LUTANGO

1 Mu lusugu lua thomo lua mbeji ya mbadi mu givo gia mbadi sendese hazogele enya Isalele gu Ejipitu, Yehowa watele maga nu Moize mu inzo ya tenta ya gudibungishila mu mavu a luselenga a Sinayi. Wamuwambelele egi: 2 “Aye nu Alona tangenu enya Isalele* agasue ha gujiya guvula guawo. Atangenu muthu nu muthu gifua mudi fami yenji, gifua mudi nji fami jia mu giphuta giawo; tangenu nji majina a mala agasue. 3 Sonegenu majina a athu agasue adi nu ivo sendese 20 uu nu holu anyi ajiya gutshita mudimo wa gisuta gu Isalele. Sonegenu majina awo gifua mudi mahunji awo a masuta.

4 “Mu giphuta nu giphuta, zulenu yala mumoshi ha gumikuatesa; yala muene udi naye gukhala fumu wa giphuta giawo. 5 Majina a mala anyi mbaamikuatesa enyawa: mu giphuta gia Ribene, Elisule mun’a Shedewule; 6 mu giphuta gia Simeone, Shelumiele mun’a Sulishadayi; 7 mu giphuta gia Yuda, Nashona mun’a Aminadaba; 8 mu giphuta gia Isakale, Netanele mun’a Suale; 9 mu giphuta gia Zabulona, Eliyabe mun’a Helona; 10 gudi ana a Yozefe: mu giphuta gia Efrayime, Elishama mun’a Amihuda, mu giphuta gia Manase, Gamaliele mun’a Phedasule; 11 mu giphuta gia Benjame, Abidane mun’a Gideoni; 12 mu giphuta gia Dane, Ahiezele mun’a Amishadayi; 13 mu giphuta gia Asele, Phagiele mun’a Okelane; 14 mu giphuta gia Gade, Eliyasafe mun’a Dewele; 15 mu giphuta gia Nefetali, Ahila mun’a Enane. 16 Wawa athu atamegewe mukatshi dia enya Isalele agasue. Adi mafumu a iphuta ya ash’awo, mafumu a athu 1 000 a Isalele.

17 Moize nu Alona azudile athu awa atombewe gudi Nzambi. 18 Mu lusugu lua thomo lua mbeji ya mbadi, abungishile enya Isalele agasue akhalele nu ivo sendese 20 uu nu holu ha gusonega majina awo. Asonegele jina dia muthu nu muthu nu dia fami yenji nu majina a fami jia mu giphuta giawo. 19 Moize watshitshile gifua muamuwambelele Yehowa. Wasonegele majina a athu mu mavu a luselenga a Sinayi.

20 Majina a ana a Ribene, ajigulu a mun’a Isalele wa somi, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 21 Athu a mu giphuta gia Ribene asonegewe majina akhalele 46 500.

22 Majina a ajigulu a Simeone, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 23 Athu a mu giphuta gia Simeone asonegewe majina akhalele 59 300.

24 Majina a ajigulu a Gade, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 25 Athu a mu giphuta gia Gade asonegewe majina akhalele 45 650.

26 Majina a ajigulu a Yuda, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 27 Athu a mu giphuta gia Yuda asonegewe majina akhalele 74 600.

28 Majina a ajigulu a Isakale, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 29 Athu a mu giphuta gia Isakale asonegewe majina akhalele 54 400.

30 Majina a ajigulu a Zabulona, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 31 Athu a mu giphuta gia Zabulona asonegewe majina akhalele 57 400.

32 Majina a ajigulu a Efrayime mun’a Yozefe, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 33 Athu a mu giphuta gia Efrayime asonegewe majina akhalele 40 500.

34 Majina a ajigulu a Manase, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 35 Athu a mu giphuta gia Manase asonegewe majina akhalele 32 200.

36 Majina a ajigulu a Benjame, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 37 Athu a mu giphuta gia Benjame asonegewe majina akhalele 35 400.

38 Majina a ajigulu a Dane, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 39 Athu a mu giphuta gia Dane asonegewe majina akhalele 62 700.

40 Majina a ajigulu a Asele, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 41 Athu a mu giphuta gia Asele asonegewe majina akhalele 41 500.

42 Majina a ajigulu a Nefetali, asonegewe gifua muakhalele fami jiawo, nu gifua muakhalele majina a akhakh’awo. Mala agasue akhalele nu ivo sendese 20 uu nu holu anyi akhalele atagana ha gutshita mudimo wa gisuta atangewe. 43 Athu a mu giphuta gia Nefetali asonegewe majina akhalele 53 400.

44 Awa majina a athu asonegewe gudi Moize nu Alona nu mafumu 12 a Isalele; fumu wagasue wakhalele mumoneshi wa giphuta giawo. 45 Asonegele majina a mala agasue a gu Isalele akhalele nu ivo sendese 20 uu nu holu anyi akhalele atagana ha gutshita mudimo wa gisuta gifua muakhalele fami jia mu giphuta giawo. 46 Athu agasue asonegewe majina akhalele 603 550.

47 Uvi asonegelego majina a enya Levi hamoshi nu iphuta iko. 48 Hene Yehowa wawambelele Moize egi: 49 “Ushigo naye gusonega majina a enya Levi, ushigo naye nji guatanga hamoshi nu enya Isalele ako. 50 Udi naye guhaga enya Levi ha gutala inzo ya tenta idi nu Mushete* wa Gikotelo nu ikadigilo yagasue ya inzo ya tenta nu ima yagasue idi muene. Ene mbaakhala mubata inzo ya tenta nu ima yayo yagasue, mbaakhala mutshita midimo muene, mbaakhala nji muhaga phundo yawo mu khulo ya inzo ya tenta. 51 Gula idi mutoga egi inzo ya tenta ikatudiwe ha guya nayo ha fundo diko, enya Levi adi naye guyikatula; uvi gula yatoga egi ijigiwe, enya Levi adi naye nji guyijiga. Muthu wagasue mukhuala ushigo muhana njila* gula wasuena hehi, udi naye gushiyiwa.

52 “Muenya Isalele wagasue udi naye gujiga tenta yenji ha fundo diamuhanewa, muthu nu muthu mu hunji diawo dia iphuta thathu.* 53 Enya Levi adi naye gutunga phundo yawo mu khulo ya inzo ya tenta idi nu Mushete wa Gikotelo hagula Nzambi gavuilago enya Isalele agasue khabu; enya Levi adi nu ginemo gia gutala* inzo ya tenta idi nu Mushete wa Gikotelo.”

54 Enya Isalele akalegele ndaga jiagasue Yehowa wawambelele Moize. Atshitshile diago ngenyi.

2 Yehowa wawambelele luko Moize nu Alona egi: 2 “Enya Isalele adi naye guhaga phundo yawo ha fundo diatombewe mukunda nu hunji diagasue dia iphuta thathu. Muthu wagasue udi naye gukhala hehi nu gijiyishilo* gia enya fami ya sh’enji. Phundo jiawo jidi naye gujietesa inzo ya tenta ya gudibungishila, jidi naye nji guditala nu inzo ya tenta yene.

3 “Hunji dia iphuta thathu didi mutuamezewa gudi giphuta gia Yuda mbaahaga phundo yawo gu khanda ya mazogelo a kumbi gifua mudi masuta awo;* Nashona mun’a Aminadaba muene fumu wa enya giphuta gia Yuda. 4 Athu asonegewe majina ha gukhala masuta enji adi 74 600. 5 Mu phundo yawo mbaakhala nu enya giphuta gia Isakale; Netanele mun’a Suale muene fumu wa enya giphuta gia Isakale. 6 Athu asonegewe majina ha gukhala masuta enji adi 54 400. 7 Mu phundo yawo mbaakhala nji nu enya giphuta gia Zabulona; Eliyabe mun’a Helona muene fumu wa enya giphuta gia Zabulona. 8 Athu asonegewe majina ha gukhala masuta enji adi 57 400.

9 “Athu agasue asonegewe majina ha gukhala masuta a mu phundo ya Yuda adi 186 400. Tangua enya Isalele mbaakatula phundo yawo, ene mbaadianga guya.

10 “Hunji dia iphuta thathu didi mutuamezewa gudi giphuta gia Ribene mbaahaga phundo yawo gu khanda ya sud gifua mudi masuta awo;* Elisule mun’a Shedewule muene fumu wa enya giphuta gia Ribene. 11 Athu asonegewe majina ha gukhala masuta enji adi 46 500. 12 Mu phundo yawo mbaakhala nu enya giphuta gia Simeone; Shelumiele mun’a Sulishadayi muene fumu wa enya giphuta gia Simeone. 13 Athu asonegewe majina ha gukhala masuta enji adi 59 300. 14 Mu phundo yawo mbaakhala nji nu enya giphuta gia Gade; Eliyasafe mun’a Rewele muene fumu wa enya giphuta gia Gade. 15 Athu asonegewe majina ha gukhala masuta enji adi 45 650.

16 “Athu agasue asonegewe majina ha gukhala masuta a mu phundo ya Ribene adi 151 450. Tangua enya Isalele mbaakatula phundo yawo, mbaakhala hunji dia mbadi dia guya.

17 “Tangua mbaakatula inzo ya tenta ya gudibungishila, phundo ya enya Levi idi naye gukhala hakatshi n’a katshi dia phundo jiko.

“Tangua mbaakhala mukatuga ha fundo dimoshi ha guya ha fundo diko, adi naye guwenda gifua luholo ana haga phundo jiawo; giphuta giagasue gidi naye gukhala ha fundo dienji mu hunji diawo dia iphuta thathu.

18 “Hunji dia iphuta thathu didi mutuamezewa gudi giphuta gia Efrayime mbaahaga phundo yawo gu khanda ya mayilo a kumbi gifua mudi masuta awo;* Elishama mun’a Amihuda muene fumu wa enya giphuta gia Efrayime. 19 Athu asonegewe majina ha gukhala masuta enji adi 40 500. 20 Mu phundo yawo mbaakhala nu enya giphuta gia Manase; Gamaliele mun’a Phedasule muene fumu wa enya giphuta gia Manase. 21 Athu asonegewe majina ha gukhala masuta enji adi 32 200. 22 Mu phundo yawo mbaakhala nji nu enya giphuta gia Benjame; Abidane mun’a Gideoni muene fumu wa enya giphuta gia Benjame. 23 Athu asonegewe majina ha gukhala masuta enji adi 35 400.

24 “Athu agasue asonegewe majina ha gukhala masuta a mu phundo ya Efrayime adi 108 100. Tangua enya Isalele mbaakatula phundo yawo, mbaakhala hunji dia thathu dia guya.

25 “Hunji dia iphuta thathu didi mutuamezewa gudi giphuta gia Dane mbaahaga phundo yawo gu khanda ya nord gifua mudi masuta awo;* Ahiezele mun’a Amishadayi muene fumu wa enya giphuta gia Dane. 26 Athu asonegewe majina ha gukhala masuta enji adi 62 700. 27 Mu phundo yawo mbaakhala nu enya giphuta gia Asele; Phagiele mun’a Okelane muene fumu wa enya giphuta gia Asele. 28 Athu asonegewe majina ha gukhala masuta enji adi 41 500. 29 Mu phundo yawo mbaakhala nji nu enya giphuta gia Nefetali; Ahila mun’a Enane muene fumu wa enya giphuta gia Nefetali. 30 Athu asonegewe majina ha gukhala masuta enji adi 53 400.

31 “Athu agasue asonegewe majina ha gukhala masuta a mu phundo ya Dane adi 157 600. Tangua enya Isalele mbaakatula phundo yawo, ene mbaakhala hunji dia gisugishilo dia guya mu gudivua nu hunji diawo dia iphuta thathu.”

32 Awa enya Isalele asonegewe majina gifua muakhalele fami jia ash’awo; mala agasue a mu phundo asonegewe majina ha gukhala masuta akhalele 603 550. 33 Uvi asonegelego majina a enya Levi hamoshi nu enya Isalele ako gifua luholo Yehowa wawambelele Moize. 34 Enya Isalele akalegele ndaga jiagasue Yehowa wawambelele Moize. Akhalele mujiga phundo jiawo mu mahunji awo a iphuta thathu; akhalele nji mukatula phundo jiene muthu nu muthu mu fami yawo gifua muakhalele fami jia ash’awo.

3 Eyi indongo ya Alona nu Moize, tangua Yehowa watele maga nu Moize gu mulundu wa Sinayi. 2 Wawa majina a ana a Alona: Nadabe mona wa somi, nu Abihu nu Eleazale nu Itamale. 3 Wawa majina a ana a Alona ambiwe maji ha gubua nganga-nzambi nu ahagewe* ha gutshita mudimo wawo wa nganga-nzambi. 4 Uvi Nadabe nu Abihu afuile gutuama dia Yehowa tangua ahanele tshuya gutuama dia Yehowa mu mavu a luselenga a Sinayi, tshuya tunu mukhuala wakhalele mutuna. Nadabe nu Abihu akhalelego nu ana. Uvi Eleazale nu Itamale alanduile gukalagala mudimo wa nganga-nzambi hamoshi nu sh’awo Alona.

5 Gungima Yehowa wawambelele Moize egi: 6 “Iza nu enya giphuta gia Levi, ahage gutuama dia nganga-nzambi Alona, ene mbaakhala gumukalegela mudimo. 7 Mbaatagenesa ginemo giawo gia gutshita mudimo mukunda nu Alona nu mukunda nu enya Isalele agasue gutuama dia inzo ya tenta ya gudibungishila tangua mbaakhala mutshita mudimo wawo watadila inzo ya tenta. 8 Adi naye gubamba muabonga ikadigilo yagasue ya mu inzo ya tenta ya gudibungishila, nu gutagenesa ginemo giawo mukunda nu enya Isalele hadi ene mukalagala mudimo wawo mu inzo ya tenta. 9 Mbawuhana enya Levi gudi Alona nu gudi an’enji. Enya Levi adi athu azudiwe mukatshi dia enya Isalele, ahanewe gudi Alona. 10 Udi naye gutomba Alona nu an’enji, mbaakhala mutshita mudimo wawo wa nganga-nzambi. Muthu* wagasue gahanewego njila gula wasuena hehi nu fundo dia gijila udi naye gushiyiwa.”

11 Yehowa wawambelele luko Moize egi: 12 “Uvi ame ngudi muzula enya Levi mukatshi dia enya Isalele ha fundo dia ana agasue a somi a enya Isalele. Enya Levi mbaabua athu ami. 13 Handaga ana agasue a somi adi ami. Lusugu ngashiyile ana a somi agasue a gu Ejipitu, ngazanguile ana a somi agasue a gu Isalele ikhale a athu nga a shitu, ngaabuishile a gijila mukunda nu ame. Ene adi naye gukhala athu ami. Ame Yehowa.

14 Yehowa watele luko maga nu Moize mu mavu a luselenga a Sinayi, wamuwambelele egi: 15 “Sonega majina a ana mala a enya Levi gifua mudi fami jia ash’awo nu fami jiawo. Udi naye gusonega jina dia mona wagasue wa yala udi nu mbeji imoshi uu nu holu. 16 Moize wasonegele majina awo, watshitshile gifua muamuwambelele Yehowa. 17 Wawa majina a ana a Levi: Geleshona, Kehate nu Melali.

18 Wawa majina a ana a Geleshona gifua muakhalele fami jiawo: Libeni nu Shimeyi.

19 Wawa majina a ana a Kehate gifua muakhalele fami jiawo, Amelame, Yisehale, Hebrone nu Uziele.

20 Wawa majina a ana a Melali gifua muakhalele fami jiawo, Mali nu Mushi.

Eji fami jia enya Levi gifua muakhalele fami jia mu giphuta giawo.

21 Fami jia ana a Libeni nu fami jia ana a Shimeyi jiazogele mu vumo dia Geleshona. Jiene jiakhalele fami jia ana a Geleshona. 22 An’awo agasue a mala akhalele nu mbeji imoshi nu holu, anyi asonegewe majina akhalele 7 500. 23 Fami jia ana a Geleshona ahagele phundo yawo gungima dia inzo ya tenta gu khanda ya mayilo a kumbi. 24 Eliyasafe mun’a Laele muene wakhalele fumu wa fami jia ana a Geleshona. 25 Mudimo wa ana a Geleshona mu inzo ya tenta ya gudibungishila wakhalele wa gubamba inzo ya tenta nu tenta nu gitshuigilo gienji nu rido ya mu fulo wa inzo ya tenta ya gudibungishila, 26 nu rido jia luphango, nu rido ya mufulo wa luphango ludi mujietesa inzo ya tenta nu giwotshielo nu shinga jia tenta nu midimo yagasue idi naye gukalegewa nu ima yene.

27 Fami jia ana a Amelame, nu fami jia ana a Yisehale, nu fami jia ana a Hebrone, nu fami jia ana a Uziele azogele mu vumo dia Kehate. Jiene jiakhalele fami jia ana a Kehate. 28 An’awo agasue a mala akhalele nu mbeji sendese imoshi uu nu holu anyi asonegewe majina akhalele 8 600. Ene akhalele nu ginemo gia gubamba fundo dia gijila. 29 Fami jia ana a Kehate ahagele phundo yawo gu khanda ya sud ya inzo ya tenta. 30 Elisafana mun’a Uziele muene wakhalele fumu wa fami jia ana a Kehate. 31 Ginemo giawo giakhalele gia gubamba Mushete wa Gikotelo nu mesa nu gihagelo gia mienda, nu iwotshielo nu ikadigilo mukunda nu mudimo wa ha fundo dia gijila nu rido nu midimo yagasue akhalele mutshita nu ima yene.

32 Eleazale mun’a nganga-nzambi Alona wakhalele fumu wa mafumu a enya Levi. Muene wakhalele mutala athu akhalele nu ginemo gia gubamba fundo dia gijila.

33 Fami jia ana a Mali nu fami jia ana a Mushi azogele mu vumo dia Melali. Jiene jiakhalele fami jia ana a Melali. 34 Mala agasue akhalele nu mbeji sendese imoshi uu nu holu anyi asonegewe majina akhalele 6 200. 35 Suliele mun’a Abihayile muene wakhalele fumu wa fami jia ana a Melali. Ahagele phundo yawo gu khanda ya nord ya inzo ya tenta. 36 Ana a Melali akhalele nu ginemo gia gubamba makunji a inzo ya tenta nu mabaya enji, nu makunji ayo akoma nu mawina a makunji ene, nu ikadigilo yayo yagasue nu midimo yagasue yakhalele mukalegewa nu ima yene, 37 nu makunji agasue a luphango nu mawina a makunji ene nu ibende* ya sungu-sungu nu shinga jia tenta.

38 Moize nu Alona nu ana a Alona ahagele phundo yawo gutuama dia inzo ya tenta gu khanda ya mazogelo a kumbi gutuama dia inzo ya tenta ya gudibungishila. Ene akhalele nu ginemo gia gubamba fundo dia gijila mukunda nu enya Isalele. Muthu* wagasue munu mukhuala wakhalelego muhana njila gula wasuena hehi nu fundo diene wakhalele naye gushiyiwa.

39 Mala agasue a enya Levi akhalele nu mbeji imoshi uu nu holu, anyi Yehowa wawambelele Moize nu Alona ha gusonega majina awo fami nu fami akhalele 22 000.

40 Gungima Yehowa wawambelele Moize egi: “Sonega majina a ana a mala agasue a somi a enya Isalele adi nu mbeji imoshi uu nu holu. Atange, sonega majina awo gu mukanda. 41 Udi naye guzula enya Levi mukunda nu ame ha fundo dia ana agasue a somi a enya Isalele. Udi naye nji guzula shitu jia hembo jia enya Levi ha fundo dia ana agasue a somi a shitu jia hembo jia enya Isalele. Ame Yehowa.” 42 Moize wasonegele majina a ana agasue a somi a enya Isalele gifua luholo lua muwambelele Yehowa. 43 Ana agasue a mala a somi akhalele nu mbeji imoshi uu nu holu anyi asonegewe majina akhalele 22 273.

44 Yehowa wawambelele luko Moize egi: 45 “Zula enya Levi ha fundo dia ana agasue a somi a enya Isalele, zula nji shitu jia hembo jia enya Levi ha fundo dia shitu jia hembo jia enya Isalele. Enya Levi adi naye gubua athu ami. Ame Yehowa. 46 Guvula gua ana somi a enya Isalele adi mubalega enya Levi adi 273, ha guasumba luko 47 udi naye guzula bashekele* thano mukunda nu muthu wagasue mu gudivua nu shekele ana kalegela ha fundo dia gijila.* Shekele imoshi idi ba gera* 20. 48 Mbawuhana mbongo gudi Alona nu an’enji a mala gifua gibawu mukunda nu guvula gua ana abalega holu.” 49 Hene Moize wazudile mbongo mukunda nu ana anyi abalegele enya Levi guvula. 50 Wazudile mbongo bashekele 1 365 gudi ana a somi a enya Isalele mu gudivua nu shekele akhalele mukalegela ha fundo dia gijila. 51 Gungima Moize wahanele mbongo jiene gudi Alona nu an’enji a mala gifua luholo luazuelele Yehowa, wakalegele diago gifua muamuwambelele Yehowa.

4 Yehowa wawambelele Moize nu Alona egi: 2 “Mukatshi dia ana a Levi, mudi naye gutanga ana a Kehate gifua mudi fami jiawo nu fami jia ash’awo, 3 athu agasue adi nu ivo sendese 30 uu nu gu 50 anyi adi mukatshi dia athu atombewe ha gutshita mudimo mu inzo ya tenta ya gudibungishila.

4 “Wuwu mudimo ana a Kehate adi naye gutshita mu inzo ya tenta ya gudibungishila. Udi mudimo wabalega gijila: 5 Tangua enya Isalele mbaakhala mukatula phundo ha guya, Alona nu an’enji a mala adi naye gungina ha gukatula rido yana khaphumuna fundo dia gijila nu fundo diabalega gijila, atshuigi mushete wa Gikotelo nu rido yene. 6 Holu dienji mbaahaga gitshuigilo gialondewe nu gilema gia nzundu, asununa mulele wakola wa ble holu dienji, gungima ahagi mihitu ya gubatela mushete ha fundo diayo.

7 “Mbaasununa nji mulele wa ble holu dia mesa a mapha ahanewe gudi Nzambi, mbaahaga malonga nu makhopho nu mabungu agumbila mulambu wa matombe ha mesa ene; mbaahaga nji mapha ana hanewa mulambu tangua diagasue holu dia mesa ene. 8 Mbaasununa mulele wabenga holu dia ima yene, atshuigi gitshuigilo gialondewe nu gilema gia nzundu holu, gungima ahagi mihitu ya gubatela mesa ha fundo diayo. 9 Gungima mbaazula mulele wa ble, atshuigi gihagelo gia mienda nu mienda, nu sizo* jia gihagelo gia mienda nu malonga a gubatela tshuya, nu ima yagasue ana mbila maji anyi ana kalegela hagula mienda ikhale mulema.* 10 Mbaatshuiga gihagelo giene gia mienda nu ima yenji yagasue moshi’a gitshuigilo gialondewe nu gilema gia nzundu, gungima ayihagi ha muhitu wa guyibatela. 11 Mbaasununa nji mulele wa ble holu dia giwotshielo gialondewe nu wolo, mbaatshuiga gitshuigilo gialondewe nu gilema gia nzundu holu, gungima ahagi mihitu ya gubatela giwotshielo giene ha fundo diayo. 12 Gungima mbaazula ikadigilo yagasue ya mudimo inyi ana kalegela tangua diagasue ana tshita mudimo ha fundo dia gijila, mbaayimba ha mulele wa ble, ayitshuigi gitshuigilo gialondewe nu gilema gia nzundu; gungima ayihagi gu muhitu wa guyibatela.

13 “Adi naye gukatula fuphi* ha giwotshielo, gungima asununa mulele walondewe nu uvuji wa shitu wabenguluga holu dia giwotshielo giene. 14 Mbaahaga ikadigilo yagasue inyi ana kalegela mudimo ha giwotshielo holu dienji: malonga a gubatela tshuya nu somo nu jiphawu nu malonga nu ikadigilo yagasue ya giwotshielo; mbaasununa gitshuigilo gialondewe nu gilema gia nzundu ha guyitshuiga. Gungima mbaahaga mihitu ya gubatela giwotshielo ha fundo diayo.

15 “Tangua enya Isalele mbaakatula phundo ha guya, Alona nu an’enji a mala adi naye gumanesela gutshuiga fundo dia gijila nu ikadigilo yagasue ana kalegela ha fundo diene. Gungima ana a Kehate mbaangina ha gubata ima yene, uvi ashigo naye gukuata fundo dia gijila gula ndo mbaafua. Ana a Kehate ene adi nu ginemo gia gubata ima ya gijila ya inzo ya tenta ya gudibungishila.

16 “Eleazale mun’a nganga-nzambi Alona, muene udi nu ginemo gia gutala maji a gumba mu mienda, nu uhafu wa vumba diabonga, nu mulambu wa mbuto wana hanewa tangua diagasue, nu maji a gijila. Udi nji nu ginemo gia gutala inzo ya tenta yagasue nu ima yagasue idi mukatshi, nu fundo dia gijila, nu ikadigilo idi ha fundo diene.”

17 Yehowa wawambelele luko Moize nu Alona egi: 18 “Mubembigo egi giphuta gia enya fami jia Kehate gishiyiwe mukatshi dia enya Levi. 19 Uvi tshitenu ndaga ngamiwambela hagula enya Kehate asale nu monyo, afuigo handaga asuenyi hehi nu ima yabalega gijila. Alona nu an’enji a mala mbaangina, ahanyi muthu nu muthu mudimo wenji nu ima idi naye gubata muene. 20 Enya Kehate ashigo naye gungina ha gutala ima ya gijila nga mukunda nu tangua diazonda, gula ndo mbaafua.”

21 Gungima Yehowa wawambelele Moize egi: 22 “Tanga ana a Geleshona ha gujiya guvula guawo, fami nu fami gifua mudi fami jia ash’awo. 23 Sonega majina a athu agasue adi nu ivo sendese 30 uu nu gu 50, adi mukatshi dia athu anyi atombewe ha gukalagala mudimo mu inzo ya tenta ya gudibungishila. 24 Fami jia ana a Geleshona jidi naye gubamba nu gubata ima eyi: 25 Adi naye gubata milele ya inzo ya tenta, tenta ya gudibungishila nu gitshuigilo gienji, nu gitshuigilo gialondewe nu gilema gia nzundu gidi holu dia inzo ya tenta ya gudibungishila, nu rido ya ha mufulo wa inzo ya tenta ya gudibungishila, 26 nu rido jia gibanzala, nu rido ya ha mufulo wa gibanzala gidi mujietesa inzo ya tenta, nu giwotshielo nu shinga jia tenta nu ikadigilo yayo yagasue nu ima yagasue ana kalegela ha gutshita mudimo mu inzo ya tenta. Idi ginemo giawo. 27 Alona nu an’enji a mala mbaakhala mutala midimo yagasue mbayikhala mukalagala ana a Geleshona nu ima yagasue mbaabata; mbamuahana ginemo gia gubata ima eyi yagasue. 28 Wene mudimo mbawukhala mukalagala ana a Geleshona mu inzo ya tenta ya gudibungishila; Itamale mun’a nganga-nzambi Alona, muene mbawukhala mutuameza midimo yawo.

29 “Udi naye nji gusonega majina a ana a Melali, fami nu fami gifua mudi fami jia ash’awo. 30 Sonega majina a athu agasue adi nu ivo sendese 30 uu nu gu 50, adi mukatshi dia athu anyi atombewe ha gukalagala mudimo mu inzo ya tenta ya gudibungishila. 31 Mudimo wawo mu inzo ya tenta ya gudibungishila udi wa gubata ima eyi: makunji a inzo ya tenta nu mabaya enji, nu makunji akoma nu mawina a makunji ene; 32 nu makunji a luphango nu mawina a makunji ene, nu shinga jia gukangela tenta, nu ibende* ya sungu-sungu ya tenta, nu shinga jia tenta nu ikadigilo yagasue, nu ima yagasue ya gukalegela mudimo nu ima eyi. Mudi naye guhana muthu nu muthu ima idi naye gubata muene. 33 Wene mudimo fami jia ana a Melali adi naye gukalagala gu inzo ya tenta ya gudibungishila mu utuameji wa Itamale mun’a nganga-nzambi Alona.”

