Mukanda wa Mbadi wa Gudilanduluila
3 Gungima Salomo wasendesele gutunga inzo ya Yehowa gu Yelusalema gu Mulundu wa Moria, fundo Yehowa wamonegene gudi sh’enji Davidi. Davidi wadiangele gulonda fundo diene, ha fundo dia gusuwila* mbuto dia Olenana muenya Yebuse. 2 Salomo wasendesele gutunga inzo yene mu lusugu lua mbadi mu mbeji ya mbadi, mu givo gia nguana gia uhinyinyi wenji. 3 Fondasio yahagele Salomo ha gutunga inzo ya Nzambi wa giamatshidia yakhalele guleha bakude 60, gukoma bakude 20 mu gudivua nu githeselo akhalele mukalegela ha thomo.* 4 Fundo dia gunginyila gutuama diakhalele guleha bakude 20, diakhalele luholo lumoshi nu gukoma gua inzo.* Gitala gienji giakhalele bakude 20;* wakungile nji fundo diene wolo wabonga mukatshi. 5 Wakhokhele mabaya a mutshi wa jenevriye gu inzo yakoma, gungima wayikungile wolo wabonga, wayisembegele nu ifuanesa ya samba nu ya malenge. 6 Wasembegele nji inzo nu maseso a ndando yavula; wolo wakalegele muene wakatugile gu Palevayima. 7 Wanamigile wolo gu inzo, gu mabaya a yangi, gu ibayi ya inzo nu gu mifulo; walondele nji ifuanesa ya basheribe gu ibayi.
8 Gungima walondele sugu* imoshi, Fundo Diabalega Gijila. Guleha guenji guakhalele luholo lumoshi nu gukoma gua inzo, guakhalele bakude 20; gukoma guenji guakhalele nji bakude 20. Wanamigile wolo wabonga batalanta* 600 ha fundo diene. 9 Wolo alondelele misumadi wakhalele gunema bashekele 50;* wakungile nji wolo gu sugu jia gosa.
10 Gungima walondele ifuanesa ya basheribe mbadi gu sugu, yakotelesa egi Fundo Diabalega Gijila, wayikungile nji wolo. 11 Mahambu agasue a basheribe akhalele nu guleha gua bakude 20; hambu dimoshi dia sheribe wa thomo diakhalele guleha bakude thano, diakhalele mukuata gu gibayi gia inzo; hambu dienji diko diakhalele nji guleha bakude thano, diakhalele gudikuma nu hambu dia sheribe wa mbadi. 12 Hambu dimoshi dia sheribe wa mbadi diakhalele guleha bakude thano, diakhalele mukuata gu gibayi giko gia inzo; hambu dienji diko diakhalele guleha bakude thano, diakhalele nji gudikuma nu hambu dia sheribe wa thomo. 13 Mahambu a basheribe ene akhalele a gusununa, akhalele nu guleha gua bakude 20; basheribe ene akhalele a gumagana,* phala jiawo jiakhalele mutala mukatshi.*
14 Walondele nji rido nu wanda wa ble nu uvuji wa shitu wabenguluga nu wanda wabenga nu linene yabonga; walondele nji ifuanesa ya basheribe gu rido yene.
15 Gungima walondele makunji mbadi gutuama dia inzo, akhalele guleha bakude 35, ima inyi yakhalele gifua mabungu holu dia makunji ene yakhalele bakude thano. 16 Walondele nji malenge gifua tumisanga, waahagele gu songi ya makunji; walondele nji mabundu a grenade 100, gungima waahagele gu malenge ene. 17 Wahagele makunji gutuama dia tempelo. Kunji dimoshi gu koko dia madia,* diko gu koko dia mahidi;* wahanele kunji diakhalele gu koko dia madia jina egi Yakine,* dinyi diakhalele gu koko dia mahidi wadihanele jina egi Boaze.*