NEHEMIYA

1 Eji mbimbi jia Nehemiya* mun’a Hakaliya: Mu mbeji ya Kiseleu* mu givo gia 20, ngakhalele mu inzo ya fumu gu Suse. 2 Mu tangua diene, phangi’ami Hanani nu mala ako akatugile gu Yuda ajile. Ngaatogele ha gungutela mene jia enya Yuda anyi akatugile mu uhiga, nu mene jia dimbo dia Yelusalema. 3 Anguhanele mvutu egi: “Athu akatugile mu uhiga anyi adi mu provense adi mutagana nu lamba diakola, adi nji muvuishiwa musonyi. Ibayi ya dimbo dia Yelusalema idi ya gumuangana, mifulo yenji idi ya guhia tshuya.”

4 Tangua ngavuile mbimbi jiene, ngakhalele hashi, ngadidile masugu avula, ngatunyile gudia ha gukombelela Nzambi wa mu dilu. 5 Ngazuelele egi: “Oo Yehowa Nzambi wa mu dilu, Nzambi wakoma munu udi naye guvuiwa woma, wana nemesa gikotelo giaye nu wana monesa guzumba gua giamatshidia gudi athu ana guguzumba nu ana tumagela mikhuala yaye, 6 ngabuba tegelela muabonga, kangula meso aye utegelele gisambu ngudi mutshita mangino gutuama diaye, ame muenya mudimo waye. Ngudi mukombelela phipha nu muanya mukunda nu enya Isalele, ngudi nji muzuela gubola guagukalegele ene. Ame nu enya fami ya tata tuagukalegele nji gubola. 7 Tuakalegele diago gubola gu meso aye luholo tuatunyile gutumagela mikhuala nu malongo nu badesizio aye wahanele gudi muenya mudimo waye Moize.

8 Ngabuba, wunguluga ndaga wawambelele* muenya mudimo waye Moize egi: ‘Gula muasalelego ya gujinginyina gudi ame, mbangumimuanga mukatshi dia athu. 9 Uvi gula muavutuga gudi ame, muanemesa mikhuala yami nu muayitumagela, ikhale mudi ya gumuangana uu nu gu songi ya mavu, mbangumibungisa mafundo mbamukhala, gungima mbangumivutula ha fundo ngatombele ha guhaga jina diami.’ 10 Adi enya mudimo aye, adi nji athu aye anyi wahuluishile* nu ngolo jiaye jiavula nu koko diaye dia ngolo. 11 Oo Yehowa, ngabuba tegelela muabonga gisambu gia muenya mudimo waye nu gisambu gia enya mudimo aye ako ana vuila jina diaye woma. Ngabuba, ngukuatese mu ndaga ngudi mutoga mangino hagula fumu anguvuile khenda.”

Mu tangua diene ngakhalele mutshita mudimo wa guhana fumu matombe.

2 Mu givo gia 20 gia uhinyinyi wa Fumu Aletakelesese mu mbeji ya Nisana,* ahagele matombe gutuama dienji, ngazanguile matombe ene gifua luholo ngakhalele mutshita, ngaahanele fumu. Mu lusugu luene ngakhalele nu gikenene, uvi khenji ngamaganelego gutuama dienji nu gikenene. 2 Hene fumu wanguhudile egi: “Mukunda natshi udi nu gikenene hoho ushigo mukata? Ngudi mumona egi gudi nu ndaga idi gugusagesa.” Tangua ngavuile ngenyi woma wangukuatele.

3 Gungima ngazuelele egi: “Fumu akhale nu monyo! Ngudi nu gikenene handaga dimbo diafundjiwe akhakh’ami didi makhulu, mifulo ya dimbo diene nji yakondewe tshuya.” 4 Fumu wanguhudile egi: “Nguwambele, itshi udi mutshigina?” Ngakombelele mbala imoshi Nzambi wa mu dilu. 5 Gungima ngamuvutudile egi: “Fumu gula watshigina, nu wavuila nji muenya mudimo waye khenda, ngutume gu Yuda mu dimbo diafundjiwe akhakh’ami hagula nguditunge luko. 6 Mu tangua diene mukaji’a fumu wakhalele hashi hehi nu fumu. Fumu wanguhudile egi: “Njila* yene mbayiguzula masugu guvula gutshi? Tangua ditshi mbawuvutuga? Fumu watshiginyile egi nguye, hene ngamuwambelele tangua mbanguvutuga.

7 Gungima ngamuwambelele egi: “Fumu gula watshigina, anguhane mikanda mukunda nu baguvernere a mu mavu a ha Sambua dia Muta,* hagula angubalegese muabonga mu mavu awo uu nu tangua mbanguheta gu Yuda, 8 anguhane nji mukanda mukunda nu Asafe mubambi wa gishitu gia fumu hagula anguhane mabaya ha gulondela mifulo ya inzo idi nu ibayi yakola hehi nu tempelo,* nu ha gutunga ibayi ya dimbo nu inzo mbangukhala.” Hene fumu wanguhanele ima yene, handaga Nzambi wami wakhalele nu ame.

9 Gungima ngahetele gudi baguvernere a mu mavu a ha Sambua dia Muta, ngaahanele mikanda ya fumu. Fumu wanguhanele nji mafumu a masuta nu awendeshi a tubalu ha guya nawo. 10 Tangua Sanabalata muenya gu Bete-Holone nu Tobia muenya Amona munu wakhalele muenya mudimo wa fumu avuile ndaga yene, asuangulugilego nga hazonda luholo muthu mumoshi wajile mukalagala ndaga jiabonga mukunda nu enya Isalele.

11 Gungima ngahetele gu Yelusalema, ngatshitshile guene masugu thathu. 12 Ngazugile mu phipha nu athu azonda ngakhalele nawo, ngawambelelego nga muthu mumoshi ndaga Nzambi wami wanguwambelele* ha gutshita mukunda nu Yelusalema, ngakhalele nji phamba nu shitu imoshi yakhalele gungubata. 13 Ngazugile mu phipha ngazogele gu Mufulo wa mu Baba, ngabalegele gutuama dia Gito gia Muta gia Nyoga Yakoma, ngayile uu nu gu Mufulo wa Shita, ngatalele muabonga ibayi ya Yelusalema yakhalele ya gumuangana nu mifulo yenji yakondewe tshuya. 14 Ngabalegele uu nu gu Mufulo wa Gito gia Muta nu gu Gijiba* gia Fumu, njila yakhalelego yakoma hagula shitu yakhalele gungubata ibalege. 15 Uvi mu phipha yene ngalanduile guya mu baba,* ngakhalele muya nu gutala muabonga ibayi, gungima ngabalegele gu Mufulo wa mu Baba ha guvutuga mu dimbo.

16 Atuameji akhalelego mujiya fundo ngayile nu ndaga ngakhalele mutshita, handaga ngakhalele khenji nguwambela galego enya Yuda nu nganga-nzambi nu manene nu atuameji nu athu ako akhalele mutshita mudimo nga ndaga imoshi. 17 Gungima ngaawambelele egi: “Enue hakhenu mudi gudimonela lamba tudi nadio, nu luholo Yelusalema yabua makhulu, mifulo yenji nji yakondewe tshuya. Izenu tutungenu luko ibayi ya Yelusalema, hagula tulandulago guvua musonyi.” 18 Gungima ngaawambelele luholo Nzambi wami wangukuatesele nu mbimbi jiangulezele fumu. Tangua avuile ndaga yene, azuelele egi: “Tusendesenu gutunga.” Hene adihanele gikhesa* ha gutshita mudimo muabonga.

19 Tangua Sanabalata muenya gu Bete-Holone nu Tobia muenya Amona munu wakhalele muenya mudimo wa fumu nu Gesheme muenya Alabe avuile ndaga yene, asendesele gutulela nu gutusegulula egi: “Itshi mudi mutshita? Mudi mulumbugila fumu ba? 20 Uvi ngaavutudile egi: “Nzambi wa mu dilu mbawutukuatesa ha gumanesela mudimo owu, esue enya mudimo enji mbatulandula gutunga. Uvi enue mushigo nga nu gima gimoshi gia gutshita nu Yelusalema, mushigo nga nu shinda.* Ndaga* jia dimbo edi jishigo gumitadila.”

3 Nganga-nzambi wakoma Eliyashibe nu aphangi’enji a mala a nganga-nzambi, asendesele gulonda Mufulo wa Imeme. Awubuishile wa gijila* nu ahagele ijidigo yenji; abuishile gitshinyi giakhalele musendesa ha Mufulo wa Imeme gia gijila, gitshinyi giene giayile uu nu gu Inzo Yaleha ya Mea, giayile nji uu nu gu Inzo Yaleha ya Hananele. 2 Mala a gu Yeliko akhalele mutunga luko gitshinyi giko gia gibayi hehi nawo. Zakule mun’a Imeli nji wakhalele mutunga gitshinyi giko gia gibayi gialanduile.

3 Ana a Hasenaya a mala alondele Mufulo wa Jishui; ahagele makunji enji, gungima ahagele nji ijidigo yenji nu ima ya gukangela mufulo.* 4 Melemota mun’a Uriya mujigulu wa Hakosa watungile luko gitshinyi gia gibayi giakhalele hehi nawo, Meshulame mun’a Belekiya mujigulu wa Meshezabela watungile luko gitshinyi giko gialanduile. Zadoke mun’a Bana nji watungile luko gitshinyi gia gibayi giakhalele hehi nu Meshulame. 5 Enya gu Tekoa atungile luko gitshinyi gia gibayi gialanduile, uvi athu awo akhalele nu inemo atunyile gudibulumuisa ha gutshita mudimo mu utuameji wa athu akhalele guatalela.

6 Yoyada mun’a Phasea nu Meshulame mun’a Besodeya alondele luko Mufulo wa Dimbo Dikulu, ahagele makunji enji, gungima ahagele nji ijidigo yenji nu ima ya gukangela mufulo wene. 7 Melatiya muenya Gibeona nu Yadona muenya Melonota atungile luko gitshinyi gia gibayi gialanduile. Mala ene akhalele enya gu Gibeona nu gu Mispa, akhalele nji mu utuameji wa guvernere wa mu mavu a ha Sambua dia Muta.* 8 Uziele mun’a Halaya munu wakhalele mukatshi dia mbembo jia utadi wa wolo watungile luko gitshinyi giko gia gibayi gialanduile. Hananiya wakhalele mulonda mananashi watungile gitshinyi giko gia gibayi giakhalele hehi n’enji, ambile maseso gu Yelusalema uu nu gu Gibayi Giakoma. 9 Lefaya mun’a Hule fumu wa gitshinyi gia distrike dia Yelusalema, watungile luko gitshinyi giko gia gibayi giakhalele hehi nawo. 10 Yedaya mun’a Halumafa watungile luko gitshinyi gia gibayi giakhalele gutuama dia inzo yenji. Hatusha mun’a Hashabeneya watungile luko gitshinyi giko gia gibayi gialanduile.

