Ngimbo
א [Alefe]
119 Gusuanguluga gudi nu athu adi ya gujinginyina,*
anyi adi mutumagela mikhuala ya Yehowa.
2 Gusuanguluga gudi nu athu ana landula malongo enji,
anyi ana gumukamba nu mutshima wawo wagasue.
3 Ana kalagalago nga ndaga imoshi yabola;
ana landula njila jienji.
4 Wazuelele egi:
Athu alandule muabonga mikhuala yaye.
5 Ngudi mutshigina gusala ya gujinginyina
hagula ngajiya gutumagela mikhuala yaye!
6 Ngenyi mbangushigo muvua musonyi
tangua ngudi mulonguga mikhuala yaye yagasue.
7 Mbangugutumbuisa nu mutshima wa phelegeta
tangua mbangulonguga usopheshi waye watagana.
8 Mbangutumagela mikhuala yaye.
Ungubembigo mayilago.
ב [Bete]
9 Luholo lutshi muvuala wa yala wajiya guphelegetesa njila yenji?
Gula wadibamba nu watumagela mbimbi yaye.
10 Ngudi gugukamba nu mutshima wami wagasue.
Ngukuatese hagula ngubembigo mikhuala yaye.
11 Ngana bamba muabonga mbimbi yaye mu mutshima wami
hagula ngugutshitshilago gubola.
12 Oo Yehowa, tumbuishiwa;
ngulongese mikhuala yaye.
13 Ngalongesele
badesizio agasue wazudile.
14 Ngana suanguluga nu malongo aye
gubalega ima yagasue ya ndando.
15 Mbangutangigiza mikhuala yaye
mbanguhaga meso ami mu njila jiaye.
16 Ngana zumba mikhuala yaye.
Mbangushigo mujimbila mbimbi yaye.
ג [Gimele]
17 Kalegela muenya mudimo waye ndaga nu gisemo,
hagula ngukhale nu monyo, ngutumagele nji mbimbi yaye.
18 Ngukangule meso hagula ngajiya gumona muabonga
ndaga jiawaha jidi mu mukhuala waye.
19 Ngudi gami ngenji mu gifutshi.
Ungusuegelago mikhuala yaye.
20 Tangua diagasue ngudi muvua nzala yakola
ya usopheshi waye.
21 Wabalela enya lulendo,
athu atewe mikumbu anyi ana tuna gutumagela mikhuala yaye.
22 Katula mashingo nu lusegu gutuama diami,
handaga ngana tumagela mikhuala yaye.
23 Ikhale tangua mafumu ana gudibungisa hamoshi ha guzuela ndaga jiabola mukunda nu ame,
ame muenya mudimo waye ngana tangiza mikhuala yaye.
24 Ngana zumba mikhuala yaye;
yana khala gifua ahanyi ami a malongo.
ד [Dalete]
25 Ngudi ya gubanda mu fuphi.
Ngubambe nu monyo mu gudivua nu mbimbi yaye.
26 Ngaguwambelele makalegelo ami, aye wanguhanele mvutu;
ungulongese mikhuala yaye.
27 Ngukuatese ha gukotelesa mikhuala yaye,
hagula ngajiya gutangigiza* midimo yaye ya gushimana.
28 Gikolekole giangukuata mukunda nu gikenene.
Nguhane ngolo mu gudivua nu mbimbi yaye.
29 Katula njila ya mambo gutuama diami,
nguvile khenda, ungulongese mikhuala yaye.
30 Ngazudi desizio dia gusala ya gujinginyina gudi aye.
Ngudi mujiya egi usopheshi waye wana khala watagana.
31 Ngudi ya gujinginyina gu malongo aye.
Oo Yehowa, ubembigo egi nguhanewe musonyi.
32 Mbangukhala nu nzala yakola ya gulandula njila ya mikhuala yaye
handaga wayilondediele fundo mu mutshima wami.
ה [He]
33 Oo Yehowa, ngulongese njila ya mikhuala yaye,
mbanguyilandula uu nu gu gisugishilo.
34 Nguhane ndunge,
hagula ngajiya gulandula mikhuala yaye
nu guyitumagela nu mutshima wami wagasue.
35 Ngutuameze* mu njila ya mikhuala yaye,
handaga yana gungusuanguluisa.
36 Ngukuatese handaga ngudi mutshigina gutumagela malongo aye,
ngushigo mutshigina gutagenesa nzala jiami.