34 Moize nu Alona nu mafumu a enya Isalele asonegele majina a ana a Kehate, fami nu fami gifua muakhalele fami jia ash’awo, 35 athu agasue anyi akhalele nu ivo sendese 30 uu nu gu 50, anyi akhalele mukatshi dia athu atombewe ha gutshita mudimo gu inzo ya tenta ya gudibungishila. 36 Athu agasue anyi asonegewe majina, fami nu fami akhalele 2 750. 37 Athu agasue a mu fami jia ana a Kehate anyi akhalele mutshita mudimo gu inzo ya tenta ya gudibungishila, asonegewe majina. Moize nu Alona asonegele majina awo gifua luholo Yehowa wawambelele Moize.

38 Asonegele majina a ana a Geleshona, fami nu fami gifua muakhalele fami jia ash’awo, 39 athu agasue anyi akhalele nu ivo sendese 30 uu nu gu 50, anyi akhalele mukatshi dia athu atombewe ha gutshita mudimo gu inzo ya tenta ya gudibungishila. 40 Athu agasue asonegewe majina, fami nu fami gifua muakhalele fami jia ash’awo akhalele 2 630. 41 Athu agasue a mu fami jia ana a Geleshona anyi akhalele mutshita mudimo gu inzo ya tenta ya gudibungishila, asonegewe majina. Moize nu Alona asonegele majina awo gifua luholo Yehowa wawambelele Moize.

42 Asonegele majina a ana a Melali, fami nu fami gifua muakhalele fami jia ash’awo, 43 athu agasue anyi akhalele nu ivo sendese 30 uu nu gu 50, anyi akhalele mukatshi dia athu atombewe ha gutshita mudimo gu inzo ya tenta ya gudibungishila. 44 Athu agasue asonegewe majina fami nu fami akhalele 3 200. 45 Athu agasue a mu fami jia ana a Melali asonegewe majina. Moize nu Alona asonegele majina awo gifua luholo Yehowa wawambelele Moize.

46 Moize nu Alona nu mafumu a enya Isalele asonegele majina a enya Levi awa agasue, fami nu fami gifua muakhalele fami jia ash’awo; 47 athu ene akhalele nu ivo sendese 30 uu nu gu 50, mukut’awo agasue atombewe ha gukalagala mudimo nu gubata ima ya mu inzo ya tenta ya gudibungishila. 48 Athu agasue asonegewe majina akhalele 8 580. 49 Asonegele majina awo gifua luholo Yehowa wawambelele Moize, muthu nu muthu gifua muakhalele mudimo wenji nu ima yakhalele naye muene gubata; majina awo asonegewe diago gifua luholo Yehowa wawambelele Moize.

5 Yehowa wawambelele luko Moize egi: 2 “Wambela enya Isalele ha guzola mu phundo muthu wagasue udi nu misongo ya hute nu muthu udi nu misongo idi gumuzola tushina nga mahatshi* nu muthu wagasue udi usala handaga wakuatshi kimbi gia muthu. 3 Ikhale yala nga mukhetu, mudi naye gumuzola. Mudi naye gumuzola gonze ya phundo hagula gabuishigo phundo jia athu ami usala, handaga ngudi mukatshi diawo.” 4 Hene enya Isalele atshitshile ngenyi, azolele athu ene gonze ya phundo. Atshitshile diago gifua luholo Yehowa wawambelele Moize.

5 Yehowa wawambelele luko Moize egi: 6 “Wambela enya Isalele egi: ‘Gula yala nga mukhetu wakalagala gubola gunu athu ana tshita nu walumbugila Yehowa, udi naye guhanewa ndola. 7 Udi* naye guzuela gubola guenji, gungima ahanyi guvula gua makuta adi gudivua nu gubola guatshitshi muene; udi naye* gulunda gitshinyi gimoshi mukatshi dia itshinyi thano gia makuta afutshi muene. Udi naye guahana gudi muthu wakalegela muene gubola. 8 Uvi gula muthu wakalegela muene gubola gashigo nu phangi’enji wajiya guzula makuta ene, adi naye guavutula gudi Yehowa, mbaabua a nganga-nzambi; muthu muene udi naye nji guhana gimeme gia mulume hagula nganga-nzambi agihane mulambu gudi Nzambi, ngenyi gubola guenji mbagutotesewa.

9 “‘Musomo wagasue wa gijila enya Isalele adi muhana gudi nganga-nzambi mbawubua wenji. 10 Ima ya gijila ya muthu wagasue mbayisala yenji. Gima giagasue muthu udi muhana nganga-nzambi, mbagibua gia nganga-nzambi muene.’”

11 Yehowa wawambelele luko Moize egi: 12 “Wambela enya Isalele egi: ‘Talenu ndaga mudi naye gukalagala gula mukaji’a muthu walumbuga, gashigo luko wagujinginyina gudi mulumi’enji 13 nu gula yala muko wabungisa n’enji muila uvi mulumi’enji nu gujiya ndo, ndaga yene ishigo nji mujiyiwa; gula mukhetu muene wadibuishi usala uvi gushigo nu muthu wajiya guzuela ndaga yene nga ndo gushigo nu muthu wamukuatshi; 14 gula yala wasendesa guvua fuwa nu udi mutangiza egi mukaji’enji wakalagala uthambi, ikhale mukhetu muene wadibuishi usala nga ndo, 15 yala muene udi naye guya nu mukaji’enji gudi nganga-nzambi. Udi naye guya nu giakumi gia efa imoshi* gia phupha ya orje ha guhana mulambu mukunda nu mukhetu muene. Gashigo naye gumba maji mu phupha yene nga gumba uhafu ulaphe handaga udi mulambu wa mbuto wahanewa mukunda nu fuwa, mulambu wa mbuto wahanewa ha gujiya gula mukhetu muene watshitshi gubola nga ndo.

16 “‘Nganga-nzambi mbawuya nu mukhetu muene, amumagenesa gutuama dia Yehowa. 17 Nganga-nzambi mbawuzula meya a gijila mu nzungu ya wuma, mbawuzula nji ndambo ya fuphi hashi mu inzo ya tenta, ayimbi mu meya ene. 18 Mbawumagenesa mukhetu muene gutuama dia Yehowa, mbawujitulula sanga dia mukhetu muene, gambi mulambu wa mbuto wa guwunguluga gubola ha mago a mukhetu muene, yakotelesa egi mulambu wa mbuto wahanewa mukunda nu fuwa; nganga-nzambi mbawukhala nu meya alula ana bata mukumbu ha mago enji.

19 “‘Gungima nganga-nzambi mbawuwambela mukhetu muene ha gudiloga. Mbawumuwambela egi: “Gula khenji ubungishilego muila nu yala muko sendese wazudiwe mu ulo gudi mulumi’aye,* gula nji khenji wuwunganele ndo nu khenji udibuishilego usala, meya awa alula ana bata mukumbu agutshitshigo nga gima. 20 Uvi gula wawunganele gale nu wadibuishile gale usala sendese wazudiwe mu ulo, nu wabungishile gale muila nu yala muko gashigo mulumi’aye ...” 21 Gungima nganga-nzambi mbawuwambela mukhetu muene ha gudiloga egi udi naye gutewa mukumbu gula wakalegele diago ndaga yene. Mbawumuwambela egi: “Yehowa aguhage gifua gifezegeselo hagula athu mbaakhale gugutanga tangua mbaakhala muta mikumbu nu gudiloga; gula wakalegele diago uthambi, Yehowa agubuise gikunya,* agujimbise nji vumo. 22 Meya awa a mukumbu angine mu mala aye, hagula agujimbise vumo nu agubuise gikunya.” Gungima mukhetu muene udi naye guzuela egi: “Amen! Amen!”*

23 “‘Nganga-nzambi mbawusonega mbimbi jiene jia mukumbu mu mukanda, gungima mbawujikukumuna nu meya alula. 24 Gungima mbawunuisa mukhetu muene meya alula a mukumbu, meya ene mbaangina mu vumo dienji, mbaazola gulula. 25 Nganga-nzambi mbawuzula mulambu wa mbuto wahanewa mukunda nu fuwa ha mago a mukhetu muene, udi naye guwuhunga gutuama nu gungima gutuama dia Yehowa, gungima mbawuwusuenesa hehi nu giwotshielo. 26 Nganga-nzambi mbawuzula koko dimoshi dia guzala nu mbuto, mbawujikonda ha giwotshielo hagula jizole mishi ha fundo dia mulambu wagasue wa mbuto, gungima mbawunuisa mukhetu muene meya. 27 Tangua nganga-nzambi mbawunuisa mukhetu muene meya, gula mukhetu muene wadibuishile diago usala nu watshitshile uthambi, meya a mukumbu mbaamungina mu vumo, mbaabua gima gialula, ngenyi vumo mbadimujimba nu mbawubua gikunya. Akuaku’enji mbaakhala mutanga jina dienji tangua mbaakhala muta mikumbu. 28 Uvi gula mukhetu muene gadibuishilego usala nu udi waphelegeta, mbagashigo muhanewa ndola eyi; mbawumita vumo nu mbawuvuala ana.

29 “‘Owu mukhuala watadila fuwa gula mukhetu wawungagana nu wadibuisa usala hadi muene mu ulo, 30 nga gula yala udi muvuila mukaji’enji fuwa nu udi mutangiza egi wakalagala uthambi; mbawumagenesa mukaji’enji gutuama dia Yehowa, nganga-nzambi mbawukalegela mukhetu muene ndaga jiagasue jidi muzuela mukhuala owu. 31 Ngenyi yala mbagashigo mukhala nu mulonga, uvi gula mukhetu watshitshile gubola, mbawuhanewa ndola.

6 Yehowa wawambelele luko Moize egi: 2 “Wambela enya Isalele egi, ‘gula yala nga mukhetu walaya Yehowa ha gukhala Nazileya* wenji, 3 gashigo naye gunua vinyo nu matombe ako akola, gashigo naye gunua vinegre ya vinyo, nga vinegre ya matombe agasue akola. Gashigo naye gunua gima giagasue gialondewe nu mabundu a vinyo, nga gudia mabundu a vinyo ikhale a gimigina nga a gibisu. 4 Masugu agasue mbaakhala muene Nazileya, gashigo naye gudia gima giagasue giakatuga gu mutshi wa vinyo, ikhale mabundu a vinyo a gibisu nga gizula gia mutshi wa vinyo.

5 “‘Masugu agasue aditendelele muene ha gukhala Nazileya, luzualu* lushigo naye gungina gu muto wenji, udi naye gubemba sanga dienji dikudi uu nu tangua masugu adihanele muene gudi Yehowa mbaatagana. Ngenyi mbawumonesa egi udi muthu wa gijila. 6 Gashigo naye gusuena hehi nu kimbi gia muthu* mu masugu agasue adihanele muene gudi Yehowa ha gukhala Nazileya. 7 Ikhale sh’enji nga gin’enji nga phangi’enji wa yala nga wa mukhetu wafua, muene gashigo naye gudibuisa usala handaga udi nu njimbu ya gukhala Nazileya wa Nzambi ha muto wenji.

8 “‘Udi muthu wa gijila mukunda nu Yehowa masugu agasue adi muene Nazileya. 9 Uvi gula muthu wafua mu gisagumuisa hehi nu muene nu ndaga yene yabuisa sanga dienji usala, sanga didi mumonesa egi wadihanele gudi Nzambi,* udi naye gukulula sanga gu muto wenji mu lusugu luenji lua gudiphelegetesa, yakotelesa egi mu lusugu lua 7. 10 Mu lusugu lua 8, mbawubata mayembe mbadi nga mawunda* mbadi a pijio gudi nganga-nzambi ha mufulo wa inzo ya tenta ya gudibungishila. 11 Nganga-Nzambi mbawuhana ganjila gamoshi gifua mulambu mukunda nu gubola uvi gako gifua mulambu wa guwotshia; ngenyi gubola guakalagala muthu muene luholo luakuatshi muene kimbi gia muthu mbagutotesewa. Mu lusugu luene muthu muene udi naye gubemba sanga dienji dikudi luko ha gumonesa egi udi waphelegeta. 12 Gungima udi naye gusendesa luko mudimo wenji wa Ginazileya mukunda nu Yehowa; mbawubata mutumba wa gimeme gia mulume wa givo gimoshi gifua mulambu mukunda nu gubola. Uvi masugu adiangele gukhala muene Nazileya mbaashigo mutangewa handaga wadibuishile usala.

13 “‘Owu mukhuala watadila muthu udi Nazileya: gula masugu enji a gukhala Nazileya ahua, mbaamubata ha mufulo wa inzo ya tenta ya gudibungishila. 14 Mbawuhana mulambu wenji gudi Yehowa guene: mutumba umoshi wa gimeme gia mulume wa givo gimoshi gishigo nu ginonga* gu muila gifua mulambu wa guwotshia, gimeme gimoshi gia mukaji gia givo gimoshi gishigo nu ginonga gu muila gifua mulambu mukunda nu gubola, gimeme gimoshi gia mulume gishigo nu ginonga gu muila gifua mulambu wa guhuima, 15 nu gitunga gia mapha ashigo nu levire alondewe gifua minengu nu phupha iladiege-diege ya gubungisa nu maji, nu bagato ashigo nu levire akungiwe maji hamoshi nu mulambu wa mbuto nu milambu ya matombe. 16 Nganga-nzambi mbawuya nayo gutuama dia Yehowa mbawuhana mulambu mukunda nu gubola nu mulambu wa guwotshia. 17 Mbawuhana gimeme gia mulume gifua mulambu wa guhuima gudi Yehowa hamoshi nu gitunga gia mapha ashigo nu levire, mbawuyihana nu mulambu wa mbuto nu mulambu wa matombe.

18 “‘Nazileya muene udi naye gukulula sanga diakhalele mubemba muene gu muto wenji ha mufulo wa inzo ya tenta ya gudibungishila, gungima mbawuzula sanga diene, adimbi ha tshuya tudi goshi’a mulambu wa guhuima. 19 Nganga-nzambi mbawuzula koko dia gimeme gia mulume didi diagutelega, nu dipha dimoshi dishigo nu levire dialondewe gifua munengu mukatshi dia kinda, nu gato gashigo nu levire, mbawuyihaga ha mago a Nazileya muene gungima dia gukulula sanga dienji diakhalele mumonesa egi udi Nazileya. 20 Nganga-nzambi mbawuyihunga gutuama nu gungima gifua mulambu wa guhunga gutuama dia Yehowa. Idi ima ya gijila mukunda nu nganga-nzambi, hamoshi nu githulo-thulo gia mulambu wa guhunga nu kulu diahanewa musomo. Gungima Nazileya muene wajiya gunua vinyo.

21 “‘Owu mukhuala watadila Nazileya waditendelele ha gudihana gudi Nzambi. Gula waditendelele ha guhana Yehowa milambu iko wajiya guyihana. Uvi muene udi diago naye gutagenesa guditendelela guenji gifua muana toga mukhuala wa Ginazileya.

22 Gungima Yehowa wawambelele Moize egi: 23 “Wambela Alona nu an’enji a mala egi, talenu luholo mudi naye gushimbiga enya Isalele, awambelenu egi:

24 “Yehowa agukuatese nu a gubambe.

25 Yehowa agumonesele gisemo gienji, aguvuile nji khenda.

26 Yehowa agukalegele ndaga nu gisemo giagasue, aguhane nji guhuima.”’

27 Adi naye gutanga jina diami gutuama dia enya Isalele, hagula ngajiya guashimbiga.

7 Mu lusugu luamanesele Moize gujiga inzo ya tenta, wayiniangele maji,* wayibuishile ya gijila hamoshi nu ima yayo yagasue, nu giwotshielo nu ikadigilo yagasue ya giwotshielo giene. Hamanesele muene gumba ima yene maji nu guyibuisa ya gijila, 2 mafumu a Isalele anyi akhalele mafumu a iphuta ahanele mulambu. Mafumu awa atuamezele mudimo wa gutanga enya Isalele, 3 ajile gutuama dia Yehowa nu musomo wawo, phusu-phusu 6 jia gutshuiga nu ngombe 12. Phusu-phusu imoshi mukunda nu mafumu mbadi, ngombe imoshi* mukunda nu fumu wagasue; abatele ima yene gutuama dia inzo ya tenta. 4 Yehowa wawambelele Moize egi: 5 “Tshigina ima aza nayo handaga mbamuyikalegela mukunda nu mudimo wa inzo ya tenta ya gudibungishila. Udi naye guyihana gudi enya Levi, muthu nu muthu gifua mudi mudimo wenji.”

6 Hene Moize watshiginyile phusu-phusu nu ngombe, wajihanele gudi enya Levi. 7 Wahanele ana a Geleshona phusu-phusu mbadi nu ngombe nguana, jinyi akhalele najio funu ha gutshita mudimo wawo; 8 wahanele ana a Melali phusu-phusu nguana nu ngombe 8 jinyi akhalele najio funu ha gutshita mudimo wawo; Itamale mun’a nganga-nzambi Alona, muene wakhalele guatuameza. 9 Uvi gahanelego nga gima gimoshi gudi ana a Kehate handaga midimo yawo yakhalele mukatshi dia mudimo wa ha fundo dia gijila, akhalele nji mubata ima ya gijila ha phanga jiawo.

10 Mafumu ajile nu mulambu mu lusugu aniangele giwotshielo maji, mu lusugu akhalele naye gusendesa gukalegela giwotshielo. Tangua mafumu ahanele mulambu wawo gutuama dia giwotshielo giene, 11 Yehowa wawambelele Moize egi: “Lusugu nu lusugu, fumu mumoshi udi naye guhana mulambu wenji hagula musendese gukalegela giwotshielo.”

12 Muthu wahanele mulambu mu lusugu lua thomo, wakhalele Nashona mun’a Aminadaba wa mu giphuta gia Yuda. 13 Mulambu wenji wakhalele: longa dimoshi dia utadi wa siliva diakhalele nu gunema gua bashekele* 130 nu longa diko dia utadi wa siliva diakhalele gunema bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 14 nu khopho* dimoshi dia wolo gunema bashekele 10 dia guzala nu uhafu, 15 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 16 nu mutumba umoshi wa khombo wa mulambu mukunda nu gubola. 17 Mukunda nu mulambu wa guhuima, wahanele ngombe mbadi jia milume, nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Nashona mun’a Aminadaba.

18 Mu lusugu lua mbadi, Netanele mun’a Suale, fumu wa mu giphuta gia Isakale wahanele mulambu. 19 Mulambu wenji wakhalele: longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 20 nu khopho dimoshi dia wolo gunema bashekele 10 dia guzala nu uhafu, 21 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 22 nu mutumba umoshi wa khombo wa mulambu mukunda nu gubola. 23 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Netanele mun’a Suale.

24 Mu lusugu lua thathu, Eliyabe mun’a Helona fumu wa ana a Zabulona, 25 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 26 nu khopho dimoshi dia wolo gunema bashekele 10 dia guzala nu uhafu, 27 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 28 nu mutumba umoshi wa khombo wa mulambu mukunda nu gubola. 29 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Eliyabe mun’a Helona.

30 Mu lusugu lua nguana, Elisule mun’a Shedewule fumu wa ana a Ribene, 31 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 32 nu khopho dimoshi dia wolo gunema bashekele 10 dia guzala nu uhafu, 33 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 34 nu mutumba umoshi wa khombo wa mulambu mukunda nu gubola. 35 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Elisule mun’a Shedewule.

36 Mu lusugu lua thano, Shelumiele mun’a Sulishadayi, fumu wa ana a Simeone, 37 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele gunema bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 38 nu khopho dimoshi dia wolo gunema bashekele 10 dia guzala nu uhafu, 39 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 40 nu mutumba umoshi wa khombo wa mulambu mukunda nu gubola. 41 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Shelumiele mun’a Sulishadayi.

42 Mu lusugu lua 6, Eliyasafe mun’a Dewele, fumu wa ana a Gade, 43 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 44 nu khopho dimoshi dia wolo gunema bashekele 10 dia guzala nu uhafu, 45 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 46 nu mutumba umoshi wa khombo wa mulambu mukunda nu gubola. 47 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Eliyasafe mun’a Dewele.

48 Mu lusugu lua 7, Elishama mun’a Amihuda, fumu wa ana a Efrayime, 49 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 50 nu khopho dimoshi dia wolo gunema bashekele 10 dia guzala nu uhafu, 51 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 52 nu mutumba umoshi wa khombo wa mulambu mukunda nu gubola. 53 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Elishama mun’a Amihuda.

54 Mu lusugu lua 8, Gamaliele mun’a Phedasule, fumu wa ana a Manase, 55 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 56 nu khopho dimoshi dia wolo gunema bashekele 10 dia guzala nu uhafu, 57 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 58 nu mutumba umoshi wa khombo wa mulambu mukunda nu gubola. 59 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Gamaliele mun’a Phedasule.

60 Mu lusugu lua 9, Abidane mun’a Gideoni, fumu wa ana a Benjame, 61 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 62 nu khopho dimoshi dia wolo gunema bashekele 10 dia guzala nu uhafu, 63 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 64 nu mutumba umoshi wa khombo wa mulambu mukunda nu gubola. 65 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Abidane mun’a Gideoni.

66 Mu lusugu lua 10, Ahiezele mun’a Amishadayi, fumu wa ana a Dane, 67 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 68 nu khopho dimoshi dia wolo gunema bashekele 10 dia guzala nu uhafu, 69 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 70 nu mutumba umoshi wa khombo wa mulambu mukunda nu gubola. 71 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Ahiezele mun’a Amishadayi.

72 Mu lusugu lua 11, Phagiele mun’a Okelane, fumu wa ana a Asele, 73 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 74 nu khopho dimoshi dia wolo gunema bashekele 10 dia guzala nu uhafu, 75 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 76 nu mutumba umoshi wa khombo wa mulambu mukunda nu gubola. 77 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume nu mitumba thano ya imeme ya milume ya givo gimoshi. Wene mulambu wahanele Phagiele mun’a Okelane.

78 Mu lusugu lua 12, Ahila mun’a Enane, fumu wa ana a Nefetali, 79 wahanele mulambu wenji. Wahanele longa dimoshi dia utadi wa siliva diakhalele nu gunema gua bashekele 130 nu longa diko dia utadi wa siliva diakhalele nu gunema gua bashekele 70, mu gudivua nu shekele akhalele mukalegela ha fundo dia gijila. Malonga ene agasue mbadi akhalele aguzala nu phupha iladiege-diege yagubungisa nu maji mukunda nu mulambu wa mbuto, 80 nu khopho dimoshi dia wolo gunema bashekele 10 dia guzala nu uhafu, 81 nu mutumba umoshi wa ngombe ya mulume, nu gimeme gia mulume, nu mutumba wa gimeme gia mulume wa givo gimoshi mukunda nu mulambu wa guwotshia; 82 nu mutumba umoshi wa khombo wa mulambu mukunda nu gubola. 83 Mukunda nu mulambu wa guhuima, wahanele ngombe mbadi jia milume nu imeme thano ya milume, nu khombo thano jia milume, nu mitumba thano ya imeme ya milume ya givo gimoshi. Wene mulambu wahanele Ahila mun’a Enane.

84 Eyi milambu yahanele mafumu a enya Isalele tangua giwotshielo giamiangewe maji hagula asendese gugikalegela: Malonga 12 a gikhalala* a utadia wa siliva, nu malonga ako 12 a utadi wa siliva adi nu khobo, nu makhopho 12 a wolo; 85 longa diagasue dia gikhalala dia utadi wa siliva diakhalele nu gunema gua bashekele 130, longa diagasue dia khobo diakhalele nu gunema gua bashekele 70, malonga agasue a utadi wa siliva akhalele nu gunema gua bashekele 2 400 mu gudivua nu shekele akhalele mukalegela ha fundo dia gijila; 86 makhopho 12 a wolo aguzala nu uhafu, khopho diagasue diakhalele gunema bashekele 10 mu gudivua nu shekele akhalele mukalegela ha fundo dia gijila, makhopho agasue a wolo akhalele gunema bashekele 120. 87 Shitu jiagasue ahanele mukunda nu mulambu wa guwotshia jiakhalele: ngombe 12 jia milume, nu imeme 12 ya milume, nu mitumba 12 ya imeme ya milume ya givo gimoshi nu milambu yayo ya mbuto, nu mitumba 12 ya khombo ya mulambu mukunda nu gubola; 88 shitu jiagasue jia mulambu wa guhuima jiakhalele: ngombe 24 jia milume, nu imeme 60 ya milume, nu khombo 60 jia milume, nu mitumba ya imeme 60 ya milume ya givo gimoshi. Yene milambu ahanele gungima dia gunianga giwotshielo maji hagula asendese gugikalegela.

89 Tangua diagasue diakhalele mungina Moize mu inzo ya tenta ya gudibungishila ha guta maga nu Nzambi, wakhalele muvua dijui gumuwambela holu dia gitshuigilo gia mushete wa Gikotelo, hakatshi dia basheribe mbadi. Nzambi wakhalele muta n’enji maga.

8 Yehowa wawambelele Moize egi: 2 “Wambela Alona egi: ‘Tangua mbawulemesa mienda, mienda yagasue 7 idi naye guphelegetesa fundo didi gutuama dia gihagelo gia mienda.’” 3 Alona watshitshile diago ngenyi; walemesele mienda ha guphelegetesa fundo diakhalele gutuama dia gihagelo gia mienda, gifua luholo Yehowa wawambelele Moize. 4 Gihagelo gia mienda aginamigile wolo sendese gu mutshi wagio uu nu gu iyaji, agilondele diago gifua luholo Yehowa wayimonesele Moize mu vizio.

5 Yehowa wawambelele luko Moize egi: 6 “Zula enya Levi mukatshi dia enya Isalele, aphelegetese. 7 Tala luholo udi naye guaphelegetesa: Udi naye guanianga meya a guphelegetesa gubola, gungima adi naye gukulula muila wawo wagasue nu luzualu,* awevui milele yawo ha gudiphelegetesa. 8 Gungima mbaazangula mutumba wa ngombe ya mulume, mbaazula nji mulambu wa mbuto wa phupha iladiege-diege yagubungisa nu maji; aye mbawuzangula mutumba uko wa ngombe ya mulume ya mulambu mukunda nu gubola. 9 Mbawuya nu enya Levi gutuama dia inzo ya tenta ya gudibungishila, gungima ubungisa enya Isalele agasue. 10 Tangua mbawubata enya Levi gutuama dia Yehowa, enya Isalele mbaahaga mago awo holu dia mito ya enya Levi. 11 Gungima Alona udi naye guhana* enya Levi gutuama dia Yehowa gifua mulambu wa guhunga wakatuga gudi enya Isalele; ngenyi ene mbaakalagala mudimo wa Yehowa.

12 “Gungima enya Levi mbaahaga mago awo holu dia mito ya ngombe jia milume, mbahana imoshi mulambu mukunda nu gubola, uvi iko ayihanyi mulambu wa guwotshia gudi Yehowa hagula muene a atotesele gubola guawo. 13 Mbawubata enya Levi gutuama dia Alona nu an’enji a mala, mbawaahana* gudi Yehowa gifua mulambu wa guhunga. 14 Udi naye gukhaphumuna enya Levi nu enya Isalele ako, enya Levi mbaabua athu ami. 15 Gungima enya Levi mbaangina ha gukalagala mudimo mu inzo ya tenta ya gudibungishila. Mbawutshita ngenyi ha guaphelegetesa nu ha guahana* gifua mulambu wa guhunga. 16 Handaga adi athu anguhanewe, anguhanewe mukatshi dia enya Isalele. Mbanguazula ha fundo dia ana a somi agasue a enya Isalele. 17 Handaga ana a somi agasue a enya Isalele adi ami, ikhale ana a somi a athu nga a shitu. Ngaabuishile athu a gijila mukunda nu ame lusugu ngashiyile ana a somi agasue a mu gifutshi gia Ejipitu. 18 Mbanguzula enya Levi ha fundo dia ana a somi agasue a enya Isalele. 19 Mbanguzula enya Levi mukatshi dia enya Isalele ha guahana gifua khapho gudi Alona nu an’enji a mala, hagula atshite mudimo mukunda nu enya Isalele mu inzo ya tenta ya gudibungishila nu akuatese nganga-nzambi hagula Nzambi atotesele enya Isalele; ngenyi nga gima gimoshi giabola gibuilago enya Isalele gula asuena hehi nu fundo dia gijila.”

