Ngimbo
Gudi mutuameji wa miziki. Lungimbo lua Davidi.
64 Oo Nzambi, tegelela dijui diami tangua ngudi gugububila.
Nguhuluise ha mago a mbalagaji jidi gunguhana woma.
2 Ngubambe mukunda nu iphungi idi muya athu abola mu mafumbe,
ngubambe mukunda nu thundu ya athu abola.
3 Ene adi muviga madimi awo gifua phogo ya khusa;
adi musonona mbimbi jiawo jia khuta gifua mifula,
4 ene adi gujisonona muthu munu gakalegelego gubola mu mafundo adisuegi ene.
Adi gumusonona najio mu gisagumuisa, ashigo muvua woma.
5 Ene adi jigi-jigi nu matangi awo abola;*
adi muzuelela luholo lua gusuega miheto yawo.
Adi muzuela egi: “Nanyi mbawuyimona?”
6 Adi mukamba maluholo ahe-ahe a gutshita gubola;
ene adi nu ndunge jiabola, adi muya giphungi mu gisuegi ha gutshita ndaga jiabola;
idi lamba ha gujiya matangi adi mu mutshima wa muthu wagasue mukatshi diawo.
7 Uvi Nzambi mbawaasonona mufula;
mufula mbawaanamenesa mu gisagumuisa.
8 Madimi awo mbaabatela malamba;
athu agasue mbaamona ndaga yene, mbaakundula mito.
9 Ngenyi, athu agasue mbaavua woma,
mbaalongesa ndaga jiakalagala Nzambi
nu mbaakotelesa ndaga jiakalegele muene.
10 Muthu wabonga mbawusuanguluga mukunda nu Yehowa nu mbawulengela gudi muene;
athu agasue adi nu mitshima yabonga, mbaadihala.