37 Katula meso ami hagula atadigo ima ya githuhu;
ngukuatese ha gukhala nu monyo mu njila yaye.
38 Tagenesa ndaga walayele muenya mudimo waye,
hagula athu aguvile woma.*
39 Ngukatule musonyi unu ngudi muvila woma,
handaga usopheshi waye udi wabonga.
40 Ngudi muvua nzala yakola ya mikhuala yaye.
Ngukuatese ha gukhala nu monyo handaga udi Nzambi wabonga.
ו [Waw]
41 Oo Yehowa, ngumonesele guzumba guaye gua giamatshidia,
nguhuluise gifua luholo walayele.
42 Ngenyi mbanguhana mvutu gudi muthu udi gungushinga,
handaga ngudi musha mutshima mu mbimbi yaye.
43 Ukatulago mbimbi ya giamatshidia mu kano diami,
handaga ngana gudifelela gu* usopheshi waye.
44 Mbangulandula gutumagela mukhuala waye tangua diagasue,
ivo nu ivo.
45 Mbanguwenda ha fundo dia ubambi,*
handaga ngudi mukamba mikhuala yaye.
46 Mbanguzuelela malongo aye gutuama dia mafumu,
mbangushigo muvua musonyi.
47 Ngudi ya gujinginyina gu mikhuala yaye,
ayi, ngana guyizumba.
48 Mbanguthuphula mago ha gukombelela mukunda nu mikhuala yaye ngana zumba,
mbangutangigiza* mikhuala yaye.
ז [Zayine]
50 Yene yana gunguhana gikhesa mu tangua dia lamba,
handaga ndaga wazuelele yahuluishile monyo wami.
51 Enya lulendo adi gungushinga muavula,
uvi ame ngushigo mubemba mukhuala waye.
52 Ngawunguluga usopheshi waye wa mualeha, Oo Yehowa,
usopheshi wene wana gunguhana gikhesa.
53 Ngudi muvua khabu jiabala mukunda nu athu abola,
anyi ana tuna mikhuala yaye.
54 Mikhuala yaye yana bua gifua ngimbo mukunda nu ame
guagasue ngana khala.*
55 Oo Yehowa, mu phipha ngana wunguluga jina diaye,
hagula ngajiya gutumagela mukhuala waye.
56 Yene ndaga ngana tshita
handaga ngana tumagela mikhuala yaye.
ח [Heth]
57 Yehowa udi khapho diami;
ngalayele egi mbangutumagela mbimbi yaye.
58 Ngudi gugububila nu mutshima wami wagasue;
nguvile khenda gifua luholo walayele.*
59 Ngatadila muabonga makalegelo ami,
hagula ngajiya guvutugila luko malongo aye.
60 Ngudi mutshita muphushi, ngushigo mushipha
ha gutumagela mikhuala yaye.
61 Shinga jia athu abola jiangulanga,
uvi ngushigo mujimbila mukhuala waye.
62 Ngana zuga mukatshi dia phipha ha guguhana mersi
mukunda nu usopheshi waye wabonga.
63 Ngudi futa dia athu agasue ana guguvila woma
nu anyi ana tumagela mikhuala yaye.
64 Oo Yehowa, guzumba guaye gua giamatshidia guazala ha mavu;
ngulongese mikhuala yaye.
ט [Teth]
65 Oo Yehowa, wakalegela muenya mudimo waye ndaga mu luholo luabonga,
gifua luholo wazuelele.
66 Ngulongese gutema nu ndunge,
handaga ngana sha mutshima gu mikhuala yaye.
67 Gutuama egi ngumonesewe lamba, ngakhalele mujimbila njila,
uvi henyaha ngudi mutumagela mbimbi yaye.
68 Udi Nzambi wabonga, midimo yaye nji idi yabonga.
Ngulongese mikhuala yaye.
69 Enya lulendo adi gungumbila mambo,
uvi ame ngudi mutumagela mikhuala yaye nu mutshima wami wagasue.
70 Adi nu mitshima yakola,
uvi ame ngudi ya gujinginyina gu mukhuala waye.
71 Idi yabonga luholo ngamonesewe lamba,
handaga yangukuatesele ha gulonguga mikhuala yaye.
72 Mukhuala waye unu wahanele udi wabonga mukunda nu ame,
gubalega itshinyi ya wolo 1 000 nu utadi wa siliva.
