Anjelo Azuelela Guvualewa gua Yesu

Sezale Oguste fumu wa gu Roma wambile mukhuala egi, enya Yuda agasue adi naye guya musonegesa majina mu membo awo. Hene Yozefe nu Madiya ayile gu Beteleheme, dimbo dia Yozefe. Mu tangua diene, Madiya wakhalele munengenena masugu enji a guvuala.

Tangua ahetele gu Beteleheme, ahetelego fundo diabonga dia gukhala, hene ayile mukhala mu inzo ya imeme. Guene Madiya wavualele mun’eji Yesu. Wamulangele milele, wamubandesele ha gidilo gia shitu.

Guakhalele nu abambi a imeme hehi nu Beteleheme, akhalele mumbamba imeme yawo hanze mu phipha. Sagumugu, muanjelo wazogele gutuama diawo, lutumbu lua Yehowa luahenyele fundo diakhalele ene. Abambi a imeme avile woma, uvi muanjelo waawambelele egi: ‘Muvigo woma. Ngudi nu lukuma luabonga lua gumiwambela. Mangino, Masiya wavualewa gu Beteleheme.’ Mu tangua diene anjelo avula amonegele mu dilu, akhalele muzuela egi: ‘Gutumbuga gukhale gudi Nzambi mu dilu, guhuima gukhale ha mavu.’ Gungima anjelo ene atotele. Itshi abambi a imeme ene akalegele?

Abambi a imeme azuelele egi: ‘Tuyenu gu Beteleheme luenyelu.’ Ayile mbala imoshi guene, asangele Yozefe nu Madiya mu inzo ya imeme nu mun’awo.

Athu agasue avile ndaga muanjelo wawambelele abambi a imeme, adihudile muavula. Madiya wakhalele mutangigiza muavula ndaga jiazuelele muanjelo, gajibuitshilego mutshima nga hazonda. Abambi a imeme avutugile mu temu fundo diakhalele imeme yawo, ahanele Yehowa mersi mukunda nu ndaga jiagasue amonele nu jinyi avile.