LUNGIMBO LUA SALOMO
1 Lungimbo luabalega gubonga lua Salomo.
2 “Nguhane beze gu kano diaye,
Handaga luholo luaye lua gumonesa guzumba, ludi luabonga gubalega vinyo.
3 Maji aye adi nu vumba diabonga.
Jina diaye didi gifua maji a vumba diabonga abundudiwa.
Gishina giene mavuala a akhetu ana guguzumba.
4 Iza unguzule;* tulenge phushi.
Handaga fumu wangunginyisa mu sugu jienji.
Tusuanguluge, tukhale nu gusuanguluga hamoshi.
Luholo luaye lua gumonesa guzumba lutusuanguluise* muavula gubalega vinyo.
Gishina giene mavuala a akhetu ana guguzumba.
5 Mavuala a akhetu a gu Yelusalema,
Ngudi ngabuita, uvi ngabonga gifua tenta jia Kedale nu milele ya tenta ya Salomo.
6 Mungutadigo githedi handaga ngudi ngabuita,
Muanya wangubuishile ngenyi.
Aphangi’ami a mala anguvuidile khabu;
Angutumile ha guya mubamba mahia a vinyo.
Uvi dihia diami, ngadibambelego.
7 Ngana guguzumba* muavula,
Nguwambele fundo wana guya mudisa shitu jiaye.
Gui wana guya gujibemba mu midi ha guhuluguga?
Mukunda natshi ngudi naye gukhala mukatshi dia shitu jia mafuta aye
Gifua mukhetu waditshuiga mulele gu phala?”*
8 “Aye mukhetu wabalega gubonga, gula ushigo mujiya,
Nda nu gulandula nganyo jia shitu,
Disa mitumba yaye ya khombo hehi nu tenta jia abambi a imeme.”
9 “Aye mukhetu ngana zumba muavula, udi gifua gabalu gabonga gajitshigiwa gu phusu-phusu jia Farao.
10 Mabutu aye adi agusembega nu tuzeya,*
Shingo yaye idi nu misanga.
11 Mbatugulondela tumalenge tua wolo,
Nu misanga ya utadi wa siliva.”
12 “Hadi fumu hashi gu mesa enji,
Mananashi ami adi muzola vumba diabonga.
13 Yala ngana zumba udi gifua sagi ya mananashi a mire,
Mu phipha wana banda hakatshi na katshi dia mele ami.
14 Yala ngana zumba udi gifua gitungu gia iyaji ya mutshi wa ina,
Mukatshi dia mahia a vinyo a gu Ene-Gedi.”
15 “Mukhetu ngana zumba, udi wabonga.
Wabonga! Meso aye adi gifua meso a yembe.”
16 “Mulumi’ami ngana zumba, udi wabonga, udi wabonga diago.
Mayiji, ene gitanda* gietu.
17 Makunji a inzo yetu* adi a mitshi ya sedre,
Yangi dietu dialondewe nu mitshi ya jenevriye.
2 “Ame ngudi gami giyaji gia safrane mu mavu ashigo nu milundu mu khulo ya kianga.
Ngudi giyaji gia lis gia mu mababa.”
2 “Mukaji’ami ngana zumba,
Udi mukatshi dia ana a akhetu gifua giyaji gia lis mukatshi dia miya.
3 “Mulumi’ami ngana zumba,
Udi mukatshi dia ana a mala gifua mutshi wa pome mukatshi dia mitshi ya mu gishitu.
Ngudi diago nu nzala yakola yagukhala ha vule dienji.
Mabundu enji adi alatulu mukano diami.
4 Wangunginyishile mu inzo ya wano,*
Ngenyi athu agasue amonele egi wana gunguzumba.
5 Nguhanenu bagato alondewa nu mabundu a vinyo hagula nguhete ngolo,
Nguhanenu mabundu a pome hagula nguhete ngolo,
Handaga guzumba guangukatesa.
6 Koko dienji dia mahidi didi goshi’a muto wami,
Uvi koko dienji dia madia didi gungubabata.
7 Enue ana a akhetu a gu Yelusalema,
Ngudi gumitoga ha gudiloga mu jina dia tuseshi nu dia mbambi jia mu foto egi:
Mukambigo guzugisa guzumba guami uu nu tangua guene hakhenji mbaguzuga.
8 Ngudi muvua dijui dia yala ngana zumba!
Talenu! Yowu muza,
Udi mukanduga milundu, udi muya nu gusombologa mu milundu yazonda.