11 Malakiya mun’a Halima nu Hashuba mun’a Phahata-Moaba atungile luko gitshinyi giko* gia gibayi, nu Inzo Yaleha ya Fulu ya Guwetshiela Mapha. 12 Shaluma mun’a Halohesha fumu wa gitshinyi gia distrike dia Yelusalema, watungile luko gitshinyi giko gia gibayi gialanduile nu an’enji a akhetu.

13 Hanuna nu enya gu Zanoa atshitshile mudimo gu Mufulo wa mu Baba, awulondele ahagele ijidigo yenji nu ima ya gukangela mufulo wene; atungile luko gibayi mu ulehelo wa bakude* 1 000 uu nu gu Mufulo wa Shita. 14 Malakiya mun’a Lekabe fumu wa distrike dia Bete-Hakelema, watshitshile mudimo gu Mufulo wa Shita; wawulondele, wahagele ijidigo yenji nu ima ya gukangela mufulo wene.

15 Shaluna mun’a Kole-Hoze fumu wa distrike dia Mispa walondele luko Mufulo wa Gito; wawutungile nu yangi dienji, wahagele ijidigo yenji nu ima ya gukangela mufulo wene. Watungile nji gibayi gia Wina dia Meya dia Shela* hehi nu Gilanga gia Fumu uu nu gu gikalo* giakhalele mukatuga gu Dimbo dia Davidi.

16 Gungima dienji, Nehemiya mun’a Azebuka fumu wa gitshinyi gia distrike dia Bete-Sule, watungile luko gibayi sendese ha sambua dia Malumba a Davidi uu nu gu wina dia meya dinyi dialondewe, wagitungile uu nu gu Inzo ya Athu Abalega Ngolo.

17 Gungima dienji, enya Levi awa atshitshile nji mudimo wene: Lehuma mun’a Bani; Hashabiya fumu wa gitshinyi gia distrike dia Keyila, watungile luko gitshinyi giko gia gibayi gialanduile. Hashabiya watshitshile mudimo wene mukunda nu distrike dienji. 18 Enya Levi ako atshitshile nji mudimo wa gutunga luko gibayi: Bavayi mun’a Henadada fumu wa gitshinyi gia distrike dia Keyila, watungile gitshinyi giko gia gibayi gialanduile.

19 Ezele mun’a Yeshua fumu wa gu Mispa, watungile luko gitshinyi giko gia gibayi ha sambua dia gamulundu uu nu gu inzo ya gubambela ima ya masuta gu makunji.

20 Baruke mun’a Zabayi watshitshile mudimo nu gikhesa, watungile luko gitshinyi giko gia gibayi gialanduile, sendese fundo diakhalele makunji uu nu gu mufulo wa inzo ya nganga-nzambi wakoma Eliyashibe.

21 Melemota mun’a Uriya mujigulu wa Hakosa watungile luko gitshinyi giko gia gibayi, sendese gu mufulo wa inzo ya Eliyashibe uu nu gu gisugishilo gia inzo yene.

22 Nganga-nzambi jia mu distrike dia Yordane* jiatungile luko gitshinyi giko gia gibayi gialanduile. 23 Benjame nu Hashuba atungile luko gitshinyi giko gia gibayi giakhalele gutuama dia inzo yawo hehi nu nganga-nzambi. Azariya mun’a Maseya mujigulu wa Ananiya watungile luko gitshinyi giko gia gibayi giakhalele gutuama dia inzo yenji. 24 Binuyi mun’a Henadada watungile luko gitshinyi giko gia gibayi gialanduile, sendese gu inzo ya Azariya uu nu fundo diakhalele makunji, watungile nji uu nu gu khomo* ya gibayi gia dimbo.

25 Phalale mun’a Uzayi watungile luko gitshinyi giko gia gibayi giakhalele gutuama dia Makunji nu dia inzo yaleha yakhalele ya gukuategena nu Inzo ya Fumu, inzo ya gosa yakhalele mu gibanzala gia abambi. Phedaya mun’a Palosha watungile luko gitshinyi giko gia gibayi gialanduile.

26 Athu ana tshita mudimo gu tempelo* anyi akhalele mujinga gu Ofele atungile luko gibayi uu nu gutuama dia Mufulo wa Meya wakhalele gu khanda ya mazogelo a kumbi, nu gu inzo yaleha idi hanze gu muila wa gibayi.

27 Enya gu Tekoa atungile luko gitshinyi giko gia gibayi giakhalele musendesa gutuama dia inzo yaleha yakoma yakhalele hanze gu muila wa gibayi uu nu gu gibayi gia Ofele.

28 Nganga-nzambi jiatungile luko gitshinyi giakhalele gu khanda ya Mufulo wa Tubalu, muthu nu muthu gutuama dia inzo yenji.

29 Zadoke mun’a Imele watungile luko gitshinyi giko gia gibayi gialanduile giakhalele gutuama dia inzo yenji.

Shemaya mun’a Shekania mubambi wa mufulo wa gu khanda ya mazogelo a kumbi watungile luko gitshinyi giko gialanduile.

30 Hananiya mun’a Shelemiya nu Hanuna mun’a Zalafa wa 6, atungile luko gitshinyi giko gia gibayi gialanduile.

Meshulame mun’a Belekiya watungile luko gitshinyi giko gia gibayi giakhalele gutuama dia inzo* yenji.

31 Malakiya munu wakhalele mbembo ya utadi wa wolo* watungile luko gitshinyi giko gia gibayi gialanduile uu nu gu inzo ya athu akhalele mutshita mudimo gu tempelo* nu enya mungenda, gutuama dia Mufulo wa Gutalela uu nu gu sugu ya gosa ha khomo.

32 Mbembo jia utadi wa wolo nu enya mungenda, atungile luko gitshinyi gia gibayi giakhalele hakatshi dia sugu ya gosa ha khomo nu Mufulo wa Imeme.

4 Tangua Sanabalata wavuile egi, tuakhalele mutunga luko gibayi gia Yelusalema wavuile khabu nu wadisagesele muavula. Wasendesele nji gulela enya Yuda. 2 Wazuelele ha meso a mafuta enji a mudimo nu ha meso a masuta a enya Samaliya egi: “Ndaga itshi imonya eyi ya enya Yuda idi mutshita? Adi mutangiza egi mbaamanesela diago mudimo owu hakhawo ba? Mbaahana milambu ba? Mbaamanesela mudimo wene mu lusugu lumoshi ba? Mbaavumbula luko maseso a gushidila adi azala pha nu fuphi ha shita ha guakalegela luko ba?”

3 Gungima Tobia muenya Amona wakhalele ya gumagana hehi n’enji wazuelele egi: “Gula mukenge wakanduga gu gibayi gia maseso adi mutunga, mbawugibuisa.”

4 Nehemiya wakombelele egi: Oo Nzambi wetu, tegelela luholo athu awa adi gutusegulula, tshita egi ndaga jiabola adi muzuela mukunda nu esue, jiavutugile; ahane ha mago a mbalagaji jiawo hagula a abate mu uhiga mu gifutshi giko. 5 Ubuitshigo mutshima gu gubola guawo, waatoteselago nji gubola guawo handaga ashingi athu adi mutunga gibayi.

6 Tualanduile gutunga gibayi, tuakuatenesele ibayi yagasue, tuayikanduishile uu nu hakatshi na katshi. Athu akhalele gudihana diago gu mudimo.

7 Tangua Sanabalata nu Tobia nu enya Alabe nu enya Amona nu enya Asedode avile egi mudimo wa gulonda ibayi ya Yelusalema wakhalele muya gutuama nu tudi gale mushita mawina akhalele gu ibayi, avile khabu jiabala. 8 Ayile giphungi ha guza gutuluisa gu Yelusalema nu ha guzola matululu mu dimbo. 9 Uvi tuakombelele Nzambi wetu, tuahagele nji athu ha gutubamba mu phipha nu mu muanya.

10 Enya Yuda akhalele muzuela egi: “Athu adi mutshita mudimo* ahuila, mvindu* nji idi yavula; mbatushigo mumanesela gutunga gibayi.”

11 Mbalagaji jietu jiakhalele muzuela egi: “Mbatuazogela mu gisagumuisa, mbatuashiya nu mbatukanga midimo yawo.

12 Tangua diagasue enya Yuda anyi akhalele mujinga hehi nawo akhalele muza gudi esue, akhalele gutuwambela* egi: “Mbalagaji mbajikatuga gu khanda jiagasue ha guza gutuluisa.”

13 Hene ngahagele mala gungima dia gibayi gu khanda ya mbongo, mu mafundo anyi gibayi giakhalele nu mahulu. Ngaahagele gifua muakhalele fami jiawo; akhalele nu phogo jiawo jia khusa nu milumbu nu mata a manana. 14 Tangua ngamonele egi athu akhalele muvua woma, ngawambelele mbala imoshi manene nu atuameji nu athu agasue egi: “Muavilago woma. Wungulugenu egi Yehowa udi Nzambi wakoma nu udi naye guvuiwa woma; luenu mukunda nu aphangi’enu, nu an’enu a mala nu a akhetu, nu akaji’enu nu jinzo jienu.

15 Mbalagaji jietu jiavile egi tuajiyi ndaga akhalele mulonda ha gutshita nu Nzambi wa giamatshidia wabolesa ndaga jiene. Gungima mukut’etu agasue tuasendesele luko gutshita mudimo wa gutunga gibayi. 16 Sendese mu lusugu luene, ndambo ya athu akhalele mutshita mudimo, uvi ndambo iko ya athu akhalele mubata milumbu nu tshibu nu mata a manana nu tuzagu tua ita. Atuameji akhalele mumagana gungima dia enya Yuda ha gukuatesa 17 athu akhalele mutunga gibayi. Athu anyi akhalele mubata inemo akhalele mutshita mudimo nu koko dimoshi, uvi gu koko diko akhalele nu mufula. 18 Muthu wagasue wakhalele mutunga wakhalele nu phogo ya khusa ha kete, uvi muthu wakhalele nu ginemo gia gushiga phungi wakhalele ya gumagana hehi nu ame.

19 Gungima ngawambelele manene nu atuameji nu athu ako egi: “Mudimo udi wavula wa gutshita gu gibayi, uvi esue tudi thanya-thanya mu gibayi giene. 20 Gula muavua phungi mudila, mbamudibungisa ha fundo tudi. Nzambi wetu mbawutuluila.”