י [Yod]
73 Aye wangufugile nu mago aye, wangulondele.
Nguhane ndunge,
hagula ngajiya gulonguga mikhuala yaye.
74 Athu anyi ana guguvila woma ana suanguluga tangua ana gungumona,
handaga mbimbi yaye idi felela diami.*
75 Oo Yehowa, ngudi mujiya egi usopheshi waye udi wabonga,
wamonesele egi udi ya gujinginyina tangua wanguhanele ndola.
76 Ngabuba, guzumba guaye gua giamatshidia gunguhane gikhesa,
gifua luholo walayele muenya mudimo waye.
77 Nguvile khenda hagula ngusale nu monyo,
handaga ngudi ya gujinginyina gu mukhuala waye.
78 Enya lulendo ahanewe musonyi,
handaga adi mulaba gungutshita gubola.
Uvi ame mbangutangigiza* mikhuala yaye.
79 Athu ana guguvila woma avutuge gudi ame,
athu anyi ana jiya malongo aye.
80 Ngukuatese, ngutumagele mikhuala yaye nu mutshima umoshi,
hagula nguvishiwago musonyi.
כ [Kaph]
81 Ngudi munengena nu mutshima zagu-zagu uhuluishi waye,
handaga mbimbi yaye idi felela diami.*
82 Meso anguhola ha gunengena ndaga walayele,
ngudi gudihula egi: “Tangua ditshi mbawungukuatesa?”
83 Handaga ngabua gifua mulondo wa gilema gia shitu wamigina gu mishi,
uvi ngushigo mujimbila mikhuala yaye.
84 Muenya mudimo waye udi naye gunengena masugu guvula gutshi?
Tangua ditshi mbawusophesa athu adi gungusagesa?
85 Enya lulendo ahaga wina mukunda nu ame,
athu anyi ana shiya mukhuala waye.
86 Mikhuala yaye yagasue idi yatagana ha gushila mutshima.
Athu adi mulaba gawo gungusagesa; ngukuatese!
87 Guasalele hazonda hagula angushiye, ngutote ha mavu,
uvi ngabembelego mikhuala yaye.
88 Ngubambe nu monyo mukunda nu guzumba guaye gua giamatshidia,
hagula ngajiya gulandula malongo wahanele.
ל [Lamede]
89 Oo Yehowa, mbimbi yaye
mbayisala mayilago mu dilu.
90 Gujinginyina guaye guana khala mu indongo yagasue.
Wajigamesele mavu muabonga hagula alandule gukhala ha fundo dienji.
91 Ima yagasue* yana khala guene uu nu mangino mukunda nu mikhuala yaye,
handaga ima yene yagasue yana gugutshitshila mudimo.
92 Gula nga ngakhalele ndo ya gujinginyina gu mukhuala waye,
nga ngafile mu tangua dia lamba.
93 Mbangushigo mujimbila mikhuala yaye,
handaga wanguhuluishile mu njila ya mikhuala yene.
94 Ngudi muthu waye; nguhuluise,
handaga ngana kamba mikhuala yaye.
95 Athu abola adi gunguzomba ha gungushiya,
uvi ame ngana tangigiza malongo aye.
96 Ngamonele egi ima yagasue yatagana yana khala nu mididilo,
uvi mukhuala waye wana khala ndo nu mididilo.
מ [Mem]
97 Ngana zumba mikhuala yaye muavula!
Ngana guyitangigiza* lusugu lua mudidi.
98 Mikhuala yaye yana gungubuisa muthu watema gubalega mbalagaji jiami,
handaga ngana khala naye ivo nu ivo.
99 Ngatema muavula gubalega mandombi ami agasue,
handaga ngana tangigiza* malongo aye.
100 Ngudi mutshita ndaga nu gutema guavula gubalega athu a gukola,
handaga ngana tumagela mikhuala yaye.
101 Ngana tuna guwenda mu njila jiabola,
ha gutumagela mbimbi yaye.
102 Ngatunyilego usopheshi waye,
handaga wangulongesele.
103 Mbimbi jiaye jidi nzegu-nzegu ha ludimi luami,
gubalega wigi!
104 Mikhuala yaye yana gungukuatesa ha gukalagala ndaga nu gutema.
Gishina giene ngana tuna njila jiagasue jiabola.
נ [Nune]
105 Mbimbi yaye idi muenda mukunda nu malu ami,
idi muanya mukunda nu njila yami.