9 Mulumi’ami ngana zumba, udi gifua gaseshi, udi gifua mutumba wa gabaji.
Udi gunu, yagumagana gungima dia gibayi gietu.
Udi mutalela ha fenetre,
Udi mukuelela ha muyingulu wa fenetre.
10 Mulumi’ami ngana zumba, udi muzuela. Udi gunguwambela egi:
‘Mukaji’ami ngana zumba, zuga,
Udi wabonga, iza tuye.
11 Tala! Sungi ya guhuma* yahua.
Sungi ya mvula yabalega.
12 Iyaji yazogi gale mu mitshi,
Tangua dia gusaya mitshi diatagana,
Mayembe adi gale mudila mu dimbo.
13 Mabundu a thomo a mitshi ya figi ahi gale,
Mitshi ya vinyo yazodi gale iyaji, idi muzola vumba.
Mukaji’ami ngana zumba, zuga uze.
Udi wabonga, iza tuye.
14 Aye udi gifua yembe mu mawina a maseso,
Mu mawina adi mu khulo ya mulundu,
Ngumutshigina gugumona nu guvua dijui diaye,
Handaga dijui diaye didi diabonga, aye nji udi wabonga diago.’”
15 “Tukuatelenu mikenge,
An’a mikenge adi mubolesa mahia a vinyo,
Handaga mitshi ya vinyo yetu yahagi gale iyaji.”
16 “Yala ngana zumba udi wami hakhami, gashigo nu mukhetu muko phamba ame.
Udi mudisa shitu jienji mukatshi dia iyaji ya lis.
17 Mulumi’ami ngana zumba, vutuga muphushi
gutuama egi muhehe wa gimenegena ubunde, gutuama egi guma gutshie.
Vutuga muphushi gifua gaseshi, nga mutumba wa gabaji holu dia milundu idi gutukhaphumuna.
3 “Tangua ngakhadi ha gitanda* giami mu phipha,
Ngakambi yala ngana zumba.
Ngamukambi, uvi nu gumumona ndo.
2 Mbanguya nu guwenda mu dimbo,
Mu njila nu mu mafundo a athu avula,
Ha gukamba muthu ngana zumba.
Ngamukambi, uvi nu gumumona ndo.
3 Tangua abambi a dimbo akhadi mujieta dimbo, angumonyi, ngaahudi egi:
‘Muamonyi yala ngana zumba ba?’
4 Tangua tuadibalegesa nawo
Ngamonyi mbala imoshi yala ngana zumba.
Ngamujinginyina, ngatshiginyilego gumubemba luko
Uu nu tangua ngamunginyisa mu inzo ya mama,
Gu sugu ya mama wanguvualele.
5 Enue ana a akhetu a gu Yelusalema,
Ngudi gumitoga ha gudiloga mu jina dia tuseshi nu dia mbambi jia mu temu egi:
Mukambigo guzugisa guzumba guami uu nu tangua guene hakhenji mbaguzuga.”
6 “Itshi idi mukanduga mu temu gifua mishi,
Idi muzola vumba dia mananashi a mire nu dia uhafu,
Nu dia mananashi agasue ana sumbishiwa gudi enya mungenda?”
7 “Idi giphoyi gia Salomo!
Mala a ngolo 60 agijieta,
Atombewe mukatshi dia mala a ngolo a gu Isalele,
8 Mukut’awo agasue adi nu phogo jia khusa,
Adi mujiya gulua ita muabonga,
Muthu wagasue mukatshi diawo udi nu phogo yenji ya khusa ha kete
Ha gulua gula atagana nu mbalagaji mu phipha.”
9 “Idi giphoyi* gia fumu Salomo
Gialondewe nu mitshi ya gu Libane.
10 Makunji a giphoyi giene alondewe nu utadi wa siliva,
Mitshi idi gugikuata yalondewe nu wolo.
Gife gienji gialondewe nu uvuji wa shitu wabenguluga;
Ana a akhetu a gu Yelusalema
Agisembegele mukatshi nu guzumba guagasue.”
11 “Enue ana a akhetu a gu Siona,
Zogenu mutale fumu Salomo
Wasudiga gifulu* gia ulo giamulondele gin’enji
Mu lusugu lua ulo wenji,
Mu lusugu luakhalele muene nu gusuanguluga.”
4 “Mukhetu ngana zumba, udi wabonga,Wabonga! Waditshuiga mulele gu phala,
Uvi meso aye adi gifua meso a yembe.
Sanga diaye didi gifua khombo jiavula
Jidi mubulumuga mu milundu ya Gileade.