21 Hene tualanduile gutshita mudimo, uvi ndambo iko ya athu akhalele nu mifula ha mago, sendese mu gimenegena uu nu tangua themua jiakhalele muzoga. 22 Mu tangua diene, ngawambelele athu egi: “Yala wagasue nu muenya mudimo wenji adi naye gubanda mu dimbo dia Yelusalema ha gutubamba mu phipha nu gutshita mudimo mu muanya.” 23 Nga muthu mumoshi gasombegeselego milele yenji ikhale ame, nga aphangi’ami a mala, nga enya mudimo ami, nga masuta akhalele gutubamba anyi tuajile nawo. Muthu wagasue mukatshi dietu wakhalele nu mufula wenji gu koko dienji dia madia.

5 Uvi mala nu akaji’awo asendesele guboguta muavula mukunda nu aphangi’awo enya Yuda. 2 Ako mukatshi diawo akhalele muzuela egi: “Tudi nu ana a mala nu ana a akhetu avula. Tudi nu funu ya ima ya gudia hagula tusale nu monyo. 3 Uvi ako akhalele muzuela egi: “Tudi muhana mahia etu a mbuto jiko nu mahia etu a vinyo nu jinzo jietu ha guheta ima ya gudia.” 4 Ako nji akhalele muzuela egi: “Tuakuatesele mahia etu a mbuto jiko nu mahia etu a vinyo ha guheta mbongo jia gufuta gitadi gia fumu. 5 Ene adi aphangi’etu, adi enya fami yetu, an’etu adi gifua an’awo; uvi tudi naye guhana an’etu a mala nu a akhetu gifua ahiga, an’etu ako a akhetu ayile gale mu uhiga. Uvi esue tushigo nu ndaga ya gutshita hagula mulonga wene ukalegewago luko, handaga mahia etu a mbuto jiko nu mahia etu a vinyo abuile gale a athu ako.

6 Ngavuile khabu jiakola tangua ngavuile gudila guawo nu tangua anguwambelele ndaga eji jiagasue. 7 Hene ngatangijile muavula mukunda nu ndaga jiene, ngabalele* nji manene nu atuameji, ngaawambelele egi: “Mudi musomba aphangi’enu ima, uvi gungima mudi guatoga ha gumivutudila nu ima iko holu.”

Ngalondele nji gudibungisa guakoma mukunda nu ene. 8 Gungima ngaawambelele egi: “Tuatshitshile yagasue tuakhalele naye gutshita ha gusumba luko aphangi’etu enya Yuda anyi adigiwe mu ifutshi iko; uvi henyeha mudi mutshigina gudiga aphangi’enu hagula gungima tuaasumbe luko ba?” Tangua avuile ndaga ngazuelele, ahenele tedie amonelego nga gima giko gia guzuela. 9 Ngaawambelele luko egi: “Ndaga mudi mutshita ishigo yabonga. Mudi naye guvuila Nzambi wetu woma hagula enya ifutshi iko, yakotelesa egi mbalagaji jietu jikhadigo nu ndaga yabola yaguzuela mukunda nu esue. 10 Ame nu aphangi’ami tudi guasomba mbongo nu mbuto uvi tushigo guatoga ha gutuvutudila nu ima iko holu. Ngabuba an’etu gula tuasomba athu ako ima, tuatogigo ha gutuvutudila nu ima iko holu. 11 Sendese mangino, avutuilenu mahia awo a mbuto jiko nu mahia awo a vinyo nu a olive nu jinzo jiawo. Avutuilenu nji ima* muatogele holu dia mbongo nu mbuto nu matombe ahe-ahe nu maji muaasombele.

12 Mala ene azuelele egi: “Mbatuavutuila ima yene, mbatushigo luko guatoga nga gima. Mbatutshita gifua luholo wazuela.” Hene ngatamegele nganga-nzambi, gungima ngatogele nji mala ene ha gudiloga egi mbaatagenesa ndaga alayi. 13 Ngalugumuine* benga* dia mulele wami, ngazuelele egi: “Muthu wagasue mbawutuna gutagenesa laji edi, Nzambi mbawumunyigisa, mbawumuzola mu inzo yenji, mbawumutambula nji ima yenji; ngenyi mbawunyigishiwa nu mbawusala mago a gituhu.” Hene hungu diagasue diazuelele egi: “Amen!”* Atumbuishile Yehowa, mala ene atshitshile nji ndaga gifua luholo alayele.

14 Uvi sendese lusugu Fumu Aletakelesese wangutombele guvernere wa mu mavu a Yuda mu givo gia 20 gia uhinyinyi wenji uu nu mu givo gia 32 gia ufumu wenji, yakotelesa egi ivo 12, ame nu aphangi’ami tuadilego ima ana hana guvernere. 15 Uvi athu adiangele gukhala baguvernere mu mavu a Yuda asagesele athu, lusugu nu lusugu akhalele muzula bashekele* 40 a utadi wa siliva gudi athu mukunda nu mapha nu vinyo. Enya mudimo awo nji akhalele musagesa athu. Uvi ame ngatshitshilego ngenyi handaga ngakhalele muvuila Nzambi woma.

16 Ngadihanele nji gu mudimo wa gutunga gibayi, tuazudilego nga dihia dia muthu, enya mudimo ami agasue adibungishile guene ha gutshita mudimo. 17 Enya Yuda 150 nu atuameji nu athu akhalele mukatuga mu ifutshi iko ha guza gututala akhalele mudia gu mesa ami. 18 Lusugu nu lusugu akhalele gungutelegela* ngombe imoshi ya mulume, nu imeme 6 yabonga nu tunjila. Gungima dia masugu 10 akhalele gutubatela matombe avula a maluholo agasue. Ikhale ngenyi ngatogelego ima ana hana guvernere, handaga athu akhalele ana tshita gale midimo yakola. 19 Oo Nzambi wami! nguwunguluge, ngukalegele nji gubonga mukunda nu ndaga jiagasue ngatshitshile mukunda nu athu awa.

6 Tangua awambelele Sanabalata nu Tobia nu Gesheme muenya Alabe nu mbalagaji jietu jiko egi ngatungile luko gibayi, nu gushigo luko nga nu hulu* dimoshi gu gibayi giene (ikhale mu tangua diene ngakhalele khenji ngumba galego mifulo), 2 Sanabalata nu Gesheme angutumidile mbala imoshi mbimbi egi: “Iza tudivue tangua tuajiya gudimona mu membo a mu baba dia Ono.” Uvi akhalele mutshigina gungutshita gubola. 3 Ngatumile athu ha guawambela egi: “Ngudi nu mudimo wavula wa gutshita, ngushigo nu luholo lua gubulumuga gununu handaga gula ngaza, mudimo uza mubatuga. 4 Angutumile mbimbi jiene jia luholo lumoshi mbala nguana, ame nji ngakhalele guahana mvutu yene imoshi mu mbala jiene jiagasue.

5 Gungima Sanabalata wangutumidile muenya mudimo wenji nu mbimbi yene imoshi mbala ya thano, muenya mudimo muene wakhalele nu mukanda wagukangula ha mago. 6 Mukanda wene wakhalele wagusonega egi: “Athu a mu ifutshi iko adi muzuela egi aye nu enya Yuda mudi mutshigina gulumbuga, Gesheme nji udi muzuela ndaga yene. Gishina giene mudi mutunga luko gibayi. Athu adi muzuela nji egi udi mutshigina gubua fumu wa enya Yuda. 7 Aye watombi nji baprofete ha guwambela athu agasue gu Yelusalema egi: ‘Gudi nu fumu gu Yuda!’ Gualeha ndo fumu uza mujiya ndaga eji. Iza hagula tuzuelele mulonga wene.

8 Uvi ngamutumile mvutu egi: “Ndaga eji jiagasue udi muzuela jishigo jia giamatshidia; jidi mukatuga mu matangi’aye.”* 9 Mukut’awo agasue akhalele mukamba gutuvuisa woma, azuelele egi: “Mbaaleba muila,* mbaashigo mumanesela mudimo wene.” Uvi ngakombelele Nzambi egi: “Nguhane gikhesa.”*

10 Gungima ngayile gumbo dia Shemaya mun’a Delaya mujigulu wa Mehetabela. Mu tangua diene wakhalele mutuna gukatuga gu inzo yenji. Wazuelele egi: “Tudivue tangua tuajiya gudimona gu inzo ya Nzambi wa giamatshidia, mukatshi dia tempelo, tukange nji mifulo ya tempelo handaga adi muza ha gugushiya. Adi muza mu phipha ha gugushiya.” 11 Uvi ngamuwambelele egi: “Muthu gifua ame ngajiya gulenga ba? Muthu gifua ame ngajiya gulenga mu tempelo ha gusala nu monyo ba? Mbangushigo muya muene!” 12 Gungima ngakotelesele egi ishigo Nzambi watumile profete muene, uvi Tobia nu Sanabalata amuhanele mbongo ha guza gungusagesa nu mbimbi jienji. 13 Amuhanele mbongo ha guza gunguvuisa woma nu ha gungutuma ha gukalagala gubola hagula abolese lukuma luami, gungima azuele ndaga jiabola mukunda nu ame.

14 Oo Nzambi wami, wunguluga ndaga jiakalegele Tobia nu Sanabalata, wunguluga nji profete wa mukhetu Naodia nu baprofete ako anyi akhalele mutshita yagasue ha gunguvuisa woma.

15 Tuamanesele gutunga gibayi mu lusugu lua 25 lua mbeji ya Elule,* mudimo wagasue watshitshile masugu 52.

16 Tangua mbalagaji jietu jiagasue jiavuile ndaga yene, nu tangua enya mu ifutshi yakhalele hehi nu esue amonele ndaga yene, avuile musonyi wavula, akotelesele egi Nzambi wetu watukuatesele ha gukalagala mudimo wene. 17 Mu masugu ene manene a gu Yuda akhalele mutumila Tobia mikanda yavula, muene nji wakhalele guavutudila. 18 Athu avula gu Yuda adilogele egi mbaakhala gu khanda yenji, handaga wakhalele giwaji gia Shekania mun’a Alaha, mun’enji Yohanana nji wazudile mun’a Meshulame wa mukhetu mu ulo. Meshulame wakhalele mun’a Belekiya. 19 Akhalele mulandula gunguwambela ndaga jiabonga mukunda nu Tobia, akhalele nji muya gumuwambela ndaga ngakhalele muzuela. Gungima Tobia wakhalele gungutumina mikanda ha gunguvuisa woma.

