Mukanda wa Mbadi wa Gudilanduluila

6 Mu tangua diene Salomo wazuelele egi: “Oo Yehowa, wazuelele egi mbawukhala mukatshi dia phipha yakola. 2 Henyaha ngagutungila inzo imoshi ya gushimana diago, fundo mbawukhala mayilago.”

3 Gungima fumu Salomo wabalumugile, wasendesele gushimbiga enya Isalele agasue hakhalele ene a gumagana. 4 Wazuelele egi: “Yehowa Nzambi wa Isalele atumbuishiwe, muene* wahanele tata wami Davidi laji, nu watagenesa* laji diene handaga wazuelele egi: 5 ‘Sendese lusugu ngazolele athu ami mu gifutshi gia Ejipitu, khenji ngatombelego dimbo mukatshi dia iphuta yagasue ya Isalele ha gutunga inzo hagula jina diami dikhale guene, ngatombelego nji muthu ha gukhala fumu wa athu ami, enya Isalele. 6 Uvi ngatombele Yelusalema hagula jina diami dikhale guene, ngatombele nji Davidi ha guhinyina athu ami enya Isalele.’ 7 Tata wami Davidi wakhalele diago mutshigina gutunga inzo mukunda nu jina dia Yehowa Nzambi wa Isalele. 8 Yehowa wawambelele tata wami Davidi egi: ‘Udi diago mutshigina gutunga inzo mukunda nu jina diami, idi ndaga yabonga. 9 Uvi ishigo aye mbawutunga inzo yene, mona mbawuvuala* muene mbawutunga inzo mukunda nu jina diami.’ 10 Yehowa watagenesele laji dienji, ngahinganele ha fundo dia tata wami Davidi, ngudi ha nguasa ya ufumu ya Isalele gifua mualayele Yehowa. Ngatunga nji inzo mukunda nu jina dia Yehowa Nzambi wa Isalele. 11 Ngazudi mushete wa gikotelo giakotele Yehowa nu enya Isalele, ngawuhagi nji mu inzo yene.”

12 Gungima wamagenele gutuama dia giwotshielo gia Yehowa gutuama dia enya Isalele agasue, wathuphuile mago enji. 13 (Handaga Salomo walondele estrade* ya kuivre, wayihagele hakatshi na katshi dia gibanzala.* Yakhalele guleha bakude* thano, gukoma ba kude thano nu gitala gia bakude thathu; gungima wamagenele holu dia estrade yene.) Wafugamele gutuama dia enya Isalele agasue, wathuphuile mago enji gosa. 14 Wazuelele egi: “Oo Yehowa Nzambi wa Isalele, gushigo nu Nzambi muko gifua aye mu dilu nu ha mavu. Aye wana nemesa gikotelo giaye, wana monesa guzumba gua giamatshidia gudi akombeledi aye adi muwenda gutuama diaye nu mutshima wawo wagasue. 15 Watagenesa ndaga walayele tata wami Davidi muenya mudimo waye. Wamuhanele laji, mangino watagenesa laji diene. 16 Henyaha, Oo Yehowa Nzambi wa Isalele, tagenesa ndaga walayele tata wami Davidi muenya mudimo waye tangua wazuelele egi: ‘Gula an’aye adituameza muabonga, atumagela mukhuala wami gifua luholo aye wawendele gutuama diami, mbagukhala nu muthu mukatshi dia ajigulu aye ha nguasa ya ufumu gu Isalele tangua diagasue.’ 17 Henyaha, Oo Yehowa Nzambi wa Isalele, tagenesa ndaga walayele Davidi muenya mudimo waye.

18 “Uvi Nzambi wajiya diago gukhala ha mavu nu athu ba? Dilu, nu guene gosa gua gudinyinyiga gudi guazonda mukunda nu aye ha gukhala; luholo lutshi wajiya gukhala mu inzo eyi ngatungi? 19 Henyaha, tegelela gisambu nu gububa gua muenya mudimo waye. Oo Yehowa Nzambi wami, ngudi mudila ha gutoga ukuateshi; ngutegelele, tegelela gisambu ngudi mutshita gutuama diaye. 20 Ngabuba, meso aye akhale mutala inzo eyi phipha nu muanya, atale fundo wazuelele egi mbawuhaga jina diaye, hagula utegelele gisambu gidi mutshita muenya mudimo waye ha fundo edi. 21 Tegelela gububa gua muenya mudimo waye udi mutoga ukuateshi, nu gububa gua athu aye enya Isalele tangua adi mutshita isambu gu khanda ya fundo edi. Ngabuba tegelela mu dilu fundo wana khala; ngabuba tegelela, tutotesele.

22 “Gula muthu wakalegela muthu n’a muko gubola, nu amutoga ha gudiloga,* gula muthu muene waza gutuama dia giwotshielo giaye, mu inzo eyi hadi muene wadilogi gale,* 23 tegelela mu dilu, sophesa enya mudimo aye, muthu wabola muvutuile gubola guatshitshi muene, haga ndaga yatshitshi muene ha muto wenji, bingisa muthu gatshitshilego gubola,* mushimbige gifua mudi gubonga guenji.