2 Mazo aye adi aphepha gifua imeme yavula yakatuga gubatudiwa uvuji
Ayiwevua, idi mukanduga
Yagasue idi nu ana muyadi-muyadi,
Gushigo nga gimoshi giatotesa mun’enji.
3 Ivungu yaye idi gifua shinga yabenga,
Wana zuela muabonga diago.
Waditshuiga mulele gu phala,
Uvi mabutu aye adi muhenya gifua gitshinyi gia bundu dia grenade.
4 Shingo yaye idi gifua inzo yaleha ya Davidi,
Yatungiwe nu seso jia gusha mu ndonga
Tshibu 1 000 jidi muzenzelela gu inzo yene,
Tshibu* jiagasue jia enya ngolo.
5 Mele aye mbadi adi gifua mitumba mbadi ya tubaji,
Gifua mitumba mbadi ya tuseshi,
Idi mudia mukatshi dia iyaji ya lis.”
6 “Gutuama egi funji ya gimenegena ibunde, guma gutshie,
Mbangukanduga gu mulundu wa mananashi a mire
Nu gu gamulundu ga uhafu.”
7 “Muila waye wagasue udi wabonga mukaji’ami,
Gushigo nga fundo dimoshi didi diabola mu muila waye.
8 Tukatuge gu milundu ya Libane, mukhetu ngana zumba,
Tukatuge gu milundu ya Libane.
Bulumuga gu mulundu wa Amana,
Nu gu mulundu wa Senile nu wa Helemona,
Mu mafundo ana khala khoshi, nu gu milundu yana khala isupha.*
9 Mukhetu ngana zumba,Mutshima wami wagasue udi gudi aye,
Tangua wangutala, nu tangua ngamona songi ya musanga udi mu shingo yaye,
Mutshima wangubudiga diago.
10 Mukhetu ngudi mutshigina guzula mu ulo, luholo luaye lua gumonesa guzumba ludi luabonga diago!
Luholo luaye lua gumonesa guzumba ludi luabonga gubalega matombe a vinyo,
Mananashi aye adi nu vumba diabonga gubalega mananashi ako agasue!
11 Mukhetu ngudi mutshigina guzula mu ulo, mbimbi jia mu kano diaye jidi jiafula gifua wigi.
Jidi gifua wigi nu miliki,
Milele yaye idi muzola vumba diabonga gifua vumba dia gu Libane.
12 Mukhetu ngana zumba udi gifua gilanga giambiwa mu luphango,
Giakangewa muabonga, udi gifua gito gia muta gia gukanga muabonga.
13 Udi gifua gilanga* gidi nu mitshi* ya grenade
Idi nu mabundu avula, nu mabundu abonga, nu iyaji ya ina, nu mitshi ya nardo,
14 Nardo, nu iyaji ya safrane, nu mitshi ya vumba diabonga, nu mitshi ya kanele,
Nu mitshi ya maluholo agasue yana zola uhafu, nu mire,
Nu alowese,* nu mitshi yagasue yana zola vumba diabonga.
15 Aye udi gifua gito gia meya mu gilanga, gifua wina dia meya atuluga,
Udi gifua tumita tuazonda-zonda tudi mubulumuga mu milundu ya Libane.
16 Muhehe wa gu nord uze,
Wa gu sud nji uze,
Unyigise* mitshi ya mu gilanga giami
Hagula vumba diabonga dimuangane muagasue.”
“Yala ngana zumba muavula angine mu gilanga gienji,
Adie mabundu abalega gubonga.”
5 “Mukhetu mbanguzula, ngutegelele,
Nganginyi mu gilanga giami,
Ngabedi mayiji a mire nu mayiji ako a vumba diabonga.
Ngadi wigi,*
Nganui nji vinyo nu miliki.”
“An’etu, dienu!
Nuenu genu, luholo luenu lua gudimonesela guzumba lumikuate gifua matombe!”
2 “Ngabandji, uvi mutshima wami wabandele ndo.
Ngavui yala ngana zumba mukokola!”
“Mukhetu mbanguzula mu ulo, nguzuluile, ngana guguzumba muavula,
Udi gifua yembe diami, ushigo nga nu ditona dimoshi
Muto wami watebi gale nu mame,
Sanga diagasue didi diago dia guteba nu mame a mu phipha.”
3 “‘Ngakatula gale lopho diami,
Ngudisudiga luko ba?
Ngawevi gale malu ami,
Luholo lutshi nguabolesa luko?’