20 Moize nu Alona nu enya Isalele agasue akalegele ngenyi nu enya Levi. Enya Isalele akalegele ndaga gifua luholo Yehowa wawambelele Moize mukunda nu enya Levi. 21 Enya Levi adiphelegetesele nu awevele milele yawo, gungima Alona waahanele* gifua mulambu wa guhunga gutuama dia Yehowa. Gungima Alona wahanele mulambu hagula Nzambi a atotesele gubola guawo nu aphelegetesewe. 22 Gungima enya Levi anginyile ha gutshita mudimo wawo mu inzo ya tenta ya gudibungishila mu utuameji wa Alona nu an’enji a mala. Akalegele ndaga gifua luholo Yehowa wawambelele Moize mukunda nu enya Levi.

23 Yehowa wawambelele luko Moize egi: 24 “Mukunda nu enya Levi, yala wagasue udi nu ivo 25 nu holu, udi naye guya musanga enya Levi anyi ana tshita mudimo gu inzo ya tenta ya gudibungishila. 25 Uvi gula watagenesa ivo 50, udi naye gukatuga mukatshi dia enya Levi ene, gashigo naye luko gutshita mudimo. 26 Muene wajiya gukuatesa aphangi’enji adi mutshita mudimo gu inzo ya tenta ya gudibungishila, uvi gashigo naye gutshita mudimo guene. Yene ndaga udi naye gutshita mukunda nu enya Levi nu midimo yawo.”

9 Yehowa watele maga nu Moize mu mavu a luselenga a Sinayi mu mbeji ya thomo mu givo gia ngiadi gungima dia guzoga guawo mu mavu a Ejipitu. Wamuwambelele egi: 2 “Enya Isalele adi naye gulondega mulambu mukunda nu Pake mu tangua diatombewe. 3 Mudi naye gulondega mulambu wene mu tangua diatombewe, mu lusugu lua 14 lua mbeji eyi mu ngueze.* Mudi naye guwulondega mu gudivua nu mikhuala ngamihanele nu gutumagela ndaga jiagasue jiatadila luholo mudi naye guwulondega.”

4 Hene Moize wawambelele enya Isalele ha gulondega mulambu mukunda nu Pake. 5 Gungima alondele mulambu mukunda nu Pake mu ngueze* ya lusugu lua 14 lua mbeji ya thomo mu mavu a luselenga a Sinayi. Enya Isalele atshitshile diago ndaga jiagasue gifua luholo Yehowa wawambelele Moize.

6 Guakhalele nu mala abuile usala handaga akuatele kimbi gia muthu,* akhalelego nu luholo lua gulondega mulambu mukunda nu Pake mu lusugu luene. Hene ayile gudimonesa gutuama dia Moize nu Alona mu lusugu luene, 7 awambelele Moize egi: “Tuadibuishi usala handaga tuakuatshi kimbi gia muthu.* Mukunda natshi tushigo naye guhana Yehowa mulambu mu tangua diatombewe hamoshi nu enya Isalele ako?” 8 Moize waawambelele egi: “Maganenu haha, nguvue ndaga iza muzuela Yehowa mukunda nu enue.”

9 Gungima Yehowa wawambelele Moize egi: 10 “Wambela enya Isalele egi: ‘Gula muthu mumoshi mukatshi dienu nga mu indongo idi muza wadibuisa usala handaga wakuatshi kimbi gia muthu,* nga ndo waya mu vuayaje yaleha, wajiya gulondega mulambu wa Pake mukunda nu Yehowa. 11 Udi naye gulondega mulambu wene mu ngueze* ya lusugu lua 14 lua mbeji ya mbadi. Udi naye gudia mbiji ya mutumba wa gimeme nu mapha ashigo nu levire nu mayiji alula. 12 Gashigo naye gubemba nga gima gimoshi uu nu mu gimenegena, gashigo naye nji gubogola nga gifuwa gimoshi gia gimeme giene. Udi naye gulondega mulambu wene mu gudivua nu mikhuala ya wano wa Pake. 13 Uvi gula muthu udi waphelegeta nga ndo gashigo mu vuayaje, muene nu gulondega ndo mulambu mukunda nu Pake, muthu* muene udi naye gushiyiwa* handaga gahanelego Yehowa mulambu mu tangua diatombewe. Muthu muene udi naye guhanewa ndola mukunda nu gubola guenji.

14 “‘Gula mudi nu ngenji mukatshi dienu, muene nji udi naye gulondega mulambu wa Pake mukunda nu Yehowa. Udi naye guwulondega mu gudivua nu mikhuala ya Pake nu gutumagela ndaga jiagasue jiatadila luholo mudi naye guwulondega. Ikhale ngenji nga muenya Isalele, udi naye gulandula mukhuala wa luholo lumoshi.’”

15 Mu lusugu ajigile inzo ya tenta, tuta diatshuigile inzo ya tenta, yakotelesa egi tenta yakhalele nu Mushete wa Gikotelo, uvi mu ngueze gima gimoshi giakhalele mumonega gifua tshuya giakhalele holu dia tenta uu nu mu gimenegena. 16 Ndaga jiakhalele mukalegewa luholo elu: Mu muanya tuta diakhalele mutshuiga inzo ya tenta, uvi mu phipha diakhalele mumonega gifua tshuya. 17 Tangua diagasue tuta diakhalele mukatuga holu dia inzo ya tenta, enya Isalele akhalele muya mbala imoshi, fundo diagasue tuta diakhalele mumagana, akhalele mujiga phundo yawo. 18 Gula Yehowa waawambela ha guya, enya Isalele akhalele muya, uvi gula Yehowa waawambela ha gujiga phundo yawo, akhalele mujiga phundo yawo. Tangua diagasue tuta diakhalele mumagana holu dia inzo ya tenta, akhalelego mukatula phundo yawo. 19 Gula tuta diasala dia gumagana holu dia inzo ya tenta masugu avula, enya Isalele akhalele mutumagela Yehowa, akhalelego muya. 20 Matangua ako tuta diakhalele mumagana holu dia inzo ya tenta masugu azonda. Gula Yehowa wawambela enya Isalele ha gukhala ha fundo ajigile phundo yawo, akhalele mukhala hene, uvi gula Yehowa waawambela ha guya, akhalele muya. 21 Matangua ako tuta diakhalele mumagana sendese mu ngueze uu nu mu gimenegena. Mu gimenegena gula tuta diakatuga, enya Isalele akhalele nji mukatuga. Ikhale mu muanya nga mu phipha, gula tuta diakatuga, enya Isalele akhalele nji mukatuga. 22 Tangua diagasue tuta diakhalele musala dia gumagana holu dia inzo ya tenta, ikhale masugu mbadi nga mbeji imoshi, nga mukunda nu masugu avula, enya Isalele akhalele mukhala mu phundo yawo, akhalelego mukatuga ha guya. Uvi gula tuta diakatuga, ene nji akhalele mukatuga. 23 Gula Yehowa waawambela ha gujiga phundo yawo, akhalele mujiga phundo yawo, uvi gula Yehowa waawambela ha gukatuga ha guya, akhalele muya. Akhalele mutumagela Yehowa nu gukalagala ndaga jiakhalele guawambela Yehowa mu njila ya Moize.

10 Gungima Yehowa wawambelele Moize egi: 2 “Zula marto ulonde phungi mbadi nu utadi wa siliva, mbawukhala gujikalegela ha gutamega enya Isalele ha gudibungisa nu ha gukatula phundo. 3 Gula phungi jiene jiagasue mbadi jiashigiwa, enya Isalele agasue adi naye guza ha gudibungisa gutuama diaye ha mufulo wa inzo ya tenta ya gudibungishila. 4 Uvi gula phungi imoshi yashigiwa, phamba mafumu, yakotelesa mafumu a athu 1 000 a enya Isalele adi naye guza gudibungisa gutuama diaye.

5 “Tangua mbamushiga phungi idi muzola dijui diakola nu dialeba, athu adi mu phundo jidi gu khanda ya mazogelo a kumbi adi naye gukatuga ha guya. 6 Tangua mbamushiga phungi idi muzola dijui diakola nu dialeba mu mbala ya mbadi, athu adi mu phundo jidi gu khanda ya sud adi naye gukatuga ha guya. Tangua diagasue mbamushiga phungi ngenyi, hunji dimoshi dia iphuta thathu didi naye guya.

7 “Uvi tangua mbamushiga phungi ha gutamega enya Isalele agasue ha gudibungisa, mushigo naye gushiga phungi jidi muzola dijui diakola nu dialeba. 8 Ana a Alona, nganga-nzambi, ene mbaakhala mushiga phungi, gukalegela phungi mbagukhala mukhuala wa ivo nu ivo mu indongo yenu yagasue.

9 “Ha mudi mu gifutshi gienu, gula muaya mulua ita nu mbalagaji udi gumisagesa, mudi naye gushiga phungi hagula masuta adibungise nu adilonde ha gulua ita; ngenyi Yehowa Nzambi wenu mbawumiwunguluga nu mbawumihuluisa ha mago a mbalagaji jienu.

10 “Mbamushiga nji phungi mu masugu enu a gusuanguluga, yakotelesa egi mu mawano enu nu gu gisendeselo gia mbeji jienu. Mbamushiga phungi tangua mbamuhana milambu ya guwotshia nu milambu ya guhuima; matululu a phungi jiene mbaatshita egi Nzambi wenu amiwunguluge. Ame Yehowa Nzambi wenu.”

11 Mu lusugu lua 20 lua mbeji ya mbadi mu givo gia mbadi, tuta diakatugile holu dia inzo ya tenta yakhalele nu Mushete wa Gikotelo. 12 Hene enya Isalele akatugile mu mavu a luselenga a Sinayi ayile gifua luholo a awambelele ha guya; tuta diayile mumagana mu mavu a luselenga a Parane. 13 Yakhalele mbala ya thomo enya Isalele akatugile ha guya mu gudivua nu malongo Yehowa wahanele Moize.

14 Hunji dia iphuta thathu ya mu phundo ya ana a Yuda diakhalele hunji dia thomo dia gukatuga ha guya, ayile gifua muakhalele masuta awo. Nashona mun’a Aminadaba muene wakhalele guatuameza. 15 Netanele mun’a Suale muene wakhalele mutuameza masuta a mu giphuta gia ana a Isakale. 16 Eliyabe mun’a Helona muene wakhalele mutuameza masuta a mu giphuta gia ana a Zabulona.

17 Tangua akatudile inzo ya tenta ha guya, ana a Geleshona nu ana a Melali abatele inzo ya tenta yene, ayile.

18 Hunji dia iphuta thathu ya mu phundo ya Ribene ayile gifua muakhalele masuta awo. Elisule mun’a Shedewule muene wakhalele guatuameza. 19 Shelumiele mun’a Sulishadayi muene wakhalele mutuameza masuta a mu giphuta gia ana a Simeone. 20 Eliyasafe mun’a Dewele muene wakhalele mutuameza masuta a mu giphuta gia ana a Gade.

21 Gungima ajigulu a Kehate anyi akhalele mubata ima ya gijila inyi yakhalele muhagewa ha fundo dia gijila ayile. Inzo ya tenta yakhalele naye gujigiwa gutuama egi ene ahete.

22 Gungima hunji dia iphuta thathu ya mu phundo ya ana a Efrayime ayile gifua muakhalele masuta awo. Elishama mun’a Amihuda muene wakhalele guatuameza. 23 Gamaliele mun’a Phedasule muene wakhalele mutuameza masuta a mu giphuta gia ana a Manase. 24 Abidane mun’a Gideoni muene wakhalele mutuameza masuta a mu giphuta gia ana a Benjame.

25 Gu gisugishilo, hunji dia iphuta thathu ya mu phundo ya ana a Dane ayile gifua muakhalele masuta awo. Ene akhalele gungima ha gubamba athu a mu phundo jiagasue jiakhalele gutuama. Ahiezele mun’a Amishadayi muene wakhalele guatuameza. 26 Phagiele mun’a Okelane muene wakhalele mutuameza masuta a mu giphuta gia ana a Asele. 27 Ahila mun’a Enane muene wakhalele mutuameza masuta a mu giphuta gia ana a Nefetali. 28 Lulu luholo enya Isalele nu mahunji awo a masuta akhalele muya.

29 Gungima Moize wawambelele Hobaba mun’a giwaji gienji Rewele* wa gu Madiana egi: “Tudi muya ha fundo Yehowa wazuelele egi: ‘Mbangumihana fundo diene.’ Iza tuye, mbatugukalegela ndaga jiabonga handaga Yehowa walayele Isalele ndaga jiabonga.” 30 Uvi Hobaba wamuvutuile egi: “Ngushigo muya n’enu. Ngudi muvutuga mu gifutshi gietu gudi aphangi’ami.” 31 Moize wamuwambelele egi: “Ngabuba, utubembigo handaga udi mujiya fundo tuajiya guhaga phundo yetu mu mavu a luselenga, wajiya gutudijiga njila. 32 Gula tuaya naye, mbawuheta nji khapho mu ndaga jiagasue jiabonga mbajitukalegela Yehowa.”

33 Enya Isalele akatugile gu mulundu wa Yehowa ha guwenda masugu thathu mu njila, mushete wa gikotelo wa Yehowa wadiangele guya masugu thathu gutuama ha guakambela fundo dia guhuluguga. 34 Tuta dia Yehowa diakhalele holu diawo mu muanya hakatugile ene mu phundo yawo ha guya.

35 Tangua diagasue akhalele mukatula Mushete wa Gikotelo ha guya nawo ha fundo diko, Moize wakhalele muzuela egi: “Oo Yehowa, zuga umuange mbalagaji jiaye. Athu anago guguzumba alenge gutuama diaye.” 36 Tangua akhalele mutulula Mushete wa Gikotelo, Moize wakhalele muzuela egi: “Oo Yehowa, vutuga ukhale mukatshi dia enya Isalele awa avula ajiyilego gutangewa.”*

11 Gungima enya Isalele asendesele guzuela ndaga jiabola diago gutuama dia Yehowa. Havuile Yehowa ndaga jiene, wavuile khabu jiakola; tshuya tuakatugile gudi Yehowa, tuasendesele gukonda athu ako akhalele gu khulo ya phundo. 2 Hene athu asendesele gudidila Moize, Moize wabubidile Yehowa, gungima tshuya tuajimine. 3 Atamegele fundo diene egi Tabela* handaga tshuya tuakatugile gudi Yehowa, tuaakondele ha fundo diene.

4 Thundu ya athu a maluholo agasue* akhalele mukatshi diawo akhalele nu ngina yakola ya guheta ima yabonga ya gudia. Nu ene enya Isalele asendesele gudila nu guzuela egi: “Nanyi mbawutuhana mbiji ha gudia ? 5 Tuakhalele getu mudia jishui jia githuhu gu Ejipitu, nu kokombre nu pasteke nu puaro nu matungulu nu ayi! 6 Uvi henyaha tudi* mufua, tushigo mumona nga gima giko gia gudia phamba mana awa.”

7 Mana akhalele gifua mbale jia koliyandre, akhalele alaphe gifua meya a mutshi wa bedeliyome. 8 Athu akhalele muzoga ha guya guanona, akhalele guakhukha ha maseso nga guatua mu kinu. Gungima akhalele guatelega mu nzungu, nga gualonda mapha akhalele gifua minengu; mu kano akhalele gifua gato galondewe nu maji nu sugadi. 9 Tangua mame akhalele mubua mu phundo mu phipha, akhalele mubua hamoshi nu mana.

10 Moize wavuile athu mudila, fami nu fami, yala wagasue ha mufulo wa tenta yenji. Yehowa wavuile khabu jiakola, Moize nji gasuangulugilego nga hazonda. 11 Hene Moize wawambelele Yehowa egi: “Mukunda natshi udi mumonesa muenya mudimo waye lamba? Ushigo musuanguluga nu ame hene wanguhana ginemo gia athu awa agasue ha gubata ba? 12 Ame ngamitshile vumo dia athu awa agasue ba? Ame ngaavualele hagula unguwambele ha guabata ha thulo yami gifua luholo muenya mudimo wana bata mona wa gitebe, ha guya nawo mu mavu wadilogele ha guhana akhakh’awo ba? 13 Gui mbanguheta mbiji ya guhana athu awa agasue? Handaga adi mulandula gungudidila nu adi gungutoga egi: ‘Tuhane mbiji tudie!’ 14 Ngushigo nu luholo lua gubata athu awa agasue hakhami; idi ginemo giakola mukunda nu ame. 15 Gula udi mutshigina gungukalegela ndaga luholo elu, ngabuba ngushiye gami luenyelu. Gula ngushigo gugusuanguluisa, ungumonesago malamba ako.”

16 Yehowa wavutudile Moize egi: “Bungisa mala 70 mukatshi dia akulu a gu Isalele, mala anyi wana mona egi* adi akulu nu atuameji a enya Isalele; azule uye nawo gu inzo ya tenta ya gudibungishila, mumagane nawo guene. 17 Gungima ame mbangubulumuga guene ha guta maga nu aye, mbangukatula ndambo ya nyuma idi nu aye ha guahana; ngenyi ene mbaagukuatesa ha gubata ginemo gia athu awa, hagula ugibatshigo hakhaye. 18 Udi naye guwambela athu egi: ‘Mudi naye gudiphelegetesa mukunda nu hamene, mbamudia diago mbiji handaga muadidila Yehowa, muazuedi egi: “Nanyi mbawutuhana mbiji hagula tudie? Tuakhalele getu muabonga gu Ejipitu.” Yehowa mbawumihana diago mbiji, mbamuyidia. 19 Mbamushigo mudia mbiji yene mu lusugu lumoshi nga masugu mbadi nga masugu thano, nga masugu 10 nga masugu 20. 20 Uvi mbamuyidia mbeji ya mudidi uu nu tangua mbayimizogela mu mazulu nu mbayimisegela, handaga muatunyi Yehowa udi mukatshi dienu, muamudidila egi: “Mukunda natshi tuazogele gu Ejipitu?”’”

21 Uvi Moize wamuwambelele egi: “Athu ngudi nawo adi mala* 600 000, uvi aye udi muzuela egi: ‘Mbanguahana mbiji, mbaayidia mbeji ya mudidi’! 22 Gula ashiya imeme yawo yagasue nga ngombe nga khombo jiawo, mbajiatagana ba? Nga ndo gula akuata jishui jiagasue jia mu kianga, mbajiatagana ba?”

23 Yehowa wawambelele Moize egi: “Koko dia Yehowa didi diahihia ba? Henyaha uza mumona gula ndaga ngudi guguwambela mbajikalegewa nga ndo.”

24 Hene Moize wazogele, wawambelele athu ndaga jiazuelele Yehowa. Gungima wabungishile mala 70 mukatshi dia akulu a enya Isalele, waawambelele ha gujieta inzo ya tenta. 25 Gungima Yehowa wabulumugile mu tuta, watele maga nu Moize, wazudile ndambo ya nyuma gudi Moize, wayihanele akulu 70 akhalele n’enji. Tangua akulu ene ahetele nyuma yene, asendesele gukalagala ndaga gifua baprofete;* uvi gungima akalegelego luko ndaga yene.

26 Uvi mukatshi dia mala ene 70, guakhalele nu mala ako mbadi asalele mu phundo. Majina awo akhalele Eledade nu Medade. Akhalele mukatshi dia athu asonegewe majina, uvi ayilego gu inzo ya tenta. Ene nji ahetele nyuma, asendesele gukalagala ndaga gifua baprofete mu phundo. 27 Muvuala mumoshi wa yala wayile phushi gudi Moize, wamuwambelele egi: “Eledade nu Medade adi mukalagala ndaga gifua baprofete mu phundo!” 28 Gungima Yoshua mun’a Nune munu wakhalele muenya mudimo wa Moize sendese ulenge wenji wazuelele egi: “Fumu, atunyise!” 29 Uvi Moize wamuwambelele egi: “Udi muvua ginjiongo mukunda nu ame ba? Ngudi mutshigina egi Yehowa ahane nyuma yenji gudi athu enji hagula athu agasue a Yehowa abue baprofete!” 30 Gungima Moize wavutugile mu phundo nu akulu a gu Isalele.

31 Gungima Yehowa watumine muhehe, muhehe wene wabatele tumbangu sendese gu kianga, wakhalele gutubuisa mu khanda jiagasue jia phundo, tuakhalele sambua nu sambua; athu akhalele naye guwenda lusugu lua mudidi ha gubalega tumbangu tuagasue tuakhalele mubua. Tunjila tuene tuakhalele mubua ha gitala gia bakude* hehi nu mbadi nu mavu. 32 Hene lusugu luene luagasue nu phipha yene yagasue nu lusugu lualanduile, athu abandelego, akhalele munona tumbangu. Athu anonele tumbangu tuazonda anonele ba omere* 10; akhalele gutuhaga gu khulo jiagasue jia phundo ha gutumiginyisa. 33 Uvi hakhalele enya Isalele nu mbiji yene mu kano khenji amanesela guyidia, Yehowa waavuidile khabu jiavula, gungima Yehowa washiyile athu avula diago mukatshi diawo.

34 Gishina giene ahanele fundo diene jina egi Kibrote-Hatava,* handaga guene afundjile athu akhalele nu ngina yakola ya guheta ima yabonga ya gudia. 35 Gungima athu akatugile gu Kibrote-Hatava, ayile gu Haselote, akhalele guene.

12 Miriame nu Alona asendesele guzuela ndaga jiabola mukunda nu Moize handaga wazudile mukhetu wa muenya Kushi mu ulo. 2 Akhalele muzuela egi: “Yehowa wazuelele phamba mu njila ya Moize ba? Gazuelelego nji mu njila yetu?” Yehowa wakhalele guategelela. 3 Uvi Moize wakhalele muthu wa gudibulumuisa diago gubalega athu agasue* akhalele ha mavu.

4 Gungima Yehowa wawambelele Moize nu Alona nu Miriame egi: “Mukut’enu agasue thathu ndenu gu inzo ya tenta ya gudibungishila.” Hene mukut’awo agasue thathu ayile guene. 5 Yehowa wabulumugile mu kunji dia tuta, wamaganele ha mufulo wa tenta, gungima watamegele Alona nu Miriame. Mukut’awo agasue mbadi ayile gudi muene. 6 Waawambelele egi: “Ngabuba, ngutegelelenu. Gula gudi nu profete wa Yehowa mukatshi dienu, ame mbangudijiyisa gudi muene mu vizio, mbanguzuela n’enji mu nzoji. 7 Uvi ngatshitshilego ngenyi nu muenya mudimo wami Moize! Ngamuhanyi ginemo gia gutuameza athu ami agasue.* 8 Ngana guta n’enji maga gifua luholo muthu wana guta maga nu muthu muko,* ngana gumuwambela ndaga haphelo, nganago gumutela ishima; ame Yehowa ngana gudimonesa gudi muene. Mukunda natshi muavuilego woma ha gufeta muenya mudimo wami Moize?”

9 Yehowa waavuidile khabu jiakola, wakatugile ha fundo akhalele. 10 Tangua tuta diakatugile holu dia tenta, misongo ya hute ilaphe gifua neje yakuatele Miriame. Gungima habalumugile Alona gudi Miriame, wamonele Miriame nu misongo ya hute. 11 Alona wawambelele Moize mbala imoshi egi: “Ngabuba fumu! Ubembigo egi tuhanewe ndola mukunda nu gubola tuakalagala! Tuakalagala diago ndaga nu guheya guagasue. 12 Ngabuba, ubembigo egi Miriame alandule gukhala ngenyi gifua mona wavualewa wa gufua misunyi yenji iko yabodi gale!” 13 Moize wasendesele gububila Yehowa mu dijui diakola egi: “Nzambi wami, ngabuba saga Miriame! Ngabuba!”

14 Yehowa wawambelele Moize egi: “Nga sh’enji wamufitshi mate gu phala, nga mbagashigo muhanewa musonyi mukunda nu masugu 7 ba? Mubembe aye gudikhalela hakhenji gonze ya phundo masugu 7, gungima wajiya guvutuga mu phundo.” 15 Miriame wayile gudikhalela hanze ya phundo masugu 7, athu akatudilego phundo uu nu tangua Miriame wavutugile. 16 Gungima enya Isalele akatugile gu Haselote, ayile muhaga phundo yawo mu mavu a luselenga a Parane.

13 Yehowa wawambelele Moize egi: 2 “Tuma athu ha guya mutala gifutshi gia Kanana, gifutshi ngudi muhana gudi enya Isalele. Mu giphuta nu giphuta, udi naye gutuma muthu mumoshi, athu ene adi naye gukhala mafumu a athu a mu iphuta yawo.”

3 Hene Moize watumine athu ene mu mavu a luselenga a Parane gifua luholo luazuelele Yehowa. Mala ene agasue akhalele mafumu a enya Isalele. 4 Athu ene majina awo enyawa: mu giphuta gia Ribene, watumile Shamua mun’a Zakule; 5 mu giphuta gia Simeone, Shafata mun’a Holi; 6 mu giphuta gia Yuda, Kalebe mun’a Yefune; 7 mu giphuta gia Isakale, Yigeyale mun’a Yozefe; 8 mu giphuta gia Efrayime, Hoshea mun’a Nune; 9 mu giphuta gia Benjame, Phaleti mun’a Lafu; 10 mu giphuta gia Zabulona, Gadiele mun’a Sodi; 11 mu giphuta gia Yozefe mukunda nu giphuta gia Manase, Gadi mun’a Susi; 12 mu giphuta gia Dane, Amiele mun’a Gemali; 13 mu giphuta gia Asele, Setule mun’a Mikaele; 14 mu giphuta gia Nefetali, Nabi mun’a Vofesi; 15 mu giphuta gia Gade, Gewele mun’a Maki. 16 Ene majina a athu anyi Moize watumine ha guya mutala gifutshi. Moize wahanele Hoshea mun’a Nune jina egi Yoshua.*

17 Tangua diaatumine Moize ha gutala gifutshi gia Kanana, waawambelele egi: “Kandugenu gu Negebe, gungima mukanduge gu khanda ya milundu. 18 Mudi naye gutala ha gujiya gula gifutshi giene gidi gia luholo lutshi, gula athu adi muene adi enya ngolo nga ndo, adi azonda nga avula, 19 gula gifutshi giene gidi giabonga nga giabola, gula membo a mu gifutshi giene adi agujietesa nu ibayi nga ndo. 20 Talenu nji gula mavu ene adi a mbuto nga ndo, nu gula adi nu mitshi nga ndo. Muvuigo woma, zangulenu nji ndambo ya mabundu a mu gifutshi giene.” Yakhalele sungi ya gukatula mabundu a thomo a vinyo.

21 Hene akandugile, atalele gifutshi sendese mu mavu a luselenga a Sine uu nu gu Lehoba, uu nu gu Lebo-Hamate.* 22 Akandugile gu Negebe, ahetele gu Hebrone fundo diakhalele Ahimana nu Sheshayi nu Talemayi, ana a Anaka. Dimbo dia Hebrone diatungiwe ivo 7 gutuama egi dimbo dia Soana dia gu Ejipitu ditungiwe. 23 Tangua ahetele mu baba* dia Eshekola, abatuile luthango luakhalele nu gisuga gimoshi gia mabundu a vinyo, mala mbadi abatele gisuga giene gu muhitu. Ahelele nji ndambo ya mabundu a grenade nu a figi. 24 Atamegele baba* diene egi Eshekola,* handaga enya Isalele abatuile gisuga gia vinyo guene.

25 Gungima dia gutala gifutshi masugu 40, avutugile. 26 Ayile gudi Moize nu Alona nu enya Isalele agasue mu mavu a luselenga a Parane gu Kadeshe. Awambelele athu agasue ndaga amonele, a adijigile nji mabundu a gifutshi giene. 27 Ndaga awambelele Moize jiene eji: “Tuayi mu gifutshi watutumile, idi yadiago egi gifutshi giene gidi giazala pha nu miliki nu wigi; mabundu a mu gifutshi giene ene awa. 28 Uvi athu a mu gifutshi giene adi enya ngolo, membo awo adi nu ibayi yakola, adi nji akoma. Tuamonyi nji ana a Anaka guene. 29 Enya Amaleke adi mu mavu a Negebe, enya Hete nu enya Yebuse nu enya Amole adi gu khanda ya milundu, enya Kanana adi gu khanda ya kianga nu mu khulo ya muta wa Yordane.”

