Yehowa Watomba Yoshua

Moize watuamezele enya Isalele ivo yavula, uvi gungima masugu enji a gufua asuenele hehi. Yehowa wamuwambelele egi: ‘Ishigo aye mbawunginyisa enya Isalele mu Mavu a Gutendelela. Uvi ngudi gugubemba umone gifutshi giene.’ Moize watogele Yehowa ha gutomba fumu muko muhe-muhe ha gutuameza athu. Yehowa wamuwambelele egi: ‘Nda uwambele Yoshua egi muene ngatombi.’

Moize wawambelele enya Isalele egi gualeha ndo umufua genji. Waawambelele nji egi Yehowa watombi Yoshua ha guanginyisa mu Mavu a Gutendelela. Gungima Moize wawambelele Yoshua egi: ‘Uvigo woma. Yehowa mbawugukuatesa.’ Gungima dia ndaga eji, Moize wakandugile holu dia mulundu wa Nebo. Yehowa wamutalesele gifutshi ginyi gialayele muene gudi Abalahama, Izake nu Yakoba. Ngungima Moize wafile; wafile nu ivo 120.

Yehowa wawambelele Yoshua egi: ‘Zawuga Muta wa Yordane, ungine mu gifutshi gia Kanana. Mbangugukuatesa gifua luholo ngakuatesele Moize. Khala mutanga mikhuala yami lusugu nu lusugu. Uvigo woma. Khala nu gikhesa. Nda, utshite ndaga gifua luholo ngaguwambela.’

Yoshua watumine athu mbadi ha guya mutala dimbo dia Yeliko mu gisuegi. Mu longo dialandula mbatumona ndaga jiavula jiatadila athu ene. Tangua avutugile, azuelele egi yakhalele tangua diabonga dia guya muluisa enya Kanana. Mu lusugu lualanduile, Yoshua wawambelele athu ha gukatuga mu phundo. Wahagele nganga-nzambi jiakhalele mubata mushete wa gikotelo gutuama ha guya gu Muta wa Yordane. Muta wene wakhalele wa guzala. Uvi tangua nganga-nzambi jianginyishile ikanzo yawo mu muta, meya asendesele gushuwuga, amiginyile! Nganga-nzambi jianginyile ha katshi na katshi dia muta, amaganele uu nu tangua athu agasue azawugile ha sambua diko. Idi yadiago egi ndaga yiyi ya gushimana yawunguluishile enya Isalele ndaga yakalegele Yehowa gu Kianga Giabenga.

Enya Isalele anginyile giwa mu Mavu a Gutendelela gungima dia gutshita ivo yavula mu Mavu a Luselenga. Atungile jinzo nu membo. Adimile mahia, akunyile mitshi ya vinyo nu mitshi iko ya mabundu. Gifutshi giene giakhalele gia guzala nu miliki nu wigi.