7 Tangua ngamanesele gutunga gibayi gia dimbo, ngambile ijidigo; gungima ngatombele abambi a mifulo nu ngimba nu enya Levi. 2 Ngatombele nji phangi’ami Hanani ha gutuameza Yelusalema hamoshi nu Hananiya fumu wa Inzo Yakoma ya Masuta. Hananiya wakhalele muthu wa gushila mutshima, wakhalele nji muvuila Nzambi wa giamatshidia woma gubalega athu avula. 3 Gungima ngaawambelele egi: “Mifulo ya Yelusalema ishigo naye gukangudiwa uu nu tangua muanya wana zoga wakola mu lusugu. Tangua abambi a mifulo mbaakhala guyibamba adi naye gukanga ijidigo nu ima ya gukangela mifulo. Mbamutomba enya gu Yelusalema ha gukhala mubamba dimbo, ako mbaakhala mu mafundo mbaahana uvi ako gutuama dia jinzo jiawo.” 4 Dimbo diakhalele diakoma diago, uvi athu akhalele azonda mukatshi. Jinzo nji jiakhalele khenji jitungiwa galego.

5 Uvi Nzambi wami wangutumile* ha gubungisa manene nu atuameji nu athu ako ha gusonega majina awo gifua muakhalele senga* ya fami jiawo. Gungima ngamonele mukanda wa senga ya fami jia athu a thomo ajile, mukanda wene wakhalele wagusonega egi:

6 Wawa majina a athu akhalele mu provense anyi akatugile mu uhiga. Fumu Nebukadenezale wa gu Babilona wayile nawo mu uhiga, gungima avutugile gu Yelusalema nu gu Yuda muthu nu muthu mu dimbo dienji. 7 Mala atuamezele athu ene akhalele: Zolobabele nu Yeshua nu Nehemiya nu Azariya nu Lamiya nu Nahamani nu Mordekayi nu Bileshana nu Misepheleta nu Bigevayi nu Nehuma nu Bana.

Mutango wa mala a gu Isalele wene owu: 8 Ana a Palosha a mala akhalele 2 172; 9 ana a Shefatia a mala akhalele 372; 10 ana a Alaha a mala akhalele 652; 11 ana a Phahata-Moaba a mala, mukatshi dia ajigulu a Yeshua nu Yoabe akhalele 2 818; 12 ana a Elama a mala akhalele 1 254; 13 ana a Zatu a mala akhalele 845; 14 ana a Zakayi a mala akhalele 760; 15 ana a Binuyi a mala akhalele 648; 16 ana a Bebayi a mala akhalele 628; 17 ana a Azegade a mala akhalele 2 322; 18 ana a Adonikame a mala akhalele 667; 19 ana a Bigevayi a mala akhalele 2 067; 20 ana a Adine a mala akhalele 655; 21 ana a Atele a mala anyi akhalele ajigulu a Ezekiase akhalele 98; 22 ana a Hashuma a mala akhalele 328; 23 ana a Besayi a mala akhalele 324; 24 ana a Halife a mala akhalele 112; 25 ana a Gibeona a mala akhalele 95; 26 ana a Beteleheme a mala nu Netofa akhalele 188; 27 mala a gu Anatota akhalele 128; 28 mala a gu Bete-Azemavete, akhalele 42; 29 mala a gu Kiriyate-Yalima nu gu Kefila nu gu Belote akhalele 743; 30 mala a gu Rama nu a gu Geba akhalele 621; 31 mala a gu Mikemashi akhalele 122; 32 mala a gu Betele nu a gu Ayi akhalele 123; 33 mala a gu Nebo iko akhalele 52; 34 ana a mala a Elama muko akhalele 1 254; 35 ana a Halima a mala akhalele 320; 36 ana a Yeliko a mala akhalele 345; 37 ana a Loda a mala nu a Hadida nu a Ono akhalele 721; 38 ana a Sena a mala akhalele 3 930.

39 Nganga-nzambi jiakhalele: Ana a Yedaya a mala, mukatshi dia ajigulu a Yeshua akhalele 973; 40 ana a Imele a mala akhalele 1 052; 41 ana a Pashule a mala akhalele 1 247; 42 ana a Halima a mala akhalele 1 017.

43 Enya Levi akhalele: Ana a Yeshua a mala nu a Kademiele, ajigulu a Hodeva, akhalele 74. 44 Ngimba jiakhalele: Ana a Asafe a mala. Mukut’awo agasue akhalele 148. 45 Abambi a mifulo akhalele: Ana a Shaluma a mala nu a Atele nu a Talamona nu a Akuba nu a Hatita nu a Shobai; akhalele 138.

46 Athu akhalele mutshita mudimo gu tempelo* akhalele: Ana a Ziha a mala nu a Hasufa nu a Tabaota, 47 nu ana a Kelosa a mala nu a Siya nu a Phadona, 48 nu ana a Lebana a mala nu a Hagabe nu a Shalemayi, 49 nu ana a Hanana a mala nu a Gidela nu a Gahale, 50 nu ana a Reyaya a mala nu a Lesina nu a Nekoda, 51 nu ana a Gazama a mala nu a Uza nu a Phasea, 52 nu ana a Besayi a mala nu a Meunima nu a Nefishesima, 53 nu ana a Bakebuka a mala nu a Hakufa nu a Halehula, 54 nu ana a Basalita a mala nu a Mehida nu a Halesha, 55 nu ana a Balekosa a mala nu a Sisera nu a Tema, 56 nu ana a Nesia a mala nu a Hatifa.

57 Ana a mala a enya mudimo a Salomo akhalele: Ana a Sotayi nu ana a Sofeleta nu ana a Phelida, 58 nu ana a Yala nu ana a Dalekona nu ana a Gidela, 59 nu ana a Shefatia nu ana a Hatile nu ana a Phokeleta-Hasebayima nu ana a Amona. 60 Athu agasue akhalele mutshita mudimo gu tempelo* nu ana a mala a enya mudimo a Salomo akhalele 392.

61 Athu akatugile gu Tele-Mela nu gu Tele-Halesha nu gu Keluba nu gu Adona nu gu Imele, akhalelego mujiya fami jiawo* nga senga yawo ha gukotelesa gula akhalele enya Isalele nga ndo. Athu ene enyawa: 62 Ana a Delaya a mala nu a Tobia nu a Nekoda, akhalele 642. 63 Ana a nganga-nzambi a mala akhalele: Ana a Habaya nu ana a Hakosa nu ana a Barzilayi, yago wazudile mukhetu mukatshi dia ana a akhetu a Barzilayi muenya gu Gileade. Mukhetu muene wakhalele mutamegewa mu jina dia giwaji gienji gia yala. 64 Athu ene akambele majina awo mu mikanda ya senga ya fami jiawo, uvi a amonelego, hene a atunyishile ha gutshita mudimo wa unganga-nzambi.* 65 Guvernere* waawambelele egi ashigo naye gudia ima yabalega gijila uu nu tangua mbaaheta nganga-nzambi wajiya guhula Nzambi mu njila ya Ulime nu Tumime.*

66 Athu agasue avutugile akhalele 42 360, 67 akhalele nu enya mudimo a mala nu a akhetu 7 337, akhalele nji nu ngimba jia mala nu jia akhetu 245. 68 Akhalele nu tubalu 736 nu phunda 245, 69 nu shamo 435 nu phunda jiko 6 720.

70 Mafumu ako a fami jia mu iphuta ya enya Isalele ahanele misomo mukunda nu mudimo. Guvernere* wahanele badrakime* a wolo 1 000 ha fundo akhalele mubambela umonyi nu malonga 50 nu malopho 530 mukunda nu nganga-nzambi. 71 Mafumu ako a fami jia mu iphuta ya enya Isalele ahanele badrakime 20 000 a wolo ha fundo akhalele mubambela umonyi akhalele mutshitshila mudimo nu bamine* 2 200 a utadi wa siliva. 72 Athu ako nji ahanele badrakime 20 000 a wolo nu bamine 2 000 a utadi wa siliva nu malopho 67 mukunda nu nganga-nzambi.

73 Nganga-nzambi nu enya Levi nu abambi a mifulo nu ayimbi a ngimbo nu athu ako nu athu akhalele mutshita mudimo gu tempelo* ayile mukhala mu membo awo. Ngenyi tangua mbeji ya 7 yatagenele, enya Isalele agasue akhalele mu membo awo.

8 Gungima athu agasue adibungishile gifua muthu mumoshi ha fundo dia athu avula gutuama dia Mufulo wa Meya, awambelele sekretere* Ezela ha gubata mukanda wa mikhuala wa Moize unu Yehowa wahanele enya Isalele. 2 Hene nganga-nzambi Ezela wabatele mukanda wa mikhuala gutuama dia hungu dia enya Isalele, diakhalele nu mala nu akhetu nu athu agasue akhalele nu luholo lua gutegelela nu gukotelesa ndaga. Yakhalele mu lusugu lua thomo lua mbeji ya 7. 3 Sendese mu gimenegena uu nu mu midi watangele mukanda wene mukunda nu mala nu akhetu nu athu agasue akhalele nu luholo lua gukotelesa ndaga ha fundo dia athu avula gutuama dia Mufulo wa Meya; athu akhalele mutegelela muabonga ndaga jiakhalele jia gusonega mu mukanda wa mikhuala. 4 Sekretere Ezela wamaganele ha estrade ya mabaya* alondele mukunda nu ndaga yene. Matitia nu Shema nu Anaya nu Uriya nu Hilikiya nu Maseya amaganele gu koko dienji dia madia, uvi Phedaya nu Mishaele nu Malakiya nu Hashuma nu Hashebadana nu Zakaliya nu Meshulame amaganele gu koko dienji dia mahidi.

5 Ezela wakangudile mukanda ha meso a athu agasue handaga wakhalele holu dia estrade. Tangua diawukangudile muene athu agasue azugile mu molu. 6 Ezela watumbuishile Yehowa Nzambi wa giamatshidia, Nzambi wakoma, hene athu agasue atuphudile mago awo gosa, azuelele egi: “Amen!* Amen! Gungima afugamele, ashiwugile nji phala mu mavu gutuama dia Yehowa. 7 Tangua athu akhalele ya gumagana, Yeshua nu Bani nu Shelebiya nu Yamine nu Akuba nu Shabetayi nu Hodiya nu Maseya nu Kelita nu Azariya nu Yozabada nu Hanana nu Phelaya anyi akhalele enya Levi akhalele mukotelesela athu Mukhuala. 8 Alanduile gutanga mukanda wene mu dijui diakola, akhalele mukotelesela athu muabonga mikhuala ya Nzambi wa giamatshidia. Ngenyi akuatesele athu ha gukotelesa ndaga yakhalele mutangewa.*

9 Gungima guvernere* Nehemiya nu nganga-nzambi Ezela yago wakhalele nji Sekretere nu enya Levi akhalele mulongesa, awambelele athu agasue egi: “Lusugu elu ludi lua gijila mukunda nu Yehowa Nzambi wetu. Mukhadigo nu gikenene, mudidigo nji.” Handaga athu agasue akhalele mudila tangua avuile mbimbi jia Mukhuala. 10 Waawambelele egi: “Ndenu, mudie ima yabonga,* munue nji matombe abonga, mutume nji ndambo ya ima ya gudia gudi athu ashigo nayo. Lusugu elu ludi lua gijila mukunda nu Fumu wetu, muvuigo gikenene handaga gusuanguluga gudi mukatuga gudi Yehowa mbagumihana ngolo.* 11 Enya Levi akhalele muhenesa athu agasue, a awambelele egi: “Henenu tedie! Handaga lusugu elu ludi lua gijila, mukhadigo nu gikenene.” 12 Athu agasue ayile ha gudia nu gunua nu gutumila athu ako ndambo ya ima ya gudia nu ha gusuanguluga muavula, handaga akotelesele ndaga a awambelele.

