndola nu fimbo jidi nu utadi gu songi.” 15 Fumu gategelelego athu handaga Yehowa watshitshile egi ndaga jikalegewe ngenyi, ha gutagenesa ndaga Yehowa wawambelele Yeloboama mun’a Nebate mu njila ya Ahiya muenya gu Shilo.

16 Tangua enya Isalele agasue amonele egi fumu watuna guategelela, athu amuwambelele egi: “Khapho ditshi tudi nadio nu Davidi? Mbatushigo nji musalela ima ya mun’a Yese. Oo Isalele, muthu nu muthu avutuge gudi nzambi jienji. Henyaha, Oo Davidi, khala mutala phamba fami yaye!” Gungima enya Isalele avutugile gu jinzo jiawo.* 17 Uvi Roboama walanduile guhinyina enya Isalele akhalele mu membo a gu Yuda.

18 Gungima Fumu Roboama watumile Adolama munu wakhalele mutuameji wa athu akhalele mutshita midimo gu ngolo, uvi enya Isalele agasue amusonele maseso, amushiyile. Fumu Roboama wanginyile holu dia phusu-phusu yenji, walengele, wayile gu Yelusalema. 19 Sendese lusugu luene uu nu mangino, enya Isalele ana lumbugila fami ya Davidi.

20 Tangua enya Isalele agasue avuile egi Yeloboama wavutuga gale, adibungishile, amutamegele, gungima amuhagele fumu gu Isalele yagasue. Phamba giphuta gia Yuda gialanduile fami ya Davidi.

21 Tangua Roboama wahetele gu Yelusalema, wabungishile mbala imoshi mala 180 000 akhalele mujiya* gulua ita a mu giphuta gia Yuda nu a mu giphuta gia Benjame, ha guya muluisa enya Isalele ha guvutula ufumu gudi Roboama mun’a Salomo. 22 Gungima Nzambi wa giamatshidia wawambelele profete* Shemaya egi: 23 “Wambela Roboama mun’a Salomo, fumu wa gu Yuda, nu athu agasue a mu giphuta gia Yuda nu a mu giphuta gia Benjame nu athu ako asala egi: 24 ‘Yehowa wazuela egi: “Muyigo muluisa aphangi’enu enya Isalele. Muthu nu muthu avutuge gumbo dienji, handaga ame ngatshitshi egi ndaga yene ikalegewe.”’” Atumagele Yehowa, avutugile gu jinzo jiawo gifua luholo Yehowa waawambelele.

25 Gungima Yeloboama watungile* dimbo dia Shekeme gu khanda ya milundu ya Efrayime, wayile mukhala guene. Gungima wakatugile guene, wayile mutunga* dimbo dia Penuele. 26 Yeloboama watangijile mu mutshima wenji egi: “Ufumu wajiya guvutuga luko mu fami ya Davidi. 27 Gula athu awa alandula guya muhana milambu mu inzo ya Yehowa gu Yelusalema, mitshima yawo mbayivutuga nji gudi Roboama, Fumu wa gu Yuda. Yadiago, ene mbaangushiya nu mbaavutuga gudi Fumu Roboama wa gu Yuda.” 28 Gungima dia guta maga nu athu akhalele gumuhana malongo, fumu walondele isongo mbadi ya ana a ngombe ya wolo. Wawambelele athu egi: “Idi diago lamba mukunda nu enue ha gukanduga gu Yelusalema. Oo Isalele, Nzambi wenu muene yowu, muene wamizolele mu gifutshi gia Ejipitu.” 29 Gisongo gimoshi wagihagele gu Betele, giko wagihagele gu Dane. 30 Ndaga yene yatumile athu ha gutshita gubola, akhalele muya uu nu gu Dane ha gukombelela gisongo giakhalele guene.

31 Gungima watungile jinzo mu mafundo a gukombelela, watombele nganga-nzambi mukatshi dia athu agasue anyi akhalelego enya Levi. 32 Yeloboama wahagele wano mu lusugu lua 15 lua mbeji ya 8, gifua wano wakhalele mukalegewa gu Yuda. Wahanele milambu gudi ana a ngombe alondele muene holu dia giwotshielo giatungile muene gu Betele. Watombele nji nganga-nzambi ha gukhala mutshita mudimo mu mafundo a gukombelela alondele muene gu Betele. 33 Mu lusugu lua 15 mu mbeji ya 8, wasendesele guhana milambu ha giwotshielo giatungile muene gu Betele. Muene hakhenji watombele mbeji yene. Wahagele wano mukunda nu enya Isalele, wakandugile gu giwotshielo ha guhana milambu, wayiwetshiele hagula izole mishi.