106 Ngadilogele ha gutumagela mikhuala yaye yatagana,
mbangutagenesa ndaga ngadilogele.
107 Ngudi mu lamba diakola.
Oo Yehowa, ngubambe nu monyo gifua luholo wazuelele.
108 Oo Yehowa, ngabuba tshigina lutumbu ngudi guguhana gifua mulambu wa khenda,
ungulongese mikhuala yaye.
109 Monyo wami udi mu gingonza tangua diagasue,*
uvi ngajimbidilego mukhuala waye.
110 Athu abola angutela muheto,
uvi ame ngashiyilego mikhuala yaye.
111 Ngana zula malongo aye gifua khapho* diami mayilago,
handaga ana gungubatela gusuanguluga mu mutshima.
112 Ngazudi desizio dia gutumagela mikhuala yaye
tangua diagasue, uu nu gu gisugishilo.
ס [Sameke]
113 Ngana zumba ndo athu ana khala nu mitshima mbadi,
uvi ngana zumba mukhuala waye.
114 Udi fundo diami dia gudisuega nu tshibu yami,
handaga mbimbi yaye idi felela diami.*
115 Enue athu abola, musuenyigo hehi nu ame,
hagula ngutumagele mikhuala ya Nzambi wami.
116 Ngukuatese gifua luholo walayele,*
hagula ngusale nu monyo;
Ngana gugushila mutshima, ubembigo egi nguhanewe musonyi.
117 Ngukuatese hagula nguhuluge;
ngenyi mbangudihana tangua diagasue gu mikhuala yaye.
118 Wana tuna athu agasue ana shiya mikhuala yaye,
handaga adi athu abola nu enya mambo.
119 Udi mukatula athu abola ha mavu gifua muana katudiwa ima ya githuhu.
Gishina giene ngana zumba malongo aye.
120 Muila wangudigita mukunda nu woma wabala ngudi guguvila;
ngudi muvua woma mukunda nu usopheshi waye.
ע [Ayine]
121 Ngakalagala ndaga jiabonga nu jiatagana.
Ungubembigo ha mago a athu adi gungumonesa lamba!
122 Kuatesa muenya mudimo waye ha gukhala muabonga;
enya lulendo angusagesago.
123 Meso anguhola nu gunenga uhuluishi waye
nu laji diaye diabonga.
124 Monesela muenya mudimo waye guzumba guaye gua giamatshidia,
ungulongese mikhuala yaye.
125 Ngudi muenya mudimo waye; nguhane ndunge
hagula ngujiye malongo aye.
126 Tangua diatagana hagula Yehowa akalagale ndaga,
handaga ashiyile mukhuala waye.
127 Gishina giene ngana zumba mikhuala yaye
muavula gubalega wolo, nu wene wolo wabonga.
128 Longo* diagasue wana hana, diana khala diatagana gu meso ami;
ngana tuna njila jiagasue jiabola.
פ [Pe]
129 Malongo aye adi awaha lume.
Gishina giene ngana guatumagela.
130 Gukotelesa mbimbi yaye guana bata muanya,
guana hana ndunge gudi muthu waheya.
131 Ngakangula kano diami, ngamba muawu,
handaga ngudi muvua nzala ya mikhuala yaye.
132 Balumuga gudi ame unguvile khenda,
ungukalegele ndaga mu luholo luatagana gifua luholo wana kalegela athu ana zumba jina diaye.
133 Tuameza ikanzo yami muabonga mu njila ya mbimbi yaye;
nga gima gimoshi giabola ginguhinyinago.
134 Nguhuluise ha mago a athu adi gungusagesa,
ngenyi mbangutumagela mikhuala yaye.
135 Monesela muenya mudimo waye gisemo,
ungulongese mikhuala yaye.
136 Ngudi mubulula masoji,
handaga athu ashigo mutumagela mukhuala waye.
צ [Tsade]
137 Oo Yehowa, udi Nzambi wabonga,
usopheshi waye wana khala wa giamatshidia.
138 Malongo wana hana ana khala abonga,
ana khala diago atagana ha gushila mutshima.
139 Gikhesa giami gialema gifua tshuya,
handaga mbalagaji jiami jiajimbila mbimbi yaye.
140 Mbimbi yaye idi diago yaphelegeta,
muenya mudimo waye wana guyizumba.
141 Ngushigo nu ndando, anguseguluile;
uvi ngajimbidilego mikhuala yaye.