30 Kalebe wakambele gutulula athu mitshima hakhalele ene agumagana gutuama dia Moize, waawambelele egi: “Tukandugenu mbala imoshi, tutambule gifutshi giene handaga mbatuabinga diago.” 31 Uvi athu ayile mutala dimbo hamoshi n’enji akhalele muzuela egi: “Tushigo nu luholo lua guluisa athu ene handaga atubalega ngolo.” 32 Alanduile guwambela enya Isalele ndaga jiabola mukunda nu gifutshi ayile mutala egi: “Gifutshi tuayile mutala gidi gifutshi giana shiya athu enji; athu agasue tuamonyi guene adi aleha diago. 33 Tuamonyi Banefilime guene, ana a Anaka, adi ajigulu a Banefilime; tuakhadi gifua matulu mukatshi diawo, ene nji atumonyi gifua matulu.”

14 Gungima athu agasue asendesele gukaluluga nu gudila mangololo phipha yene yagasue. 2 Enya Isalele agasue asendesele guzuela ndaga jiabola mukunda nu Moize nu Alona; mukut’awo agasue akhalele muzuela egi: “Tuakhalele getu naye gufuila gu Ejipitu, nga ndo tuakhadi naye gufua mu mavu awa a luselenga! 3 Mukunda natshi Yehowa udi gutubata mu mavu awa hagula tushiyiwe gu phogo ya khusa? Mbalagaji jietu mbajitutambula akaji’etu nu an’etu. Ishigo ndaga yabonga gula tuavutuga gu Ejipitu ba?” 4 Akhalele gudiwambela egi: “Tutombenu fumu, tuvutuge gu Ejipitu!”

5 Tangua Moize nu Alona avuile ndaga jiene, afugamele phala mu mavu ha meso a enya Isalele agasue. 6 Yoshua mun’a Nune nu Kalebe mun’a Yefune anyi akhalele mukatshi dia athu ayile mutala gifutshi mu gisuegi, atawuile milele yawo, 7 gungima awambelele enya Isalele agasue egi: “Gifutshi tuayile mutala, gidi gifutshi giabonga diago. 8 Gula tuatumagela Yehowa, muene mbawusuanguluga nu esue, mbawutubata diago mu gifutshi giene, mu gifutshi giazala pha nu miliki nu wigi, mbawutuhana nagio. 9 Uvi mulumbugilago Yehowa, muvuilago athu a mu gifutshi giene woma, handaga mbatuabinga gifua saga.* Ashigo luko mu ubambi, Yehowa udi nu esue. Muavuilago woma.”

10 Ikhale ngenyi, athu agasue adivuile ha guasonona maseso. Uvi mbala imoshi enya Isalele agasue amonele lutumbu lua Yehowa holu dia inzo ya tenta ya gudibungishila.

11 Hene Yehowa wawambelele Moize egi: “Athu awa mbaalandula gutuna gungunemesa uu nu tangua ditshi? Uu nu tangua ditshi mbaalandula gutuna gungushila mutshima ikhale ngakalegele gale ndaga jiavula jia gushimana* mukatshi diawo? 12 Ngudi guashiya gu misongo ya gisambugila hagula nguamanesele mukut’awo agasue, mbangugubuisa gifutshi giakoma nu gia ngolo guabalega ene.”

13 Uvi Moize wawambelele Yehowa egi: “Tangua enya mu gifutshi gia Ejipitu, fundo wazolele athu awa nu ngolo jiaye, mbaavua ndaga yene, 14 mbaatela athu a mu gifutshi egi lumene lua ndaga yene. Athu ene nji avuile egi aye Yehowa udi mukatshi dia enya Isalele, wana guta nji nawo maga gifua luholo muthu wana guta maga nu muthu muko.* Aye udi Yehowa, tuta diaye diana magana holu diawo; mu muanya wana wenda gutuama diawo mu kunji dia tuta, uvi mu phipha, mu kunji dia tshuya. 15 Gula washiya athu awa agasue mbala imoshi,* athu a mu ifutshi inyi avuile lukuma luaye mbaazuela egi: 16 ‘Yehowa gakhalelego nu luholo lua gubata athu awa mu gifutshi giadilogele muene ha guahana, hene waashiya mu mavu a luselenga.’ 17 Henyaha Yehowa ngudi gugububila, monesa egi ngolo jiaye jidi jiavula gifua luholo walayele, tangua wazuelele egi: 18 ‘Yehowa ganago guvua khabu muphushi, udi wazala pha nu guzumba gua giamatshidia, wana totesela athu gubola guawo nu gujimbila guawo, uvi wana hana diago ndola gudi muthu wana tshita gubola, wana hana ndola gudi ana mukunda nu gubola gua ash’awo uu nu mu gindongo gia thathu nu gia nguana.’ 19 Ngabuba, totesela athu awa gubola guawo gifua luholo wana guatotesela gale sendese gu Ejipitu uu nu mangino, handaga guzumba guaye gua giamatshidia gudi guavula.”

20 Hene Yehowa wazuelele egi: “Ngaatotesela gifua luholo wangutoga. 21 Uvi ngudi gudiloga egi mavu agasue mbaazala nu lutumbu lua Yehowa. 22 Athu agasue amonele lutumbu luami nu ndaga jia gushimana ngakalegele gu Ejipitu nu mu mavu a luselenga, uvi alandula gungulumbugila mu mbala eji 10 nu atuna gutegelela mbimbi yami, 23 mbaashigo mumona gifutshi ngatendelele gudi ash’awo. Gushigo nga nu muthu mumoshi mukatshi dia athu ashigo gungunemesa mbawumona gifutshi giene. 24 Uvi muenya mudimo wami Kalebe wakhadi nu matangi a luholo luko nu walandula gungutumagela nu mutshima wenji wagasue, hene mbangumubata diago mu gifutshi giayile muene mutala, mbangugihana nji gudi ajigulu enji. 25 Luholo enya Amaleke nu enya Kanana adi mu baba, hamene mudi naye guvutuga muyile gu khanda ya mavu a luselenga, mu njila ya Kianga Giabenga.”

26 Gungima Yehowa wawambelele Moize nu Alona egi: 27 “Uu nu tangua ditshi athu awa abola mbaalandula guzuela ndaga jiabola mukunda nu ame? Ngavui ndaga jiabola jidi muzuela enya Isalele mukunda nu ame. 28 Awambele egi: ‘Yehowa wazuela egi: “Ngudi gudiloga egi mbangumikalegela ndaga gifua luholo ngamivui muzuela! 29 Athu agasue adi nu ivo sendese 20 uu nu holu asonegewe majina, athu anyi azuedi ndaga jiabola mukunda nu ame, mbaafua mu mavu awa a luselenga. 30 Nga muthu mumoshi mukatshi dienu mbagashigo mungina mu gifutshi ngadilogele egi mbangumihana ha gukhala muene, phamba Kalebe mun’a Yefune nu Yoshua mun’a Nune mbaangina.

31 “‘“Uvi an’enu muazuelele egi mbaatambudiwa, ene mbaangina mu gifutshi muatunyi, ene nji mbaagijiya. 32 Uvi enue mbamufua mu mavu awa a luselenga. 33 Henyaha an’enu mbaabua abambi a imeme mu mavu a luselenga ivo 40, mbaabata ginemo gia gubola* muangukalegele uu nu tangua muthu wa gisugishilo mukatshi dienu mbawufua mu mavu a luselenga. 34 Mbamubata ginemo gia gubola guenu ivo 40 gifua mudi guvula gua masugu muayile mutala gifutshi, masugu 40, lusugu lumoshi mukunda nu givo gimoshi, lusugu lumoshi mukunda nu givo gimoshi; ngenyi mbamujiya ndaga yana buila athu ana gungulumbugila.*

35 “‘“Ame Yehowa ngazuedi. Ndaga mbangukalegela athu awa agasue abola adibungisa ha gungulumbugila ame jiene eji: Mbaafua mu mavu awa a luselenga, mbaahua mukut’awo agasue. 36 Mala anyi Moize watumile ha guya mutala gifutshi, anyi avutugile nu mene jiabola jiatadila gifutshi, jinyi jiatumine athu ha guzuela ndaga jiabola mukunda nu muene, 37 yadiago, athu anyi avutugile nu mene jiabola jiatadila gifutshi, adi naye gushiyiwa gutuama dia Yehowa. 38 Uvi mukatshi dia athu ayile mutala gifutshi, phamba Yoshua mun’a Nune nu Kalebe mun’a Yefune mbaasala nu monyo.”’”

39 Tangua Moize wawambelele enya Isalele agasue ndaga eji, athu asendesele gudila mangololo. 40 Azugile nu gimenegena giagasue, akhalele mutshigina gukanduga gu mulundu, akhalele muzuela egi: “Tuakalagala gubola, henyaha tudi mutshigina guya ha fundo Yehowa watuwambelele egi tudi naye guya.” 41 Uvi Moize wazuelele egi: “Mukunda natshi mushigo mutumagela mbimbi ya Yehowa? Mushigo muya mubinga. 42 Mukandugago handaga Yehowa gashigo n’enu; mbalagaji jienu mbajimibinga. 43 Enya Amaleke nu enya Kanana adi ha sambua, mbaamishiya nu phogo ya khusa. Luholo muatunyi gutumagela Yehowa, Yehowa mbagashigo mukhala n’enu.”

44 Uvi akhalele mito yakola, akandugile holu dia mulundu, uvi Moize wasalele mu phundo nu mushete wa gikotelo wa Yehowa. 45 Gungima enya Amaleke nu enya Kanana akhalele gu khanda yene ya milundu, abulumugile, a ashiyile, a akayele uu nu gu Holema.

15 Yehowa wawambelele luko Moize egi: 2 “Wambela enya Isalele egi: ‘Tangua mbamungina mu gifutshi ngalayele ha gumihana hagula mukhale muene, 3 tangua mbamuzula ngombe jienu nga imeme yenu ha guhana Yehowa mulambu wagasue (ikhale mulambu wa guwotshia, nga mulambu ha gutagenesa ndaga muaditendelele, nga mulambu wa khenda, nga mulambu mbamuhana mu sungi jia mawano enu) hagula uzole vumba diabonga mukunda nu Yehowa, 4 muthu udi muhana mulambu wenji, udi naye nji guhana Yehowa mulambu wa mbuto: giakumi gia efa* imoshi ya phupha iladiege-diege ya gubungisa nu litre* imoshi ya maji. 5 Mukunda nu mulambu wa guwotshia, nga mutumba wagasue wa gimeme gia mulume mudi muhana gifua mulambu, mudi naye guwuhana hamoshi nu mulambu wa matombe, litre imoshi ya vinyo. 6 Mukunda nu gimeme gia mulume, mudi naye guhana mulambu wa mbuto: bakilo* mbadi a phupha iladiege-diege yagubungisa nu litre imoshi ya maji nu ndambo. 7 Mudi naye nji guhana mulambu wa matombe: litre imoshi ya vinyo nu ndambo, hagula uzole vumba diabonga mukunda nu Yehowa.

8 “‘Gula muazangula ngombe ya mulume ha guyihana mulambu wa guwotshia nga mulambu mukunda nu gutagenesa ndaga imoshi muaditendelele nga ha guhana Yehowa mulambu wa guhuima, 9 mudi naye guwuhana hamoshi nu mulambu wa mbuto; bakilo thathu a phupha iladiege-diege ya gubungisa nu gitshinyi gia hine* gia maji. 10 Mudi naye guhana mulambu wa matombe gitshinyi gimoshi gia hine gifua mulambu wawetshiewa ha tshuya, hagula uzole vumba diabonga mukunda nu Yehowa. 11 Yene ndaga mudi naye gukalagala mukunda nu ngombe yagasue ya mulume nga gimeme giagasue gia mulume, nga mutumba wagasue wa gimeme gia mulume, nga mukunda nu khombo. 12 Mudi naye gutshita ngenyi mukunda nu shitu yagasue mbamuhana ikhale shitu jiene jidi guvula gutshi. 13 Muenya Isalele wagasue mbawutshita ngenyi ha guhana mulambu wawetshiewa ha tshuya, hagula uzole vumba diabonga mukunda nu Yehowa.

14 “‘Gula ngenji wana khala mukatshi dienu nga muthu wana jinga mukatshi dienu sendese mualeha watshigina guhana mulambu ha tshuya hagula uzole vumba diabonga mukunda nu Yehowa, udi naye guwuhana gifua luholo enue nji muana hana. 15 Mukut’enu agasue mbamukhala nu mukhuala umoshi ikhale enue enya Isalele nga ngenji jidi mukatshi dienu. Mukhuala wene mbawukhala ivo nu ivo mu indongo yenu yagasue. Gu meso a Yehowa, ngenji mbawukhala luholo lumoshi nu enue. 16 Mukhuala mbawukhala umoshi nu usopheshi wa luholo lumoshi mukunda nu enue nu ngenji udi mukatshi dienu.’”

17 Yehowa wawambelele luko Moize egi: 18 “Wambela enya Isalele egi: ‘Tangua mbamungina mu gifutshi ngudi gumibata, 19 nu mbamudia mapha* a mu gifutshi giene, mudi naye guhana musomo gudi Yehowa. 20 Mbamuhana musomo wa phupha ya mbuto jienu jia thomo; mbamuzula phupha yene mulondji mapha adi gifua minengu. Mbamuhana musomo wene gifua luholo muana hana musomo wana katuga ha fundo dia gusuwila* mbuto. 21 Mu indongo yenu yagasue, mbamukhala muhana Yehowa musomo wa phupha ya mbuto jienu jia thomo.

22 “‘Uvi gula muatshita gubola, muatuna gutumagela mikhuala eyi yagasue Yehowa wahanele Moize, 23 yakotelesa ndaga jiagasue jiazuelele Yehowa mu njila ya Moize mukunda nu enue nu indongo yenu mbayiza sendese lusugu luamiwambelele Yehowa ndaga jiene; 24 gula muakalagala gubola guene handaga muabuitshi mutshima nu gubola guene guakalegewego ha meso a athu avula, enya Isalele agasue adi naye guhana mutumba wa ngombe ya mulume gifua mulambu wa guwotshia, hagula uzole vumba diabonga mukunda nu Yehowa; adi naye guwuhana hamoshi nu mulambu wa mbuto nu mulambu wenji wa matombe gifua luholo mukhuala wana toga, hamoshi nu mutumba wa khombo gifua mulambu mukunda nu gubola. 25 Nganga-nzambi mbawuhana milambu eyi mukunda nu enya Isalele agasue hagula gubola guawo gutotesewe, ngenyi gubola guawo mbagutotesewa handaga akalagala gubola guene mu gubuita gua mutshima; abatshi nji mulambu wawo wawetshiewa ha tshuya mukunda nu Yehowa, nu mulambu wawo mukunda nu gubola gutuama dia Yehowa mukunda nu gujimbila guawo. 26 Nzambi mbawutotesela enya Isalele agasue gubola guawo nu ngenji udi mukatshi diawo handaga yakhadi gubola gua athu agasue.

27 “‘Gula muthu* wakalagala gubola handaga wabuitshi mutshima, udi naye guhana khombo ya mukaji ya givo gimoshi gifua mulambu mukunda nu gubola. 28 Nganga-nzambi mbawuhana mutumba wa khombo yene hagula Yehowa atotesele muthu wakalagala gubola gu meso enji uvi gakhalelego nu matangi a gutshita gubola guene, ngenyi gubola gua muthu muene mbagutotesewa. 29 Mukunda nu gubola guakalagala muthu handaga wabuitshi mutshima, mukhuala mbawukhala umoshi mukunda nu muenya Isalele nu ngenji jidi mukatshi diawo.

30 “‘Uvi gula muthu* wakalagala ndaga yabola nu mutshima umoshi, washinga Yehowa, ikhale muene udi muenya Isalele nga ngenji udi naye gushiyiwa.* 31 Luholo muthu muene wasegulula mbimbi ya Yehowa nu ganemeselego mukhuala wenji, udi naye gushiyiwa diago. Gubola guenji mbagukhala ha muto wenji.’”

32 Tangua enya Isalele akhalele mu mavu a luselenga, amonele yala mumoshi mutshiaya khunyi mu Lusugu lua Guhuluguga. 33 Athu amusangele mutshiaya khunyi, ayile n’enji gudi Moize nu Alona nu enya Isalele agasue. 34 Amubambele muabonga handaga akhalelego mujiya ndaga ajiya gumutshita.

35 Yehowa wawambelele Moize egi: “Yala muene udi naye gushiyiwa diago, enya Isalele agasue adi naye gumusonona maseso gonze ya phundo.” 36 Hene, enya Isalele agasue amuzolele gonze ya phundo, amusonuene maseso, wafuile, gifua luholo Yehowa wawambelele Moize.

37 Yehowa wawambelele luko Moize egi: 38 “Wambela enya Isalele egi adi naye gulonda malenda gu songi jia milele yawo mu indongo yawo yagasue, adi naye guhaga shinga ya ble ha thunda ya malenda ene. 39 ‘Mudi naye gukhala nu malenda awa gu songi jia milele yenu hagula tangua mbamukhala guamona, mbamuwunguluge mikhuala yagasue ya Yehowa nu guyitumagela. Mushigo naye gulandula mitshima yenu nu meso enu, handaga mbayimituma ha gukalagala uthambi wa mu nyuma.* 40 Mbayimikuatesa ha guwunguluga mikhuala yami yagasue, ngenyi mbamuyitumagela nu mbamukhala athu a gijila mukunda nu Nzambi wenu. 41 Ame Yehowa Nzambi wenu, ngamizolele mu gifutshi gia Ejipitu ha gumitshiginyisa egi ngudi Nzambi wenu. Ame Yehowa Nzambi wenu.’”

16 Muenya giphuta gia Levi mumoshi jina dienji Kora mun’a Yisehale, mujigulu wa Kehate, wadibungishile nu Datana nu Abirame ana a Eliyabe nu One mun’a Phelete; mukut’awo agasue thathu akhalele ajigulu a Ribene. 2 Ene nu enya Isalele ako 250, mafumu a enya Isalele, athu atombewe mu hungu, enya lukuma, alumbugile Moize. 3 Adibungishile, asendesele guzuela ndaga jiabola mukunda nu Moize nu Alona egi: “Muatusegela diago! Enya Isalele agasue adi athu a gijila, Yehowa nji udi mukatshi diawo. Mukunda natshi enue mudi gudimona egi muabalega athu agasue a mu hungu dia Yehowa?”

4 Havuile Moize ndaga eyi, wafugamele mbala imoshi phala mu mavu. 5 Gungima wawambelele Kora nu athu agasue akhalele gu khanda yenji egi: “Hamene mu gimenegena, Yehowa mbawumonesa gula nanyi udi gu khanda yenji, nanyi udi muthu wa gijila nu muthu udi naye gusuena hehi n’enji. Muthu mbawutombewa, muene mbawusuena hehi n’enji. 6 Henyaha aye Kora nu athu agasue adi gu khanda yaye tshitenu ndaga eyi: Zulenu malonga a gubatela tshuya, 7 hamene mudi naye gumba tshuya nu uhafu ha malonga ene gutuama dia Yehowa; muthu munu Yehowa mbawutomba, muene udi muthu wa gijila. Enue ana a Levi na muabalegesa giwa!”

8 Gungima Moize wawambelele Kora egi: “Enue ana a Levi, ngabuba, ngutegelelenu. 9 Yehowa Nzambi wa Isalele wamitombele mukatshi dia enya Isalele ako nu watshiginyile egi musuene hehi n’enji, wamitombele nji ha gumukalegela gu inzo yenji ya tenta nu ha gumagana gutuama dia enya Isalele agasue ha guakalegela mudimo. Ndaga eyi ishigo nu ndando gu meso enu ba? 10 Luholo Nzambi wagutombele aye nu aphangi’aye ana a Levi ha gusuena hehi n’enji ishigo nu ndando gu meso enu ba? Henyaha mudi mutshigina nji gubua nganga-nzambi? 11 Aye nu athu agasue adibungisa gu khanda yaye mudi mulumbugila Yehowa. Uvi Alona udi nanyi hagula muzuele ndaga jiabola mukunda nu muene?”

12 Gungima Moize watumile athu ha gutamega Datana nu Abirame ana a Eliyabe, uvi ene amuvutuile egi: “Tushigo muza! 13 Watukatuile gale mu gifutshi giakhalele giazala pha nu miliki nu wigi, ha guza gutufuisa mu mavu a luselenga. Ndaga yene yagutaganelego ba? Henyaha udi mutshigina nji gudibuisa fumu wakoma ha gututuameza ba?* 14 Uu nu luenyelu, khenji utubata mu gifutshi giazala pha nu miliki nu wigi nga gutuhana khapho dietu dia mahia nga dia gilanga gia vinyo. Udi mutshigina egi athu awa* akhale gugulandula gifua ifofo* ba? Tushigo getu muza ndo!”

15 Hene Moize wavuile khabu jiakola, wawambelele Yehowa egi: “Utshiginago milambu yawo ya mbuto. Ngazudilego nga phunda ya muthu, ngakalegelego nga muthu mumoshi mukatshi diawo gubola.”

16 Gungima wawambelele Kora egi: “Hamene iza nu athu agasue adi gu khanda yaye nu Alona gutuama dia Yehowa. 17 Muthu wagasue mbawuzangula longa dienji dia gubatela tshuya, mbawumba uhafu ha longa diene, gungima mbawuhaga longa diene dia tshuya gutuama dia Yehowa, malonga a gubatela tshuya 250; luholo lumoshi nji, aye nu Alona zangulenu muthu wagasue longa dienji dia gubatela tshuya.” 18 Muthu wagasue mukatshi diawo wazudile longa dienji dia gubatela tshuya, ambile tshuya nu uhafu mu malonga ene; gungima amaganele ha mufulo wa inzo ya tenta ya gudibungishila hamoshi nu Moize nu Alona. 19 Hamanesele Kora gubungisa athu akhalele gu khanda yenji ha mufulo wa inzo ya tenta ya gudibungishila anyi alumbugile Moize nu Alona, lutumbu lua Yehowa luamonegene gudi enya Isalele agasue.

20 Yehowa wawambelele Moize nu Alona egi: 21 “Katugenu mukatshi dia athu awa hagula nguashiye luenyelu.” 22 Hene afugamele phala mu mavu, azuelele egi: “Oo Nzambi, aye wana hana athu agasue monyo; mukunda natshi udi naye guhana athu awa agasue ndola mukunda nu gubola gua muthu mumoshi?”

23 Gungima Yehowa wawambelele Moize egi: 24 “Wambela enya Isalele egi: ‘Katugenu hehi nu tenta ya Kora nu ya Datana nu ya Abirame!’”

25 Moize wazugile, wayile gudi Datana nu Abirame. Akulu a gu Isalele ayile gumutuala. 26 Wawambelele enya Isalele egi: “Ngabuba, katugenu hehi nu tenta jia athu awa abola, mukuatshigo nga gima giawo gimoshi hagula mushiyiwago mukunda nu gubola guawo.” 27 Akatugile mbala imoshi gu khanda jiagasue jiakhalele hehi nu tenta ya Kora nu ya Datana nu ya Abirame. Gungima Datana nu Abirame azogele, amaganele ha mifulo ya tenta jiawo nu akaji’awo nu an’awo a mala nu an’awo azonda.

28 Gungima Moize wazuelele egi: “Ndaga iza mukalegewa mbayimikuatesa ha gujiya egi ngushigo mutshita ndaga eji jiagasue mu gutshigina guami, Yehowa wangutumi ha gujikalagala: 29 Gula athu awa afua gifua muana gufua athu agasue, gula ndola yawo nji idi gifua ndola ya athu agasue a ha mavu, mbayimonesa egi Yehowa gangutumilego. 30 Uvi gula Yehowa wakalagala ndaga ya gushimana mukunda nu athu awa, gula mavu akanguluga* a aminya nu ene nu ima yawo yagasue, gula abulumuga nu monyo mu Malumba,* ngenyi mbamujiya diago egi athu awa anemeselego Yehowa nga hazonda.”

31 Hamanesele Moize guzuela ndaga eji, mavu akangulugile mbala imoshi ha fundo diakhalele athu ene. 32 Mavu akangulugile,* a aminyile nu enya fami jiawo nu athu agasue akhalele nu Kora nu ima yawo. 33 Ene nu athu agasue akhalele nawo abulumugile nu monyo mu Malumba,* mavu a atshuigile; ngenyi atotele mukatshi dia enya Isalele. 34 Tangua avuile milolo ya athu akhalele mukaluga, enya Isalele agasue akhalele nawo hehi alengele, azuelele egi: “Mavu ajiya gutuminya nji nu esue!” 35 Gungima tshuya tuakatugile gudi Yehowa, tuakondele mala 250 akhalele muhana uhafu.

36 Gungima Yehowa wawambelele Moize egi: 37 “Wambela Eleazale mun’a nganga-nzambi Alona ha gukatula tshuya tudi mu malonga a gubatela tshuya, handaga adi a gijila. Muwambele nji ha gubishila tshuya tuene gualeha. 38 Malonga a gubatela tshuya a athu akalegele gubola anyi ashiyiwe mudi naye guabuisa inzanza ilalebe-lebe ya utadi. Gungima mudi naye guyikuatenesa gu giwotshielo handaga malonga ene abuile a gijila tangua a abatele gutuama dia Yehowa. Malonga ene mbaakhala gijiyishilo mukunda nu enya Isalele.” 39 Nganga-nzambi Eleazale wazanguile malonga a kuivre a gubatela tshuya a athu ahile tshuya, waabuishile inzanza ilalebe-lebe ha guyikuatenesa gu giwotshielo, 40 gifua luholo Yehowa wamuwambelele mu njila ya Moize. Ndaga yene yakhalele naye guwunguluisa enya Isalele egi muthu wagasue munu gahanewego njila,* yakotelesa egi munu gashigo mujigulu wa Alona, gashigo naye gusuena ha guwotshia uhafu gutuama dia Yehowa; yakhalele naye nji guawunguluisa egi nga muthu mumoshi gashigo naye gubua gifua Kora nu athu akhalele gu khanda yenji.

41 Hamene dienji, enya Isalele agasue asendesele guzuela ndaga jiabola mukunda nu Moize nu Alona egi: “Enue muashiyisa athu a Yehowa.” 42 Enya Isalele adibungishile ha gulumbugila Moize nu Alona; tangua abalumugile gu khanda ya inzo ya tenta ya gudibungishila, amonele egi tuta diatshuigile inzo ya tenta, lutumbu lua Yehowa luasendesele gumonega.

43 Moize nu Alona ayile gutuama dia inzo ya tenta ya gudibungishila. 44 Yehowa wawambelele Moize egi: 45 “Katugenu mukatshi dia athu awa hagula nguashiye mukut’awo agasue luenyelu.” Havuile ene ngenyi, afugamele phala mu mavu. 46 Moize wawambelele Alona egi: “Zula longa dia gubatela tshuya, zula tshuya gu giwotshielo, mba mu longa diene, mba nji uhafu muene, nda nadio phushi gudi enya Isalele, toga Yehowa ha guatotesela gubola guawo handaga muene udi nu khabu. Misongo yakola yasendesa gale gushiya athu!” 47 Alona wazudile mbala imoshi longa dia gubatela tshuya gifua muamuwambelele Moize, wayile phushi mukatshi dia enya Isalele handaga misongo yakola yakhalele yasendesa gale gushiya athu. Wambile uhafu mu longa dia gubatela tshuya, wasendesele gutoga Nzambi ha gutotesela athu gubola guawo. 48 Wamaganele hakatshi na katshi dia athu afuile nu athu akhalele nu monyo, gungima misongo yakola yabembele gushiya athu. 49 Athu afuile gu misongo yakola akhalele 14 700, katula anyi afuile mukunda nu Kora. 50 Tangua Alona wavutugile gudi Moize ha mufulo wa inzo ya tenta ya gudibungishila, misongo yakola yakhalele yahui gale.

17 Yehowa wawambelele Moize egi: 2 “Ta maga nu enya Isalele, wambela mafumu agasue a iphuta aguhane muhango wa giphuta nu giphuta, mihango yagasue idi naye gukhala 12. Gungima sonega jina dia muthu wagasue gu muhango wenji. 3 Udi naye gusonega jina dia Alona gu muhango wa giphuta gia Levi, handaga fumu wagasue wa giphuta udi naye gukhala nu muhango umoshi. 4 Haga mihango yene mu inzo ya tenta ya gudibungishila gutuama dia Mushete wa Gikotelo, fundo ngana gudimonesa gudi enue. 5 Muhango wa muthu mbangutomba, wene mbawuzola iyaji; ngenyi mbangumanesela ndaga jiabola jidi muzuela enya Isalele mukunda nu ame, jinyi adi muzuela nji mukunda nu enue.”