4 Yala ngana zumba wakatula koko dienji ha wina dia gijidigo,
Hene muila wagasue wanguwendji diago.
5 Ngazugi ha guzuluila yala ngana zumba gijidigo;
Mananashi a mire akhalele mumbosa ha mago ami,
Maji a mire adi mu mino yami,
Akhalele mumbosa mu mafundo agukangudila gijidigo.
6 Ngakangudila yala ngana zumba gijidigo,
Uvi muene gakhalelego hene, wakhalele wayi gale genji.
Guya guenji guangulebesa diago muila.
Ngamukambi, uvi ngamumonelego.
Ngamutamega, uvi muene gatayelego.
7 Abambi a dimbo angumonyi tangua ngakhadi muwenda mu dimbo.
Angubetshi, angunamenesa.
Abambi a ibayi angutambula mulele* waleha ngaditshuigi.
8 Enue ana a akhetu a gu Yelusalema, ngudi gumitoga ha gudiloga egi,
Gula muamona yala ngana zumba,
Muwambelenu egi guzumba guangukatesa.”
9 “Aye mukhetu wabalega gubonga,
Yala wana zumba wabalega mala ako gu itshi?
Zuela, yala muene wabalega mala ako gu itshi,
Hagula ututoge ha gudiloga?”
10 “Mulumi’ami ngana zumba udi wabonga, udi wabenguluga;
Gajiyilego gujimbidiwa nga udi mukatshi dia mala 10 000.
11 Muto wenji udi wa wolo, wolo wabonga.
Sanga dienji didi gifua mandala a samba* adi gudinyigisa,
Didi diabuita gifua gikuanga.
12 Meso enji adi gifua mayembe gu khulo ya muta,
Gifua mayembe adi muzua miliki,
Adi hehi nu longa diazala pha nu meya.
13 Mabutu enji adi gifua gilanga gidi nu mayiji a vumba diabonga,
Gifua tumihanga tua mayiji a vumba diabonga.
Ivungu yenji idi gifua iyaji ya lis, idi muzola maji a mire.
14 Mago enji adi gifua wolo wa gubungisa nu utadi wa krizolite.
Vumo dienji didi gifua mazo a ngiamba alondewa nu utadi wa safire.
15 Malu enji adi akola nu abonga gifua makunji a marbre amagenesewa muabonga holu dia wolo.
Yala ngana zumba udi wabonga, udi waleha gifua mitshi ya sedre
16 Kano dienji didi diafula,
Ima yagasue mu muila wenji idi yabonga.
Enue an’a akhetu a gu Yelusalema, yala ngana zumba udi ngenyi, udi diago luholo ngamiwambela.”
6 “Aye mukhetu wabalega gubonga,
Yala wana zumba wayi gui?
Yala muene wayi khanda tshi?
Iza tuye tumukambe.”
2 “Yala ngana zumba wabulumuga gu gilanga gienji,
Gu mihanga ya mayiji a vumba diabonga,
Ha gudisa shitu jienji guene
Nu ha guhela iyaji ya lis.
3 Yala ngana zumba udi wami hakhami,
Muene nji gashigo nu mukhetu muko, phamba ame.
Udi mudisa shitu jienji mukatshi dia iyaji ya lis.
4 “Aye mukhetu ngana zumba, wabonga diago gifua dimbo dia Tirza,*
Wabonga nji gifua dimbo dia Yelusalema,
Gula athu agumona, ana gudihula* gifua amona masuta adibungisa hamoshi ha gulua ita.
5 Ungutadigo, handaga guzumba guaye
Guanguzadi gale mu mutshima.
Sanga diaye didi gifua uvuji wa khombo jiavula
Jidi mubulumuga mu milundu ya Gileade.
6 Mazo aye adi aphepha gifua imeme yavula
Yawevewa, idi mukanduga,
Yagasue idi nu ana muyadi-muyadi,
Gushigo nga gimoshi giatotesa mun’enji.
7 Waditshuiga mulele gu phala,
Uvi mabutu aye adi muhenya gifua gitshinyi gia bundu dia grenade.
8 Fumu wajiya gukhala nu akhetu 60
Nu akhetu ako 80
Nu mavuala ako a akhetu avula.
9 Uvi mukhetu ngana zumba, udi gifua yembe, gashigo nga nu ditona dimoshi.
Gin’enji wana gumuzumba diago.
Wana gumuzumba muavula gubalega ana ako.
Gula ana a akhetu amumona, ana gumushimana;
Nu akaji’a fumu agasue, ana gumushimana nji.