24 “Gula mbalagaji jiabinga athu aye enya Isalele handaga adi mulandula gukalagala ndaga jiabola gu meso aye, gungima gula athu aye avutuga, atumbuisa jina diaye, a gukombelela nu a gububila mu inzo eyi hagula waavile khenda, 25 ngabuba tegelela mu dilu, totesela athu aye enya Isalele gubola guawo, avutule mu gifutshi waahanele nu akhakh’awo.

26 “Gula dilu diadikanga, mvula nji ishigo luko munoga handaga adi mulandula gutshita gubola gu meso aye, gungima gula a gukombelela gu khanda ya inzo eyi, atumbuisa jina diaye nu abemba gukalagala gubola handaga waamonesa lamba, 27 ngabuba tegelela mu dilu, totesela enya mudimo aye gubola guawo, gubola gua athu aye enya Isalele handaga mbawaadijiga njila yabonga adi naye gulandula, nogesa nji mvula mu mavu wahanele athu aye gifua khapho.

28 “Gula nzala yangina mu gifutshi nga misongo ya gisambugila, nga gikalala giakola giana miginyisa mbuto, nga misongo yana kuata mitshi, nga matulu* ana wenda avula fundo dimoshi, nga ndo gula mbalagaji jiawo jiaajieta mu dimbo dimoshi dia mu gifutshi, nga gula misongo nga malamba a luholo lutshi a abuila, 29 gula muthu mumoshi nga athu aye agasue enya Isalele atshita gisambu nu a gububila ha guavila khenda, (handaga muthu nu muthu udi mujiya lamba dienji) gula asununa mago awo gu khanda ya inzo eyi, 30 ngabuba tegelela mu dilu fundo wana khala, atotesele; hana lufuto gudi muthu wagasue gifua mudi makalegelo enji, handaga udi mujiya mutshima wa muthu wagasue (phamba aye wana jiya diago ndaga jiana khala mu mutshima wa muthu), 31 hagula ajiya guguvuila woma ha guwenda mu njila jiaye masugu agasue mbaakhala mu mavu wahanele akhakh’etu.

32 “Gula ngenji munu gashigo mukatshi dia athu aye enya Isalele, wakatuga mu gifutshi gia gualeha mukunda nu lukuma lua jina diaye diakoma, nu ngolo jiaye jiavula, gungima waza mutshita gisambu gu khanda ya inzo eyi, 33 ngabuba tegelela mu dilu fundo wana khala, kalagala ndaga yagasue idi gugutoga ngenji muene hagula athu agasue a ha mavu ajiye jina diaye, aguvile woma gifua muana tshita athu aye enya Isalele, ajiye nji egi inzo ngatungile idi mutumbuisa jina diaye.

34 “Gula athu aye aya mulua ita nu mbalagaji jiawo ikhale fundo ditshi, atshita gisambu gudi aye gu khanda ya dimbo edi watombele nu gu khanda ya inzo ngatungi mukunda nu jina diaye, 35 tegelela gisambu giawo mu dilu nu luholo adi gugububila ha guavila khenda, abingise.

36 “Gula a gukalegela gubola (handaga gushigo nu muthu ganago gukalagala gubola), gula waavuila khabu waabemba ha mago a mbalagaji jiawo, mbalagaji jiene jiaabata mu uhiga mu gifutshi giawo, ikhale gualeha nga hehi, 37 gula mu gifutshi a abatele mu uhiga akotelesa egi akalegele gubola, avutuga gudi aye nu a gububila ha guavila khenda mu gifutshi giene ayile mu uhiga, azuele egi ‘tuakalegele gubola; tuajimbidile, tuatshitshile diago ndaga yabola,’ 38 gula avutuga gudi aye nu mutshima wawo wagasue nu monyo* wawo wagasue hadi ene mu gifutshi a abatele mu uhiga, atshita gisambu gu khanda ya gifutshi giawo ginyi wahanele akhakh’awo, gu khanda ya dimbo watombele nu gu khanda ya inzo ngatungi mukunda nu jina diaye, 39 tegelela gisambu giawo mu dilu fundo wana khala, tegelela nji luholo adi gugububila ha guavila khenda, batula mulonga mukunda nu gubonga guawo, totesela athu aye anyi akalegele gubola gu meso aye.

40 “Henyaha, Oo Nzambi wami ngabuba, kangula meso aye, matshui aye ategelele gisambu ngudi mutshita ha fundo* edi. 41 Henyaha, Oo Yehowa Nzambi, kanduga ha fundo diaye dia guhuluguga, aye nu Mushete wa ngolo jiaye. Oo Yehowa Nzambi, nganga-nzambi jiaye jimonese egi aye wana huluisa athu;* athu adi a gujinginyina gudi aye asuanguluge mukunda nu ndaga jiagasue jiabonga wana kalagala. 42 Oo Yehowa Nzambi, utunyigo* muthu wambile maji; ngabuba wunguluga guzumba guaye gua giamatshidia mukunda nu Davidi muenya mudimo waye.”