13 Mu lusugu lua mbadi, mafumu a fami jia mu iphuta ya enya Isalele agasue nu nganga-nzambi nu enya Levi, ayile mukut’awo agasue gudi sekretere Ezela ha gukotelesa muabonga ndaga yakhalele muzuela Mukhuala. 14 Gungima amonele egi mukanda wa mikhuala unu Yehowa wahanele enya Isalele mu njila ya Moize wakhalele muzuela egi adi naye gukhala* mu isasa* mu tangua dia wano mu mbeji ya 7, 15 adi naye nji guya muwambela athu mu membo awo agasue nu gu Yelusalema yagasue egi: “Ndenu gu khanda ya milundu, mubate mayiji a mitshi ya olive nu a mitshi ya pine nu mayiji a mitshi ya milete nu mandala a samba nu mayiji a mitshi iko ha gulonda isasa gifua luholo idi ya gusonega mu mikhuala.”

16 Hene athu ayile muzula mayiji ene ha gulonda isasa, muthu nu muthu walondele gisasa ha yangi* dia inzo yenji. Ayilondele nji mu ibanzala yawo nu mu ibanzala ya inzo ya Nzambi wa giamatshidia nu ha fundo dia athu avula diakhalele gu Mufulo wa Meya nu ha fundo dia athu avula diakhalele gu Mufulo wa Efrayime. 17 Athu agasue anyi akatugile mu uhiga alondele isasa, akhalele nji mukhala muene. Enya Isalele akhalele khenji atshitshile galego wano wa luholo elu sendese mu masugu a Yoshua mun’a Nune uu nu mu lusugu luene, gishina giene akhalele diago nu gusuanguluga guavula. 18 Sendese mu lusugu lua thomo uu nu mu lusugu lua suga akhalele mutanga mukanda wa mikhuala ya Nzambi wa giamatshidia lusugu nu lusugu. Atshitshile wano wene masugu 7, uvi mu lusugu lua 8 akalegele gudibungisa gua ndando gifua luholo mukhuala wakhalele mutoga.

9 Mu lusugu lua 24 lua mbeji ya 7, enya Isalele adibungishile; atunyile gudia nu asudigile sagi, adimbile nji fuphi mu mito. 2 Adi khaphumuine nu athu agasue a mu ifutshi iko, gungima azugile mu molu, azuelele gubola guawo nu gubola gua akhakh’awo. 3 Amaganele mu molu mu mafundo awo, atangele mu dijui diakola mukanda wa mikhuala ya Yehowa Nzambi wawo matangua thathu;* gungima atshitshile matangua ako thathu ha guzuela gubola guawo nu gufugama gutuama dia Yehowa Nzambi wawo.

4 Yeshua nu Bani nu Kademiele nu Shebaniya nu Buni nu Shelebiya nu Bani nu Kenani amagenele holu dia estrade ya enya Levi, adidile mu dijui diakola gudi Yehowa Nzambi wawo. 5 Enya Levi awa, Yeshua nu Kademiele nu Bani nu Hashabeneya nu Shelebiya nu Hodiya nu Shebaniya nu Phetahiya azuelele egi: “Zugenu mu molu mutumbuise Yehowa Nzambi wenu ivo nu ivo. Atumbuise jina diaye dia lutumbu, didi diakoma gubalega ishimbigo yagasue nu lutumbu luajiya guguhana athu.

6 “Phamba aye hakhaye udi Yehowa; aye wafugile dilu nu gosa gua gudinyinyiga nu ima yagasue yana khala guene,* nu mavu nu ima yagasue yana khala hene, nu kianga nu ima yagasue yana khala muene. Wana guyibamba nji yagasue nu monyo, ima yagasue ya mu dilu* yana fugama gutuama diaye. 7 Aye Yehowa udi Nzambi wa giamatshidia munu watombele Abalama nu wamuzolele mu dimbo dia Ure dia enya Kaldea, nu wamuhanele jina egi Abalahama. 8 Wamonele egi muene wakhalele ya gujinginyina gudi aye hene wakotele n’enji gikotelo, ha gumuhana nu vungu* dienji mavu a enya Kanana nu a enya Hete nu a enya Amole nu a enya Phelese nu a enya Yebuse nu a enya Gilegase. Watagenesele nji laji diaye handaga udi muthu wabonga.

9 “Wamonele malamba a akhakh’etu gu Ejipitu, wavuile nji gudila guawo gu Kianga Giabenga. 10 Wamonesele ijiyishilo nu wakalegele ndaga jia gushimana ha guhana Farao ndola nu enya mudimo enji agasue nu athu agasue a mu mavu enji, handaga wajiyile egi asagesele athu aye nu lulendo luagasue. Wakalegele egi jina diaye dijiyiwe uu nu mangino. 11 Wakhaphumuine kianga gutuama diawo hagula azawuge mu mavu a gimigina, uvi athu akhalele gualandula waabishidile ha jinga gifua luholo ana sonona seso mu muta udi nu matshipha-tshipha. 12 Mu muanya wakhalele guatuameza nu kunji dia tuta, uvi mu phipha wakhalele guatuameza nu zenyi dia tshuya ha guakuatesa ha gumona njila adi naye guwenda. 13 Aye wabulumugile gu Mulundu wa Sinayi, watele nawo maga sendese mu dilu, waahanele nji mikhuala ha gusophesa mu luholo luabonga nu mikhuala ya giamatshidia* nu malongo abonga. 14 Waakuatesele ha gujiya Lusugu Luaye lua Guhuluguga lua gijila, waahanele nji mikhuala nu malongo mu njila ya muenya mudimo waye Moize. 15 Tangua akhalele nu nzala, waahanele mapha akatugile mu dilu, tangua akhalele nu luhungu wazolele meya mu seso ha guahana, waawambelele ha gungina nu guzula mavu wadilogele* ha guahana.

16 Uvi akhakh’etu akalegele ndaga nu lulendo luagasue, abuile mito yakola, akhalelego nji mutumagela mikhuala yaye. 17 Atunyile gutegelela, awungulugilego ndaga jia gushimana wakalegele mukatshi diawo, uvi akhalele mito yakola, atombele nji fumu ha guvutuga gu Ejipitu. Uvi aye waabembelego handaga udi Nzambi wa gisemo, wana khala hehi ha gutotesela athu, wana vuila athu khenda, wanago guvua khabu mu phushi, udi wazala pha nu guzumba gua giamatshidia. 18 Tangua alondele gisongo gia utadi gia mun’a ngombe nu akhalele muzuela egi: ‘Nzambi waye waguzolele gu Ejipitu mueny’owu.’ Akalegele nji ndaga jiamonesele diago egi akhalelego gugunemesa, 19 uvi mu khenda jiaye jiavula waabembelego mu mavu a luselenga.* Mu muanya kunji dia tuta dialanduile guatuameza, uvi mu phipha zenyi dia tshuya* diakhalele guakuatesa ha gumona njila akhalele naye guwenda. 20 Waahanele nyuma yaye yabonga ha guahana ndunge, watunyilego guahana mana, waahanele nji meya a gunua tangua akhalele nu luhungu. 21 Waahanele ima ya gudia mu mavu a luselenga ivo 40. Akambelego nga gima. Milele yawo yatawugilego, malu awo nji ajimbilego.

22 “Waahanele ma ufumu nu athu, waakhaphele nawo itshinyi-itshinyi, hene azanguile mavu a Sihona yakotelesa egi mavu a fumu wa gu Heshebona. Azanguile nji mavu a Oga fumu wa gu Bashana. 23 Wabuishile an’awo a mala avula gifua themua jia mu dilu. Gungima wayile nawo mu gifutshi walayele ha guhana akhakh’awo. 24 Hene an’awo ayile guene, azanguile mavu ene, waakuatesele nji ha gubinga enya Kanana akhalele mujinga mu gifutshi giene, wahanele mafumu nu athu a mu gifutshi ha mago awo hagula a atshite ndaga yagasue akhalele mutshigina. 25 Atambudile membo akhalele nu ibayi yakola nu mavu akhalele muzola mbuto jiavula, azanguile nji jinzo jiakhalele jia guzala nu ima yabonga ya maluholo agasue, nu mawina a meya akhalele ahagewe gale,* nu mahia a vinyo nu a olive nu mahia a mitshi ya mabundu a maluholo avula. Adile, akutshile, akhalele nu ima yavula yabonga. Asuangulugile nji nu ima yavula yabonga waahanele.

26 “Uvi atunyile gugutumagela, agulumbugidile, ashiyile mikhuala yaye. Ashiyile baprofete watumile ha guatemesa hagula avutuge gudi aye, akalegele ndaga jiabola jiamonesele egi akhalelego diago gugunemesa. 27 Hene waahanele ha mago a mbalagaji jiawo, mbalagaji jiene jialanduile guamonesa lamba. Uvi tangua akhalele mumona malamba ene, akhalele mudila gudi aye, aye wakhalele guategelela sendese mu dilu. Wakhalele guavuila khenda jiavula hene wakhalele mutuma athu ha guahuluisa ha mago a mbalagaji jiawo.

28 “Uvi tangua akhalele muheta guhuima, akhalele luko mukalagala ndaga jiabola gu meso aye, wakhalele guahana luko ha mago a mbalagaji jiawo, mbalagaji jiene jiakhalele guahinyina.* Gungima akhalele muvutuga gudi aye nu akhalele gugutamega ha guakuatesa, aye wakhalele muvua sendese mu dilu, waahuluishile mbala jiavula mukunda nu khenda jiaye jiavula. 29 Aye wakhalele guatemesa hagula atumagele luko mikhuala yaye, uvi akalegele ndaga nu lulendo luagasue nu atunyile gutumagela mikhuala yaye. Akalegele gubola handaga atunyile gutumagela malongo aye ana kuatesa muthu udi gualandula ha gukhala nu monyo. Akhalele guguta dikunda, nu gulumbuga, atunyile nji gutegelela. 30 Waamonesele guhuiminyina guavula ivo yavula, wakalegele nji nyuma yaye ha gulandula guatemesa mu njila ya baprofete, uvi atunyile gutegelela. Gungima waahanele ha mago a enya ifutshi iko. 31 Mu khenda jiaye jiavula waamaneselego, waabembelego nji, handaga udi Nzambi wa gisemo nu wa khenda.