6 Hene Moize watele maga nu enya Isalele; mafumu a iphuta amuhanele mihango, fumu yagasue muhango umoshi, mihango yagasue yakhalele 12. Muhango wa Alona nji wakhalele mukatshi dia mihango yene. 7 Gungima Moize wahagele mihango yene gutuama dia Yehowa mu tenta yakhalele nu mushete wa Gikotelo.

8 Mu lusugu lualanduile, tangua Moize wanginyile mu tenta yakhalele nu mushete wa Gikotelo, wasangele muhango wa Alona mukunda nu giphuta gia Levi wazodi gale iyaji. Muhango wene wakhalele nu mayiji a mutshi wa amande nu iyaji nu mabundu a amande a guhia. 9 Gungima Moize wazanguile mihango yagasue yakhalele gutuama dia Yehowa, wayile nayo gudi enya Isalele agasue. Ayitalele, muthu wagasue wazanguile muhango wenji.

10 Gungima Yehowa wawambelele Moize egi: “Vutula muhango wa Alona gutuama dia mushete wa Gikotelo, mbamuwubamba gifua gijiyishilo mukunda nu athu ana khala nu khadilo dia gungulumbugila, hagula abembe guzuela ndaga jiabola mukunda nu ame nu afuigo.” 11 Moize wakalegele mbala imoshi ndaga jiamuwambelele Yehowa. Wakalegele diago ngenyi.

12 Enya Isalele awambelele Moize egi: “Henyaha tudi mufua! Yadiago, tudi mufua getu mukut’etu agasue! 13 Muthu wagasue udi musuena hehi nu inzo ya tenta ya Yehowa mbawufua! Mbatukhala mufua getu phamba ngenyi ba?”

18 Yehowa wawambelele Alona egi: “Gula athu ashiya mikhuala yatadila fundo dia gijila, aye nu an’aye nu ajigulu aye mbamubata ginemo gia gubola guene; uvi gula muashiya mikhuala yatadila mudimo wa nganga-nzambi aye nu an’aye mbamubata ginemo gia gubola guenu. 2 Tamega nji aphangi’aye a mu giphuta gia Levi, giphuta gia sh’aye, hagula aze gudi aye nu amikuatese aye nu an’aye ha gukalagala midimo gutuama dia tenta ya gijila idi nu Mushete wa Gikotelo. 3 Adi naye gutagenesa inemo yawo gudi aye nu mukunda nu inzo ya tenta yagasue. Uvi ashigo naye gusuena hehi nu ikadigilo ya ha fundo dia gijila nu giwotshielo hagula enue nu ene mufuigo. 4 Ene mbaaza gudi aye, mbaatagenesa inemo yawo mukunda nu inzo ya tenta ya gudibungishila nu mukunda nu midimo yagasue ya mu inzo ya tenta. Gula muthu gahanewego njila,* gajiyilego gusuena hehi nu enue. 5 Mudi naye gutagenesa inemo yenu mukunda nu fundo dia gijila nu giwotshielo, hagula nguvilago luko enya Isalele khabu. 6 Ame ngazanguile aphangi’enu enya Levi mukatshi dia enya Isalele ha gumihana nawo gifua khapho, ene ahanewe gudi Yehowa ha gukalagala mudimo wa mu inzo ya tenta ya gudibungishila. 7 Aye nu an’aye mudi nu ginemo gia gutshita mudimo wenu wa ginganga-nzambi gu giwotshielo nu ha fundo diabalega gijila,* enue mudi naye gutshita mudimo wene. Ngamihanyi mudimo wa ginganga-nzambi gifua khapho, muthu wagasue munu gahanewego njila* gula wasuena hehi udi naye gushiyiwa.”

8 Yehowa wawambelele luko Alona egi: “Ngaguhana ginemo gia gutala misomo yana hanewa mukunda nu ame. Aye nu an’aye ngamihana shinda mu ima yagasue ya gijila enya Isalele ana hana misomo, idi mukhuala wa ivo nu ivo. 9 Mukatshi dia milambu yabalega gijila yana kondewa ha tshuya, ima mudi naye guzula yenyeyi: milambu yagasue ana hana ikhale milambu ya mbuto nu milambu mukunda nu gubola nu milambu ya gulondega ndaga ana bata gudi ame, idi ima yabalega gijila mukunda nu aye nu mukunda nu an’aye. 10 Mbamuyidia ha fundo diabalega gijila. Mala agasue ajiya guyidia, mbayikhala ima yabalega gijila mukunda nu aye. 11 Ima eyi nji idi yaye: bakado enya Isalele ana hana hamoshi nu milambu yawo yagasue ya guhunga. Ngahanyi ima yene gudi aye nu gudi an’aye a mala nu gudi an’aye akhetu, idi mukhuala wa ivo nu ivo. Muthu wagasue udi waphelegeta mu inzo yaye wajiya guyidia.

12 “Ngaguhana nji ima eyi: maji agasue abalega gubonga nu matombe agasue ahe-ahe abalega gubonga nu mbuto, yakotelesa mbuto jia thomo enya Isalele ana hana gudi Yehowa. 13 Mabundu agasue a thomo a mu gifutshi giawo mbaahana gudi Yehowa mbaabua aye. Muthu wagasue udi waphelegeta mu inzo yaye wajiya guadia.

14 “Gima giagasue ahanyi* Nzambi gu Isalele mbagibua giaye.

15 “Somi ya ima yagasue idi nu monyo inyi enya Isalele mbaahana Yehowa, ikhale muthu nga shitu mbayibua yaye. Uvi udi naye gubemba egi, ana a somi a athu nu ana a somi a shitu jia usala asumbiwe luko. 16 Gula mona muene udi nu mbeji imoshi uu nu holu, udi naye gubemba egi asumbiwe luko nu ndando yahagewe. Bashekele* thano a utadi wa siliva mu gudivua nu shekele ana kalegela ha fundo dia gijila. Shekele imoshi idi bagera* 20. 17 Uvi somi yagasue ya mulume ya ngombe nga ya gimeme nga ya khombo ishigo naye gusumbiwa luko. Idi ima ya gijila. Udi naye gunianga mahatshi ayo holu dia giwotshielo, maji ayo udi naye guakonda ha guzola mishi gifua mulambu wakondewa ha tshuya, ha guzola vumba diabonga mukunda nu Yehowa. 18 Mbiji ya shitu jiene mbayibua yaye. Gifua githulo-thulo gia mulambu wa guhunga nu kulu dia madia. 19 Misomo yagasue enya Isalele mbaahana Yehowa, ngayihana gudi aye nu gudi an’aye a mala nu gudi an’aye a akhetu. Idi mukhuala wa ivo nu ivo. Idi gikotelo gia mayilago* gutuama dia Yehowa mukunda nu aye nu ajigulu aye.”

20 Yehowa wawambelele luko Alona egi: “Aye mbawushigo muheta khapho mu gifutshi giawo, mbawushigo nji muheta nga gitshinyi gimoshi gia mavu mukatshi diawo. Ame ngudi shinda diaye, ngudi khapho diaye mukatshi dia enya Isalele.

21 “Uvi ana a Levi ngaahana giakumi giagasue gu Isalele gifua khapho mukunda nu mudimo ana kalagala, mudimo wa mu inzo ya tenta ya gudibungishila. 22 Enya Isalele ajiyilego gusuena hehi nu inzo ya tenta ya gudibungishila, gula ndo mbaatshita gubola nu mbaafua. 23 Phamba enya Levi adi naye gutshita mudimo wa mu inzo ya tenta ya gudibungishila, ene adi naye gubata ginemo gia gubola guawo. Ashigo naye guheta shinda dia mavu mukatshi dia enya Isalele. Udi mukhuala wa ivo nu ivo mu indongo yenu yagasue. 24 Handaga enya Levi ngaahanyi giakumi gia misomo enya Isalele ana hana Yehowa, yene shinda diawo. Gishina giene ngaawambela egi: ‘Mukatshi dia enya Isalele ene mbaashigo muheta shinda dia mavu.’”

25 Gungima Yehowa wawambelele Moize egi: 26 “Udi naye guwambela enya Levi egi, ‘tangua enya Isalele mbaamihana giakumi gia ima yawo ngamihanyi gifua khapho dienu, enue nji mudi naye guzula giakumi mu ima yene ha guhana musomo gudi Yehowa. 27 Musomo wenu mbawukhala gifua mbuto jiakatuga ha fundo dia gusuwila* mbuto nga vinyo yavula nga maji muazodi. 28 Ngenyi enue nji mbamuhana musomo gudi Yehowa mu giakumi giagasue gia misomo mbamuzula gudi enya Isalele. Mbamuzula musomo mu giakumi giene ha guhana nganga-nzambi Alona mukunda nu Yehowa. 29 Mu bakado agasue abalega gubonga mbaamihana gifua gima gia gijila, mbamuhana Yehowa misomo ya maluholo agasue.’

30 “Udi naye guawambela egi, ‘gula mukatshi dia ima yene muahana musomo wa ima yabalega gubonga, ngenyi misomo ya enya Levi mbayikhala gifua mbuto jiakatuga ha fundo dia gusuwila mbuto nga vinyo nga maji muazodi. 31 Enue nu enya fami jienu muajiya gudia ima yene ha fundo diagasue muatshigina, handaga idi lufuto luenu mukunda nu mudimo muana tshita mu inzo ya tenta ya gudibungishila. 32 Gula mudi muhana ima yabalega gubonga mu ima yana gumihana enya Isalele, mbamushigo mutshita gubola. Mushigo naye gusegulula ima ya gijila ya enya Isalele hagula mufuigo.’”

19 Yehowa watele luko maga nu Moize nu Alona, waawambelele egi: 2 “Wuwu mukhuala wahanyi Yehowa: ‘Wambela enya Isalele egi adi naye guzula ngombe yabenga ishigo nu ginonga* gu muila nga nu ditona inyi khenji ahagelego muhitu. 3 Mbamuyihana nganga-nzambi Eleazale, muene mbawuyizola gonze ya phundo nu mbayishiyiwa ha meso enji. 4 Gungima nganga-nzambi Eleazale mbawuzula ndambo ya mahatshi ayo nu muno wenji, mbawunianga mahatshi ene mbala 7 gu khanda ya mufulo wa inzo ya tenta ya gudibungishila. 5 Mbaakonda ngombe yene tshuya ha meso enji. Mbaakonda gilema giayo, misunyi yayo nu mahatshi ayo nu tuji tuayo. 6 Nganga-nzambi mbawuzula mutshi wa sedre nu hisophe nu mulele wabenga, mbawuyimba ha tshuya fundo ngombe yene idi muhia. 7 Gungima nganga-nzambi mbawuweva milele yenji nu mbawuzua meya, gungima dienji wajiya guvutuga giwa mu phundo; uvi mbawukhala usala uu nu mu ngueze.

8 “‘Muthu wakondji ngombe yene mbawuweva milele yenji nu mbawuzua meya, mbawukhala usala uu nu mu ngueze.

9 “‘Muthu udi waphelegeta mbawuzula fuphi ya ngombe yakondewa tshuya, mbawuyihaga gonze ya phundo ha fundo diaphelegeta. Enya Isalele agasue adi naye guyibamba, mbaayikalegela ha gulondega meya a gudiphelegetesa. Idi mulambu mukunda nu gubola. 10 Muthu wazudi fuphi ya ngombe yene, mbawuweva milele yenji mbawukhala usala uu nu mu ngueze.

“‘Mbayikhala mukhuala wa ivo nu ivo mukunda nu enya Isalele nu ngenji udi mukhala mukatshi diawo. 11 Muthu wagasue wakuata kimbi gia muthu, mbawukhala usala masugu 7. 12 Muthu muene mbawudiphelegetesa nu meya* mu lusugu lua thathu, ngenyi mu lusugu lua 7 mbawukhala waphelegeta. Uvi gula gadiphelegeteselego mu lusugu lua thathu, mu lusugu lua 7 mbawukhala usala. 13 Muthu wagasue mbawukuata kimbi gia muthu,* gula gadiphelegeteselego, mbawubuisa inzo ya tenta ya Yehowa usala; muthu* muene udi naye gushiyiwa.* Mbawulandula gukhala usala handaga amuniangelego meya a gudiphelegetesa.

14 “‘Owu mukhuala mbamulandula gula muthu wafua mukatshi dia tenta: Muthu wagasue mbawungina mu tenta yene nga muthu wagasue udi mu tenta yene, mbawukhala usala masugu 7. 15 Gima giagasue gidi gishigo gia gutshuiga muabonga* nu munogo gidi gia usala. 16 Gula muthu udi mu temu wakuata muthu wafui gu phogo ya khusa nga kimbi nga ifuwa ya muthu nga malumba, mbawukhala usala masugu 7. 17 Ha guphelegetesa muthu udi usala, mudi naye guzula ndambo ya fuphi ya mulambu mukunda nu gubola wawotshiewa muyimbi mu longa, gungima mumbi meya a gu mudidi* mukatshi. 18 Gungima muthu udi waphelegeta mbawuzula hisophe, gayimbi mu meya, ganiangi meya ene mu tenta nu mu ima yagasue idi muene nu gudi athu* akhadi ha fundo diene nu gudi muthu wakuatshi ifuwa nga muthu washiyiwa nga kimbi nga malumba. 19 Muthu udi waphelegeta mbawuniangela muthu udi usala meya ene mu lusugu lua thathu nu mu lusugu lua 7. Mbawumuphelegetesa mu gubola guenji mu lusugu lua 7. Gungima muthu muene mbawuweva milele yenji mbawuzua meya, mu ngueze mbawubua waphelegeta.

20 “‘Uvi gula muthu* udi usala, muene nu gudiphelegetesa ndo, udi naye gushiyiwa,* handaga wabolesa fundo dia gijila dia Yehowa. Amuniangelego meya a gudiphelegetesa, ngenyi udi usala.

21 “‘Wuwu mukhuala wa ivo nu ivo mukunda nu ene: Muthu waniangi meya a gudiphelegetesa udi naye guweva milele yenji. Uvi muthu wakuatshi meya a gudiphelegetesa, mbawukhala usala uu nu mu ngueze. 22 Gula muthu udi usala wakuata gima, gima giene mbagibua nji usala. Muthu* mbawukuata gima giene, mbawukhala usala uu nu mu ngueze.’”

20 Mu mbeji ya thomo, enya Isalele agasue ahetele mu mavu a luselenga a Sine, asendesele gukhala gu Kadeshe. Miriame wafuidile guene, guene nji amufundjile.

2 Meya akhalelego ha fundo diene, hene enya Isalele agasue adibungishile ha gulumbugila Moize nu Alona. 3 Athu akhalele mumanesa Moize, akhalele muzuela egi: “Gula nga tuafuile getu tangua aphangi’etu afuile gutuama dia Yehowa! 4 Mukunda natshi muabatshi athu a Yehowa mu mavu awa a luselenga? Muatubatshi hagula esue nu shitu jietu tufue? 5 Mukunda natshi muatuzodi gu Ejipitu ha gutubata ha fundo edi diabola? Gushigo nu fundo dia gukuna mbuto, gushigo nji nu mitshi ya figi nga ya vinyo nga mitshi ya grenade, gushigo nji nu meya a gunua ha fundo edi. 6 Gungima Moize nu Alona akatugile gutuama dia enya Isalele agasue, ayile ha mufulo wa inzo ya tenta ya gudibungishila, ashiwugile phala mu mavu. Lutumbu lua Yehowa luasendesele gumonega gudi ene.

7 Gungima Yehowa wawambelele Moize egi: 8 “Zula muhango, aye nu phangi’aye Alona bungisenu enya Isalele agasue muwambele seso ha meso awo hagula dizole meya. Udi naye guzola meya mu seso diene, uhane enya Isalele ha gunua nu shitu jiawo.

9 Hene Moize wazudile muhango wakhalele gutuama dia Yehowa gifua luholo luamuwambelele muene. 10 Gungima Moize nu Alona atamegele enya Isalele agasue ha guza gutuama dia seso, a awambelele egi: “Enue enya gulumbuga tegelelenu! Tudi naye gumizolela meya mu seso edi ba? 11 Gungima Moize wathuphuile koko, wawasele seso mbala mbadi nu muhango wenji; meya avula azogele, enya Isalele asendesele gunua nu shitu jiawo.

12 Gungima Yehowa wawambelele Moize nu Alona egi: “Luholo muamoneselego gutshigina gudi ame nu muangutumbuishilego ha meso a enya Isalele, mbamushigo mubata athu awa mu gifutshi mbanguahana.” 13 Fundo meya ene azogele diatamegewe egi Meriba,* fundo enya Isalele amanesele Yehowa, muene waamonesele egi udi Nzambi wa gijila.

14 Hakhalele ene gu Kadeshe, Moize watumile athu ha guya muwambela fumu wa gu Edome egi: “Phangi’aye Isalele wazuela egi: ‘Udi mujiya muabonga malamba agasue tuataganele nawo. 15 Akhakh’etu ayile gu Ejipitu, tuakhalele guene ivo* yavula, enya Ejipitu atumonesele lamba nu akhakh’etu. 16 Gungima tuadidile gudi Yehowa, muene wavuile gudila guetu, watumine muanjelo, watuzolele gu Ejipitu, henyaha tudi gu Kadeshe, dimbo didi mu mudidilo wa mavu aye. 17 Tuabuba, tubembe tubalegele mu mavu aye. Mbatugisho mubalegela mu mahia nga mu ilanga ya mitshi ya vinyo, mbatushigo nji munua meya nga a wina dimoshi. Mbatubalega phamba mu Njila ya Fumu, mbatushigo muya nga gu koko dia madia nga dia mahidi uu nu tangua mbatubalega mu mavu aye.’”

18 Uvi Edome wamuwambelele egi: “Mushigo mubalega mu mavu etu. Gula ndo, mbanguza gumitagana nu phogo ya khusa.” 19 Enya Isalele amuvutuile egi: “Mbatubalegela getu mu njila yakoma, gula esue nga shitu jietu tuanua meya aye, mbatufuta mukunda nu meya ene. Tushigo nu funu ya gima giko, tudi mutoga phamba njila ha gubalega mu gifutshi giaye.” 20 Uvi muene wazuelele egi: “Mushigo mubalega.” Edome wayile guatagana nu athu avula nu masuta a ngolo.* 21 Edome watunyile guhana Isalele njila ha gubalega mu mavu enji; hene Isalele wayidile mu njila iko.

22 Enya Isalele agasue akatugile gu Kadeshe, ahetele gu Mulundu wa Hola. 23 Gungima Yehowa wawambelele Moize nu Alona gu Mulundu wa Hola mu mudidilo wa mavu a Edome egi: 24 “Alona mbawufua, mbaamufunda gifua luholo afundjile akhakh’enji.* Mbagashigo mungina mu gifutshi mbanguhana enya Isalele, handaga muyadi enu muatumagelego ndaga ngamiwambelele mukunda nu meya a gu Meriba. 25 Zula Alona nu mun’enji Eleazale ukanduge nawo gu mulundu wa Hola. 26 Gungima ukatule Alona milele yenji, uyisudige mun’enji Eleazale. Alona mbawufuila guene.”*

27 Moize watshitshile gifua muamuwambelele Yehowa, akandugile gu Mulundu wa Hola ha meso a enya Isalele agasue. 28 Gungima Moize wakatudile Alona milele, wayisudigile mun’enji Eleazale. Alona wafuile guene holu dia mulundu. Gungima Moize nu Eleazale akatugile gu mulundu, abulumuga. 29 Tangua enya Isalele amonele egi Alona wafua, mukut’awo agasue amudidile masugu 30.

21 Tangua fumu wa gu Alada muenya gu Kanana, munu wakhalele mujinga gu Negebe wavuile egi enya Isalele ajila mu njila ya Atalima, waaluishile, wakuatele enya Isalele ako wayile nawo. 2 Hene enya Isalele adilogele gudi Yehowa egi: “Gula wahana athu awa ha mago etu, mbatushiya diago membo awo.” 3 Yehowa wavuile ndaga yamutogele enya Isalele, wahanele enya Kanana ha mago awo; enya Isalele ashiyile athu ene nu membo awo. Hene ahanele fundo diene jina egi Holema.*

4 Tangua akatugile gu Mulundu wa Hola, hakhalele ene muyila mu njila ya Kianga Giabenga ha gukondomoga mavu a Edome, athu* asendesele guhuila mukunda nu guwenda. 5 Athu akhalele muzuela ndaga jiabola mukunda nu Nzambi nu Moize egi: “Mukunda natshi muatuzolele gu Ejipitu? Muatuzolele hagula tuze tufue mu mavu a luselenga? Gushigo nu ima ya gudia nga meya, dipha edi diabola diatusegela getu.”* 6 Hene Yehowa watumidile enya Isalele nioga jia malengo-lengo,* jiasendesele guasuma; athu avula afuile.

7 Athu ayile gudi Moize, amuwambelele egi: “Tuatshitshi gubola luholo tuazuedi ndaga jiabola mukunda nu Yehowa nu mukunda nu aye. Bubila Yehowa hagula akatule nioga mukatshi dietu.” Moize wabubidile Nzambi mukunda nu athu. 8 Yehowa wawambelele Moize egi: “Londa nioga ya malengo-lengo uyihage gu mutshi. Gula nioga yasuma muthu, muthu muene udi naye gutala nioga idi gu mutshi hagula gafuigo.” 9 Moize walondele mbala imoshi nioga ya kuivre, wayihagele gu mutshi; tangua nioga yakhalele musuma muthu, gula muthu muene watala nioga ya kuivre, gakhalelego mufua.

10 Gungima enya Isalele akatugile, ayile muhaga phundo gu Obote. 11 Gungima akatugile gu Obote, ayile muhaga phundo gu Ye-Abalima mu mavu a luselenga adi ha sambua dia Moaba, gu khanda ya mazogelo a kumbi. 12 Akatugile ha fundo diene, ayile muhaga phundo mu baba dia Zelede. 13 Akatugile hene, ayile muhaga phundo gu khanda ya Alenona, mu mavu a luselenga adi musendesa mu mudidilo wa enya Amole, handaga Alenona udi mudidilo udi hakatshi dia Moaba nu enya Amole. 14 Gishina giene mukanda wa ita wa Yehowa wana zuelela “Vaheba ya gu Sufa, nu mababa a Alenona, 15 nu mababa adi mubulumuga uu nu gu khanda ya dimbo dia Ale adi muya uu nu gu mudidilo wa Moaba.”

16 Gungima ayile gu Bele, guene guakhalele wina dia meya, fundo Yehowa wawambelele Moize egi: “Bungisa athu hagula nguahane meya.”

17 Mu tangua diene, enya Isalele ayimbile lungimbo elu:

“Oo wina, zola meya! Yimbilenu wina diene!

Gungima akatugile mu mavu a luselenga, ayile gu Matana, 19 akatugile gu Matana, aya gu Nahaliele, akatugile gu Nahaliele, aya gu Bamote; 20 akatugile gu Bamote, ayile mu baba didi mu mavu* a Moaba, holu dia Phisega inyi yana monega gu Yeshimona.*

21 Gungima enya Isalele atumine athu ha guya muwambela Sihona fumu wa enya Amole egi: 22 “Tubembe tubalegele mu mavu aye. Mbatushigo mubalegela mu mahia nga mu ilanga ya mitshi ya vinyo. Mbatushigo nji munua nga meya a wina dimoshi. Mbatuwenda phamba mu Njila ya Fumu uu nu tangua mbatubalega mavu aye.” 23 Uvi Sihona gahanelego enya Isalele njila ha gubalega mu mavu enji. Wabungishile athu enji, ayile ha guluisa enya Isalele mu mavu a luselenga, gungima ahetele gu Yahase, asendesele gulua nu enya Isalele. 24 Uvi enya Isalele amubingile nu phogo ya khusa, atambuile mavu enji sendese gu Alenona uu nu gu Yaboke hehi nu enya Amona, handaga Yazele idi mu mididilo ya enya Amona.

25 Enya Isalele atambudile membo ene agasue, asendesele gukhala mu membo agasue a enya Amole, gu Heshebona nu mu membo enji agasue a hehi. 26 Heshebona yakhalele dimbo dia Sihona fumu wa enya Amole, munu waluile nu fumu wa gu Moaba nu wamutambudile gifutshi gienji giagasue uu nu gu Alenona. 27 Ndaga yene, yazolele gishima gia gusegulula giana zuela egi:

“Izenu gu Heshebona.

Dimbo dia Sihona ditungiwe, dijigamesewe.

28 Handaga tshuya tuazogele gu Heshebona, tshuya tuakatugile mu dimbo dia Sihona.

Tuakondele Ale wa gu Moaba, tuakondele mafumu a gu tumilundu tua Alenona.

29 Lamba diaye Moaba! Mbawushiyiwa, Oo enue athu a gu Kemoshe!

An’enji a mala alengele gifutshi mukunda nu muene, an’enji a akhetu akuatewe mu bologo gudi Sihona, fumu wa enya Amole.

31 Enya Isalele asendesele gukhala mu mavu a enya Amole. 32 Gungima Moize watumile athu ha guya mutala dimbo dia Yazele. Atambudile membo enji a hehi, akayele enya Amole akhalele muene. 33 Gungima dienji akondomogele, ayidile mu njila ya gu Bashana. Fumu Oga wa gu Bashana wajile nu masuta enji agasue ha gualuisa gu Edeleyi. 34 Yehowa wawambelele Moize egi: “Umuvuilago woma handaga mbangumuhana nu masuta enji agasue nu gifutshi gienji ha mago aye, mbawumutshita gifua luholo watshitshile Sihona, fumu wa enya Amole wakhalele gu Heshebona.” 35 Amushiyile nu an’enji nu masuta enji agasue, nga muthu mumoshi gasalelego nu monyo; atambudile nji gifutshi gienji.

22 Enya Isalele akatugile, ayile muhaga phundo yawo mu mavu a luselenga a Moaba ha sambua dia Muta wa Yordane, gu khanda ya Yeliko. 2 Balaka mun’a Siphola wamonele ndaga jiagasue enya Isalele atshitshile enya Amole, 3 enya Moaba asendesele guvua woma wavula mukunda nu enya Isalele handaga enya Isalele akhalele avula; yadiago, enya Moaba asendesele guavuila woma wavula diago. 4 Moaba wawambelele akulu a gu Madiana egi: “Athu awa avula mbaadia ima yagasue idi hehi nu esue gifua luholo ngombe yana gudia muangu mu mahia.”

Mu tangua diene, Balaka mun’a Siphola wakhalele fumu wa gu Moaba. 5 Watumine athu gudi Balama mun’a Beole gu Petole idi hehi nu Muta* mu gifutshi giavualewe muene. Wamutamegele ha guza, wazuelele egi: “Gudi nu athu azoga gu Ejipitu. Azala pha ha mavu,* aza mukhala haha gutuama diami. 6 Henyaha ngabuba, iza ungutele athu ene mukumbu, handaga adi nu ngolo jiavula gungubalega ame. Ngenyi ngajiya guabinga, nguakaye mu gifutshi, handaga ngudi mujiya egi gula wasuanguluisa muthu, muene wana khala nu gusuanguluga, uvi gula wata muthu mukumbu, wana gumukuata.”

7 Akulu a gu Moaba nu a gu Madiana ayile gudi Balama nu ima ana hana ha guphonga, amuwambelele ndaga jiazuelele Balaka. 8 Balama waawambelele egi: “Bandenu haha, mbangumiwambela ndaga yagasue mbayinguwambela Yehowa.” Hene mafumu a gu Moaba abandele gumbo dienji.

9 Gungima Nzambi wajile gudi Balama, wamuhudile egi: “Awa akuatshi adi gumbo diaye?” 10 Balama wawambelele Nzambi wa giamatshidia egi: “Balaka mun’a Siphola, fumu wa gu Moaba wangutumila mbimbi egi: 11 ‘Athu anyi azogi gu Ejipitu, azala pha ha mavu.* Iza ungutele nawo mukumbu. Mbala iko ngajiya gualuisa hagula nguakaye.’” 12 Uvi Nzambi wawambelele Balama egi: “Uyigo nawo. Ushigo naye guta enya Isalele mukumbu handaga adi athu ngasuanguluishile.”

13 Balama wazugile mu gimenegena, wawambelele mafumu atumine Balaka egi: “Vutugenu mu gifutshi gienu handaga Yehowa wangutunyisa ha guya n’enu.” 14 Hene mafumu a gu Moaba ayile, avutugile gudi Balaka, amuwambelele egi: “Balama watuna guza nu esue.”

