Elizabete Wavuala Mona

Ivo 400 yabalegele sendesa tangua atungile luko ibayi ya Yelusalema. Nganga-nzambi mumoshi, jina dienji Zakaliya nu mukaji’enji Elizabete akhalele mujinga hehi nu dimbo dia Yelusalema. Akhalele abalegesa gale ivo yavula mu ulo wawo, uvi akhalelego nu ana. Lusugu lumoshi tangua Zakaliya wakhalele muwetshia uhafu mu giwetshielo gia mu tempelo, muenjelo Gabriyele wamonegele gudi muene. Zakaliya wavile woma, uvi Gabriyele wamuwambelele egi: ‘Uvigo woma. Ngagubatela lukuma luabonga luakatuga gudi Yehowa. Mukaji’aye Elizabete mbawuguvalela mona yala, mbawumuhana jina egi Yone. Yehowa watombi Yone ha gutshita mudimo wa ndando yavula.’ Zakaliya wamuhudile egi: ‘Luholo lutshi ngajiya gutshigina egi ndaga eyi idi ya giamatshidia? Ame nu mukaji’ami tudi athu a gukola, tuajiyilego guvuala mona.’ Gabriyele wazuelele egi: ‘Nzambi wangutumi ha guguwambela lukuma elu luabonga. Uvi luholo aye watuna mbimbi jiami, mbawubua gatabu, mbawushigo muzuela luko uu nu lusugu mona mbawuvualewa.’

Zakaliya washiphile muavula mu tempelo. Tangua diazogele muene hanze, athu akhalele mutshigina gujiya ndaga yamubuila. Uvi Zakaliya gakhalelego nu luholo lua guzuela. Wakhalele guafezegesela nu mago. Gungima athu akotelesele egi Nzambi wawambela Zakaliya ndaga imoshi mu tempelo.

Gungima Elizabete wamitshile vumo nu wavualele mona wa yala gifua luholo muanjelo wazuelele. Mafut’enji nu enya fami yenji ajile mutala mona. Akhalele nu gusuanguluga guavula. Elizabete wazuelele egi: ‘Jina dienji Yone.’ Uvi ene azuelele egi: ‘Gushigo nga muthu mumoshi mu fami yenu udi nu jina dia Yone. Tumuhanenu jina dia sh’enji Zakaliya.’ Zakaliya wasonegele gu baya egi: ‘Jina dienji Yone.’ Mu tangua diene, Zakaliya wasendesele guzuela! Lumene lua mona wavualewe luamuanganele gu Yudea yagasue, athu akhalele gudihula egi: ‘Mona muene mbawukhala muthu wa luholo lutshi?’

Gungima Zakaliya wahetele nyuma ya Nzambi. Wazuelele profesi egi: ‘Yehowa atumbuishiwe. Walayele Abalahama egi mbawututumila muhuluishi, Masiya ha gutuhuluisa. Yone mbawukhala profete, mbawulondega njila mukunda nu Masiya.’

Gungima ndaga imoshi yabonga diago yakalegewe gudi Madiya phangi’a Elizabete. Tutadile lumene luene mu mukhapho walandula.