Ndaga ya Gushimana Yakalegewa gu Kianga Giabenga

Tangua Farao wavile egi enya Isalele akatuga gale gu Ejipitu, wasombegesele mbala imoshi matangi’enji. Wawambelele masuta enji egi: ‘Londenu phusu-phusu jiami jiagasue jia ita, tulandule enya Isalele! Tushigo naye guabemba ha guya.’ Muene nu athu enji asendesele gulandula enya Isalele.

Yehowa wakhalele mutuameza athu enji mu muanya mu njila ya kunji dia tuta, uvi mu phipha wakhalele guatuameza mu njila ya zenyi dia tshuya. Waatuamezele uu nu gu Kianga Giabenga, waawambelele ha gusha phundo guene.

Gungima enya Isalele amonele Farao nu masuta enji gualandula. Akhalele ya gukuatagana hakatshi na katshi; gugu kianga giabenga gugu masuta a enya Ejipitu. Asendesele gudidila Moize egi: ‘Tuafua getu! Ngawatubembi getu gu Ejipitu.’ Uvi Moize wazuelele egi: ‘Muvigo woma. Maganenu mutale luholo Yehowa uza gutuhuluisa mangino.’ Moize wakhalele diago mushila Yehowa mutshima.

Yehowa wawambelele enya Isalele ha gukatula phundo yawo. Mu phipha yene Yehowa wakatuile tuta diakhalele gutuama diawo, wadihagele hakatshi diawo nu enya Ejipitu. Gu khanda ya enya Ejipitu guakhalele guabuita. Uvi gu khanda ya enya Isalele guakhalele guaphelegeta.

Yehowa wawambelele Moize ha gusununa koko dienji holu dia kianga. Gungima Yehowa watshitshile egi funji imoshi yakola ibunde phipha yagasue. Kianga giadikhaphuimine mu itshinyi mbadi, njila yakoma yazogele hakatshi na katshi. Bamilio a enya Isalele abalegele mu mavu a gimigina; meya akhalele agumagana khanda nu khanda gifua ibayi.

Masuta a Farao alanduile enya Isalele mu njila yene. Uvi Yehowa waabuishile tunga-tunga. Pine jia phusu-phusu jiawo jiasendesele guhomoga. Masuta akalugile egi: “Tulengenu enya Isalele, handaga Yehowa udi guanginyina.”

Yehowa wawambelele Moize egi: ‘Sununa koko diaye holu dia kianga.’ Meya avutugile gifua luholo akhalele, atshuigile masuta a gu Ejipitu. Farao nu athu enji agasue afile. Gushigo nga nu muthu mumoshi wasalele nu monyo.

Uvi athu avula azawugile gu sambua diko dia muta, asendesele guyimba ngimbo ha gutumbuisa Nzambi. Akhalele muyimba egi: “Mbanguyimbila Yehowa, handaga lukuma luenji luajiyiwa muavula. Wabishidile tubalu nu awendeshi a tubalu tuene mu kianga.” Tangua athu akhalele muyimba, akhetu akhalele mushiga tungoma nu gukina. Athu agasue akhalele nu gusuanguluga guavula luholo azogele mu uhiga.