15 Uvi Balaka watumine luko mafumu ako avula, anyi akhalele nu lutumbu luavula gubalega anyi a thomo. 16 Ayile gudi Balama amuwambelele egi: “Balaka mun’a Siphola wazuela egi: ‘Ngabuba, ubembigo egi nga gima gimoshi gigukange njila ha guza gudi ame, 17 handaga mbanguguhana lutumbu luavula, mbangutshita nji ndaga yagasue mbawunguwambela ha gutshita. Ngabuba, iza ungutele athu awa mukumbu.’” 18 Uvi Balama wawambelele enya mudimo a Balaka egi: “Ikhale Balaka wanguhana inzo yenji yaguzala pha nu utadi wa siliva nu wolo, ngajiyilego gutshita nga ndaga imoshi, ikhale yakoma nga yazonda, inyi ishigo gudivua nu ndaga yanguwambela Yehowa Nzambi wami. 19 Uvi enue nji bandenu haha mangino ha gujiya gula Yehowa uza gunguwambela ndaga iko.”

20 Gungima Nzambi wajile gudi Balama mu phipha, wamuwambelele egi: “Gula mala awa aji ha gugutamega, nda nawo. Uvi mbawuzuela phamba ndaga mbanguguwambela.” 21 Hene Balama wazugile mu gimenegena, walondele phunda yenji,* wayile nu mafumu a gu Moaba.

22 Uvi Nzambi wavuile khabu jiakola luholo Balama wayile, hene muanjelo wa Yehowa wamaganene mu njila ha gumukanga njila. Balama wakhalele muya holu dia phunda yenji, wakhalele nji nu enya mudimo enji mbadi. 23 Tangua phunda yamonele muanjelo wa Yehowa wagumagana mu njila nu phogo ya khusa ha koko dienji, yakambela gukatuga mu njila ha gungina mu dihia. Uvi Balama wasendesele gubeta phunda hagula ivutuge mu njila. 24 Gungima muanjelo wa Yehowa wamaganele mu njila yazonda yakhalele hakatshi dia mitshi ya vinyo mbadi, khanda nu khanda yakhalele nu gibayi gia maseso. 25 Tangua phunda yamonele muanjelo wa Yehowa, yasendesele gudibanjiginya gu gibayi, yabanjiginyile nji kulu dia Balama gu gibayi; hene Balama wasendesele guyibeta luko.

26 Muanjelo wa Yehowa wabalegele luko, wamaganele mu njila yazonda fundo diakhalelego nu luholo lua gubalumuga nga gu koko dia madia nga gu koko dia mahidi. 27 Tangua phunda yamonele muanjelo wa Yehowa, yakhalele hashi; Balama wavuile khabu, walanduile guyibeta nu muhango wenji. 28 Gu gisugishilo, Yehowa watshitshile egi phunda yene izuele,* yawambelele Balama egi: “Itshi ngagutshitshi hagula unguwase mbala thathu?” 29 Balama wavutudile phunda yene egi: “Handaga udi gungukenesa. Gula nga ngudi nu phogo ya khusa ha mago, nga ngudi gugushiya!” 30 Phunda yawambelele Balama egi: “Ame ngushigo phunda wana wendela monyo waye wagasue uu nu mangino ba? Ngagukalegele gale ndaga ya luholo elu ba?” Muene wayivutudile egi: “Ndo!” 31 Gungima Yehowa wakangudile meso a Balama, wamonele muanjelo wa Yehowa wakhalele wagumagana mu njila nu phogo ya khusa ha mago. Balama wafugamele mbala imoshi, washiwugile phala mu mavu.

32 Muanjelo wa Yehowa wamuhudile egi: “Mukunda natshi wawashi phunda yaye mbala thathu? Tala! Ame ngaji ha gugukanga njila, handaga njila yaye ishigo gudivua nu gutshigina guami. 33 Phunda yangumonyi, hene yakambi gungulenga mu mbala jiene thathu. Gula nga yangulengelego, ngakhala naye gugushiya, ngubembi phunda yene nu monyo.” 34 Balama wawambelele muanjelo wa Yehowa egi: “Ngatshita gubola handaga ngajiyilego egi aye wamagana mu njila ha gungutagana. Henyaha gula ndaga yene idi yabola gu meso aye, ngudi muvutuga gami.” 35 Uvi muanjelo wa Yehowa wawambelele Balama egi: “Nda nu athu ene, uvi mbawuzuela phamba ndaga mbanguguwambela.” Hene Balama wayile nu mafumu atumine Balaka.

36 Tangua Balaka wavuile egi Balama yowu muza, wayile mbala imoshi ha gumutagana mu dimbo dia Moaba didi gu khanda ya Alenona mu mudidilo wa mavu. 37 Balaka wawambelele Balama egi: “Ngatumine athu ha guza gugutamega, mukunda natshi watunyile guza? Watangijile egi ame ngajiyilego guguhana lutumbu luavula ba? 38 Balama wawambelele Balaka egi: “Ame owu, ngaji gale. Uvi ngahanewego njila ha guzuela nga ndaga imoshi. Mbanguzuela phamba ndaga jinyi Nzambi mbawunguwambela ha guzuela.”*

39 Balama wayile nu Balaka, ahetele gu Kiriyate-Husota. 40 Balaka washiyile ngombe nu imeme, wajihanele mulambu; ndambo iko watumidile Balama nu mafumu akhalele n’enji. 41 Mu gimenegena, Balaka wazudile Balama, wakandugile n’enji gu Bamota-Bale; diene fundo Balama wakhalele nu luholo lua gumona athu agasue.

23 Gungima Balama wawambelele Balaka egi: “Tunga iwotshielo 7 ha fundo edi, ngushiyile ngombe 7 jia milume nu imeme 7 ya milume. 2 Balaka wakalegele mbala imoshi gifua muazuelele Balama. Gungima Balaka nu Balama azanguile ngombe ya mulume nu gimeme gia mulume, ahanele mulambu ha iwotshielo yagasue. 3 Balama wawambelele Balaka egi: “Aye sala haha hehi nu mulambu waye wa guwotshia, ame ngaya. Mbala iko Yehowa uza muta maga nu ame. Nguza guguwambela ndaga yagasue iza gunguwambela muene.” Balama wayile gu songi ya gamulundu.

4 Gungima Nzambi watele maga nu Balama, Balama wamuwambelele egi: “Ngatungi iwotshielo 7 mu ndonga, ngahanyi nji ngombe ya mulume nu gimeme gia mulume ha iwotshielo yagasue.” 5 Yehowa wawambelele Balama mbimbi jiaguwambela Balaka. Wamuwambelele egi: “Vutuga gudi Balaka, muwambele ndaga ngaguwambela ha guzuela.” 6 Balama wavutugile, wasangele Balaka nu mafumu agasue a gu Moaba a gumagana hehi nu mulambu wenji wa guwotshia. 7 Gungima watele gishima egi:

‘Iza ungutele ajigulu a Yakoba mukumbu.

Ayi, iza usegulule enya Isalele.’

 8 Luholo lutshi ngajiya guta mukumbu gudi athu anyi Nzambi gatelego mukumbu?

Luholo lutshi ngajiya gusegulula athu Yehowa gaseguluilego?

10 Nanyi wajiya gutanga ajigulu a Yakoba adi avula gifua fuluguta dia mavu?

Nanyi wajiya gutanga nga giene gitshinyi gimoshi mukatshi dia itshinyi nguana ya enya Isalele?

11 Gungima Balaka wawambelele Balama egi: “Itshi wangutshita? Ngagutamega ha guta mbalagaji jiami mukumbu, uvi henyaha aye udi guashimbiga.” 12 Muene wamuvutudile egi: “Ngudi muzuela phamba ndaga jinyi Yehowa wanguwambela ha guzuela.”

13 Balaka wamuwambelele egi: “Ngabuba, iza tuye ha fundo diko hagula wajiya guamona. Ushigo guamona mukut’awo agasue uvi uza mumona phamba ndambo mukatshi diawo; ngutele nawo mukumbu ha fundo diene.” 14 Wamubatele mu dihia dia Sofime gu songi ya Phisega, gungima watungile iwotshielo 7, wahanele ngombe ya mulume nu gimeme gia mulume ha iwotshielo yagasue. 15 Balama wawambelele Balaka egi: “Aye sala haha hehi nu mulambu waye wa guwotshia tangua nguya muta maga nu Nzambi gunu.” 16 Yehowa watele maga nu Balama, wamuwambelele mbimbi jiaguwambela Balaka. Wamuwambelele egi: “Vutuga gudi Balaka, muwambele ndaga ngaguwambela ha guzuela.” 17 Hene Balama wavutugile, wamusangele yowu munengenena hehi nu mulambu wenji wa guwotshia, mafumu a gu Moaba akhalele n’enji. Balaka wamuhudile egi: “Yehowa wazuela egi itshi?” 18 Gungima Balama watele gishima egi:

“Balaka zuga, tegelela.

Oo mun’a Siphola, ngutegelele.

Gula muene wazuela ndaga imoshi, mbagashigo guyitagenesa ba?

Gula wazuela, mbagashigo guyikalagala ba?

22 Nzambi waazolele gu Ejipitu.

Muene udi gifua mbinga jia ngombe yakoma ya mulume mukunda nu ene.

Henyaha ajiya guzuela mukunda nu Yakoba nu enya Isalele egi:

‘Talenu ndaga Nzambi wakalagala!’

25 Balaka wawambelele Balama egi: “Gula wajiyilego guata mukumbu, waashimbigago nji.” 26 Balama wavutudile Balaka egi: “Ngaguwambela egi mbangutshita ndaga yagasue mbayizuela Yehowa.”

27 Balaka wawambelele Balama egi: “Ngabuba, iza tuye ha fundo diko. Mbala iko Nzambi wa giamatshidia wajiya gutshigina egi ungutele nawo mukumbu guene.” 28 Balaka wayile nu Balama gu songi ya Pheole, fundo diana monega Yeshimona.* 29 Gungima Balama wawambelele Balaka egi: “Tunga iwotshielo 7 ha fundo edi, ngushiyile ngombe 7 jia milume nu imeme 7 ya milume.” 30 Balaka wakalegele gifua muazuelele Balama, wahanele ngombe ya mulume nu gimeme gia mulume ha iwotshielo yagasue.

24 Tangua Balama wakotelesele egi Yehowa wakhalele genji mutshigina* gushimbiga enya Isalele, gayilego luko mukamba* gujiya gula ndaga yabola mbayibuila enya Isalele; uvi wabalumugile, watalele mu mavu a luselenga. 2 Tangua Balama wathuphudile meso, wamonele egi enya Isalele ahagi phundo yawo mu giphuta nu giphuta, wahetele nyuma ya Nzambi. 3 Gungima watele gishima egi:

10 Gungima Balaka wavuidile Balama khabu jiakola. Wabundjile giphuphu, wawambelele Balama egi: “Ngagutamega haha ha guta mbalagaji jiami mukumbu, uvi aye waashimbiga mbala thathu. 11 Henyaha vutuga gumbo diaye. Ngatshigina guguhana lutumbu luavula, uvi Yehowa wagukanga njila ha guheta lutumbu luene.”

12 Balama wavutudile Balaka egi: “Ngawambelele athu watumile egi: 13 ‘Ikhale Balaka wanguhana inzo yenji yaguzala pha nu utadi wa siliva nu wolo, ngajiyile ndo gutshita nga ndaga imoshi mu gutshigina guami hakhami, ikhale yabonga nga yabola, inyi ishigo gudivua nu ndaga yanguwambela Yehowa. Mbanguzuela phamba ndaga Yehowa mbawunguwambela.’ 14 Henyaha ngudi muvutuga gami gudi akuaku’ami. Iza nguguwambele ndaga athu awa mbaatshita athu aye mu masugu adi muza.”* 15 Gungima Balama watele gishima egi:

20 Hamonele muene Amaleke, walanduile guta gishima egi:

21 Hamonele muene enya Kena, walanduile guta gishima egi:

“Inzo yaye idi mu ubambi, fundo diaye dia gukhala didi holu dia seso.

22 Uvi muthu mumoshi mbawukonda Kaine tshuya.

Masugu guvula gutshi asala hagula enya Asiliya agubate mu uhiga?”

23 Walanduile guta gishima egi:

“Idi lamba! Nanyi mbawusala nu monyo tangua Nzambi mbawutshita ndaga eyi?

Uvi muene nji mbawushiyiwa diago.”

25 Gungima Balama wavutugile gumbo dienji. Balaka nji wayile genji.

25 Tangua enya Isalele akhalele gu Shitime, athu asendesele gubungisa muila nu ana a akhetu a gu Moaba. 2 Akhetu ene atamegele athu ha guhana nzambi jiawo milambu, gungima athu asendesele gudia nu gufugamela nzambi jiawo. 3 Enya Isalele asendesele nji gukombelela Bale wa gu Pheole, hene Yehowa waavuidile khabu jiavula. 4 Yehowa wawambelele Moize egi: “Zula mafumu agasue a athu atshitshi gubola, waashiye, waazenzelese ha muanya gutuama dia Yehowa hagula Yehowa abembe guvuila enya Isalele khabu jiakola.” 5 Gungima Moize wawambelele manzuji a gu Isalele egi: “Muthu wagasue mukatshi dienu udi naye gushiya akuaku’enji anyi akombelela Bale wa gu Pheole.”

6 Uvi mu tangua diene, muenya Isalele mumoshi wajile nu mukhetu wa gu Madiana gudi aphangi’enji ha meso a Moize nu enya Isalele agasue, hakhalele ene mudila ha mufulo wa inzo ya tenta ya gudibungishila. 7 Tangua Fineyase mun’a Eleazale, mujigulu wa nganga-nzambi Alona wamonele ndaga yene, wazugile mbala imoshi mukatshi dia athu, wazudile mulumbu ha mago. 8 Wahatele muenya Isalele muene mu tenta, muyadi’awo tshima waatuile mulumbu, muenya Isalele nu mukhetu muene gu muila wenji wa ukhetu. Ngenyi lamba diabuidile enya Isalele diahuile. 9 Athu afuile mukunda nu lamba diene akhalele 24 000.

10 Gungima Yehowa wawambelele Moize egi: 11 “Fineyase mun’a Eleazale, mujigulu wa nganga-nzambi Alona watshita egi khabu jiami mukunda nu enya Isalele jihue, handaga gabembelego egi akombelele Nzambi muko phamba ame. Hene ngashiyilego enya Isalele agasue ngatshima ngana toga egi angukombelele phamba ame. 12 Wambela Fineyase egi: “Ngakota n’enji gikotelo gia guhuima. 13 Mbagikhala gikotelo gia unganga-nzambi mayilago mukunda nu muene nu ajigulu enji, handaga gabembelego egi athu akombelele Nzambi muko phamba ame; ngenyi watshitshi egi Nzambi atotesele enya Isalele.’”

14 Muenya Isalele washiyiwe hamoshi nu mukhetu wa gu Madiana jina dienji Zimiri mun’a Salu; Salu wakhalele fumu wa fami imoshi mu giphuta gia Simeone. 15 Mukhetu wa gu Madiana munu washiyiwe jina dieji Kozibi mun’a Sule; Sule wakhalele fumu wa giphuta gimoshi gu Madiana.

16 Gungima Yehowa wawambelele Moize egi: 17 “Sagesenu enya gu Madiana, ashiyenu, 18 handaga ene nji amisagesa luholo amihuigi mu ndaga yatadila mulonga wa Pheole nu mulonga wa Kozibi mun’a fumu wa gu Madiana, phangi’awo wa mukhetu munu washiyiwe mu lusugu lamba diabuidile enya Isalele mukunda nu mulonga wa Pheole.”

26 Gungima dia lamba diene, Yehowa wawambelele Moize nu Eleazale mun’a nganga-nzambi Alona egi: 2 “Tangenu enya Isalele agasue adi nu ivo sendese 20 nu holu gifua mudi fami jia ash’awo; tangenu athu agasue anyi ajiya gutshita mudimo wa gisuta gu Isalele.” 3 Moize nu nganga-nzambi Eleazale atele maga nu athu mu mavu a luselenga a Moaba, hehi nu Muta wa Yordane ha sambua dia Yeliko. Aawambelele egi: 4 “Tangenu athu adi nu ivo sendese 20 nu holu gifua luholo Yehowa wawambelele Moize.”

Ana agasue a Isalele azogele mu gifutshi gia Ejipitu ene awa: 5 Ribene wakhalele somi wa Isalele; ana a Ribene ene awa: mu vumo dia Hanoka, muene muazogele fami ya Hanoka; mu vumo dia Phalu, muene muazogele fami ya Phalu; 6 mu vumo dia Heselona, muene muazogele fami ya Heselona; mu vumo dia Kalemi, muene muazogele fami ya Kalemi. 7 Jiene fami jia mu giphuta gia Ribene; athu awo asonegewe majina akhalele 43 730.

8 Phalu wavualele Eliyabe. 9 Ana a Eliyabe akhalele Nemuele, Datana nu Abirame. Datana nu Abirame akhalele amoneshi a athu alumbugidile Moize nu Alona, hamoshi nu athu a Kora tangua alumbugidile Yehowa.

10 Gungima mavu akangulugile, a aminyile. Kora nji wafuile nu athu akhalele gu khanda yenji tangua tshuya tuakondele athu 250. Ndaga yaabuidile yabuile gifezegeselo gidi mutemesa. 11 Uvi ana a Kora afuilego.

12 Wawa ana a Simeone gifua mudi fami jiawo: mu vumo dia Nemuele, muene muazogele fami ya Nemuele; mu vumo dia Yamine, muene muazogele fami ya Yamine; mu vumo dia Yakine, muene muazogele fami ya Yakine; 13 mu vumo dia Zela, muene muazogele fami ya Zela; mu vumo dia Shaula, muene muazogele fami ya Shaula. 14 Athu asonegewe majina mu fami jia mu giphuta gia Simeone akhalele: 22 200.

15 Wawa ana a Gade gifua mudi fami jiawo: mu vumo dia Sefona, muene muazogele fami ya Sefona; mu vumo dia Hagi, muene muazogele fami ya Hagi; mu vumo dia Shuni, muene muazogele fami ya Shuni; 16 mu vumo dia Ozeni, muene muazogele fami ya Ozeni; mu vumo dia Eri, muene muazogele fami ya Eri; 17 mu vumo dia Alodi, muene muazogele fami ya Alodi; mu vumo dia Aleli, muene muazogele fami ya Aleli. 18 Jiene fami jia ana a Gade; athu awo asonegewe majina akhalele 40 500.

19 Ana a Yuda akhalele Ele nu Onane. Uvi Ele nu Onane afuile mu mavu a Kanana. 20 Wawa ana a Yuda gifua mudi fami jiawo: mu vumo dia Shela, muene muazogele fami ya Shela; mu vumo dia Phelese, muene muazogele fami ya Phelese; mu vumo dia Zela, muene muazogele fami ya Zela. 21 Wawa ana a Phelese: mu vumo dia Heselona, muene muazogele fami ya Heselona; mu vumo dia Hamule, muene muazogele fami ya Hamule. 22 Jiene fami jia mu giphuta gia Yuda; athu awo asonegewe majina akhalele 76 500.

23 Wawa ana a Isakale gifua mudi fami jiawo: mu vumo dia Tola, muene muazogele fami ya Tola; mu vumo dia Phuwa, muene muazogele fami ya Phuwa; 24 mu vumo dia Yashuba, muene muazogele fami ya Yashuba; mu vumo dia Shimelone, muene muazogele fami ya Shimelone. 25 Jiene fami jia mu giphuta gia Isakale; athu awo asonegewe majina akhalele 64 300.

26 Wawa ana a Zabulona gifua mudi fami jiawo: mu vumo dia Selede, muene muazogele fami ya Selede; mu vumo dia Elona, muene muazogele fami ya Elona; mu vumo dia Yalele, muene muazogele fami ya Yalele. 27 Jiene fami jia mu giphuta gia Zabulona; athu awo asonegewe majina akhalele 60 500.

28 Wawa ana a Yozefe gifua mudi fami jiawo: Manase nu Efrayime. 29 Wawa ana a Manase: mu vumo dia Makile, muene muazogele fami ya Makile; Makile wavualele Gileade; mu vumo dia Gileade, muene muazogele fami ya Gileade. 30 Wawa ana a Gileade: mu vumo dia Yasele, muene muazogele fami ya Yasele; mu vumo dia Heleke, muene muazogele fami ya Heleke; 31 mu vumo dia Aseliyele, muene muazogele fami ya Aseliyele; mu vumo dia Shekeme, muene muazogele fami ya Shekeme; 32 mu vumo dia Shemida, muene muazogele fami ya Shemida; mu vumo dia Hefele, muene muazogele fami ya Hefele. 33 Uvi Selofehade mun’a Hefele gavualelego ana a mala, wakhalele phamba nu ana a akhetu; majina a an’enji a akhetu akhalele: Mala, Nowa, Hogela, Milka nu Tilesa. 34 Jiene fami jia mu giphuta gia Manase; athu awo asonegewe majina akhalele 52 700.

35 Wawa ana a Efrayime gifua mudi fami jiawo: mu vumo dia Shutela, muene muazogele fami ya Shutela; mu vumo dia Bekere, muene muazogele fami ya Bekere; mu vumo dia Tahana, muene muazogele fami ya Tahana. 36 Wawa ana a Shutela: mu vumo dia Elana, muene muazogele fami ya Elana. 37 Jiene fami jia ana a Efrayime; athu awo asonegewe majina akhalele 32 500. Ene ana a Yozefe gifua mudi fami jiawo.

38 Wawa ana a Benjame gifua mudi fami jiawo: mu vumo dia Bela, muene muazogele fami ya Bela; mu vumo dia Ashebele, muene muazogele fami ya Ashebele; mu vumo dia Ahilama, muene muazogele fami ya Ahilama; 39 mu vumo dia Shefufame, muene muazogele fami ya Shuphama; mu vumo dia Hufama, muene muazogele fami ya Hufama. 40 Ana a Bela akhalele Alede nu Namana: mu vumo dia Alede, muene muazogele fami ya Alede; mu vumo dia Namana, muene muazogele fami ya Namana. 41 Ene ana a Benjame gifua mudi fami jiawo; athu awo asonegewe majina akhalele 45 600.

42 Wawa ana a Dane gifua mudi fami jiawo: mu vumo dia Shuhama, muene muazogele fami jia Shuhama. Jiene fami jia ajigulu a Dane. 43 Athu asonegewe majina mu fami jiagasue jia Shuhama akhalele 64 400.

44 Wawa ana a Asele gifua mudi fami jiawo: mu vumo dia Yimena, muene muazogele fami ya Yimena; mu vumo dia Yishevi, muene muazogele fami ya Yishevi; mu vumo dia Beliya, muene muazogele fami ya Beliya; 45 mukunda nu ana a Beliya: mu vumo dia Hebele, muene muazogele fami ya Hebele; mu vumo dia Malakiele, muene muazogele fami ya Malakiele. 46 Mun’a Asele wa mukhetu jina dienji diakhalele Sela. 47 Jiene fami jia ana a Asele; athu awo asonegewe majina akhalele 53 400.

48 Wawa ana a Nefetali gifua mudi fami jiawo: mu vumo dia Yasiele, muene muazogele fami ya Yasiele, mu vumo dia Guni, muene muazogele fami ya Guni; 49 mu vumo dia Yesele, muene muazogele fami ya Yesele; mu vumo dia Shileme, muene muazogele fami ya Shileme. 50 Jiene fami jia ajigulu a Nefetali; athu awo asonegewe majina akhalele 45 400.

51 Enya Isalele agasue asonegewe majina akhalele: 601 730.

52 Gungima Yehowa wawambelele Moize egi: 53 “Mavu mbaakhaphewa mu gudivua nu guvula gua athu atangewa. 54 Mukunda nu athu adi avula, mbawukomesa khapho diawo, athu adi azonda, mbawuzondesa nji khapho diawo. Athu nu athu mbaahanewa khapho mu gudivua nu guvula gua athu asonegewa majina. 55 Uvi adi naye guta mubela ha gukhapha mavu. Mbaaheta khapho diawo gifua mudi majina a iphuta ya ash’awo. 56 Mbaata mubela ha gujiya khapho dia athu anyi adi avula nu dia athu anyi adi azonda.”

57 Wawa enya Levi anyi asonegewe majina gifua mudi fami jiawo: mu vumo dia Geleshona, muene muazogele fami ya Geleshona; mu vumo dia Kehate, muene muazogele fami ya Kehate; mu vumo dia Melali, muene muazogela fami ya Melali. 58 Eji fami jia enya Levi: fami ya Libeni, fami ya Hebrone, fami ya Mali, fami ya Mushi, nu fami ya Kora.

Kehate wavualele Amelame. 59 Mukaji’a Amelame jina dienji diakhalele Yokebede, wakhalele mun’a Levi. Mukaji’a Levi wavualele mona muene gu Ejipitu. Amelame nu Yokebede avualele Alona nu Moize nu Miriame phangi’awo wa mukhetu. 60 Alona wavualele Nadabe, Abihu, Eleazale nu Itamale. 61 Uvi Nadabe nu Abihu afuile handaga ahanele tshuya tunu mukhuala wakhalele mutunyisa gutuama dia Yehowa.

62 Mala agasue akhalele nu mbeji imoshi nu holu anyi asonegewe majina akhalele 23 000. Asonegelego majina awo hamoshi nu enya Isalele ako handaga akhalelego naye guheta khapho mukatshi dia enya Isalele.

63 Wawa majina a athu anyi Moize nu nganga-nzambi Eleazale asonegele tangua asonegele majina a enya Isalele mu mavu a luselenga a Moaba hehi nu Yordane, ha sambua dia Yeliko. 64 Uvi mukatshi dia athu awa, guakhalelego nga muthu mumoshi wakhalele mukatshi dia athu atangele Moize nu nganga-nzambi Alona tangua atangele enya Isalele mu mavu a luselenga a Sinayi. 65 Handaga Yehowa wazuelele mukunda nu ene egi: “Mbafua mu mavu a luselenga.” Gushigo nu muthu wasalele nu monyo mukatshi diawo, phamba Kalebe mun’a Yefune nu Yoshua mun’a Nune.

27 Gungima ana a Selofehade a akhetu asuenele hehi. Selofehade wakhalele mun’a Hefele, mun’a Gileade, mun’a Makile, mun’a Manase, enya mu fami jia mu giphuta gia Manase mun’a Yozefe. Majina a an’enji a akhetu akhalele: Mala, Nowa, Hogela, Milka nu Tilesa. 2 Amaganele gutuama dia Moize, nu nganga-nzambi Eleazale nu dia mafumu nu gutuama dia athu agasue ha mufulo wa inzo ya tenta ya gudibungishila, azuelele egi: 3 “Tata wafuile mu mavu a luselenga, gakhalelego mukatshi dia athu alumbugidile Yehowa, athu akhalele gu khanda ya Kora, uvi wafuile mukunda nu gubola guenji hakhenji, gavualelego nga mona wa yala. 4 Jina dia tata didi naye gutota mu fami yenji handaga gavualelego mona wa yala ba? Tuhanenu khapho dia mavu hamoshi nu aphangi’a tata.” 5 Moize wayile nu mulonga wawo gutuama dia Yehowa.

6 Gungima Yehowa wawambelele Moize egi: 7 “Ana a Selofehade a akhetu azuela muabonga. Udi naye guahana khapho dia mavu hamoshi nu aphangi’a sh’awo; ahane khapho dia sh’awo. 8 Wambela enya Isalele egi: “Gula yala wafua uvi muene gashigo nu mona wa yala, mudi naye guhana mun’enji wa mukhetu khapho dienji. 9 Gula gashigo nu mona wa mukhetu, mbamuhana khapho dienji gudi aphangi’enji a mala. 10 Gula gashigo nu aphangi a mala, mbamuhana khapho dienji gudi aphangi’a sh’enji a mala. 11 Gula sh’enji gashigo nu aphangi a mala, mbamuhana khapho dienji gudi phangi’enji muko wa mu fami udi hehi nu jigo diawo, muthu muene mbawuzula khapho diene. Ndaga eyi mbayikhala mukhuala mukunda nu enya Isalele, gifua luholo Yehowa wawambela Moize.’”