32 Oo Nzambi wetu, udi Nzambi wakoma nu wa ngolo, Nzambi munu athu adi naye guvuila woma, wana nemesa gikotelo giaye, wana monesa nji guzumba gua giamatshidia, ubuitshigo mutshima mu ndaga jiagasue jiana gutubuila nu mafumu etu, nu manene, nu nganga-nzambi, nu baprofete, nu akhakh’etu nu athu aye agasue sendese mu masugu a mafumu a gu Asiliya uu nu mangino. 33 Wamonesele egi udi muthu wabonga mu ndaga jiagasue jiatubuidile, handaga watshitshile ndaga nu gujinginyina guagasue. Uvi esue tuakalegele ndaga jiabola. 34 Mafumu etu nu manene etu nu nganga-nzambi jietu nu akhakh’etu atunyile gutumagela mikhuala yaye, nu alanduilego malongo wakhalele guahana ha guatemesa. 35 Ikhale tangua akhalele mu ufumu wawo nu akhalele musuanguluga nu ima yavula yabonga waahanele, nu hakhalele ene mu mavu akoma waahanele anyi akhalele muzola mbuto jiavula, agukombelelego nu abembelego gukalagala ndaga jiabola. 36 Henyeha, mangino tuabua ahiga, tudi ahiga mu mavu wahanele akhakh’etu ha gudia mabundu enji nu ima yenji yabonga. 37 Mbuto jiavula jiana zola mavu ene jidi mukunda nu mafumu wahagele ha gutuhinyina mukunda nu gubola guetu. Ana gutuhinyina* nu shitu jietu mu luholo ludi guasuanguluisa, uvi esue tudi mumona malamba avula.

38 “Mukunda nu ndaga eji jiagasue, tudi musonega desizio tuazula ha gutagenesa ndaga tualayi. Manene etu nu enya Levi nu nganga-nzambi jietu adi mumba kashe ha gutshiginyisa ndaga yene.”

10 Athu ambile kashe ha gutshiginyisa ndaga yene enyawa:

9 Mukatshi dia athu guakhalele nji nu enya Levi awa: Yeshua mun’a Azaniya wa yala, nu Binuyi wakhalele mukatshi dia ana a Henadada a mala, nu Kademiele, 10 nu aphangi’awo awa a mala: Shebaniya nu Hodiya nu Kelita nu Phelaya nu Hanana, 11 nu Mika nu Lehoba nu Hashabiya, 12 nu Zakule nu Shelebiya nu Shebaniya, 13 nu Hodiya nu Bani nu Beninu.

14 Mafumu a athu akhalele: Palosha nu Phahata-Moaba nu Elama nu Zatu nu Bani, 15 nu Buni nu Azegade nu Bebayi, 16 nu Adoniya nu Bigevayi nu Adine, 17 nu Atele nu Ezekiase nu Azule, 18 nu Hodiya nu Hashuma nu Besayi, 19 nu Halife nu Anatota nu Nebayi, 20 nu Magaphiasha nu Meshulame nu Hezile, 21 nu Meshezabela nu Zadoke nu Yadua, 22 nu Phelatiya nu Hanana nu Anaya, 23 nu Hoshea nu Hananiya nu Hashuba, 24 nu Halohesha nu Philaha nu Shobeka, 25 nu Lehuma nu Hashabena nu Maseya, 26 nu Ahiya nu Hanana nu Anana, 27 nu Maluka nu Halima nu Bana.

28 Uvi athu ako anyi asalele (nganga-nzambi nu enya Levi nu abambi a mifulo nu ngimba nu athu akhalele mutshita mudimo gu tempelo,* nu athu agasue adikhaphumuine nu enya ifutshi iko ha gutumagela mikhuala ya Nzambi wa giamatshidia, hamoshi nu akaji’awo nu an’awo a mala nu an’awo a akhetu, athu agasue akhalele mukotelesa ndaga adilogele)* 29 adibungishile nu aphangi’awo a mala, nu mala awo a lutumbu, adilogele ha gulandula mikhuala ya Nzambi wa giamatshidia yahanele muene mu njila ya Moize muenya mudimo wa Nzambi wa giamatshidia. Adi naye nji gutumagela muabonga mikhuala yagasue ya Yehowa Fumu wetu, nu badesizio enji nu malongo enji. Gula muthu gayitumagelego udi naye gutewa mukumbu. 30 Mbatushigo muhana an’etu a akhetu gudi enya mu gifutshi giko, mbatushigo nji muzula an’awo a akhetu mukunda nu an’etu a mala.

31 Gula athu a mu gifutshi giko aza nu ima yawo nu mbuto jia maluholo agasue ha gutudigila mu Lusugu lua Guhuluguga, mbatushigo musumba nga gima gimoshi gudi ene mu lusugu luene nga mu lusugu luko lua gijila. Mu givo gia 7 mbatushigo mukatula mbuto, athu agasue adi nu mikudi yetu nji mbatuabembela nayo.

32 Tuambile nji mukhuala egi muthu nu muthu mukatshi dietu udi naye guhana bagrame nguana a utadi wa siliva* givo nu givo mukunda nu mudimo wa mu inzo* ya Nzambi wetu, 33 nu mukunda nu mapha ana hagewa mu thundu,* nu mulambu wa mbuto wana hanewa lusugu nu lusugu, nu mulambu wa guwotshia wana hanewa mu Masugu a Guhuluguga nu mu mbeji jihe-jihe, nu mawano atombewe, nu ima ya gijila, nu milambu mukunda nu gubola hagula gubola gua enya Isalele gutotesewe, nu mukunda nu midimo yagasue ya mu inzo ya Nzambi wetu.

34 Tuatele nji mubela ha gujiya tangua nganga-nzambi nu enya Levi nu athu ako akhalele naye gubata mitshi mu inzo ya Nzambi wetu gifua muakhalele fami jiawo. Akhalele naye guyibata givo nu givo mu matangua atombewe, hagula mitshi yene iwetshiewe ha giwotshielo gia Yehowa Nzambi wetu, gifua luholo yakhalele ya gusonega mu mukanda wa mikhuala. 35 Givo nu givo mbatuhana mbuto jia thomo jia mu mavu etu nu mabundu a thomo a mitshi ya maluholo agasue mukunda nu inzo ya Yehowa, 36 Mbatuhana nji an’etu a mala a somi nu somi jia shitu* jietu, gifua luholo idi ya gusonega mu mukanda wa mikhuala, nu somi jia ngombe nu jia imeme nu jia khombo. Mbatuyibata gu inzo ya Nzambi wetu gudi nganga-nzambi jiana tshita mudimo guene. 37 Tudi naye gubata phupha ya thomo, nu misomo yetu nu mabundu a mitshi ya maluholo agasue, nu matombe ahe-ahe, nu maji gudi nganga-nzambi mu sugu* jia gubambela ima mu inzo ya Nzambi wetu, tudi naye nji gubata giakumi gia mu mavu etu gudi enya Levi, handaga enya Levi ene ana zula giakumi mu membo etu agasue ana khala nu mahia.

38 Tangua enya Levi adi muzula giakumi, nganga-nzambi udi mujigulu wa Alona, udi naye gukhala hene; gungima ene nji adi naye guzula giakumi gia ima yene ha guyibata mu inzo ya Nzambi wetu nu guyimba mu sugu jia inzo ya gubambela ima. 39 Enya Isalele nu enya Levi adi naye gubata misomo ya mbuto nu matombe ahe-ahe nu maji mu sugu* jia gubambela ima. Ikadigilo ya ha fundo dia gijila yana khala mu sugu jiene. Nganga-nzambi jidi mukalagala mudimo nu abambi a mifulo nu ngimba ana guza nji guene. Mbatushigo mubemba inzo ya Nzambi wetu.

11 Manene a athu akhalele mujinga gu Yelusalema. Uvi athu ako anyi asalele, atele mubela ha gutomba muthu mumoshi mukatshi dia athu 10 hagula ajinge gu Yelusalema dimbo dia gijila, uvi athu ako 9 asalele mu membo ako. 2 Athu ako ashimbigile mala agasue anyi atshiginyile nu mutshima umoshi ha guya mujinga gu Yelusalema.

3 Wawa mafumu a mu provense akhalele mujinga gu Yelusalema. (Enya Isalele ako, nu nganga-nzambi nu enya Levi nu athu akhalele mutshita mudimo gu tempelo* nu ana a mala a enya mudimo a Salomo akhalele mujinga mu membo ako a gu Yuda, muthu nu muthu mu gitshinyi gienji gia mavu mu dimbo dienji.

4 Athu ako a mu giphuta gia Yuda nu gia Benjame akhalele nji mujinga gu Yelusalema.) Mukatshi dia enya giphuta gia Yuda guakhalele: Ataya mun’a Oziase, mun’a Zakaliya, mun’a Amaliya, mun’a Shefatia, mun’a Mahalalele yago wakhalele mukatshi dia ana a Phelese, 5 nu Maseya mun’a Baruke, mun’a Kole-Hoze, mun’a Hazaya, mun’a Adaya, mun’a Yoyaliba, mun’a Zakaliya, mun’a Shela. 6 Ana a Phelese agasue a mala anyi akhalele mujinga gu Yelusalema, akhalele mala a ngolo 468.

7 Mukatshi dia athu ako a mu giphuta gia Benjame guakhalele: Salu mun’a Meshulame, mun’a Yoede, mun’a Phedaya, mun’a Kolaya, mun’a Maseya mun’a Itiele, mun’a Yeshaya, 8 gungima dienji guakhalele Gabayi nu Salayi, akhalele 928; 9 Yowele mun’a Zikri wa yala wakhalele mutuameji wawo, uvi Yuda mun’a Hasenua wakhalele muthu wa mbadi gungima dienji mu dimbo.

10 Nganga-nzambi jiakhalele: Yedaya mun’a Yoyaliba wa yala nu Yakine, 11 Selaya mun’a Hilikiya, Hilikiya mun’a Meshulame mun’a Zadoke, Zadoke mun’a Melayota, Melayota mun’a Ahituba muthu wakhalele mutuameji mu inzo* ya Nzambi wa giamatshidia, 12 nu aphangi’awo a mala anyi atshitshile mudimo wa inzo, akhalele 822. Nu Adaya mun’a Yelohama, mun’a Phelaliya, mun’a Amesi, mun’a Zakaliya, mun’a Pashule, mun’a Malakiya, 13 nu aphangi’enji a mala yakotelesa egi mafumu a fami jia iphuta yawo, mukut’awo agasue akhalele 242. Nu Amashasayi mun’a Azalele, mun’a Ahezayi, mun’a Meshilemota, mun’a Imele, 14 nu aphangi’awo a mala anyi akhalele mala a ngolo nu a gikhesa, mukut’awo agasue akhalele 128; nu mutuameji wawo Zabadiele wakhalele mu fami ya athu a lutumbu.

