Makalegelo a Apostolo
17 Phaula nu Silase abalegele dimbo dia Amfipholise nu Apholonia, ahetele gu Tesalonike. Dimbo diene diakhalele nu sinagoga ya enya Yuda. 2 Phaula wanginyile mu sinagoga gifua muakhadile khadilo dienji. Mukatshi dia phoso thathu, mu Lusugu luagasue lua Guhuluguga, wakhalele muta nawo maga* ha guakuatesa hagula akotelese muabonga Mbimbi ya Nzambi. 3 Wakhalele guadijiga nu guakotelesela ndaga jidi mu mukanda wa Nzambi jinyi jidi mumonesa egi Klisto wakhalele naye gumona lamba nu gufuzumuga mu gufua. Wakhalele muzuela egi: “Yesu yowu ngudi gumiwambela, muene Klisto.” 4 Hene enya Yuda ako mukatshi diawo abuile alandudi a Yesu, adibungishile nu Phaula nu Silase. Enya Greke avula anyi akhalele mukombelela Nzambi, nu akhetu avula a lukuma abuile nji alandudi a Yesu.
5 Uvi enya Yuda avuile giphi, abungishile mbundudi jiakhalele mulaba gumagana ha zando. Athu ene avula asendesele guzola matululu mu dimbo. Anginyine gu ngolo monzo ya Yazoni, akambele Phaula nu Silase ha guya nawo fundo diakhalele athu avula. 6 Uvi a amonelego, hene akuatele Yazoni nu aphangi ako, ayile nu guanana uu nu gudi mafumu a dimbo. Akhalele muzuela mu dijui diakola egi: “Athu awa ana zola malungu ha mavu agasue, aza nji mu dimbo dietu. 7 Yazoni waayambi gumbo dienji. Athu awa agasue ashigo munemesa mikhuala ya Sezale, handaga adi muzuela egi gudi nu fumu muko, jina dienji Yesu.” 8 Tangua mafumu a dimbo nu athu ako avula avuile ndaga eji, abuile tunga-tunga. 9 Awambelele Yazoni nu athu ako ha gufuta mbongo gungima a abembele ha guya.
10 Mu phipha aphangi awambelele Phaula nu Silase ha guya gu Berea muphushi. Tangua ahetele guene, anginyile mu sinagoga ya enya Yuda. 11 Enya Yuda a gu Berea akhalele nu matangi abonga gubalega enya Yuda a gu Tesalonike, handaga atshiginyile lukuma luabonga nu guhaphelela guagasue. Akhalele mulonguga muabonga Mukanda wa Nzambi lusugu nu lusugu ha gujiya gula ndaga jiakhalele muzuela Phaula jiakhalele jia giamatshidia. 12 Hene enya Yuda avula mukatshi diawo abuile alandudi a Yesu. Mukatshi dia enya Greke guakhalele nu mala nu akhetu avula a lukuma abuile nji alandudi a Yesu. 13 Uvi tangua enya Yuda a gu Tesalonike avuile egi Phaula wakhalele mulongesa nji mbimbi ya Nzambi gu Berea, ajile, ashinjigile athu ha guzola matululu. 14 Mu tangua diene, aphangi awambelele Phaula ha guyila mu njila ya mu khulo ya kianga. Uvi Silase nu Timote asalele. 15 Aphangi ayile mutuala Phaula uu nu gu Atene. Hakhalele ene muvutuga, Phaula waalezele ha guwambela Silase nu Timote egi amulandule muphushi.