142 Gubonga guaye guana khala ivo nu ivo,
mukhuala waye udi giamatshidia.
143 Ngatshima gikenene nu malamba angubuila,
ngana sala ya gujinginyina gu mikhuala yaye.
144 Gubonga gua malongo aye guana khala mayilago.
Nguhane ndunge hagula ngusale nu monyo.
ק [Qoph]
145 Ngudi gugutamega nu mutshima wami wagasue. Oo Yehowa, nguhane mvutu.
Mbangutumagela mikhuala yaye.
146 Ngudi gugutamega; nguhuluise!
Mbangutumagela malongo aye.
147 Ngazugi gutuama egi guma gutshie* ha gugudidila ha gutoga ukuateshi,
handaga mbimbi jiaye jidi felela diami.*
148 Tulo tuana gunguhua gu meso gutuama egi tangua dia gukengelela ditagane,
hagula ngajiya gutangigiza* mbimbi yaye.
149 Tegelela dijui diami mukunda nu guzumba guaye gua giamatshidia.
Oo Yehowa, ngubambe nu monyo handaga wana sophesa mu luholo luatagana.
150 Athu ana kalagala ndaga jia musonyi asuena hehi,
ene adi gualeha nu mukhuala waye.
151 Oo Yehowa, udi hehi.
Mikhuala yaye yagasue idi ya giamatshidia.
152 Sendese mualeha, ngana longuga malongo aye
anyi wahagele ha gukhala mayilago.
ר [Resh]
153 Tala malamba ngudi mumona, nguhuluise,
handaga ngajimbidilego mukhuala waye.
155 Athu abola ajiyilego guhuluga,
handaga akambelego mikhuala yaye.
156 Oo Yehowa, khenda jiaye jidi jiavula.
Ngubambe nu monyo handaga wana sophesa mu luholo luatagana.
157 Mbalagaji jiami nu athu adi gungusagesa adi avula;
uvi ngabembelego malongo aye.
158 Athu ana huiga athu ako, ngana guatala nu gisegela,
handaga ene ana tumagela ndo mbimbi yaye.
159 Tala luholo ngana zumba mikhuala yaye!
Oo Yehowa, ngubambe nu monyo mukunda nu guzumba guaye gua giamatshidia.
160 Mbimbi yaye yagasue idi ya giamatshidia,
usopheshi waye wagasue watagana wana khala mayilago.
ש [Sine] nga [Shin]
161 Mafumu adi mulaba gungusagesa,
uvi ngudi muvua woma mukunda nu ndaga wazuelele.
162 Ngudi musuanguluga mukunda nu mbimbi yaye
gifua muthu watambula ima yavula gu ita.
163 Ngana tuna mambo—ngana guaatshigina ndo nga hazonda—
ngana zumba mukhuala waye.
164 Ngana gugutumbuisa mbala 7 mu lusugu
mukunda nu usopheshi waye wabonga.
165 Athu anyi ana zumba mukhuala waye ana khala nu guhuima guavula;
gushigo nga nu gima giajiya guakhakhuisa.
166 Oo Yehowa, ngana gudifelela gu ndaga wana kalagala ha gunguhuluisa,
ngana tumagela mikhuala yaye.
167 Ngana tumagela malongo aye,
ngana guazumba diago muavula.
168 Ngana tumagela mikhuala nu malongo aye,
handaga udi mujiya muabonga ndaga ngana tshita.
ת [Taw]
169 Oo Yehowa, tegelela luholo ngudi gugudidila ha gutoga ukuateshi.
Nguhane ndunge ha gukotelesa gifua luholo wazuelele.
170 Vua luholo ngudi gugutoga ha gunguvila khenda.
Nguhuluise gifua luholo walayele.
171 Mbangulandula gugutumbuisa,
handaga wangulongesa mikhuala yaye.
172 Ludimi luami mbaluyimba ndaga wazuelele,
handaga mikhuala yaye yagasue idi yabonga.
173 Koko diaye dikhale hehi ha gungukuatesa,
handaga ngatombi ha gutumagela mikhuala yaye.
174 Ngudi munengena uhuluishi waye, Oo Yehowa,
ngudi ya gujinginyina gu mukhuala waye.
175 Ngubembe nu monyo hagula ngajiya gugutumbuisa;
mikhuala yaye ingukuatese.
176 Ngawungagana gifua gimeme giatota. Kamba muenya mudimo waye,
handaga ngajimbidilego mikhuala yaye.