10 ‘Yowu mukhetu mutshi udi muhenya* gifua hana zoga tangua mu gimenegena?
Udi wabonga gifua ngonda,*
Udi waphelegeta gifua muanya udi muhenya,
Gula athu amumona, ana gudihula gifua amona masuta agudibungisa hamoshi ha gulua ita.’”
11 “Ngabulumuga mu gilanga gia mitshi yana haga mabundu
Ha gutala tumitshi tuazonda-zonda tudi mukula mu baba,
Nu ha gutala gula mitshi ya vinyo ya saphutshila gale,
Nga gula mitshi ya grenade yazodi gale iyaji.
13 “Vutuga, vutuga mon’a mukhetu wa gu Sulama!
Vutuga, vutuga ngagububila,
Hagula tugutale getu!”
“Mukunda natshi mudi mutala mon’a mukhetu wa gu Sulama?”
“Udi gifua thundu mbadi jia athu adi mukina ulumbu!”*
7 “Aye mon’a mukhetu wa ndando!
Ikanzo yaye idi yabonga diago mukatshi dia saphata jiaye,
Gu mbunda yaye gudi gifua misanga
Yalondewa gu mago a enya ndunge.
2 Mutshimbi waye udi gifua khopho.*
Ukhale tangua diagasue nu vinyo ya gufutula.
Vumo diaye didi gifua gitungu gia mbuto jia ble,
Gia gujietesa nu iyaji ya lis.
3 Mele aye mbadi adi gifua mitumba mbadi ya tubaji,
Gifua mitumba mbadi ya tuseshi.
4 Shingo yaye yabonga gifua inzo yaleha yatungiwa nu mazo a ngiamba.
Meso aye alaphe gifua meya a mita ya Heshebona,
Adi hehi nu mifulo ya Bate-Labime.
Muzulu waye wabonga gifua inzo yaleha ya gu Libane,
Idi mutala gu khanda ya Damase.
5 Muto waye wabonga gifua mulundu wa Kalemele,
Sanga diaye* didi gifua uvuji wa shitu wabenguluga.
Fumu udi musuanguluga luholo didi muzenzela gu kunda diaye.
6 Aye mukhetu ngana zumba, udi wabonga,
Wana gungusuanguluisa diago gubalega ima yagasue yabonga.
7 Udi wabonga gifua samba,
Mele aye adi gifua gisuga* gia mabundu a date.
8 Ngazuedi egi: ‘mbangungina gos’a samba ya date
Hagula ngukuate isuga ya mabundu a date.’
Mele aye akhale gifua isuga ya mabundu a vinyo,
Muhehe udi muzoga mukano diaye ukhale nu vumba diabonga gifua mabundu a pome,
9 Kano diaye dikhale gifua matombe a vinyo afula.”
“Matombe ene abulumuge mage-mage ha muminyo wa yala ngana zumba,
Abulumuge mage-mage gifua mu ivungu ya athu adi gu tulo.
10 Yala ngana zumba udi wami hakhami,
Muene nji wana gunguzumba phamba ame.
11 Yala ngana zumba, iza,
Iza tuye gu ilanga;
Tuye tukhale getu mukatshi dia mitshi ya ina.
12 Tuzoge nu gimenegena ha guya gu ilanga ya vinyo
Ha gutala gula mitshi ya vinyo yazodi gale iyaji,
Gula iyaji yene yasangumuga gale.
Ha gutala nji gula mitshi ya grenade yazodi gale iyaji.
Mbangugumonesela guzumba guami guene.
13 Mitshi ya mandragore idi muzola vumba diabonga;
Gutuama dia inzo yetu, gudi nu mabundu abonga a maluholo agasue.
Gudi nu mabundu ahelewa luenyelu nu mabundu ahelewe gale mualeha.
Yala ngana zumba, ngagubambela mabundu ene.
8 “Nga udi gifua phangi’ami wa yala,
Wanuile mele a mama,
Nga gushigo nu muthu wajiya gungusegulula
Gula ngatagana naye hanze, ngaguhana beze.
2 Nga ngagutuameza uu nu mu inzo ya mama,
Nga ngagunginyisa muene,
Mu inzo ya mama wangulongesele.
Nga ngaguhana matombe agufutula ha gunua,
Nu matombe alondewa nu mabundu a grenade.
3 Nga koko dienji dia mahidi didi goshi’a muto wami,
Uvi koko dienji dia madia didi gungubabata.
