Fumu wa Masuta Wamonesa Gutshigina Guakola

Gungima dia gukalagala diskur holu dia mulundu, Yesu wayile gu Kaphelenauma. Tangua gahetele guene, akulu a enya Yuda ayile gumumona. Atumiwe gudi fumu mumoshi wakoma wa gifutshi giko: fumu ya masuta a enya Roma.

Fumu muene wakhalele nu muenya mudimo wenji gakhalele muzumba muavula. Gungima, muenya mudimo muene wakatele mangololo, hehi nu gufua. Fumu ya masuta gakhalelego muenya Yuda, uvi wakambele ukuateshi gudi Yesu. Enya Yuda awambelele Yesu egi muenya mudimo muene ‘udi wa gubanda monzo nu misongo ya khonzo, udi nu gukata guakola diago.’ (Matayo 8:6) Akulu a enya Yuda awambelele Yesu egi fumu muene wakhalele diago watagana ha gukuatesewa. Azuelele egi: ‘Wana guzumba gifutshi gietu, muene nji watutungile sinagoga yetu.’—Luka 7:4, 5.

Gungima, Yesu wayile nu akulu ene gumbo dia fumu ya masuta. Tangua ahetele hehi nu inzo, fumu ya masuta watumine mafut’enji ha guwambela Yesu egi: ‘Fumu, udisagesago, handaga ame ngushigo watagana hagula aye ungine monzo yami. Hene, ngatunyi gami guza gudi aye.’ (Luka 7:6, 7) Muthu owu wakhalele nu khadilo dia guhana mikhuala wamonesele diago gudibulumuisa mu mbimbi jienji! Luko, yamonesele egi muthu owu wakhalele wa gudisha nu enya Roma ako akhalele mumonesa ahiga awo lamba.—Matayo 8:9.

Yadiago, fumu wa masuta wakhalele mujiya egi enya Yuda akhalele ndo gudibungisa nu athu akhalelego enya Yuda. (Makalegelo 10:28) Yajiya gukhala egi fumu muene wakhalele mujiya ndaga eyi, hene gatumine mafut’enji ha guwambela Yesu egi: ‘Zuela phamba mbimbi hagula muenya mudimo wami asagewe.’—Luka 7:7.

Havuile Yesu ndaga eyi, washimanele, wazuelele egi: ‘Ngudi gumiwambela egi khenji ngumona gutshigina guakola ngenyi mukatshi dia enya Isalele.’ (Luka 7:9) Tangua mafuta a fumu muene avutugile gu inzo ya fumu, asangele muenya mudimo wakhalele mukata wakodi gale.

Tangua Yesu wasagele muenya mudimo wa fumu wa masuta, wamonesele egi athu ashigo enya Yuda uvi ana gumonesa gutshigina mbaaheta gishimbigo. Wazuelele egi: ‘Athu avula mbaaza gu mazogelo a kumbi nu gu mayilo a kumbi, mbaakhala gu mesa nu Abalahama nu Isaka nu Yakobo mu Ufumu wa mu dilu.’ Uvi, itshi mbayibuila enya Yuda anyi ashigo nu gutshigina? Yesu wazuelele egi: ‘Ene mbaabishidiwa mu phipha hanze. Guene mbaakhala mudila nu gudidia mazo.’—Matayo 8:11, 12.

Nzambi mbagatshiginago athu avalewe mu giphuta gia enya Yuda uvi atunyine luendu lua guhingana nu Klisto mu Ufumu wenji. Uvi muene mbawutshigina athu ashigo enya Yuda ha gukhala gu mesa enji “mu Ufumu wa mu dilu.”