16 Hakhalele Phaula guanenga gu Atene, wavile khabu handaga wamonele egi dimbo diene diakhalele dia guzala nu isongo. 17 Wasendesele gutangigiza* mu sinagoga nu enya Yuda nu akombeledi ako a Nzambi. Lusugu nu lusugu wakhalele nji mutangigiza nu athu akhalele ha zando. 18 Uvi enya filozofi ako a enya Ephikule nu enya Stoika asendesele gusha n’enji giphapha.* Ako akhalele muzuela egi: “Muenya izuele-zuele owu udi mutshigina guzuela itshi?” Uvi ako egi: “Idi mumonega gifua udi mulongesa nzambi jia ifutshi iko.” Azuelele ngenyi handaga Phaula wakhalele mulongesa lukuma luabonga luatadila Yesu nu gufuzumuga gua athu. 19 Amukuatele, ayile n’enji gu Aleopage, amuhudile egi: “Tuwambele, longo ditshi dihe-dihe udi mulongesa? 20 Handaga ima udi muzuela khenji tuayivile galego. Tudi mutshigina gujiya gula idi mukotelesa itshi.” 21 Athu agasue a gu Atene nu ngenji jiakhalele guene akhalele mukalegela tangua diawo dia guhuluguga phamba ha guzuela nu gutegelela ndaga jihe-jihe. 22 Phaula wamaganele ha katshi na katshi dia Aleopage, wazuelele egi:
“Enue enya gu Atene, ngudi mumona egi mu ima yagasue muana gudihana muavula mu ndaga jia nzambi* gubalega athu ako. 23 Ha gufezegesa, tangua ngakhadi muwenda mu dimbo dienu, ngakhadi mutala muabonga ima muana kombelela. Ngamonyi giwotshielo gimoshi gia gusonega egi ‘Gudi Nzambi Gashigo Mujiyiwa.’ Nzambi munu mudi mukombelela uvi mushigo mujiya, muene ngudi gumilongesa. 24 Nzambi munu wafugile mavu nu ima yagasue idi hene, muene udi Fumu wa dilu nu mavu, ganago gukhala mu tempelo jiatungile athu nu mago awo; 25 ganago nji gukamba egi athu amukalegele mudimo ha gumonesa gifua udi nu funu ya gima gimoshi ngenyi, handaga muene wana hana athu agasue monyo nu muhehe nu ima yagasue. 26 Mu njila ya muthu mumoshi, wafugile athu a ifutshi yagasue hagula akhale ha mavu agasue; watombele nji tangua nu mididilo ya mafundo athu adi naye gukhala, 27 hagula amukambe. Gula atshita ngolo ha gumukamba, mbaamumona. Yadiago Nzambi gashigo gualeha nu muthu wagasue mukatshi dietu. 28 Handaga muene watuhanele monyo, muene nji wana gutukuatesa ha gudinyigisa nu ha gukhala nu monyo. Idi gifua luholo luasonegele asonegi ako a gumbo dienu egi: ‘Esue nji tudi an’enji.’*
29 “Hene luholo tudi ana* a Nzambi, tushigo naye gutangiza egi Nzambi udi gifua gisongo gia wolo nga gia siliva nga gia seso nga gima giko gialondewe nu ndunge nu matangi a athu. 30 Yadiago, mu tangua dikulu Nzambi gahanelego athu ndola mukunda nu ndaga eji handaga akhalelego gumujiya. Uvi henyaha udi muwambela athu a mu mafundo agasue egi adi naye gubalumuna mitshima, 31 handaga watombele gale lusugu mbalusophesa muene athu agasue a ha mavu mu luholo luatagana mu njila ya muthu watombele muene. Nzambi wafuzumuine muthu muene mu gufua ha gumonesa gudi athu agasue egi lusugu luene mbaluza diago.”
32 Havile ene ndaga yatadila gufuzumuga gua athu a gufua, asendesele gumulela. Uvi ako azuelele egi: “Mbatugutegelela luko mukunda nu ndaga eyi.” 33 Gungima Phaula wakatugile ha fundo diene. 34 Uvi athu ako ayile n’enji, abuile alandudi a Yesu. Mukatshi dia athu ene guakhalele nu Denis, nzuji wa tribinale ya Aleopage, nu mukhetu mumoshi jina dienji Damalise, nu athu ako.