Ibayi ya Yelusalema

Tuvutuge luko gungima dia ivo yazonda. Muenya Isalele mumoshi jina dienji Nehemiya, wakhalele mujinga gu Phelese mu dimbo dia Suse; wakhalele muenya mudimo wa Fumu Aletakelesese. Phangi’a Nehemiya mumoshi wakatugile gu Yuda, wawambelele Nehemiya ndaga imoshi yamusagesele; wazuelele egi: ‘Athu avutugile gu Yelusalema, ashigo mu ubambi. Ibayi ya dimbo nu mifulo ya dimbo inyi enya Babilona abolesele, khenji itungiwa gale ndo.’ Nehemiya wavile khabu. Watshiginyile guya mbala imoshi gu Yelusalemba ha guakuatesa. Wakombelele Yehowa hagula fumu amuhane njila ya guya.

Gungima fumu wakotelesele egi Nehemiya wakhalele nu gikenene. Wamuhudile egi: ‘Khenji ngagumonele galego khenda-khenda ngegi. Mulonga tshi?’ Nehemiya wazuelele egi: ‘Luholo lutshi ngajiya gukhala nu gusuanguluga tangua dimbo dia Yelusalema didi makhulu?’ Fumu wamuhudile egi: ‘Itshi udi mutshigina egi ngugukalegele?’ Nehemiya watshitshile mbala imoshi gisambu moshi’a mutshima. Gungima wazuelele egi: ‘Ngabuba, guhane njila ya guya gu Yelusalema ha gutunga luko ibayi ya dimbo.’ Fumu Aletakelesese wamuwambelele egi wajiya guya. Fumu watshitshile nji yagasue hagula Nehemiya ahete muabonga gu Yelusalema. Wamubuishile guvernere wa gu Yuda. Wamuhanele nji mabaya ha gulonda mifulo ya dimbo.

Tangua Nehemiya wahetele gu Yelusalema, watalele muabonga ibayi ya dimbo. Gungima wabungishile nganga-nzambi nu mafumu, waawambelele egi: ‘Idi ndaga ya lamba diago. Tudi naye gutshita mudimo.’ Athu atshiginyile, asendesele gutunga luko ibayi ya dimbo.

Uvi mbalagaji jia enya Isalele jiakhalele gualela, jiazuelele egi: ‘Gula mukenge wadikuma gu gibayi mudi mutunga gidi mubua.’ Uvi athu alanduilego ndaga mbalagaji jiakhalele muzuela, alanduile gutshita mudimo. Ibayi yalehele nu yakhalele yakola.

Mbalagaji jiadivile ha guza khanda nu khanda ha gualuisa mu gisagumuisa. Tangua enya Yuda avile ndaga yene, avile woma. Uvi Nehemiya wazuelele egi: ‘Muvigo woma. Yehowa udi nu esue.’ Wahagele athu ha gubamba athu akhalele mutshita mudimo, mbalagaji jiamonelego luholo lua gualuisa.

Gungima dia masugu 52, amanesele gutunga ibayi nu mifulo ya dimbo. Nehemiya wajile nu enya Levi agasue gu Yelusalema ha gukalagala wano. Wakhaphele ayimbi a gimbo mu mahunji mbadi. Anginyile mukatshi dia dimbo ha Mufulo wakhalele nu eskaliye, gungima ayile nu gujieta mu dimbo, wawa khanda iko, wawa khanda iko. Akhalele muya nu gushiga phungi, sembale nu itare; akhalele nji muyimba ngimbo ha gutumbuisa Yehowa. Ezela wakhalele mutuameza hunji dimoshi, Nehemiya nji wakhalele mutuameza hunji diko; ayile mutagana gu tempelo. Athu agasue, mala nu akhetu nu ana, akalegele wano nu ahanele Yehowa mulambu. Matululu a majui awo a gusuanguluga akhalele muya gualeha.