12 Gungima Yehowa wawambelele Moize egi: “Kanduga gu mulundu wuwu wa Abalima, utale mavu mbanguhana enya Isalele. 13 Gungima dia gutala mavu ene, mbawufua* gifua muafuile phangi’aye Alona; 14 handaga tangua athu angumanesele mu mavu a luselenga a Sine, muangulumbugile, muangutumbuishilego gutuama diawo mukunda nu meya a gu Meriba gu Kadeshe, mu mavu a luselenga a Sine.”

15 Gungima Moize wawambelele Yehowa egi: 16 “Yehowa, aye Nzambi wana hana monyo gudi athu agasue,* tombela athu aye muthu 17 munu mbawukhala muzoga nu gungina gutuama diawo, nu mbawukhala guazola nu guanginyisa hagula athu a Yehowa akhadigo gifua imeme ishigo nu mubambi.” 18 Yehowa wawambelele Moize egi: “Zula Yoshua mun’a Nune, muthu udi watagana ha gutagenesa ginemo giene, umuhage mago. 19 Mumaganese gutuama dia nganga-nzambi Eleazale nu gutuama dia athu agasue, umubuise mutuameji ha meso awo. 20 Udi naye gumuhana ndambo ya ufumu* waye hagula enya Isalele agasue akhale gumuvuila. 21 Mbawumagana gutuama dia nganga-nzambi Eleazale, nganga-nzambi mbawumukambela utuameji wa Yehowa mu njila ya Ulime. Gula waawambela ha guzoga, ene mbaazoga, gula waawambela ha gungina, mbaangina, muene nu enya Isalele agasue adi n’enji nu athu agasue.”

22 Moize watshitshile gifua muamuwambelele Yehowa. Wazudile Yoshua, wamumaganesele gutuama dia nganga-nzambi Eleazale nu gutuama dia athu agasue, 23 wamuhagele mago, wamubuishile mutuameji gifua luholo Yehowa wamuwambelele.

28 Gungima Yehowa wawambelele Moize egi: 2 “Wambela enya Isalele egi: ‘Mushigo naye gujimbila guhana mulambu wami, dipha diami. Mudi naye guhana milambu yami yawetshiewa ha tshuya ha guzola vumba diabonga mu tangua diatombewe.’

3 “Awambele nji egi: ‘Mulambu wawetshiewa mbamuhana Yehowa wene owu: lusugu nu lusugu, mudi naye guhana mitumba mbadi ya imeme ya milume ya givo gimoshi ishigo nu ginonga* gu muila gifua mulambu wa guwotshia. 4 Mbawuhana gimeme gimoshi mu gimenegena, giko mbawugihana mu ngueze,* 5 mbawuyihana hamoshi nu giakumi gia efa* imoshi ya phupha iladiege-diege yagufutula nu litre imoshi* ya maji abonga gifua mulambu wa mbuto. 6 Idi mulambu wa guwotshia wa lusugu nu lusugu unu asendesele guhana gu Mulundu wa Sinayi gifua mulambu udi muzola vumba diabonga, mulambu wawetshiewa mukunda nu Yehowa. 7 Mudi naye guwuhana hamoshi nu mulambu wa matombe, litre imoshi* mukunda nu gimeme giagasue gia mulume. Mudi naye gubundula matombe akola ha fundo dia gijila gifua mulambu wa matombe mukunda nu Yehowa. 8 Gimeme giko gia mulume mbawugihana mu ngueze.* Mbawugihana hamoshi nu mulambu wa mbuto nu mulambu wa matombe gifua unu wahanyi mu gimenegena, mbawuyihana gifua mulambu wawetshiewa udi muzola vumba diabonga mukunda nu Yehowa.

9 “‘Uvi mu Lusugu lua Guhuluguga, mudi naye guhana imeme mbadi ya milume ya givo gimoshi ishigo nu ginonga gu muila nu bakilo mbadi* a phupha iladiege-diege yagufutula nu maji gifua mulambu wa mbuto, hamoshi nu mulambu wa matombe. 10 Udi mulambu wa guwotshia mukunda nu Lusugu lua Guhuluguga, hamoshi nu mulambu wa guwotshia wa lusugu nu lusugu nu mulambu wenji wa matombe.

11 “‘Gu gisendeselo gia mbeji yagasue,* mudi naye guhana mitumba mbadi ya ngombe jia milume, gimeme gimoshi gia mulume nu mitumba 7 ya imeme ya milume ya givo gimoshi ishigo nu ginonga gu muila, gifua mulambu wa guwotshia mukunda nu Yehowa. 12 Mbamuwuhana hamoshi nu bakilo thathu nu ndambo* a phupha iladiege-diege yagufutula nu maji gifua mulambu wa mbuto mukunda nu ngombe yagasue ya mulume, nu bakilo mbadi a phupha iladiege-diege yagufutula nu maji gifua mulambu wa mbuto mukunda nu gimeme gimoshi gia mulume, 13 nu giakumi gia phupha iladiege-diege yagufutula nu maji gifua mulambu wa mbuto mukunda nu mutumba wagasue wa gimeme gia mulume; udi mulambu wa guwotshia udi muzola vumba diabonga, mulambu wawetshiewa mukunda nu Yehowa. 14 Milambu ya matombe idi naye gukhala: gitshinyi gia hine ya vinyo mukunda nu ngombe ya mulume nu gitshinyi gimoshi mukatshi dia itshinyi thathu ya hine mukunda nu gimeme gia mulume, nu gitshinyi gimoshi mukatshi dia itshinyi nguana ya hine mukunda nu mutumba wa gimeme gia mulume. Wene mulambu wa guwotshia udi naye guhanewa mbeji yagasue mu givo. 15 Holu dia mulambu wa guwotshia wa lusugu nu lusugu nu mulambu wenji wa matombe, adi naye nji guhana Yehowa mutumba wa khombo gifua mulambu mukunda nu gubola.

16 “‘Mu lusugu lua 14 lua mbeji ya thomo, mbayikhala Wano wa Pake wa Yehowa. 17 Mu lusugu lua 15 lua mbeji yene, mbayikhala lusugu lua wano. Mbamudia mapha ashigo nu levire masugu 7. 18 Mu lusugu lua thomo, mbayikhala gudibungisa gua gijila. Mushigo naye gutshita mudimo wakola. 19 Mbamuhana Yehowa mitumba mbadi ya ngombe jia milume, gimeme gimoshi nu mitumba 7 ya imeme ya milume ya givo gimoshi gifua mulambu wa guwotshia. Shitu mbamuhana jishigo naye gukhala nu ginonga gu muila. 20 Mudi naye gujihana hamoshi nu milambu ya mbuto ya phupha iladiege-diege yagufutula nu maji, bakilo thathu nu ndambo mukunda nu ngombe ya mulume, bakilo mbadi mukunda nu gimeme gia mulume. 21 Mukunda nu mitumba 7 ya imeme ya milume, mudi naye guhana kilo gimoshi mukunda nu gimeme giagasue, 22 nu khombo imoshi gifua mulambu mukunda nu gubola hagula Nzambi wajiya gumitotesela gubola guenu. 23 Mbamulezela milambu eyi holu dia mulambu wa guwotshia wa mu gimenegena, unu wana hanewa gifua mulambu wa guwotshia wa lusugu nu lusugu. 24 Mbamuyihana luholo lumoshi lusugu nu lusugu, masugu 7 gifua ima ya gudia,* udi mulambu wawetshiewa ha guzola vumba diabonga mukunda nu Yehowa. Mbamuyihana hamoshi nu mulambu wa guwotshia wa lusugu nu lusugu nu mulambu wenji wa matombe. 25 Mu lusugu lua 7, mbamutshita gudibungisa gua gijila. Mushigo naye gutshita mudimo wakola.

26 “‘Mu lusugu lua gukatula mabundu a thomo, tangua mbamuhana mulambu wa mbuto jihe-jihe gudi Yehowa, mudi naye gukalagala gudibungisa gua gijila mu lusugu lua wano wenu wa phoso.* Mushigo naye gukalagala mudimo wakola. 27 Mbamuhana mitumba mbadi ya ngombe jia milume nu gimeme gimoshi gia mulume nu mitumba 7 ya imeme ya milume ya givo gimoshi, gifua mulambu wa guwotshia udi muzola vumba diabonga mukunda nu Yehowa. 28 Mbamuwuhana hamoshi nu mulambu wa mbuto wa phupha iladiege-diege yagufutula nu maji, bakilo thathu nu ndambo mukunda nu ngombe yagasue ya mulume, bakilo mbadi mukunda nu gimeme gia mulume. 29 Mukunda nu mitumba 7 ya imeme ya milume, mudi naye guhana kilo gimoshi mukunda nu gimeme giagasue, 30 nu mutumba umoshi wa khombo hagula Nzambi wajiya gumitotesela gubola guenu. 31 Mudi naye guwuhana holu dia mulambu wa guwotshia wa lusugu nu lusugu nu mulambu wenji wa mbuto nu milambu yenji ya matombe. Shitu jiene jishigo naye gukhala nu ginonga gu muila.

29 “‘Mu lusugu lua thomo lua mbeji ya 7, mudi naye gukalagala gudibungisa gua gijila. Mushigo naye gutshita mudimo wakola. Idi lusugu mudi naye gushiga phungi. 2 Mbamuhana mutumba wa ngombe ya mulume nu gimeme gia mulume nu mitumba 7 ya imeme ya milume ya givo gimoshi gifua mulambu wa guwotshia hagula uzole vumba diabonga mukunda nu Yehowa; shitu jiene jiagasue jishigo naye gukhala nu ginonga* gu muila. 3 Mudi naye gujihana hamoshi nu mulambu wa mbuto wa phupha iladiege-diege yagufutula nu maji, bakilo thathu nu ndambo* mukunda nu ngombe ya mulume, bakilo mbadi mukunda nu gimeme gia mulume. 4 Mukunda nu mitumba 7 ya imeme ya milume, mudi naye guhana kilo gimoshi mukunda nu gimeme giagasue, 5 nu mutumba wa khombo ya mulume gifua mulambu mukunda nu gubola hagula Nzambi wajiya gumitotesela gubola guenu. 6 Mudi naye gulunda milambu eyi holu dia mulambu wa guwotshia wana hanewa mbeji nu mbeji nu mulambu wenji wa mbuto, nu mulambu wa guwotshia wa lusugu nu lusugu nu mulambu wenji wa mbuto hamoshi nu milambu yenji ya matombe, gifua luholo mukhuala wana toga. Udi mulambu udi muzola vumba diabonga wawetshiewa mukunda nu Yehowa.

7 “‘Mu lusugu lua kumi lua mbeji yene ya 7, mudi naye gukalagala gudibungisa gua gijila, mudi naye guvua gikenene mukunda nu gubola guenu.* Mushigo naye gutshita mudimo wakola. 8 Mbamuhana mutumba wa ngombe ya mulume nu gimeme gia mulume, nu mitumba 7 ya imeme ya milume ya givo gimoshi gifua mulambu wa guwotshia hagula uzole vumba diabonga mukunda nu Yehowa; shitu jiagasue jishigo naye gukhala nu ginonga gu muila. 9 Mudi naye gujihana hamoshi nu milambu ya mbuto ya phupha iladiege-diege yagufutula nu maji, bakilo thathu nu ndambu mukunda nu ngombe ya mulume, bakilo mbadi mukunda nu gimeme gia mulume. 10 Mukunda nu mitumba 7 ya imeme ya milume, mudi naye guhana kilo gimoshi mukunda nu gimeme giagasue, 11 nu mutumba wa khombo gifua mulambu mukunda nu gubola, mudi naye gulezela milambu yene holu dia mulambu wa gutotesela gubola nu mulambu wa guwotshia wa lusugu nu lusugu nu mulambu wa mbuto hamoshi nu milambu yenji ya matombe.

12 “‘Mu lusugu lua 15 lua mbeji ya 7, mudi naye gutshita gudibungisa gua gijila. Mushigo naye gukalagala mudimo wakola, mudi naye gutshita wano mukunda nu Yehowa masugu 7. 13 Mbamuhana mitumba 13 ya ngombe jia milume, imeme mbadi ya milume, mitumba ya imeme ya milume 14 ya givo gimoshi gifua mulambu wa guwotshia udi muzola vumba diabonga mukunda nu Yehowa; shitu jiagasue jishigo naye gukhala nu ginonga mu muila. 14 Mudi naye gujihana hamoshi nu mulambu wa mbuto ya phupha iladiege-diege yagufutula nu maji, bakilo thathu nu ndambo mukunda nu ngombe yagasue ya mulume, bakilo mbadi mukunda nu gimeme giagasue gia mulume, 15 nu kilo gimoshi mukunda nu mutumba wagasue wa gimeme gia mulume, 16 nu mutumba wa khombo gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto nu mulambu wenji wa matombe.

17 “‘Mu lusugu lua mbadi, mbamuhana mitumba 12 ya ngombe jia milume, imeme mbadi ya milume nu mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 18 Mbamuhana nji mulambu wa mbuto, nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 19 nu mutumba wa khombo gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wenji wa mbuto hamoshi nu milambu ya matombe.

20 “‘Mu lusugu lua thathu, mbamuhana ngombe 11 jia milume, imeme mbadi ya milume, mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 21 Mbamuhana nji mulambu wa mbuto nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 22 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto hamoshi nu mulambu wenji wa matombe.

23 “‘Mu lusugu lua nguana, mbamuhana ngombe 10 jia milume, imeme mbadi ya milume, mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 24 Mbamuhana nji mulambu wa mbuto nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 25 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto hamoshi nu mulambu wenji wa matombe.

26 “‘Mu lusugu lua thano, mbamuhana ngombe 9 jia milume, imeme mbadi ya milume, nu mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 27 Mbamuhana nji mulambu wa mbuto nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 28 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto hamoshi nu mulambu wenji wa matombe.

29 “‘Mu lusugu lua 6, mbamuhana ngombe 8 jia milume, imeme mbadi ya milume nu mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 30 Mbamuhana nji mulambu wa mbuto nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 31 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto hamoshi nu mulambu wenji wa matombe.

32 “‘Mu lusugu lua 7, mbamuhana ngombe 7 jia milume, imeme mbadi ya milume nu mitumba ya imeme ya milume 14 ya givo gimoshi; shitu jiagasue jishigo naye gukhala nu ginonga gu muila. 33 Mbamuhana nji mulambu wa mbuto nu milambu ya matombe mukunda nu ngombe jia milume nu imeme ya milume nu mitumba ya imeme ya milume ha gutadila guvula guajio gifua luholo mukhuala wana toga, 34 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto nu mulambu wenji wa matombe.

35 “‘Mu lusugu lua 8, mbamukalagala gudibungisa gua ndando yavula. Mushigo naye gutshita mudimo wakola. 36 Mudi naye guhana ngombe imoshi ya mulume, nu gimeme gimoshi gia mulume nu mitumba ya imeme ya milume 7 ya givo gimoshi gifua mulambu wa guwotshia udi muzola vumba diabonga mukunda nu Yehowa; shitu jiagasue jishigo naye gukhala nu ginonga gu muila. 37 Mbamuhana nji milambu ya mbuto nu milambu ya matombe mukunda nu ngombe ya mulume, gimeme gia mulume nu mitumba ya imeme ya milume ha gutadila guvula guajio gifua luholo mukhuala wana toga, 38 nu khombo imoshi gifua mulambu mukunda nu gubola. Mudi naye gulezela milambu yene holu dia mulambu wa guwotshia wa lusugu nu lusugu nu mulambu wa mbuto hamoshi nu mulambu wenji wa matombe.

39 “‘Mbamuhana milambu eyi gudi Yehowa mu sungi jienu jia mawano, mbamuyilezela holu dia milambu yenu ya guditendelela nu milambu yenu ya khenda nu milambu yenu ya guwotshia nu milambu yenu ya mbuto nu milambu yenu ya matombe nu milambu yenu ya guhuima.’” 40 Moize wawambelele enya Isalele ndaga jiagasue jiamuwambelele Yehowa.

30 Gungima Moize wawambelele mafumu a iphuta ya Isalele egi: “Tegelelenu ndaga jiazuela Yehowa: 2 Gula muthu walaya Yehowa ndaga imoshi nga wadiloga egi gashigo naye gutshita ndaga imoshi, udi naye gutagenesa mbimbi yenji. Udi naye gukalagala ndaga yagasue yalayi muene.

3 “Gula muvuala wa mukhetu walaya Yehowa ndaga imoshi nga wadiloga ha gutuna gutshita ndaga imoshi hadi muene mujinga monzo ya sh’enji, 4 gula sh’enji wavua ndaga yalayi muene nga gudiloga guenji ha gutuna gutshita ndaga imoshi, uvi muene nu gumutunyisa ndo, mona wa mukhetu muene udi naye gutagenesa ndaga jialayi muene; udi naye nji gutagenesa ndaga jiagasue jiadilogi muene egi gashigo naye gutshita. 5 Uvi gula sh’enji wamutunyisa tangua diavua muene ndaga jialayi muene nga jiadilogi muene egi gashigo naye gutshita, mona muene mbagashigo mutagenesa ndaga jiene. Yehowa mbawumutotesela handaga sh’enji wamutunyisa.

6 “Uvi gula muvuala muene wa mukhetu walabi genji gulaya nga gudiloga, gungima wazudiwa mu ulo, 7 gula mulumi’enji wajiya ndaga yene uvi muene nu gumutunyisa ndo mu lusugu luavua muene ndaga yene, mona wa mukhetu muene udi naye gutagenesa ndaga jialayele muene nga ndaga jiadilogele muene egi gashigo naye gutshita. 8 Uvi gula mulumi’enji wamutunyisa mu lusugu luavua muene ndaga yene, wajiya gukatula gudiloga nga ndaga yalabele mukhetu muene gudilaya, ngenyi Yehowa mbawumutotesela.

9 “Uvi gula mukhetu wa gafunda nga mukhetu munu washiyile gale ulo wadiloga, udi naye gutagenesa ndaga jiagasue jiadilayele muene.

10 “Gula mukhetu mumoshi wadiloga ha gutshita ndaga imoshi nga wadiloga ha gutuna gutshita ndaga imoshi ngenyi hadi muene monzo ya mulumi’enji, 11 gula mulumi’enji wavua ndaga yene uvi muene nu gumutunyisa ndo, mukhetu muene udi naye gutagenesa ndaga jiagasue jiadilogele muene, nga ndaga jiadilogele muene egi gashigo naye gutshita. 12 Uvi lusugu mbaluvua mulumi’enji egi wadilogele ha gutshita ndaga imoshi nga wadilogele ha gutuna gutshita ndaga imoshi, gula wamutunyisa, mukhetu muene mbagashigo mutaganesa luko ndaga jiadilogele muene. Yehowa mbawumutotesela handaga mulumi’enji wakatula gudiloga guene. 13 Mukunda nu ndaga yagasue yatadila gudiloga ha gutshita ndaga imoshi nga gudiloga ha gutuna gutshita ndaga imoshi, mulumi’enji udi naye gutuna nga gutshigina. 14 Uvi gula masugu abalega muene nu guzuela ndo nga ndaga imoshi, idi mumonesa egi watshigina gudiloga guagasue guadilogi mukaji’enji nga ndaga yagasue yadilogi muene ha gutuna gutshita, handaga muene gazuelelego nga ndaga imoshi mu lusugu luavuile muene ndaga yene. 15 Uvi gula wamutunyisa gungima dia lusugu luavuile muene ndaga yene, gubola gua mukaji’enji mbagukhala ha muto wenji.

16 “Eyi mikhuala Yehowa wahanele Moize mu ndaga yatadila yala nu mukaji’enji, nu ndaga yatadila tata nu mun’enji wa mukhetu udi mujinga mu inzo ya sh’enji.”

31 Gungima Yehowa wawambelele Moize egi: 2 “Vutudila enya Madiana gubola akalegele enya Isalele. Gungima aye mbawufua gifua muafuile akhakh’aye.”*

3 Moize wawambelele athu egi: “Hanenu mala adi mukatshi dienu iluilo ha guya muluisa enya Madiana hagula Yehowa avutudile enya Madiana gubola. 4 Mu giphuta giagasue gia enya Isalele, mudi naye gutuma athu 1 000 gu ita.” 5 Mu iphuta yagasue ya Isalele* atombele mala 1 000 mu giphuta nu giphuta, ahanele athu 12 000 iluilo ha guya mulua ita.

6 Moize watumine athu 1 000 a mu giphuta nu giphuta ha guya mulua ita. Fineyase mun’a nganga-nzambi Eleazale wayile nawo, wakhalele nu ikadigilo ya gijila ha mago nu phungi jia gushiga gu ita. 7 Aluile nu enya Madiana gifua luholo Yehowa wawambelele Moize, ashiyile mala agasue. 8 Mu tangua diene, ashiyile nji mafumu thano a gu Madiana, majina awo akhalele: Evi, Lekeme, Sule, Hule nu Reba. Ashiyile nji Balama mun’a Beole nu phogo ya khusa. 9 Uvi enya Isalele akuatele akhetu nu ana a gu Madiana, ayile nawo. Atambudile nji shitu jiawo jiagasue jia hembo nu shitu jiawo jiko jiagasue nu ima yawo yagasue. 10 Akondele nji membo awo agasue akhalele mukhala nu phundo jiawo jiagasue. 11 Azudile ima yagasue atambudile, nu athu nu shitu. 12 Azudile athu akuatele nu ima atambudile, ayile nayo gudi Moize nu nganga-nzambi Eleazale nu gudi enya Isalele agasue gu phundo mu mavu a luselenga a Moaba hehi nu Yordane ha sambua dia Yeliko.

13 Gungima Moize nu nganga-nzambi Eleazale nu mafumu agasue a enya Isalele ayile guatagana hanze ya phundo. 14 Uvi Moize wavuile khabu mukunda nu athu akhalele mutuameza masuta, yakotelesa egi mafumu a athu 1 000 nu mafumu a athu 100 anyi akatugile gu ita. 15 Moize waawambelele egi: “Mukunda natshi muabembi akhetu agasue nu monyo? 16 Mudi mujiya muabonga egi akhetu awa ene avuile ndaga jiazuelele Balama, hene atumine enya Isalele ha gulumbugila Yehowa nu ha gukombelela nzambi wa mambo gu Pheole; gishina giene misongo yakola yakuatele athu a Yehowa. 17 Henyaha mudi naye gushiya ana agasue a mala nu mukhetu wagasue wabungishile gale muila nu yala. 18 Uvi mushigo naye gushiya ana a akhetu agasue anyi khenji abungishile galego muila nu yala. 19 Mudi naye gukhala gonze ya phundo masugu 7. Muthu wagasue mukatshi dienu nga mukatshi dia athu muakuatshi gu ita munu washiyi muthu* nga wakuatshi kimbi gia muthu, udi naye gudiphelegetesa mu lusugu lua thathu nu mu lusugu lua 7. 20 Mudi naye guphelegetesa mulele wagasue, gima giagasue gialondewe nu gilema nu gima giagasue gialondewe nu uvuji wa khombo nu gima giagasue gialondewe nu mutshi.”

21 Nganga-nzambi Eleazale wawambelele masuta ayile gu ita egi: “Yehowa wahanele Moize mukhuala owu: 22 ‘Wolo nu utadi wa siliva nu kuivre nu utadi nu etene* nu utadi wanema, 23 gima giagasue ginyi giajiyilego guhia tshuya, mudi naye gugibalegesa ha tshuya ha gugiphelegetesa. Uvi mudi naye nji gugiphelegetesa nu meya a gudiphelegetesa. Gima giagasue ginyi giajiya guhia tshuya, mudi naye gugibalegesa mu meya. 24 Mu lusugu lua 7, mudi naye guwovua milele yenu hagula mubue aphelegeta, gungima muajiya giwa guvutuga mu phundo.’”

25 Gungima Yehowa wawambelele Moize egi: 26 “Tanga athu muakuatele gu ita nu shitu; atangenu hamoshi nu nganga-nzambi Eleazale nu mafumu a fami jia gu Isalele. 27 Khaphumuna ima yene mu mashinda mbadi ha guyikhaphela athu anyi ayile mulua ita nu athu agasue asalele. 28 Udi naye guzula gitadi mukunda nu ame Yehowa gudi masuta anyi ayile mulua ita; mukatshi dia athu 500 udi naye gunguzudila muthu mumoshi, mukatshi dia shitu 500 ikhale ngombe nga phunda nga imeme nu khombo, udi naye gunguzudila shitu imoshi-imoshi. 29 Shinda mbamuzula, mbamudihana gudi nganga-nzambi Eleazale gifua musomo mukunda nu Yehowa. 30 Mu shinda mbamuhana enya Isalele, udi naye guzula muthu mumoshi mukatshi dia athu 50; udi naye nji guzula shitu imoshi-imoshi mukatshi dia shitu 50, ikhale ngombe nga phunda nga imeme nu khombo nga shitu jia hembo jia maluholo agasue. Mbawuyihana gudi enya Levi ana tshita mudimo wa inzo ya tenta ya Yehowa.”

31 Moize nu nganga-nzambi Eleazale atshitshile ndaga gifua luholo Yehowa wawambelele Moize. 32 Mu ima atambudile gu ita inyi yasalele yakhalele: imeme nu khombo 675 000, 33 ngombe 72 000, 34 nu phunda 61 000. 35 Akhetu anyi akhalele khenji abungishilego muila nu yala akhalele 32 000. 36 Shinda dia athu ayile mulua ita diakhalele: imeme nu khombo 337 500. 37 Gitadi azudile mukunda nu Yehowa giakhalele, imeme nu khombo 675. 38 Ngombe jiakhalele 36 000, gitadi azudile mukunda nu Yehowa giakhalele, ngombe 72. 39 Phunda jiakhalele 30 500, gitadi azudile mukunda nu Yehowa giakhalele, phunda 61. 40 Athu akhalele 16 000, gitadi azudile mukunda nu Yehowa giakhalele, athu 32. 41 Gungima Moize wahanele gitadi gudi nganga-nzambi Eleazale gifua musomo mukunda nu Yehowa; watshitshile gifua luholo Yehowa wamuwambelele.

42 Shinda dia enya Isalele dinyi Moize wakhaphumuine nu shinda dia athu ayile mulua ita, 43 diakhalele: imeme nu khombo 337 500, 44 nu ngombe 36 000, 45 nu phunda 30 500, 46 nu athu 16 000. 47 Mu shinda dia enya Isalele, Moize wazudile muthu mumoshi mukatshi dia athu 50 nu shitu imoshi-imoshi mukatshi dia shitu 50, wayihanele enya Levi anyi akhalele mutshita mudimo wa inzo ya tenta ya Yehowa; watshitshile gifua luholo Yehowa wamuwambelele.

48 Mala anyi akhalele mutuameza masuta, yakotelesa egi mafumu a athu 1 000 nu mafumu a athu 100, ayile gudi Moize, 49 amuwambelele egi: “Esue enya mudimo waye tuatangi masuta agasue adi mu utuameji wetu, mukut’awo agasue adi guene. 50 Muthu wagasue mukatshi dietu waza muhana mulambu gudi Yehowa mu ima yahetshi muene: ima ya wolo, misanga ya gu malu, minengu, phete jia guhagela njimbu, tuzeya nu ima iko ya gudisembegela, hagula Yehowa atutotesele gubola guetu.”

51 Moize nu nganga-nzambi Eleazale atshiginyile wolo wahanele athu ene, yakotelesa egi ima yagasue ya gudisembegela. 52 Ima yagasue ya wolo inyi mafumu a athu 1 000 nu mafumu a athu 100 ahanele gudi Yehowa, yakhalele bashekele* 16 750. 53 Muthu wagasue wayile gu ita, wahetele shinda dienji mu ima atambudile. 54 Moize nu nganga-nzambi Eleazale atshiginyile wolo waahanele mafumu a athu 1 000 nu mafumu a athu 100, awubatele mu inzo ya tenta ya gudibungishila hagula enya Isalele akhale muwunguluga luholo Yehowa waakuatesele.

32 Ana a Ribene nu ana a Gade akhalele nu shitu jiavula diago, amonele egi mavu a Yazele nu a Gileade akhalele abonga mukunda nu shitu. 2 Gishina giene ana a Gade nu ana a Ribene ayile gudi Moize nu nganga-nzambi Eleazale nu gudi mafumu a enya Isalele agasue, a awambelele egi: 3 “Mavu a Atalote nu Dibona nu Yazele nu Nimela nu Heshebona nu Eleale nu Sebama nu Nebo nu Beona, 4 mavu anyi Yehowa wabingile gutuama dia enya Isalele, adi abonga mukunda nu shitu, esue enya mudimo aye tudi nu shitu jiavula diago.” 5 Azuelele luko egi: “Tuabuba, gula watshigina tuhane mavu awa abue etu. Ubembigo egi tuzawuge muta wa Yordane.”

