Mukanda wa Thomo Gudi Enya gu Kolinto
10 Aphangi, ngudi mutshigina mujiye egi akhakh’etu agasue awendele moshi’a tuta. Mukut’awo agasue nji azawugile kianga. 2 Mukut’awo agasue abatijiwe mu luholo akhalele mulandula Moize mu tuta nu mu kianga. 3 Mukut’awo agasue adile ima ya mu nyuma ya luholo lumoshi. 4 Mukut’awo agasue nji anuile meya a mu nyuma a luholo lumoshi nji. Yadiago, akhalele munua meya akhalele muzoga mu seso dia mu nyuma diakhalele gualandula; seso diene diakhalele* Klisto. 5 Uvi avula mukatshi diawo Nzambi waatunyine. Gishina giene afuile mu mavu a luselenga.
6 Ndaga eji jidi gututemesa hagula tuvuigo nzala ya ima yabola, gifua muatshitshile ene. 7 Mukhadigo akombeledi a isongo gifua muakhalele athu ako mukatshi diawo. Mukanda wa Nzambi udi muzuela mukunda nu ene egi: “Athu akhalele hashi ha gudia nu gunua. Gungima azugile ha gudikenesa.” 8 Tukalagalago nji uthambi* gifua luholo luatshitshile athu ako mukatshi diawo. Hene athu 23 000 mukatshi diawo afuile mu lusugu lumoshi. 9 Tushigo naye gulola Yehowa gifua muatshitshile athu ako mukatshi diawo. Hene nyoga jiaasumine, afuile. 10 Mukhadigo gudinyenga* gifua muatshitshile athu ako mukatshi diawo. Hene muanjelo* wa Nzambi waashiyile. 11 Ndaga eji jiasonegewe ha gututemesa hagula esue tudi mujinga gu gisugishilo gia mavu awa tukhadigo gifua ene.
12 Hene muthu udi mutangiza egi udi wagumagana, ateme genji hagula abuigo. 13 Gulolewa guagasue mudi mutagana nago, guana gubuila nji athu agasue. Uvi Nzambi udi wagujinginyina; muene mbaashigo muhana njila egi ndaga yinyi muajiyilego gukolesela imibuile. Uvi mbawumikuatesa hagula muajiya gukolesela ndaga yene.
14 Hene aphangi ngana guzumba muavula, mukombelelago* isongo. 15 Ngudi muzuela n’enu gifua athu adi nu ndunge. Hene enue hakhenu talenu gula ndaga ngudi muzuela jidi jia giamatshidia nga ndo. 16 Khopho dia vinyo tuana guhanela Nzambi mersi, dianago gumonesa mahatshi a Klisto ba? Dipha tuana gubatula ha gudia, dianago gumonesa muila wa Klisto ba? 17 Dipha didi phamba dimoshi. Uvi esue, ikhale tudi avula, tudi muila umoshi handaga mukut’etu agasue tuana gudia dipha diene dimoshi.
18 Tangizenu gale enya Isalele: Tangua akhalele mudia milambu yakhalele muhanewa ha giwotshielo, yakhalele gifua adi mudia hamoshi nu Nzambi. 19 Itshi ngudi muzuela? Ngudi muzuela egi gisongo nu ima yahanewe mulambu gu isongo, idi nu ndando ba? 20 Ndo sha. Uvi ngudi muzuela egi milambu yana guhana athu a ifutshi, anago guyihana gudi Nzambi uvi ana guyihana gudi bademo. Hene ngushigo mutshigina egi mudibungise nu bademo. 21 Muajiyilego gunua khopho dia Yehowa hamoshi nu khopho dia bademo. Muajiyilego nji gudia ha “mesa a Yehowa” nu ha mesa a bademo. 22 ‘Tudi mutshigina gutuma Yehowa ha guvua fuwa ba’? Esue tuamubalega ngolo ba?
23 Tuajiya gukalagala ima yagasue,* uvi ima yagasue yakhalago nu ndando. Tuajiya gukalagala ima yagasue, uvi ima yagasue yanago gukuatesa. 24 Muthu wagasue mukatshi dienu gakambigo phamba gubonga guenji, uvi akambe nji gubonga gua athu ako.
25 Dienu mbiji yagasue idi musumbishiwa ha zando. Mudihudigo mihu mukunda nu mitshima yenu, 26 handaga “mavu nu ima yagasue idi hene idi ya Yehowa.” 27 Gula muthu gashigo muklisto wamitamega gumbo dienji, nu muatshigina ha guya guene, dienu gima giagasue giamihana muene; muhudigo mihu mukunda nu mitshima yenu. 28 Uvi gula muthu wamiwambela egi, “Mbiji eyi yahanewa milambu gu isongo,” muyidigo mukunda nu muthu wamiwambela nu mukunda nu mitshima ya athu ako ajiya guvua ndaga yene. 29 Ngushigo muzuelela mutshima wenu, uvi ngudi muzuelela mutshima wa muthu muko. Ngajiya gukalagala gima giagasue ngatshigina. Uvi ngushigo mutshigina gutshita ngenyi hagula nguhanyigo njila egi mutshima wa muthu muko ungusophese. 30 Gula ngudi mudia nu muhana Nzambi mersi, mukunda natshi athu ako adi gungusegulula mukunda nu ima ya gudia ngudi gumuhanela mersi?
31 Hene ikhale mudi mudia nga mudi munua, nga mudi mukalagala ndaga iko ya luholo lutshi, tshitenu ndaga jiagasue mukunda nu gutumbuisa Nzambi. 32 Temienu hagula mukalagalago ndaga jiajiya gutuma enya Yuda nga enya Greke nga hungu dia Nzambi ha gubua mu gubola. 33 Ngudi mukalagala ngolo ha gusuanguluisa athu agasue mu ndaga jiagasue. Ngushigo mukamba gubonga guami hakhami, uvi ngudi mukamba gubonga gua athu avula hagula ajiya guhuluishiwa.