Yobo
42 Yobo wahanele Yehowa mvutu egi:
2 “Henyaha ngajiya egi udi watagana ha gutshita ndaga jiagasue
wajiya gutshita ndaga jiagasue, udi mutshigina gutshita.
3 Wazuedi egi: ‘Nanyi udi mubuisa malongo ami akola ha gukotelesa uvi muene ujiyi ndo?’
Hene ngazuelele, uvi ngakhalelego mukotelesa
ndaga jinyi jidi diago jia gushimana mukunda nu ame, jinyi ngushigo nji mujiya.
4 Wazuedi egi: ‘Ngabuba, ngutegelele nguzuele.
Ngudi guguhula mihu unguhane mvutu.’
5 Matshui ami avuile ndaga jiagutadila,
uvi henyaha ngagumona nu meso ami.
6 Gishina giene ngudi gudibela mukunda nu ndaga ngazuedi,
ngudi nji gudibalumuna mu fuphi.”
7 Tangua Yehowa wamanesele guwambela Yobo mbimbi jiene, Yehowa wawambelele Elifaze muenya gu Temana egi:
“Ngaguvuila khabu jiakola nu mafuta aye mbadi, handaga muazuelelego giamatshidia mukunda nu ame gifua muatshitshi muenya mudimo wami Yobo. 8 Henyaha zula ngombe jia milume 7 nu imeme ya milume 7 uye nayo gudi muenya mudimo wami Yobo, hagula munguhane mulambu wa guwotshia mukunda nu gubola guenu. Muene mbawukombelela mukunda nu enue. Ame, mbanguvua gisambu gienji,* mbangushigo gumikalegela ndaga gifua mudi guheya guenu, handaga muazuelelego giamatshidia mukunda nu ame gifua muatshitshi muenya mudimo wami Yobo.”
9 Hene Elifaze muenya gu Temana, nu Biledade muenya gu Shuha nu Sofale muenya gu Naama ayile, atshitshile ndaga gifua luholo Yehowa waawambelele ha gutshita. Yehowa watshiginyile gisambu gia Yobo.
10 Tangua Yobo wamanesele gukombelela mukunda nu mafuta enji, Yehowa wakatudile malamba enji, wamuvutudile umonyi wenji.* Yehowa wamuhanele ima yavula gubalega inyi yakhalele nayo muene thomo mbala jiyadi. 11 Aphangi’enji agasue a mala nu a akhetu nu mafuta enji agasue a mualeha, ajile gudi muene adile n’enji hamoshi gumbo dienji. Amuwalaganele, amuhanele nji gikhesa mukunda nu malamba agasue anyi Yehowa wahanele njila egi amubuile. Muthu wagasue mukatshi diawo wamuhanele makuta nu luphete lua wolo.
12 Hene Yehowa washimbigile gitshinyi giasuga gia monyo wa Yobo muavula gubalega gu gisendeselo. Yobo wahetele imeme 14 000 nu shamo 6 000 nu ngombe 1 000 jiyadi-jiyadi nu phunda 1 000 jia akaji. 13 Wavualele luko ana a mala 7 nu ana a akhetu thathu. 14 Wahanele mun’enji wa mukhetu wa thomo jina egi Jemima, wa mbadi Kezia nu wa thathu Kerene-Apuke. 15 Gushigo nga nu mukhetu mumoshi mu gifutshi giagasue wakhalele wabonga gifua ana a Yobo a akhetu. Sh’awo waahanele khapho dia ima yenji hamoshi nu aphangi’awo a mala.
16 Gungima Yobo wajingile luko ivo 140, wamonele an’enji nu ajigulu enji—indongo nguana. 17 Gu gisugishilo Yobo wafuile, uvi wajingile ivo yavula ya gusuanguluga.*