6 Moize wawambelele ana a Gade nu ana a Ribene egi: “Mudi mumona egi idi ndaga yabonga aphangi’enu aye alue ita enue musale haha? 7 Mukunda natshi mudi naye gulebesa enya Isalele muila ha guzawuga muta wa Yordane ha gungina mu mavu anyi adi guahana Yehowa? 8 Yene ndaga yatshitshile ash’enu ha tuakhalele gu Kadeshe-Barnea, tangua a atumine ha guya mutala gifutshi. 9 Tangua ayile uu nu gu baba dia Eshekola, amonele gifutshi, alebesele enya Isalele muila ha gutuna gungina mu mavu anyi Yehowa wakhalele naye guahana. 10 Mu lusugu luene, Yehowa wavuile khabu jiakola, wadilogele egi: 11 ‘Athu anyi azogele gu Ejipitu adi nu ivo 20 uu nu holu mbaashigo mungina mu gifutshi ginyi ngalayele Abalahama nu Izake nu Yakoba, handaga atunyile gungutumagela nu mutshima umoshi; 12 phamba Kalebe mun’a Yefune muenya Kenaze nu Yoshua mun’a Nune mbaangina handaga atumagele Yehowa nu mutshima umoshi.’ 13 Yehowa wavuidile enya Isalele khabu, waawunganesele mu mavu a luselenga ivo 40 uu nu tangua gindongo gia athu agasue akalegele gubola gu meso a Yehowa giatotele. 14 Henyaha enue athu abola, mudi mukalagala ndaga gifua ash’enu ha guvudisa khabu jia Yehowa mukunda nu enya Isalele. 15 Gula muatuna gumutumagela, muene mbawubemba luko enya Isalele mu mavu a luselenga, mbamufuisa athu awa agasue.”

16 Gungima ayile muwambela Moize egi: “Tuhane njila tutunge madinda a maseso mukunda nu shitu jietu nu membo mukunda nu an’etu ha fundo edi. 17 Mbatukhala hehi ha gulua ita, mbatubalega gutuama dia enya Isalele uu nu tangua mbatuabata mu mavu awo. Uvi an’etu mbaakhala mu ubambi mu membo adi nu ibayi yakola hagula enya gifutshi egi a atshitshigo gubola. 18 Mbatushigo muvutuga gu jinzo jietu gula muenya Isalele wagasue khenji gaheta gale khapho dienji dia mavu. 19 Mbatushigo muheta khapho dia mavu hamoshi nu ene ha sambua diko dinyi dia muta wa Yordane, handaga tuahetshi gale khapho dietu dia mavu gu khanda ya mazogelo a kumbi a muta wa Yordane.”

20 Moize waavutudile egi: “Gula mukut’enu agasue muatshita ndaga eyi: Gula muazula iluilo ha gulua mukunda nu Yehowa; 21 gula mukut’enu agasue muazula iluilo, muazawuga muta wa Yordane gutuama dia Yehowa hadi muene mukaya mbalagaji jienji gutuama dienji, 22 uu nu tangua mbamutambula gifutshi egi mukunda nu Yehowa, gungima muajiya giwa guvutuga, mbamushigo mukhala nu gubola gutuama dia Yehowa nu enya Isalele. Ngenyi mavu awa mbaabua enu gutuama dia Yehowa. 23 Uvi gula muatuna gukalagala ndaga eyi, mbamukalegela Yehowa gubola. Ngenyi mbamutagana nu malamba mukunda nu gubola guenu. 24 Muajiya giwa gutunga membo mukunda nu an’enu nu madinda mukunda nu shitu jienu, uvi mudi naye gutagenesa ndaga mualaya.”

25 Ana a Gade nu ana a Ribene awambelele Moize egi: “Fumu, esue enya mudimo aye mbatukalagala ndaga jiagasue gifua luholo wazuela. 26 An’etu nu akaji’etu nu shitu jietu jiagasue jia hembo mbajisala mu membo a Gileade, 27 uvi esue enya mudimo aye mbatuzawuga muta wa Yordane, yala wagasue nu iluilo yenji ya ita, ha guya mulua ita mukunda nu Yehowa gifua luholo watuwambela.”

28 Moize wawambelele nganga-nzambi Eleazale nu Yoshua mun’a Nune nu mafumu a fami jia iphuta ya enya Isalele ndaga adi naye gukalagala mukunda nu ene. 29 Moize waawambelele egi: “Gula ana a Gade nu ana a Ribene azawuga n’enu muta wa Yordane, yala wagasue nu iluilo ya ita ha guya mulua mukunda nu Yehowa, gula muatambula nji gifutshi, mbamuahana mavu a Gileade ha gubua khapho diawo. 30 Uvi gula atuna guzula iluilo ha guzawuga n’enu, mbamukhala nawo mu gifutshi gia Kanana.”

31 Ana a Gade nu ana a Ribene amuvutudile egi: “Esue enya mudimo waye mbatukalagala ndaga jiagasue jiazuedi Yehowa. 32 Mbatuzula iluilo, mbatuzawuga muta wa Yordane ha gungina mu gifutshi gia Kanana ha meso a Yehowa, uvi khapho dietu dia mavu mbatuheta mbadikhala sambua edi dia Yordane.” 33 Hene Moize wahanele ana a Gade nu ana a Ribene nu gitshinyi gia giphuta gia Manase mun’a Yozefe ufumu wa Sihona, fumu wa enya Amole nu ufumu wa Oga, fumu wa gu Bashana, yakotelesa egi mavu awo agasue nu membo agasue akhalele hehi nu mavu ene.

34 Ana a Gade atungile* membo awa: Dibona, Atalote nu Aloele, 35 Atelote-Shofana nu Yazele nu Yogebaha, 36 nu Bete-Nimela nu Bete-Halama; membo awa akhalele nu ibayi yakola. Atungile nji madinda a maseso mukunda nu shitu jiawo. 37 Ana a Ribene atungile membo awa: Heshebona nu Eleale nu Kiriyatayime, 38 nu Nebo nu Bete-Bale-Meona (majina a membo awa asombegesewe) nu Sibema; asendesele guhana membo anyi atungile majina ako.

39 Ana a Makile mun’a Manase ayile mu mavu a Gileade, atambudile mavu ene, akayele enya Amole akhalele muene. 40 Moize wahanele Makile mun’a Manase mavu a Gileade, wasendesele gukhala guene. 41 Yayile mun’a Manase wayile nji gualuisa, watambudile membo azonda-zonda a Gileade, wahanele membo ene jina egi Havote-Yayile.* 42 Noba wayile, watambuile mavu a Kenata nu membo enji a hehi,* wahanele mavu ene jina dienji egi Noba.

33 Wawa mafundo enya Isalele akhalele muwenda gifua muakhalele mahunji awo* tangua azogele gu Ejipitu mu utuameji wa Moize nu Alona. 2 Moize wakhalele musonega majina a mafundo agasue akhalele mumagana tangua diakhalele ene muwenda, gifua muakhalele gumuwambela Yehowa. Mafundo enya Isalele akhalele mukatuga ha guya ha fundo diko enyawa: 3 Mu lusugu lua 15 lua mbeji ya thomo, enya Isalele akatugile gu Ramesese. Mu lusugu luene diago gungima dia Pake, azogele nu gikhesa* ha meso a enya Ejipitu agasue. 4 Mu tangua diene, enya Ejipitu agasue akhalele mufunda an’awo agasue a somi anyi Yehowa washiyile, handaga Yehowa wasophesele nzambi jiawo, wajihanele ndola.

5 Enya Isalele akatugile gu Ramesese, ayile muhaga phundo yawo gu Sukote. 6 Gungima akatugile gu Sukote, ayile muhaga phundo yawo gu Ethame idi mu khulo ya mavu a luselenga. 7 Hakatugile ene gu Ethame, akondomogele, ayile gu Pihahilote idi ha sambua dia Bale-Sefone, ahagele phundo yawo gutuama dia Migedole. 8 Gungima dienji akatugile gu Pihahilote, azawugile mukatshi dia kianga, ayile mu mavu a luselenga; awendele masugu thathu mu mavu a luselenga a Ethame, gungima ahagele phundo yawo gu Mara.

9 Gungima akatugile gu Mara, ahetele gu Elima. Fundo diene diakhalele nu ito ya meya 12 nu samba 70, ahagele phundo yawo guene. 10 Hakatugile ene gu Elima, ayile muhaga phundo yawo hehi nu Kianga Giabenga. 11 Gungima akatugile gu Kianga Giabenga, ayile muhaga phundo yawo mu mavu a luselenga a Sine. 12 Hakatugile ene mu mavu a luselenga a Sine, ayile muhaga phundo yawo gu Dofeka. 13 Gungima akatugile gu Dofeka, ayile muhaga phundo yawo gu Alusha. 14 Hakatugile ene gu Alusha, ayile muhaga phundo yawo gu Refidime; fundo diene diakhalelego nu meya hagula athu ajiya gunua. 15 Gungima akatugile gu Refidime, ayile muhaga phundo yawo mu mavu a luselenga a Sinayi.

16 Akatugile mu mavu a luselenga a Sinayi, ayile muhaga phundo yawo gu Kibrote-Hatava. 17 Gungima akatugile gu Kibrote-Hatava, ayile muhaga phundo yawo gu Haselote. 18 Hakatugile ene gu Haselote, ayile muhaga phundo yawo gu Litema. 19 Gungima akatugile gu Litema, ayile muhaga phundo yawo gu Limona-Pelese. 20 Hakatugile ene gu Limona-Pelese, ayile muhaga phundo yawo gu Libena. 21 Akatugile gu Libena, ayile muhaga phundo yawo gu Risa. 22 Gungima akatugile gu Risa, ayile muhaga phundo yawo gu Kehelata. 23 Hakatugile ene gu Kehelata, ayile muhaga phundo yawo gu Mulundu wa Shefele.

24 Gungima dienji akatugile gu Mulundu wa Shefele, ayile muhaga phundo gu Halada. 25 Hakatugile ene gu Halada, ayile muhaga phundo yawo gu Makelota. 26 Gungima akatugile gu Makelota, ayile muhaga phundo yawo gu Tahata. 27 Gungima dienji akatugile gu Tahata, ayile muhaga phundo yawo gu Tera. 28 Hakatugile ene gu Tera, ayile muhaga phundo yawo gu Miteka. 29 Gungima akatugile gu Miteka, ayile muhaga phundo yawo gu Hashemona. 30 Hakatugile ene gu Hashemona, ayile muhaga phundo yawo gu Mosela. 31 Gungima akatugile gu Mosela, ayile muhaga phundo yawo gu Bene-Yakane. 32 Hakatugile ene gu Bene-Yakane, ayile muhaga phundo yawo gu Hola-Hagidegade. 33 Gungima akatugile gu Hola-Hagidegade, ayile muhaga phundo yawo gu Yotebata. 34 Hakatugile ene gu Yotebata, ayile muhaga phundo yawo gu Abrona. 35 Gungima akatugile gu Abrona, ayile muhaga phundo yawo gu Esione-Gebele. 36 Gungima dienji akatugile gu Esione-Gebele, ayile muhaga phundo yawo mu mavu a luselenga a Sine, yakotelesa egi gu Kadeshe.

37 Hakatugile ene gu Kadeshe, ayile muhaga phundo yawo gu Mulundu wa Hola mu mudidilo wa mavu a Edome. 38 Nganga-nzambi Alona wayile gu Mulundu wa Hola gifua muazuelele Yehowa, wafuile guene mu givo gia 40 sendese tangua diazogele enya Isalele gu Ejipitu; yakhalele mu lusugu lua thomo lua mbeji ya thano. 39 Alona wakhalele nu ivo 123 hafuile muene gu Mulundu wa Hola.

40 Fumu Alada muenya gu Kanana, munu wakhalele mujinga gu Negebe mu gifutshi gia Kanana, wavuile egi enya Isalele wawa muza.

41 Gungima akatugile gu Mulundu wa Hola, ayile muhaga phundo yawo gu Salamona. 42 Hakatugile ene gu Salamona, ayile muhaga phundo yawo gu Punona. 43 Akatugile gu Punona, ayile muhaga phundo yawo gu Obote. 44 Gungima akatugile gu Obote, ayile muhaga phundo yawo gu Ye-Abalima mu mudidilo wa Moaba. 45 Hakatugile ene gu Iyime, ayile muhaga phundo yawo gu Dibona-Gade. 46 Gungima akatugile gu Dibona-Gade, ayile muhaga phundo yawo gu Alemone-Dibeyatama. 47 Hakatugile ene gu Alemone-Dibeyatama, ayile muhaga phundo yawo gu Milundu ya Abalima gutuama dia Nebo. 48 Gu gisugishilo, akatugile gu Milundu ya Abalima, ayile muhaga phundo yawo mu mavu a luselenga a Moaba hehi nu Muta wa Yordane ha sambua dia Yeliko. 49 Alanduile gukhala mu mavu a luselenga a Moaba mu khulo ya Muta wa Yordane, sendese gu Bete-Yeshimota uu nu gu Abele-Shitime.

50 Tangua akhalele mu mavu a luselenga a Moaba hehi nu Muta wa Yordane ha sambua diko dia Yeliko, Yehowa wawambelele Moize egi: 51 “Wambela enya Isalele egi: ‘Mudi muzawuga Muta wa Yordane ha guya mu gifutshi gia Kanana. 52 Mudi naye gukaya athu agasue a mu gifutshi giene, mudi naye nji gumuanga isongo yawo yagasue ya maseso nu isongo yawo yagasue ya utadi nu mafundo awo agasue a gijila a gukombelela.* 53 Mbamuzula gifutshi giene, mbamukhala muene handaga ame mbangumihana diago gifutshi giene hagula gibue gienu. 54 Mbamuta mubela ha gukhaphela fami jienu mavu ene. Gula adi athu avula, mbamukomesa khapho diawo, uvi gula adi athu azonda mbamuzondesa khapho diawo. Muthu wagasue mbawuheta khapho dienji ha fundo diabui mubela. Mbamuheta khapho dia mavu mu mavu ahanewa iphuta yenu.

55 “‘Uvi gula muakayelego athu a mu gifutshi giene, athu anyi mbamubemba mbaakhala gifua ima yamingina mu meso, mbaakhala nji gifua miya idi gumitua mu mbebe; ene mbaamisagesa mu gifutshi mbamukhala. 56 Ngenyi mbangumikalegela ndaga jinyi ngakhalele mutshigina guakalegela.’”

34 Yehowa wawambelele luko Moize egi: 2 “Wambela enya Isalele egi: ‘Tangua mbamungina mu gifutshi gia Kanana, talenu mididilo ya gifutshi giene mbamuheta gifua khapho dienu:

3 “‘Mudidilo wenu wa gu sud mbawusendesa mu mavu a luselenga a Sine gu khanda ya Edome. Gu khanda ya mazogelo a kumbi, mudidilo wene mbawusendesa gu songi ya Kianga gia Mungua,* 4 mbawukondomogela gu khanda ya sud ya Akelabime, mbawuya uu nu gu Sine. Gungima mbawubalegela gu sud ya Kadeshe-Barnea, mbawuya gu Hasale-Adale uu nu gu Asemone. 5 Mudidilo wene mbawukondomogela gu Asemone, mbawuya uu nu mu baba* dia Ejipitu. Gungima mbawusuga gu Kianga.*

6 “‘Gu khanda ya mayilo a kumbi, mudidilo wenu mbawukhala mu khulo ya Kianga Giakoma.* Wene mbawukhala mudidilo wenu gu khanda ya mayilo a kumbi.

7 “‘Wuwu mbawukhala mudidilo wenu gu khanda ya nord: Mbamuhaga mudidilo wenu sendese gu Kianga Giakoma uu nu gu Mulundu wa Hola. 8 Mudidilo wene mbawukatuga gu Mulundu wa Hola, mbawuya uu nu gu Lebo-Hamate,* gungima mbawusuga gu Sedade. 9 Mudidilo wene mbawulandula guya uu nu gu Zifelone, gungima mbawusuga gu Hasale-Enane. Wene mbawukhala mudidilo wenu gu khanda ya nord.

10 “‘Gu khanda ya mazogelo a kumbi, mbamuhaga mudidilo wenu sendese gu Hasale-Enane uu nu gu Shefama. 11 Mudidilo wene mbawukatuga gu Shefama, mbawuya uu nu gu Libela gu khanda ya mazogelo a kumbi a Ayine; gungima mbawubulumuga, mbawubalegela gu tumilundu tudi gu khanda ya mazogelo a kumbi a kianga gia Kinelete.* 12 Mudidilo wene mbawubalegela gu Yordane, mbawusuga gu Kianga gia Mungua. Ene mbaakhala mavu enu nu mididilo ya mavu ene.’”

13 Moize wawambelele enya Isalele egi: “Ene mavu mbamuta mubela ha gukhapha, mavu Yehowa wazuelele egi adi naye guhana iphuta 9 nu ndambo. 14 Handaga fami jia giphuta gia Ribene nu fami jia giphuta gia Gade nu gitshinyi giko gia giphuta gia Manase ahetele gale khapho diawo. 15 Iphuta mbadi nu ndambo yahetele gale khapho diawo gu khanda ya mazogelo a kumbi a Muta wa Yordane hehi nu Yeliko gu khanda ya mazogelo a kumbi.”

16 Yehowa wawambelele luko Moize egi: 17 “Wawa athu mbaamikhaphela mavu: nganga-nzambi Eleazale nu Yoshua mun’a Nune. 18 Mbamuzula fumu mumoshi mu giphuta nu giphuta ha gumikhaphela mavu. 19 Majina a athu ene enyawa: mu giphuta gia Yuda, Kalebe mun’a Yefune; 20 mu giphuta gia Simeone, Shemuele mun’a Amihuda; 21 mu giphuta gia Benjame, Elidade mun’a Kiselona; 22 mu giphuta gia Dane, fumu mumoshi, Buki mun’a Yogeli; 23 mukunda nu ana a Yozefe mu giphuta gia Manase, fumu mumoshi, Haniele mun’a Efoda; 24 mu giphuta gia Efrayime, fumu mumoshi, Kemuele mun’a Shifetana; 25 mu giphuta gia Zabulona, fumu mumoshi, Elisafana mun’a Phalenake; 26 mu giphuta gia Isakale, fumu mumoshi, Phaletiele mun’a Azana; 27 mu giphuta gia Asele, fumu mumoshi, Ahihuda mun’a Shelomi; 28 mu giphuta gia Nefetali, fumu mumoshi, Phedahele mun’a Amihuda.” 29 Ene athu Yehowa wawambelele ha gukhaphela enya Isalele mavu mu gifutshi gia Kanana.

35 Yehowa watele maga nu Moize mu mavu a luselenga a Moaba hehi nu Yordane ha sambua diko dia Yeliko, wamuwambelele egi: 2 “Wambela enya Isalele egi mu mavu mbaaheta ene adi naye guhana enya Levi membo ha gukhala. Adi naye nji guahana matemu adi hehi nu membo ene. 3 Enya Levi mbaakhala mu membo ene, matemu adi hehi nu membo ene mbaakhala mukunda nu shitu jiawo jia hembo nu ima yawo nu shitu jiawo jiko jiagasue. 4 Matemu adi hehi nu membo mbamuhana enya Levi adi naye gujieta dimbo, adi naye gukhala gukoma bakude* 1 000 sendese mu gibayi. 5 Mbamuthesa khanda jiagasue gonze ya dimbo; gu khanda ya mazogelo a kumbi bakude 2 000, gu khanda ya sud bakude 2 000, gu khanda ya mayilo a kumbi bakude 2 000, gu khanda ya nord bakude 2 000 dimbo hakatshi na katshi. Ene mbaakhala matemu a membo awo.

6 “Mbamuhana enya Levi membo a gulengela 6, hagula muthu wajiya gulengela guene gula washiya muthu, nu membo ako 42. 7 Membo agasue mbamuhana enya Levi mbaakhala 48, hamoshi nu matemu awo. 8 Mbamuzula membo mu mavu ahetele enya Isalele muaahanyi. Mu giphuta giakoma, mbamuzula membo avula, mu giphuta giazonda, mbamuzula membo azonda. Giphuta giagasue mbagihana enya Levi membo awo ako gifua mudi gukoma gua mavu ahetele ene.”

9 Yehowa wawambelele luko Moize egi: 10 “Wambela enya Isalele egi: ‘Mudi muzawuga Muta wa Yordane ha guya mu gifutshi gia Kanana. 11 Mudi naye gutomba membo a gulengela anyi ajiyilego gukhala lamba mukunda nu enue ha guheta guene, hagula muthu washiyi muthu uvi gakhalelego nu matangi a gumushiya* wajiya gulengela guene. 12 Membo ene mbaamikuatesa ha gulenga muthu udi naye guvutula gubola mukunda nu muthu wafui,* hagula muthu washiyi muthu gafuigo uu nu tangua mbaasophesa mulonga wene gutuama dia athu. 13 Membo 6 mbamutomba mbaamikuatesa mukunda nu ndaga yene. 14 Mbamuhaga membo thathu a gulengela gu sambua edi dia Muta wa Yordane, membo ako thathu mu gifutshi gia Kanana. 15 Membo ene 6 a gulengela mbaakhala mukunda nu enya Isalele nu ngenji jidi mukatshi diawo nu athu akatugile mu mafundo ako ha guza mujinga mu membo awo, hagula muthu washiyi muthu uvi muene gakhalelego nu matangi a gumushiya wajiya gulengela guene.

16 “‘Gula muthu wawasa muthu gima gialondewe nu utadi, muthu muene wafua, muthu wawashi muthu muene udi mushiyi. Muthu muene udi naye nji gushiyiwa. 17 Nga ndo gula muthu wawasa muthu seso diajiya gumushiya, muthu muene wafua, udi mushiyi. Muene nji udi naye gushiyiwa. 18 Gula muthu wawasa muthu gima gialondewe nu mutshi ginyi giajiya gumushiya, muthu muene wafua, udi mushiyi. Muene nji udi naye diago gushiyiwa.

19 “‘Muthu udi naye guvutula gubola mukunda nu muthu wafui, muene udi naye gushiya muthu washiyi muthu muko. Gula watagana nu muthu muene, muene hakhenji udi naye gumushiya. 20 Gula muthu walutula* muthu nu khuta nga wamusonona gima nu matangi abola,* muthu muene wafua, 21 nga ndo gula muthu wawasa muthu muko khome nu khuta, muthu muene wafua, muthu wamuwashi udi naye diago gushiyiwa. Muthu muene udi mushiyi. Gula muthu udi naye guvutula gubola mukunda nu muthu wafui watagana nu muthu washiyi muthu muko, udi naye gumushiya.

22 “‘Uvi gula muthu muene gamulutuilego nu khuta nga gamusononuego gima nu matangi abola,* 23 nga ndo gula muene nu gumona ndo wabuishila muthu muene seso, muthu muene wafua, gula gakhalelego n’enji nu umbalagaji nga gakambelego gumutshita gubola, 24 athu* adi naye gusophesa mulonga wa muthu washiyi muthu muko nu muthu udi naye guvutula gubola mukunda nu muthu wafui mu gudivua nu mikhuala eyi. 25 Athu adi naye guhuluisa muthu washiyi muthu muko ha mago a muthu udi naye guvutula gubola mukunda nu muthu wafui, adi naye gumuvutula mu dimbo dia gulengela, fundo dialengele muene; udi naye gusala guene uu nu tangua mbadifua nganga-nzambi wakoma munu wambiwe maji a gijila.

26 “‘Uvi gula muthu washiyile muthu wazoga mu mudidilo wa dimbo dia gulengela diayile muene, 27 gungima muthu udi naye guvutula gubola mukunda nu muthu wafui wamumona hanze ya mudidilo wa dimbo dialengele muene nu wamushiya, mbagashigo mukhala nu mukudi wa mahatshi. 28 Muthu muene udi naye gukhala mu dimbo dialengele muene uu nu tangua nganga-nzambi wakoma mbawufua. Gula nganga-nzambi wakoma wafua, muthu muene wajiya giwa guvutuga mu mavu enji. 29 Mbamukalegela ndaga eji gifua mukhuala ha gusophesa milonga ya luholo elu mu indongo yenu yagasue, mu mafundo agasue mbamukhala.

30 “‘Muthu wagasue washiya muthu udi naye gushiyiwa mukunda nu ndaga yatshitshi muene, gula matemue* atshiginyisa ndaga yene; uvi nga muthu mumoshi gajiyilego gushiyiwa gula temue udi phamba mumoshi. 31 Mushigo naye guzula gibawu ha guhuluisa monyo wa muthu udi naye gushiyiwa, handaga muthu muene washiyi muthu muko; udi naye diago gushiyiwa. 32 Mushigo naye nji guzula gibawu ha gubemba egi muthu wayile mu dimbo dia gulengela avutuge ha gukhala mu mavu enji, hadi nganga-nzambi wakoma khenji gafua gale ndo.

33 “‘Mushigo naye gubolesa gifutshi mudi mukhala handaga mahatshi ana bolesa mavu; gushigo nga nu gima giajiya gukatula* mukudi wa mahatshi amuangewa mu gifutshi, phamba mahatshi a muthu munu wamuangi mahatshi ene. 34 Mushigo naye gusegulula mavu mudi mukhala, gifutshi ngudi mukhala; handaga ame Yehowa ngana khala mukatshi dia enya Isalele.’”

36 Mafumu a fami jia Gileade mun’a Makile, mujigulu wa Manase, a mu fami jia ana a Yozefe asuenele, atele maga nu Moize nu mafumu, nu mafumu a fami jia enya Isalele. 2 Amuwambelele egi: “Fumu, Yehowa waguwambelele ha guta mubela ha gukhaphela enya Isalele mavu; Yehowa waguwambelele nji ha guhana khapho dia mavu dia phangi’etu Selofehade gudi an’enji a akhetu. 3 Gula ana ene a akhetu adizula mu ulo nu mala a mu giphuta giko gia Isalele, khapho diawo mbadikatudiwa mukatshi dia khapho dia ash’etu, mbaadilunda mu khapho dia giphuta gia alumi’awo; ngenyi khapho diene mbadikatudiwa mukatshi dia khapho dia giphuta gia ash’etu. 4 Tangua Givo gia Gukatudiwa mu Uhiga mbagitagana mukunda nu enya Isalele, mbaalunda khapho dia akhetu awa mu khapho dia giphuta gia alumi’awo; ngenyi khapho diawo mbadikatudiwa mu khapho dia giphuta gia ash’etu.”

5 Moize wawambelele enya Isalele ndaga jiamuwambelele Yehowa egi: “Ndaga yazuedi giphuta gia ana a Yozefe idi ya diago. 6 Ndaga yazuela Yehowa mukunda nu ana a Selofehade yene eyi: ‘Ajiya gudizula mu ulo nu muthu wagasue atshigina. Uvi muthu muene udi naye gukhala mu fami ya giphuta gia sh’awo. 7 Khapho dia enya Isalele dishigo naye gukatuga mu giphuta gimoshi ha guya mu giphuta giko, handaga enya Isalele adi naye gubamba khapho dia giphuta gia akhakh’awo. 8 Mona wa mukhetu wagasue udi nu khapho mukatshi dia iphuta ya Isalele, udi naye gudizula mu ulo nu muenya mu giphuta gia sh’enji; ngenyi enya Isalele mbaabamba khapho dia akhakh’awo. 9 Khapho dia giphuta gimoshi dishigo naye guya mu giphuta giko; giphuta giagasue gia Isalele gidi naye gubamba khapho diawo.’”

10 Ana a Selofehade a akhetu akalegele ndaga gifua luholo Yehowa wawambelele Moize. 11 Ana a Selofehade a akhetu: Mahala, Tilesa, Hogela, Milka nu Nowa adizudile mu ulo nu ana a aphangi’a sh’awo. 12 Adizudile mu ulo nu mala a mu fami jia Manase mun’a Yozefe, hagula khapho diawo disale mu giphuta gia fami ya sh’awo.

13 Wawa badesizio a Yehowa nu mikhuala yahanele muene enya Isalele mu njila ya Moize mu mavu a luselenga a Moaba hehi nu Yordane ha sambua diko dia Yeliko.