4 Enue ana a akhetu a gu Yelusalema, ngudi gumitoga ha gudiloga egi,
Mukambigo guzugisa guzumba guami uu nu tangua guene hakhenji mbaguzuga.”
5 “Mon’a mukhetu mutshi udi mukatuga mu mavu a luselenga,
Wa gudikuata nu mon’a yala wana gumuzumba?”
“Ngaguzugisa gu tulo ha mushin’a mutshi wa pome.
Fundo diavuile gin’aye misongo ya gugubuta,
Fundo dia guvualele gin’aye.
6 Nguhage gifua kashe mu mutshima waye,
Gifua kashe holu dia koko diaye,
Handaga guzumba gudi nu ngolo gifua gufua,
Gusala yagujinginyina phamba gudi muthu mumoshi, gudi nu ngolo jiavula gifua Malumba.*
Tshuya tuenji tudi mulema muavula, tshuya tua Yah.*
7 Nga ene meya avula, ajiyilego gujima tshuya tua guzumba,
Mita yavula nji, yajiyilego nji gujima tshuya tuene.
Gula muthu wahana umonyi wenji wagasue ha gusumba guzumba,
Athu mbaasegulula ima yagasue yahanyi muene.”
8 “Tudi nu galenge getu ga mukhetu,
Uvi gashigo nu mele.
Na itshi mbatutshita mukunda nu galenge getu ga mukhetu
Lusugu mbaaza gumuhula ulo?”
9 “Gula nga udi gibayi,
Nga mbatumutungila ga gibayi gazonda ga utadi wa siliva holu,
Uvi gula udi mufulo,
Nga mbatumukanga nu baya dia sedre.”
10 “Ngudi gifua gibayi,
Mele ami adi gifua jinzo jialeha.
Na gu meso a yala ngana zumba
Ngudi gifua muthu wahetshi guhuima.
11 Salomo udi nu gilanga gia mitshi ya vinyo gu Bale-Hamone.
Wahanele gilanga giene gudi athu hagula agibambe.
Muthu nu muthu mukatshi diawo, wakhalele naye gufuta utadi wa siliva 1 000 mukunda nu mabundu a gilanga giene.
12 Salomo, sala nu utadi waye wa siliva 1 000,
Hana utadi wa siliva 200 gudi athu ana gugubambela gilanga giaye.
Uvi ame, ngudi nu gilanga giami gia vinyo hakhami.”
13 “Aye muthu watunga mu ilanga,
Mafuta aye adi mutshigina gutegelela dijui diaye.
Ame nji ngudi mutshigina guditegelela.”
14 “Aye yala ngana zumba, iza muphushi,
Zula phushi gifua gaseshi
Gifua mutumba wa gaseshi
Holu dia milundu idi nu vumba diabonga.”
Mu Hebelu: “ngunane gudi aye.”
Nga “guta maga.”
Nga “monyo wami wana guguzumba.”
Nga “gifua mukhetu udi nu masaga waditshuiga mulele gu muto.”
Nga ndo, yajiya gukhala egi: “Sanga diaye didi dia gutebuga holu dia mabutu aye.”
Nga “giphona.”
Nga “inzo yakoma.”
Mu Hebelu: “inzo ya matombe a vinyo.”
Nga “sungi ya mvula.”
Nga “giphona.”
Giphoyi gidi gima giana londewa ha gubata muthu udi nu ndando yavula.
Nga “gipho gialondewe nu iyaji.”
Nga “tshibu idi gifua bundu.”
Nga “kholoma.”
Mu Hebelu: “phaladiso.”
Nga ndo, yajiya gukhala egi, “gilema.”
Alowese udi mutshi wakhalele muzola vumba diabonga. Mu tangua dikulu, akhalele guwulondela mananashi.
Nga “unyigise mage-mage.”
Nga “wemba.”
Nga “mulele waguditshuiga gu phala.”
Nga ndo, yajiya gukhala egi, “gifua isuga ya mabundu a date.”
Nga “dimbo diabonga.”
Nga “gushimana.”
Mu Hebelu: “udi mutala hashi.”
Nga “mbeji.”
Nga “athu adi mutshigina gukuatesa athu ako nu mutshima umoshi.”
Nga “gifua ulumbu wa gu Mahanayime.”
Nga “kawu.”
Mu Hebelu: “muto waye.”
Nga “gilende, gikayi, mutshimba.”
Nga “Sheole,” yakotelesa fundo diana fundjiwa athu agasue. Tala Ukoteleshi wa Mbimbi.
“Yah” idi jina dia Yehowa mu giketu.