Ngimbo

144 Yehowa atumbuishiwe, muene udi Seso diami,

wana longesa mago ami ha gulua ita,

wana longesa mino yami ha guluisa mbalagaji jiami.

 2 Muene wana gungumonesela guzumba gua giamatshidia, udi fundo diami diakola,

fundo diami diabonga dia gulengela, muhuluishi wami,

udi tshibu yami, fundo diami dia gulengela;

muene wana gungukuatesa ha guhinyina athu.

 3 Oo Yehowa, muthu udi nanyi hagula umumone,

mun’a muthu udi nanyi hagula ukambe gumujiya?

 4 Muthu udi gifua muhehe wa githuhu;

masugu a monyo wenji adi gifua vule didi mutota.

 5 Oo Yehowa, shigula* dilu, ubulumuge hashi;

kuata milundu, izole mishi.

 6 Henyesa mvula, mbalagaji jimuangane;

sonona mifula yaye, abuise tunga-tunga.

 7 Sununa koko diaye gosa fundo wana khala,

unguhuluise gu matshipha-tshipha a meya,

ha mago* a ngenji,

 8 jinyi jiana mba mambo

nu jiana thuphula koko diawo dia madia ha gudiloga ndaga jia mambo.*

Mbanguyimba ngimbo* nu gima gia gushigila miziki gidi nu shinga kumi ha gugutumbuisa,

10 aye wana bingisa* mafumu,

aye wana huluisa muenya mudimo waye Davidi gu phogo ya khusa yana bata gufua.

11 Nguhuluise ha mago a ngenji,

jinyi jiana mba mambo

nu jiana thuphula koko diawo dia madia ha gudiloga ndaga jia mambo.

12 Ngenyi an’etu a mala mbaakhala gifua an’a mitshi idi mukula muphushi,

an’etu a akhetu gifua makunji a ha khomo a gusembega muabonga mukunda nu inzo ya fumu.

13 Jinzo jietu jia gubambela ima mbajizala nu mbuto jia maluholo agasue;

shitu jietu mbajidivudisa mu temu, inunu nu inunu.

14 Ngombe jietu jinyi jidi gu mavumo mbajishigo munamana nga guselula;

mbagushigo mukhala nu milolo ya gikenene mu mabala-bala etu.