15 Mukatshi dia enya Levi guakhalele: Shemaya mun’a Hashuba, mun’a Azelikame, mun’a Hashabiya, mun’a Buni, 16 nu Shabetayi nu Yozabada, a mukatshi dia mafumu a enya Levi anyi akhalele mutshita mudimo wa hanze ya inzo ya Nzambi wa giamatshidia; 17 nu Matania mun’a Mika mun’a Zabedi mun’a Asafe, mutuameji wa ngimbo munu wakhalele mutuameza ngimbo jia lutumbu mu tangua dia gisambu nu mukuateshi wenji Bakebukiya nu Abeda mun’a Shamua, mun’a Galale, mun’a Yedutuna. 18 Enya Levi agasue a mu dimbo dia gijila akhalele 284.

19 Abambi a mifulo akhalele Akuba nu Talamona nu aphangi’awo a mala, mukut’awo agasue akhalele 172.

20 Enya Isalele ako nu nganga-nzambi nu enya Levi akhalele mujinga mu membo ako agasue a gu Yuda, muthu nu muthu mu gitshinyi gia mavu gia muhanewe.* 21 Athu akhalele mutshita mudimo gu tempelo* akhalele mujinga gu Ofele, Ziha nu Gishepha ene akhalele guatuameza.

22 Mutuameji wa enya Levi gu Yelusalema wakhalele Uzi mun’a Bani, mun’a Hashabiya, mun’a Matania, mun’a Mika wakhalele mukatshi dia ana a Asafe anyi akhalele ngimba; muene wakhalele mutalela mudimo wa mu inzo ya Nzambi wa giamatshidia. 23 Fumu wambile mukhuala mukunda nu ngimba, waawambelele nji ha guahana ima akhalele nayo funu lusugu nu lusugu. 24 Phetahiya mun’a Meshezabela mukatshi dia ana a Zela mun’a Yuda wakhalele muhana fumu malongo* mukunda nu ndaga jiagasue jiatadila athu.

25 Ha gutadila membo awo nu mahia awo, athu ako a gu Yuda akhalele mujinga gu Kiriyate-Arba nu mu membo enji a hehi nu gu Dibona nu mu membo enji a hehi, nu gu Yekabesele nu mu membo enji a hehi, 26 nu gu Yeshua nu gu Molada nu gu Bete-Phelete, 27 nu gu Hasale-Shuala nu gu Belesheba nu mu membo enji a hehi, 28 nu gu Sikelage nu gu Mekona nu mu membo enji a hehi, 29 nu gu Ene-Limona nu gu Sola nu gu Yalemuta, 30 nu gu Zanoa, nu gu Adulama nu mu membo akhalele hehi, nu gu Lakishe nu mu mavu akhalele hehi, nu gu Azeka nu membo enji a hehi. Ayile mukhala* sendese gu Belesheba uu nu gu Baba dia Hinoma.

31 Athu ako a mu giphuta gia Benjame akhalele gu Geba nu gu Mikemashi nu gu Ayiya nu gu Betele nu membo enji a hehi. 32 nu gu Anatota nu gu Nobe nu gu Ananiya, 33 nu gu Hasole nu gu Rama nu gu Gitayime, 34 nu gu Hadida nu gu Seboyime nu gu Nebalata, 35 nu gu Loda nu gu Ono nu mu baba dia mbembo. 36 Mahunji ako a enya Levi a gu Yuda ayile mukhala mu mavu a Benjame.

12 Majina a nganga-nzambi nu enya Levi anyi ayile nu Zolobabele mun’a Shalatiele nu Yeshua ene awa: Selaya nu Yelemiya nu Ezela, 2 nu Amaliya nu Maluka nu Hatusha, 3 nu Shekania nu Lehuma nu Melemota, 4 nu Ido nu Ginetoyi nu Abiya, 5 nu Miyamine nu Maadiya nu Bilega, 6 nu Shemaya nu Yoyaliba nu Yedaya, 7 nu Salu nu Amoka nu Hilikiya nu Yedaya. Athu ene nu aphangi’awo a mala akhalele mafumu a nganga-nzambi mu masugu a Yeshua.

8 Enya Levi akhalele: Yeshua nu Binuyi nu Kademiele nu Shelebiya nu Yuda nu Matania. Matania wakhalele mutuameza ngimbo akhalele muyimba ha guhana Nzambi mersi, hamoshi nu aphangi’enji a mala. 9 Bakebukiya nu phangi’awo wa yala Uni amaganele ha sambua diawo ha gubamba tempelo.* 10 Yeshua wavualele Yoyakime, Yoyakime wavualele Eliyashibe, Eliyashibe wavualele Yoyada. 11 Yoyada wavualele Yonatana, Yonatana wavualele Yadua.

12 Wawa majina a nganga-nzambi jiakhalele mafumu a fami jia mu iphuta ya enya Isalele mu masugu a Yoyakime: Melaya fumu wa fami ya Selaya; Hananiya fumu wa fami ya Yelemiya; 13 Meshulame fumu wa fami ya Ezela, Yohanana fumu wa fami ya Amaliya; 14 Yonatana fumu wa fami ya Maliki; Yozefe fumu wa fami ya Shebaniya; 15 Adina fumu wa fami ya Halima; Helekayi fumu wa fami ya Melayota; 16 Zakaliya fumu wa fami ya Ido, Meshulame fumu wa fami ya Ginetona; 17 Zikri fumu wa fami ya Abiya; . . .* fumu wa fami ya Minyamine; Philetayi fumu wa fami ya Moadia; 18 Shamua fumu wa fami ya Bilega; Yonatana fumu wa fami ya Shemaya; 19 Matenayi fumu wa fami ya Yoyaliba; Uzi fumu wa fami ya Yedaya; 20 Kalayi fumu wa fami ya Salayi; Ebere fumu wa fami ya Amoka; 21 Hashabiya fumu wa fami ya Hilikiya; Netanele fumu wa fami ya Yedaya.

22 Majina a mafumu a fami jia mu giphuta gia enya Levi nu nganga-nzambi asonegewe mu masugu a Eliyashibe nu Yoyada nu Yohanana nu Yadua, yakotelesa egi uu nu mu uhunyinyi wa Daliyuse muenya gu Phelese.

23 Majina a mafumu a fami jia giphuta gia enya Levi asonegewe mu mukanda wa mene uu nu mu masugu a Yohanana mun’a Eliyashibe. 24 Mafumu a enya Levi akhalele Hashabiya nu Shelebiya nu Yeshua mun’a Kademiele, aphangi’awo a mala amaganele ha sambua diawo ha gutumbuisa Nzambi nu gumuhana mersi gifua muakhalele mikhuala yahanele Davidi muthu wa Nzambi wa giamatshidia. Hunji dia abambi diakhalele hehi nu hunji diko dia abambi. 25 Matania nu Bakebukiya nu Obadia nu Meshulame nu Talamona nu Akuba akhalele abambi a mifulo, akhalele mubamba mifulo ya sugu jia gubambela ima jiakhalele hehi nu mifulo ya tempelo. 26 Atshitshile mudimo mu masugu a Yoyakime mun’a Yeshua munu wakhalele mun’a Yesadake nu mu masugu a guvernere Nehemiya nu nganga-nzambi Ezela yago wakhalele nji sekretere.*

27 Hamanesele ene gutunga luko ibayi ya Yelusalema, mu tangua dia gutshita wano mukunda nu ibayi yene, akambele enya Levi mu mafundo agasue akhalele mujinga, ayile nawo gu Yelusalema ha gutshita wano wene nu gusuanguluga, nu ha guyimba ngimbo ha guhana Nzambi mersi nu sembale nu ima ya gushigila miziki yana khala nu shinga nu itare. 28 Ana a mala a athu akhalele muyimba ngimbo* akatugile gu distrike,* nu mu mafundo agasue akhalele hehi nu Yelusalema nu mu membo a enya Netofa, adibungishile. 29 Akatugile nji gu Bete-Gilegale, nu gu khanda ya Geba nu gu Azemavete, handaga ngimba jiatungile membo awo mu mavu agasue akhalele hehi nu Yelusalema. 30 Nganga-nzambi nu enya Levi adiphelegetesele, aphelegetesele nji athu ako nu mifulo nu gibayi.

31 Gungima ngayile nu manene a gu Yuda holu dia gibayi. Ngatombele nji mahunji mbadi akoma a ngimba akhalele muyimba ngimbo ha guhana Nzambi mersi, nu mahunji ako a athu ha gualandula. Hunji dimoshi diakhalele holu dia gibayi, diakhalele muya gu koko dia madia gu khanda ya Mufulo wa Shita. 32 Hoshaya nu ndambo ya manene a gu Yuda akhalele muwenda gungima diawo, 33 hamoshi nu Azariya nu Ezela nu Meshulame, 34 nu Yuda nu Benjame nu Shemaya nu Yelemiya. 35 Akhalele nji nu ana ako a nganga-nzambi a mala anyi akhalele nu phungi, majina a ana ene enyawa: Zakaliya mun’a Yonatana, mun’a Shemaya, mun’a Matania, mun’a Mikaya, mun’a Zakule, mun’a Asafe, 36 nu aphangi’enji awa a mala: Shemaya nu Azalele nu Milalayi nu Gilalayi nu Mayi nu Netanele nu Yuda nu Hanani, nu ima ya gushigila miziki ya Davidi muthu wa Nzambi wa giamatshidia. Sekretere Ezela wakhalele hatuama diawo. 37 Tangua ahetele gu Mufulo wa Gito alanduile guya, akandugile gu gikalo gia Dimbo dia Davidi, abalegele gu gamulundu ga gibayi, gungima abalegele nji gu Inzo ya Davidi nu gu Mufulo wa Meya gu khanda ya mazogelo a kumbi.

38 Hunji diko dia ngimba jiakhalele muyimba ha guhana Nzambi mersi diakhalele muwenda gu khanda iko,* ngaalanduile nu ndambo ya athu ako, tuawendele holu dia gibayi, tuabalegele gu Inzo Yaleha ya Fulu ya Guwetshiela Mapha nu gu gibayi giakoma, 39 tuabalegele nji ha Mufulo wa Efrayime nu ha Mufulo wa Dimbo Dikulu, tuayile ha Mufulo wa Jishui nu gu Inzo Yaleha ya Hananele nu Inzo Yaleha ya Mea, nu ha Mufulo wa Imeme; gungima tuamaganene ha Mufulo wa Abambi.

40 Gu gisugishilo mahunji ene mbadi a ngimba amagenele gutuama dia inzo ya Nzambi wa giamatshidia; Ame nu ndambo ya atuameji ngakhalele nawo tuamagenele nji hene, 41 nu nganga-nzambi eji: Eliyakime nu Maseya nu Minyamine nu Mikaya nu Eliyohenayi nu Zakaliya nu Hananiya anyi akhalele nu phungi, 42 nu Maseya nu Shemaya nu Eleazale nu Uzi nu Yohanana nu Malakiya nu Elama nu Ezele. Ngimba jiakhalele muyimba mu dijui diakola mu utuameji wa Izelehiya.

43 Mu lusugu luene ahanele milambu yavula nu asuangulugile, handaga Nzambi wa giamatshidia waasuanguluishile muavula. Akhetu nu ana asuangulugile nji, hene matululu a gusuanguluga gua athu akhalele gu Yelusalema akhalele muvuiwa uu nu gualeha.

44 Mu lusugu luene atombele mala ha gutalela jinzo jia gubambela misomo nu mbuto jia thomo nu giakumi. Akhalele naye guzula shinda diakhalele mutoga mukhuala mukunda nu nganga-nzambi nu enya Levi mu ima yakhalele mukatuga mu mahia a mu membo. Athu a gu Yuda akhalele nu gusuanguluga handaga nganga-nzambi nu enya Levi akhalele mutshita mudimo wawo. 45 Asendesele gutshita midimo mukunda nu Nzambi wawo, nu midimo ya gudiphelegetesa, gifua luholo ngimba nu abambi a mifulo nji atshitshile midimo yawo mu gudivua nu mikhuala ya Davidi nu ya mun’enji Salomo. 46 Sendese mu masugu a Davidi nu Asafe, guakhalele nu atuameji* mukunda nu ayimbi a ngimbo, nu atuameji a ngimbo jia gutumbuisa Nzambi nu jia gumuhanela mersi. 47 Mu masugu a Zolobabele nu mu masugu a Nehemiya, enya Isalele agasue akhalele muhana shinda gudi ngimba nu gudi abambi a mifulo ha gutadila nzala jiawo jia lusugu nu lusugu. Akhalele nji mubamba shinda mukunda nu enya Levi, enya Levi nji akhalele mubamba shinda mukunda nu ajigulu a Alona.

13 Mu lusugu luene atangele mukanda wa Moize ha meso a athu agasue. Mukanda wene wakhalele wagusonega egi, enya Amona nu enya Moaba ajiyilego gungina mu hungu dia Nzambi wa giamatshidia, 2 handaga ayilego mutagana enya Isalele ha guahana mapha nu meya, afutshile nji Balama ha guata mukumbu. Uvi Nzambi wetu wasombegesele mukumbu wene ha gubua gishimbigo. 3 Tangua avuile mbimbi jia Mukhuala wene, asendesele gudikhaphumuna nu ngenji jiagasue.*

4 Gutuama dia ndaga eyi, nganga-nzambi Eliyashibe wakhalele nu ginemo gia gutalela sugu jia gubambela ima* mu inzo* ya Nzambi wetu. Nganga-nzambi muene wakhalele mu fami ya Tobia. 5 Wamuhanele sugu yakoma ya gubambela ima,* fundo akhalele muhaga thomo milambu ya mbuto nu uhafu ulaphe nu ikadigilo nu giakumi gia mbuto, nu matombe ahe-ahe nu maji. Idi ima akhalele naye guhana enya Levi nu ngimba nu abambi a mifulo. Akhalele nji mubamba misomo ya nganga-nzambi guene.

6 Mu tangua diene diagasue ngakhalelego gu Yelusalema, handaga ngayile gudi Fumu Aletakelesese wa gu Babilona mu givo gia 32 gia uhinyinyi wenji. Gungima dia masugu, ngamutogele njila ha guvutuga. 7 Tangua ngahetele gu Yelusalema, ngamonele ndaga yabola yakalegele Eliyashibe mukunda nu Tobia. Wamuhanele sugu ya gubambela ima mu gibanzala gia inzo ya Nzambi wa giamatshidia. 8 Ngasuangulugilego nga hazonda nu ndaga yene, hene ngabishidile ima yagasue ya Tobia yakhalele mu sugu yene hanze. 9 Gungima ngatumile athu ha guphelegetesa sugu jiene jia gubambela ima; ngavutudile ikadigilo ya mu inzo ya Nzambi wa giamatshidia, nu mulambu wa mbuto nu uhafu ulaphe mukatshi.

10 Ngamonele nji egi akhalelego luko muhana enya Levi shinda diawo, hene enya Levi nu ngimba abembele mudimo akhalele mutshita, muthu nu muthu wayile mu dihia dienji. 11 Gishina giene ngabalele atuameji, ngaawambelele egi: “Mukunda natshi muabembi inzo ya Nzambi wa giamatshidia? Gungima ngabungishile athu abembele gutshita mudimo wawo, ngaavutudile muthu nu muthu ha fundo dienji dia mudimo. 12 Gungima enya Yuda agasue abatele giakumi gia mbuto nu gia matombe ahe-ahe nu gia maji mu sugu jia gubambela ima. 13 Ngahagele nji nganga-nzambi Shelemiya nu sekretere* Zadoke nu Phedaya muenya Levi ha gutalela sugu jia gubambela ima, Hanana mun’a Zakule mujigulu wa Matania wakhalele mukuateshi wawo, akhalele athu a gushila mutshima. Ene akhalele nu ginemo gia gukhaphela aphangi’awo a mala ima.

14 Oo Nzambi wami! Nguwunguluge mukunda nu ndaga eyi, ujimbilago ndaga ngatshitshile nu guzumba gua giamatshidia mukunda nu inzo ya Nzambi wami nu midimo ya mu inzo yene.*

15 Mu masugu ene ngamonele enya Yuda mukama vinyo ha gikameno gia vinyo mu Lusugu lua Guhuluguga. Ako akhalele mubata mbuto holu dia phunda, akhalele nji muza nu matombe nu mabundu a vinyo nu figi nu inemo ya maluholo agasue gu Yelusalema mu Lusugu lua Guhuluguga. Ngaatunyishile ha gudiga ima ya gudia mu lusugu luene.* 16 Gungima enya gu Tile anyi akhalele mujinga mu dimbo dia Yelusalema akhalele mubata jishui nu ima ya gudiga ya maluholo agasue, ha guyidigila athu a gu Yuda nu gu Yelusalema mu Lusugu lua Guhuluguga. 17 Hene ngabalele manene a gu Yuda, ngaawambelele egi: “Mudi mutshita diago ndaga yabola luholo mushigo munemesa Lusugu lua Guhuluguga. 18 Akhakh’enu atshitshile nji ndaga eyi hene Nzambi wetu watubatele malamba awa agasue, wabatele nji dimbo edi malamba. Nzambi mbawuvuila luko Isalele khabu jiakola luholo mushigo munemesa Lusugu lua Guhuluguga.”

19 Gishina giene mu ngueze hasendesele gushiwuga tangua gu Yelusalema gutuama egi Lusugu lua Guhuluguga lusendese, ngambile mukhuala egi adi naye gukanga mifulo ya dimbo. Ngazuelele nji egi ashigo naye gukangula mifulo yene uu nu tangua lusugu luene ludi naye gubalega, ngahagele nji enya mudimo ami ako ha mifulo hagula nga gima* gimoshi ginginyigo mu dimbo mu lusugu luene. 20 Hene enya mungenda nu athu akhalele mudiga ima ya maluholo agasue, abandele mbala imoshi nga jiyadi hanze ya dimbo dia Yelusalema mu phipha. 21 Gungima ngaawambelele egi: “Mukunda natshi mudi mubanda hanze gutuama dia gibayi? Gula muabanda luko guene, mbangudi gumikaya gu ngolo.” Sendese mu lusugu luene ajilego luko mu Lusugu lua Guhuluguga.

22 Ngawambelele enya Levi egi adi naye gulandula gukhala aphelegeta, adi naye nji guza mubamba mifulo hagula lusugu lua guhuluguga lukhale lua gijila. Oo Nzambi wami, nguwunguluge mukunda nu ndaga eyi, nguvuile khenda gifua mudi guzumba guaye gua giamatshidia.

23 Mu masugu ene, ngamonele nji enya Yuda anyi adizudile mu ulo* nu akhetu a enya Asedode, nu a enya Amona nu enya Moaba. 24 An’awo ako* a mala akhalele muzuela zuelelo dia enya Asedode, ako nji akhalele muzuela mazuelelo a gudisha a athu ako, uvi nga mumoshi mukatshi diawo gakhalelego mujiya guzuela zuelelo dia enya Yuda. 25 Hene ngaabalele, ngaatele mukumbu, ngabetele* ako mukatshi diawo, ngaavuzumuine nji sanga, ngaawambelele egi: “Dilogenu mu jina dia Nzambi egi, mbamushigo muhana an’enu a akhetu gudi an’awo a mala, mbamushigo nji muzula an’awo a akhetu mukunda nu an’enu a mala nga mukunda nu enue hakhenu. 26 Fumu Salomo wa gu Isalele gatshitshilego gubola mukunda nu ndaga yene ba? Guakhalelego nga nu fumu mumoshi mu ifutshi yavula gifua muene; Nzambi wenji wakhalele gumuzumba hene wamubuishile fumu gu Isalele yagasue. Uvi nu muene nji, akhetu a mu ifutshi iko a mubuishile mu gubola. 27 Enue muajiya diago gutshita ndaga yabola luholo elu ba? Muatuna gusala ya gujinginyina gudi Nzambi wetu luholo muazula akhetu a mu ifutshi iko mu ulo.

28 Mun’a Yoyada mumoshi wa yala, mujigulu wa nganga-nzambi wakoma Eliyashibe wabuile giwaji gia Sanabalata muenya gu Holone. Hene ngamukayele gutuama diami.

29 Oo Nzambi wami! Waabuitshigo mutshima luholo abolesele* mudimo wa unganga-nzambi, abolesele nji gikotelo wakotele nu nganga-nzambi nu enya Levi.

30 Ngaaphelegetesele mu gubola guagasue gua enya ifutshi iko, ngakhaphele nji midimo gudi nganga-nzambi nu gudi enya Levi, hagula muthu nu muthu atshite mudimo wenji. 31 Ngalondele nji ndaga hagula athu akhale muza nu mitshi mu matangua atombewe, nu mukunda nu mbuto jia thomo.

Oo Nzambi wami! Nguwunguluge ha gungukalegela gubonga.